1. Jehova i givim wanem ol samting bilong helpim yumi long i stap amamas?

 JEHOVA i laik bai yumi stap amamas, olsem na em i givim yumi planti blesing. Wanpela blesing em olsem, yumi gat laip. Olsem na yumi inap yusim laip bilong yumi long litimapim nem bilong God, long wanem, em i kirapim yumi long kam bihainim lotu i tru. (Sng. 144:15; Jon 6:44) Jehova i helpim yumi long luksave olsem em i laikim tru yumi, na em i helpim yumi long stap gut yet long mekim wok bilong em. (Jer. 31:3; 2 Kor. 4:16) Yumi amamas long kisim planti gutpela tok bilong strongim bilip bilong yumi, na tu, yumi amamas long stap insait long bikpela lain brata i gat pasin laikim. Na moa yet, yumi bilip na wet long kisim gutpela samting tru long bihain.

2. Sampela gutpela wokman bilong God i save holim wanem kain tingting?

² Maski yumi gat ol samting bilong mekim yumi amamas, sampela gutpela wokman bilong God i holim tingting kranki long ol yet. Ol i pilim olsem Jehova i no laikim ol, na em i no laikim tu wok ol i mekim. Ol man husat i holim tingting kranki long olgeta taim, ol i pilim olsem yumi ol man i no inap stap “amamas long olgeta yia.” I luk olsem laip bilong yumi i pulap tasol long ol hevi.—Sav. 11:8.

3. Wanem ol samting inap kirapim sampela bratasista long kisim tingting kranki?

³ Ating ol dispela bratasista i kisim tingting kranki, long wanem, ol i bel hevi, ol i sik, o ol i karim hevi we i save painim man taim em i kamap lapun. (Sng. 42:9; 71:9; Snd. 13:12) Na tu, olgeta Kristen i mas save olsem bel i save giamanim man na em inap mekim na yumi pilim  nogut maski God i amamas long yumi. (Jer. 17:9; 1 Jon 3:20) Satan i save giaman na sutim tok long ol wokman bilong God. Elifas i no gat bilip, na em i tok yumi samting nating long ai bilong God. Olsem na ol manmeri husat i holim tingting bilong Satan, ol inap kirapim yumi long kisim dispela tingting em Elifas i bin kamapim. Dispela em wanpela tok giaman long taim bilong Jop, na dispela tok giaman i stap tu long nau.—Jop 4:18, 19.

4. Yumi bai skelim wanem samting long dispela stadi?

⁴ Jehova i kamapim klia long Baibel olsem em bai sambai long ol manmeri husat i “wokabaut long ples nogut na bikpela tudak.” (Sng. 23:4) Wanpela rot bilong em long sambai long yumi, em long rot bilong Baibel. Baibel “i gat bikpela strong inap long daunim ol samting i gat strong,” olsem ol tok giaman na ol tingting kranki. (2 Kor. 10:4, 5) Orait nau yumi ken skelim olsem wanem yumi inap yusim Baibel long helpim yumi long kisim na holim yet stretpela tingting. Dispela inap helpim yu, na tu, yu inap painim rot bilong strongim ol narapela.

5. Yumi ken mekim wanem bilong helpim yumi long kisim stretpela tingting?

⁵ Aposel Pol i stori long sampela samting we inap helpim yumi long kisim stretpela tingting. Em i tokim kongrigesen long Korin olsem: “Oltaim yupela i mas skelim yupela yet na bai yupela i ken save olsem yupela i holimpas bilip o nogat.” (2 Kor. 13:5) “Bilip” i makim olgeta bilip Kristen em Baibel i as bilong en. Sapos toktok na pasin bilong yumi i stret wantaim ol dispela bilip, orait dispela i soim olsem yumi “holimpas bilip.” Na tu, yumi mas tingim laip bilong yumi yet na skelim wantaim olgeta bilip Kristen na lo na stiatok em Baibel i as bilong en. Yumi no ken bihainim sampela tasol na sampela nogat.—Jems 2:10, 11.

6. Bilong wanem yumi mas skelim yumi yet bilong save olsem yumi “holimpas bilip o nogat”? (Lukim piksa long kirap bilong stadi.)

