Holim Yet Pasin Bilong Daunim Laik Bilong Yumi Yet
“Sapos wanpela man i laik bihainim mi, orait em i mas givim baksait long ol laik bilong em yet.”—MAT. 16:24.
1. Olsem wanem Jisas i stap gutpela piksa tru long pasin bilong daunim laik bilong em yet?
TAIM Jisas i bin stap long graun, em i stap gutpela piksa tru long pasin bilong daunim laik bilong em yet. Em i laik bihainim laik bilong God, olsem na em i no tingting long inapim laik bilong em yet o tingting long kisim gutpela sindaun. (Jon 5:30) Em i stap gut long God i go inap long taim em i dai long diwai pos, na dispela i kamapim klia olsem em i gat pasin bilong daunim laik bilong em yet.—Fili. 2:8.
2. Olsem wanem yumi inap soim olsem yumi gat pasin bilong daunim laik bilong yumi yet? Bilong wanem yumi mas mekim olsem?
2 Yumi stap olsem ol disaipel bilong Jisas, olsem na yumi tu i mas daunim laik bilong yumi yet. Dispela i makim olsem yumi no mekim ol wok bilong helpim yumi yet pastaim, nogat, yumi mekim ol wok bilong helpim ol narapela. (Ritim Matyu 16:24.) Taim yumi gat dispela pasin, dispela inap helpim yumi long tingim filings na laik bilong ol narapela pastaim, na yumi no tingim filings na laik bilong yumi yet. (Fili. 2:3, 4) Jisas i skulim yumi olsem pasin bilong daunim laik bilong yumi yet i save kirapim yumi long mekim wok lotu. Bilong wanem yumi ken tok olsem? Long wanem, pasin laikim Kristen i save kirapim man long daunim laik bilong em yet, na dispela em mak bilong ol disaipel tru bilong Jisas. (Jon 13:34, 35) Tingim ol blesing yumi kisim, long wanem, yumi insait long bikpela lain brata i stap long olgeta hap bilong graun, na yumi save daunim laik bilong yumi yet!
3. Wanem samting inap pasim yumi long daunim laik bilong yumi yet?
3 Maski i olsem, yumi gat wanpela birua we inap pasim yumi long daunim laik bilong yumi yet. Dispela birua em laik bilong yumi long tingim yumi yet tasol. Tingim wanem samting i bin kirapim Adam na Iv long tingim laik bilong ol yet. Iv i tingim laik bilong em yet tasol, na em i laik kamap wankain olsem God. Man bilong em i soim olsem em i tingim laik bilong em yet na em i laik amamasim meri bilong em. (Stt. 3:5, 6) Bihain long Satan i pulim Adam na Iv long lusim lotu i tru, em i wok yet long mekim ol samting bilong kirapim ol man long tingim laik bilong ol yet tasol. Em i bin mekim olsem tu long Jisas. (Mat. 4:1-9) Long nau, Satan i bin giamanim planti manmeri, na em i kirapim ol long mekim planti kain kain samting we i soim olsem ol i tingim ol yet tasol. Yumi mas was gut, nogut yumi tu i kisim dispela pasin.—Efe. 2:2.
4. (a) Yu ting long nau yumi inap pinisim laik nogut bilong tingim yumi yet tasol? Stori long dispela. (b) Bai yumi skelim wanem ol askim?
4 Yumi ken tok piksa olsem, pasin bilong tingim yumi yet tasol i kain olsem ros i kamap long ain. Sapos wanpela ain i stap ples klia long win na ren samting, dispela inap mekim na ros bai stat long kamap. Bikpela hevi inap kamap sapos yumi larim dispela ros i stap, na ros i kamap bikpela na bagarapim ol samting. Olsem tasol, long nau yumi no inap pinisim sin na laik nogut bilong tingim yumi yet, tasol yumi mas luksave kwik long ol hevi inap kamap na wok yet long daunim ol dispela laik nogut. (1 Kor. 9:26, 27) Olsem wanem yumi inap luksave sapos yumi gat pasin bilong tingim laik bilong yumi yet tasol? Olsem wanem yumi inap wok strong moa long kisim pasin bilong daunim laik bilong yumi yet?
YUSIM BAIBEL LONG LUKSAVE LONG PASIN BILONG TINGIM YU YET
5. (a) Olsem wanem Baibel i kain olsem mira? (Lukim piksa long kirap bilong stadi.) (b) Taim yumi laik luksave sapos yumi gat pasin bilong tingim laik bilong yumi yet tasol, orait yumi no ken mekim wanem?
5 Yumi save yusim mira long lukim pes bilong yumi, na olsem tasol, yumi inap yusim Baibel long skelim pasin tru bilong yumi na stretim ol pasin kranki bilong yumi. (Ritim Jems 1:22-25.) Tasol mira bai helpim yumi sapos yumi mekim stretpela wok long en. Olsem: Sapos yumi lukluk long mira inap liklik haptaim tasol, ating yumi no inap lukim wanpela liklik mak we inap senisim lukluk bilong yumi. O sapos yumi sanap long wanpela sait na lukluk i go long wanpela kona bilong mira, ating yumi bai lukim pes bilong narapela man. Long wankain pasin, sapos yumi laik yusim Baibel long luksave sapos yumi gat pasin bilong tingim laik bilong yumi yet tasol, orait yumi no ken ritim nating tasol o yusim long painim ol popaia bilong ol narapela, nogat. Yumi mas mekim sampela samting moa.
6. “Long olgeta taim” yumi tingim na bihainim lo bilong God we i gutpela olgeta, na yumi mas mekim wanem samting moa?
