Famili Lotu—Yu Inap Mekim na Famili i Kisim Bikpela Amamas?
Wanpela papa long Brasil i tok: “Taim mipela i mekim Famili Lotu, mipela i save toktok i go i go, na sapos mi no stopim famili, mipela bai stadi yet i go inap long biknait.” Wanpela papa long Japan i tok, pikinini man bilong em i gat 10-pela krismas, na em i no save tingim taim long klok—em i laik bai ol i stadi yet. Bilong wanem? Papa i tok: “Bel bilong em i kirapim em, na dispela i save mekim em i amamas.”
Em tru olsem i no olgeta pikinini i save pilim olsem, na ating sampela pikinini i no save kisim amamas long famili lotu. Bilong wanem i olsem? Wanpela papa long Togo i tok: “Yumi no ken les long lotuim Jehova.” Sapos yumi pilim les, ating yumi no mekim gut famili lotu, a? Buk Aisaia i stori olsem ol manmeri i bin “amamas moa yet” long de Sabat, na olsem tasol, planti famili i “amamas moa yet” long famili lotu.—Ais. 58:13, 14.
Ol papa Kristen i luksave olsem sapos tingting na bel bilong famili i stap isi, dispela bai helpim ol long kisim amamas long famili lotu. Ralf i gat 3-pela pikinini meri na 1-pela pikinini man. Em i tok, long famili lotu olgeta i save toktok gut wantaim. Tasol, sampela taim i hatwok long mekim na bai olgeta long famili i amamas na putim tingting olgeta i go long samting ol i stadi long en. Wanpela mama i tok: “Sampela taim mi no gat strong long mekim ol samting na bai famili i kisim amamas long famili lotu olsem mi laik bai kamap.” Olsem wanem? Yu inap winim dispela hevi?
TRAIM KAIN KAIN STAIL
Wanpela papa long Jemani i gat 2-pela pikinini, na em i tok: “Yumi mas traim kain kain stail.” Natalie em mama i gat 2-pela pikinini, na em i tok: “Bikpela samting tru long famili bilong mipela em olsem, olgeta taim mipela i mas traim kain kain stail long mekim famili lotu.” Planti famili i save tilim gut haptaim bilong famili lotu na bai ol i no mekim 1-pela samting tasol. Cleiton em wanpela papa long Brasil na em i gat 2-pela tineja pikinini. Em i tok: “Dispela pasin i save kirapim tingting bilong famili na olgeta i save kamapim sampela tok.” Taim papamama i tilim haptaim ol i yusim bilong mekim famili lotu, ol inap
tingim krismas na skel bilong olgeta wan wan pikinini na helpim ol gut. Papamama inap helpim olgeta wan wan insait long famili, na senisim ol samting ol bai stadi long en, na pasin ol bai bihainim long mekim stadi.Sampela famili i mekim wanem na bai famili lotu i no wankain long olgeta taim? Sampela i save singim ol song long Jehova bilong kirapim famili lotu. Juan em wanpela papa long Meksiko na em i tok: “Dispela i save mekim gut bel na redim tingting bilong mipela long ol samting mipela bai stadi long en.” Famili bilong Juan i save makim ol song we i stret long samting ol bai skelim long Famili Lotu bilong dispela de.
Sri Lanka
Planti famili i save bung wantaim na ritim wanpela hap bilong Baibel. Olgeta wan wan long famili i save ritim ol tok bilong narapela narapela man em Baibel i stori long en. Wanpela papa long Japan i tok: “Mipela i no lain long dispela kain pasin bilong rit, olsem na pastaim i hatwok liklik.” Tasol 2-pela pikinini man bilong em i amamas olsem papamama i rit wantaim ol. Sampela famili i save mekim drama long ol stori bilong Baibel. Roger, em papa long Saut Afrika na em i gat 2-pela pikinini man, em i tok ol pikinini inap “luksave long sampela samting long ol stori bilong Baibel em mipela ol papamama i no luksave long en.”
South Africa
Narapela pasin bilong mekim famili lotu em long wok wantaim long wanpela projek, olsem wokim liklik sip olsem sip bilong Noa o liklik tempel olsem tempel bilong Solomon. Bilong wokim ol kain samting olsem, ol i mas mekim wok painimaut na ol inap kisim amamas long en. Olsem: Long haus bilong wanpela famili long Esia, wanpela pikinini meri i gat 5-pela krismas i stap wantaim papamama na bubu meri. Ol i wokim bod gem i makim ol raun bilong aposel Pol taim em i mekim wok misineri. Sampela famili i mekim bod gem long ol stori i stap long Buk Kisim Bek. Donald i gat 19 krismas na em i bilong Togo, na em i tok: “Taim famili bilong mipela i traim kain kain stail bilong mekim famili lotu, dispela i givim amamas long famili na famili lotu i kamap gutpela moa.” Yu inap tingim wanpela projek we inap mekim na yu kisim bikpela amamas moa long famili lotu?
United States of America
REDI GUT
Em tru olsem yumi kisim amamas long traim kain kain stail bilong mekim famili lotu, tasol sapos yumi laik kisim gut skul, orait olgeta i mas redi gut. Sampela taim ol liklik pikinini i save pilim taiet, olsem na ol papa i mas skelim gut samting ol bai stadi long en na redi gut. Wanpela papa i tok: “Taim mi redi gut, famili olgeta i save pilim tru samting mipela i stadi long en.” Paslain yet, wanpela papa long Jemani i save tokim famili long samting ol bai stadi long en long ol wik bihain. Wanpela papa long Benin i gat 6-pela pikinini em ol i no winim yet 13 krismas. Sapos em i makim olsem famili bai lukim DVD i gat stori bilong Baibel long en long taim bilong famili lotu, orait paslain yet em i save givim ol askim long ol. Tru tumas, sapos yumi redi gut, famili lotu bai kamap gutpela moa na dispela bai helpim gut famili.
Sapos paslain yet famili i save pinis long samting ol bai skelim long famili lotu, ol inap toktok long en namel long wik, na dispela bai kirapim tingting na laik bilong ol. Sapos olgeta wan wan i gat asainmen long famili lotu, ol bai pilim olsem dispela em famili lotu bilong ol yet.
MEKIM LONG OLGETA WIK
Planti famili i hatwok long mekim famili lotu long olgeta wik.
Planti papa i save wok mani inap planti aua long olgeta de bilong lukautim famili. Wanpela papa long Meksiko i save lusim haus long 6 klok moningtaim na em i save kam bek long 8 klok long nait. Sampela taim, papa bilong famili i ken senisim taim bilong mekim Famili Lotu sapos kongrigesen i gat spesel miting long dispela wik.
Tasol yumi mas wok strong long mekim famili lotu long olgeta wik. Loïs i gat 11 krismas na em i bilong Togo, na em i tok: “Maski sampela samting i kamap na mipela i leit long kirapim famili lotu, mipela i save mekim yet famili lotu long olgeta wik.” Long dispela as, sampela famili i save mekim famili lotu long kirap bilong wik. Sapos wanpela samting i kamap, ol inap makim narapela de long dispela wik long mekim famili lotu.
Dispela nem, “famili lotu,” i makim olsem famili lotu em hap wok yu mekim bilong lotuim Jehova. Olgeta long famili bilong yu i ken yusim maus bilong ol long givim “ofa” long Jehova long olgeta wik. (Hos. 14:2) Olgeta wan wan insait long famili i ken kisim amamas long taim bilong famili lotu, long wanem, sapos yupela i “amamas long Bikpela,” dispela bai strongim yupela.—Neh. 8:9, 10.