⁶ Ating yu bai surik long skelim yu yet sapos yu gat 2-pela tingting. Tasol tingting bilong Jehova i bikpela samting moa na i antap tru winim tingting bilong yumi ol man. (Ais. 55:8, 9) Em i save skelim ol man i lotuim em, tasol em i no mekim olsem bilong kotim ol, nogat, em i laik luksave long ol gutpela pasin bilong ol na helpim ol. Taim yu yusim Baibel long skelim yu yet bilong save olsem yu “holimpas bilip o nogat,” yu bai luksave long sampela gutpela pasin bilong yu em God tu i luksave long en. Dispela bai helpim yu long senisim tingting kranki olsem yu samting nating long ai bilong God, na yu bai kisim stretpela tingting em Baibel i as bilong en, olsem: Yu dia tumas long ai bilong Jehova. I kain olsem wanpela rum i stap tudak na yu pulim ol keten i go long sait na larim lait bilong san i kam insait long rum.

7. Olsem wanem gutpela stori bilong ol bilipman long Baibel inap helpim yumi?

⁷ Wanpela gutpela rot bilong skelim yumi yet em olsem, yumi ken tingim tingim gutpela eksampel bilong ol bilipman na bilipmeri em Baibel i stori long ol. Skelim ol hevi i bin painim ol na ol i bin pilim olsem wanem, na tingim olsem yu bai mekim wanem sapos dispela hevi i bin painim yu. Orait nau yumi ken skelim stori bilong 2-pela bilipman na 1-pela bilipmeri. Stori bilong ol bai helpim yu long kisim save long olsem wanem yu inap yusim Baibel long skelim sapos yu “holimpas bilip o nogat,” na yu inap kisim stretpela tingting long yu yet.

8, 9. (a) Wanem ol samting i bin painim wido meri i stap rabis? (b) Ating wido meri i bin pilim olsem wanem?

⁸ Jisas i stap long tempel long Jerusalem na em i lukim wanpela wido meri i stap rabis. Gutpela eksampel bilong dispela wido inap helpim yumi long holim stretpela tingting maski yumi sot long sampela samting. (Ritim Luk 21:1-4.) Skelim sindaun bilong dispela wido. Em i stap bel hevi, long wanem, man bilong em i dai pinis, na tu, ol hetman bilong lotu “i save stilim ol samting bilong ol wido meri” na ol i no save helpim ol wido. (Luk 20:47) Em i stap rabis tru, olsem na kontribiusen  em inap givim em skel bilong pe em wanpela wokboi inap kisim insait long sampela minit.

⁹ Traim tingim: Taim wido meri i holim 2-pela liklik koin na go insait long banis bilong tempel, ating em i bin pilim olsem wanem? Ating em i tingting olsem taim man bilong em i stap laip, em i save givim bikpela kontribiusen, tasol nau em bai givim kontribiusen i liklik tru. Yu ting em bai sem taim em i lukim ol arapela i go paslain long em na putim bikpela kontribiusen? Yu ting em bai pilim olsem kontribiusen bilong em i samting nating? Maski sapos em i bin pilim olsem, em i mekim yet samting em inap mekim bilong helpim lotu i tru.

10. Olsem wanem Jisas i soim olsem wido meri i dia tumas long ai bilong God?

¹⁰ Jisas i kamapim klia olsem Jehova i tingim dispela wido na kontribiusen bilong em olsem ol samting i dia tumas. Jisas i tok, “mani em [wido meri] i putim i winim mani olgeta arapela [maniman] i bin putim.” Kontribiusen bilong dispela wido bai miks wantaim kontribiusen em ol narapela i bin putim, tasol Jisas i givim biknem long dispela wido. Bihain, ol man bilong kaunim mani i no inap save olsem dispela 2-pela liklik koin na meri husat i putim ol dispela koin, ol i dia tumas long ai bilong Jehova. Maski i olsem, tingting bilong God i bikpela samting moa winim tingting bilong ol man na tingting bilong dispela wido. Olsem wanem? Yu inap yusim stori bilong dispela wido long skelim yu yet bilong save olsem yu holimpas bilip?

11. Yu inap kisim wanem skul long stori bilong wido meri?

¹¹ Taim ol hevi i painim yu, dispela inap stiaim ol samting yu laik givim long Jehova. Sampela man i kamap lapun o bodi i no gat strong moa, olsem na ol i no inap lusim bikpela haptaim long autim gutnius. Yu ting i stret long ol i surik long putim ripot, long wanem, ol i pilim olsem ol i lusim liklik haptaim tasol long autim tok? Maski sapos i no gat bikpela samting i pasim yu, ating yu inap pilim olsem wok yu mekim em liklik tru taim yu skelim wantaim olgeta aua em lain bilong God i lusim long olgeta yia long lotuim Em. Stori bilong wido meri i skulim yumi olsem Jehova i save lukim na pilim tru olgeta wok yumi mekim bilong lotuim em, na moa yet long taim  bikpela hevi i painim yumi. Tingim bek ol wok yu bin mekim bilong lotuim Jehova insait long yia i go pinis. Olsem wanem? Yu bin daunim tru laik bilong yu yet na lusim 1-pela aua long mekim wok bilong God? Sapos yu bin mekim olsem, orait yu ken save tru olsem God i tingim tru wok yu bin mekim long dispela aua. Olsem dispela wido, taim yu mekim olgeta samting yu inap mekim long wok bilong Jehova, orait yu ken bilip tru olsem yu “holimpas bilip.”

12-14. (a) Elaija i kisim tingting kranki na dispela i mekim wanem long em? (b) Bilong wanem Elaija i pilim bikpela bel hevi?

¹² Profet Elaija i stap gut long Jehova na em i gat strongpela bilip. Tasol wanpela taim em i bel hevi tru na em i askim Jehova long kilim em i dai, na em i tok: “Bikpela, mi inap pinis long ol dispela hevi i kamap long mi. Nau mi laik bai yu larim mi i dai.” (1 Kin. 19:4) Ating ol lain husat i no bin pilim kain bel hevi olsem, ol bai ting olsem Elaija i bin “kros na mekim planti toktok nabaut” taim em i beten. (Jop 6:3) Tasol Elaija i pilim tru ol tok em i bin mekim. Tingim: Taim Elaija i tok olsem em i laik i dai, Jehova i no krosim em, nogat, em i helpim Elaija.

¹³ Wanem ol samting i mekim na Elaija i pilim bikpela bel hevi? Paslain liklik, Elaija i bin mekim wanpela bikpela samting long Israel we i kamapim klia olsem Jehova em i God tru, olsem na ol i bin kilim i dai 450 profet bilong god Bal. (1 Kin. 18:37-40) Elaija i laik bai lain bilong God i kirap gen long bihainim lotu i tru, tasol ol i no mekim olsem. Kwin Jesebel i salim tok i go long Elaija olsem em bai kilim Elaija i dai. Elaija i pret, olsem na em i ranawe i go olsem long hap saut long hap bilong Juda, na em i go stap long wanpela ples drai nating.—1 Kin. 19:2-4.

¹⁴ Taim Elaija i stap wanpis, em i kirap long kisim tingting olsem wok profet bilong em i samting nating. Em i tokim Jehova olsem: “Mi no gutpela man. Nogat. Mi wankain olsem ol tumbuna bilong mi.” Em i pilim olsem em i no inap moa long mekim wanpela wok, wankain olsem ol tumbuna bilong em i dai pinis na das na bun bilong ol tasol i stap. Taim em i skelim em yet, em i bin bihainim tingting bilong em yet na em i pilim olsem em i no bin mekim gutpela wok. Em i pilim olsem Jehova na ol narapela tu i no amamas long wok em i bin mekim.

15. Olsem wanem God i helpim Elaija long luksave olsem em i dia tumas long ai bilong Em?

¹⁵ Tasol God i Gat Olgeta Strong i holim narapela tingting long Elaija. Jehova i tingim yet Elaija olsem em i dia tumas, olsem na em i helpim Elaija long save long dispela samting. God i salim wanpela ensel i go bilong strongim Elaija. Na tu, Jehova i stretim rot bilong givim kaikai na wara bilong strongim Elaija taim em i wokabaut inap 40 de i go long hap saut na kamap long maunten Horep. Elaija i pilim olsem i no gat wanpela man bilong lain Israel i stap gut long Jehova, olsem na Jehova i stretim dispela tingting bilong em. God i givim ol nupela wok long Elaija, na Elaija i orait long mekim ol dispela wok. Jehova i helpim Elaija, na Elaija i kisim nupela strong na em i kirap gen long mekim wok profet.—1 Kin. 19:5-8, 15-19.

16. God i bin yusim wanem ol samting bilong strongim yu?

¹⁶ Ekspiriens bilong Elaija inap helpim yu long skelim sapos yu holimpas bilip o nogat, na tu, em inap helpim yu long kisim stretpela tingting. Namba 1: Yu mas tingim ol samting Jehova i yusim bilong strongim yu. Ating wanpela wokman bilong God, olsem wanpela elda o narapela strongpela Kristen i bin helpim yu taim hevi i painim yu. (Gal. 6:2) Olsem wanem? Yu bin kisim helpim long tok bilong Baibel, ol buk na nius bilong Baibel, na ol miting bilong kongrigesen? Bihain, taim yu kisim helpim long ol dispela rot, tingim husat Man tru i stretim rot bilong givim dispela helpim long yu, na yu mas beten na tok tenkyu long Em.—Sng. 121:1, 2.

17. Taim Jehova i skelim ol wokman bilong em, em i save tingim tru wanem ol samting?

¹⁷ Namba 2: Yu mas tingim olsem tingting  kranki inap giamanim yu. Tingting God i holim long yumi em i bikpela samting moa. (Ritim Rom 14:4.) Jehova i no save skelim yumi long hamas wok yumi mekim, nogat, em i save tingim tru pasin bilong yumi long givim bel tru long em na stap gut long em. Olsem Elaija, ating yu tu i no luksave olsem yu bin mekim planti samting long wok bilong Jehova. Ating yu bin helpim sampela insait long kongrigesen, na ating yu bin helpim tu ol man long teritori long kisim sampela save long tok i tru.

18. Wok yu kisim long Jehova i kamapim klia wanem samting?

¹⁸ Namba 3: Yu mas tingim olsem taim yu kisim wanpela wok long Jehova, dispela i kamapim klia olsem em i sambai long yu. (Jer. 20:11) Olsem Elaija, ating yu bel hevi, long wanem, yu pilim olsem wok bilong yu i no karim kaikai o yu no inap winim sampela mak yu laik winim long wok bilong God. Maski i olsem, yu mekim yet gutpela wok tru, em wok bilong autim gutnius na tokaut long nem bilong God. Stap gut long God. Long dispela rot, yu inap pilim tru tok Jisas i bin mekim long wanpela tok piksa, em i tok: “Kam na amamas wantaim bosman bilong yu.”—Mat. 25:23.

19. Wanem hevi i painim man i raitim Buk Song 102?

¹⁹ Man bilong raitim Buk Song sapta 102 i nidim tru helpim. Em i “karim bikpela hevi.” Ating em i bel hevi o sampela narapela hevi i painim em, na em i no gat strong moa long karim hevi. (Sng. 102, tok i go pas) Tok bilong em i helpim yumi long luksave olsem em i stap wanpis, na bel hevi na tingting bilong em yet i daunim em olgeta. (Sng. 102:3, 4, 6, 11) Em i ting olsem Jehova i laik tromoim em olsem wanpela hap pipia.—Sng. 102:9, 10.

20. Olsem wanem beten inap helpim man husat i wok strong long daunim ol tingting kranki?

²⁰ Man bilong raitim song inap yusim yet laip bilong em long litimapim nem bilong Jehova. (Ritim Song 102:19-21.) Ol tok bilong Buk Song 102 i soim olsem maski man i holimpas bilip, bel hevi inap daunim em na em inap hatwok tru long putim tingting long wanpela samting stret. Man bilong raitim song i pilim olsem em “i stap wanpis olsem wanpela pisin i stap antap long het bilong haus,” i olsem ol hevi tasol i stap olsem poroman bilong em. (Sng. 102:7) Sapos yu pilim olsem, orait beten long Jehova na autim tingting i stap long bel bilong yu, wankain olsem man bilong raitim song i bin mekim. Taim yu bel hevi tru na yu beten, dispela inap helpim yu long daunim ol tingting kranki. Jehova i tok promis olsem em bai “harim beten bilong ol manmeri bilong en, bipo em i bin lusim ol na ol i stap nating. Bai em i no ken givim baksait moa long ol prea bilong ol.” (Sng. 102:17) Yu mas bilipim dispela tok promis.

21. Sapos man i holim tingting kranki, olsem wanem em inap kisim stretpela tingting?

²¹ Buk Song 102 i stori tu long olsem wanem yu inap kisim stretpela tingting. Man bilong raitim song i bin kisim stretpela tingting taim em i tingim gut pasin bilong em long pas gut wantaim Jehova. (Sng. 102:12, 27) Em i stap bel isi taim em i kisim save olsem oltaim Jehova bai sambai long ol manmeri bilong Em long taim bilong hevi. Olsem na sapos sampela tingting kranki i mekim na inap sampela haptaim yu no mekim planti samting yu laik mekim long wok bilong God, orait yu mas beten long dispela samting. Askim God long harim beten bilong yu na bai hevi i no ken daunim yu, na tu, ol man i ken wok yet long “autim nem” bilong Jehova.—Sng. 102:20, 21.

22. Olsem wanem yumi olgeta wan wan inap amamasim Jehova?

²² Yes, yumi inap yusim Baibel long helpim yumi yet long luksave olsem yumi holimpas bilip na Jehova i tingim yumi olsem samting i dia tumas. Em tru olsem long dispela haptaim bilong nau, ating yumi no inap long tekewe olgeta tingting kranki o bel hevi. Maski i olsem, sapos yumi olgeta wan wan i stap gut long mekim wok bilong Jehova, yumi inap amamasim em na yumi inap abrusim bagarap.—Mat. 24:13.