6 Maski yumi save ritim Baibel long olgeta wan wan de, ating yumi no inap luksave olsem isi isi yumi wok long kisim pasin bilong tingim yumi yet tasol. Olsem wanem dispela samting inap kamap? Tingim dispela: Long tok piksa bilong Jems, man i bin lukluk long mira, tasol em i no lukluk gut. Jems i tok, dispela man “i lukim em yet.” Jems i yusim wanpela tok Grik we i makim pasin bilong lukluk gut na skelim gut wanpela samting. Orait dispela man i mekim wanem popaia? Jems i tok moa olsem: “Bihain em i go, na kwiktaim em i lusim tingting long em i wanem kain man.” Yes, dispela man i lusim mira na i go na em i lusim tingting long samting em i lukim long mira. Tasol gutpela man i save “lukluk gut long dispela lo i gutpela olgeta” na “em i save mekim long olgeta taim.” Em i no save lusim tingting long lo i gutpela olgeta we i stap long Baibel, nogat, em i save tingim na bihainim long olgeta taim. Jisas i bin mekim wankain tok: “Sapos yupela i holimpas tok bilong mi, orait yupela i disaipel tru bilong mi.”—Jon 8:31.
7. Olsem wanem yumi inap yusim Baibel long luksave sapos yumi gat pasin bilong tingim yumi yet tasol?
7 Olsem na sapos yu laik daunim pasin bilong tingim yu yet tasol, orait pastaim yu mas ritim gut Baibel. Dispela bai helpim yu long luksave long ol pasin em yu mas senisim. Na tu, yu mas mekim sampela samting moa. Yu mas mekim wok painimaut na skelim gut ol tok. Taim yu kliagut long wanpela stori bilong Baibel, tingim olsem yu yet i stap insait long dispela stori na yu ken mekim ol askim olsem: ‘Bai mi mekim wanem sapos kain samting olsem i painim mi? Mi bai bihainim stretpela pasin o nogat?’ Na bikpela samting moa em olsem, taim yu ritim pinis wanpela stori na tingim tingim ol samting yu ritim, orait yu mas wok strong long bihainim. (Mat. 7:24, 25) Orait nau yumi ken skelim olsem wanem stori bilong King Sol na aposel Pita inap helpim yumi long bihainim yet pasin bilong daunim laik bilong yumi yet.
STORI BILONG KING SOL I STAP OLSEM TOK LUKAUT
8. King Sol i bihainim wanem kain pasin taim em i kirap mekim wok king? Olsem wanem em i soim dispela pasin?
8 Stori bilong King Sol bilong Israel i stap olsem tok lukaut long yumi. Em i helpim yumi long luksave olsem sapos yumi tingim yumi yet tasol, dispela bai pasim yumi long daunim laik bilong yumi yet. Taim Sol i kirap long mekim wok king, em i bin bihainim pasin daun. (1 Sml. 9:21) Sampela man bilong lain Israel i no bin amamas taim em i kisim wok king, tasol em i no givim strafe long ol maski em i gat namba long sambai long dispela wok em God i bin givim long em. (1 Sml. 10:27) King Sol i larim spirit bilong God i stiaim em long gopas long lain Israel taim ol i pait long lain Amon. Taim lain Israel i winim pait, King Sol i mekim pasin daun na givim biknem long Jehova.—1 Sml. 11:6, 11-13.
9. Olsem wanem Sol i kisim pasin bilong tingim em yet?
9 Bihain, Sol i kisim pasin antap na pasin bilong tingim em yet tasol, na dispela i kain olsem ros i bagarapim ain. Taim em i winim lain Amalek long pait, em i tingim laik bilong em yet na em i no bihainim tok bilong Jehova. Sol i kisim ol samting em God i bin tokim em long bagarapim. Na Sol i bihainim pasin antap na em i sanapim wanpela ston bilong makim biknem em i bin kisim. (1 Sml. 15:3, 9, 12) Taim profet Samuel i tokim em olsem Jehova i no amamas, Sol i traim long givim ol eskius na tok olsem em i bin bihainim tok bilong God, na em i sutim tok long ol narapela long rong em i bin mekim. (1 Sml. 15:16-21) Na tu, pasin antap i mekim na Sol i tingting tasol long stretim gutnem bilong em, na em i no tingting long amamasim God. (1 Sml. 15:30) Olsem wanem yumi inap yusim stori bilong Sol olsem mira bilong helpim yumi long holim yet pasin bilong daunim laik bilong yumi yet?
10, 11. (a) Olsem wanem stori bilong Sol i kirapim yumi long holim yet pasin bilong daunim laik bilong yumi yet? (b) Yumi inap mekim wanem bilong abrusim pasin nogut em Sol i bin bihainim?
10 Namba 1: Stori bilong Sol i soim olsem maski yumi bin daunim laik bilong yumi yet long pastaim, yumi no ken kisim tingting olsem yumi bai bihainim yet dispela pasin, nogat. Oltaim yumi mas wok hat long daunim laik bilong yumi yet. (1 Tim. 4:10) Tingim: Inap sampela haptaim, Sol i bin stap gut long God na God i orait long em, tasol isi isi em i kisim laik nogut bilong tingim em yet, na em i no pinisim dispela laik. Bihain, Jehova i sakim Sol, long wanem, Sol i no bihainim tok.
11 Namba 2: Yumi mas was gut, nogut yumi tingting tasol long ol gutpela wok yumi inap mekim, na yumi no tingim ol samting em yumi gat wok long stretim. Dispela i kain olsem yumi lukluk long mira na yumi amamas long nupela klos yumi werim, tasol yumi no lukim doti i stap long pes bilong yumi. Maski yumi no kisim pasin bilong bihainim laik bilong yumi yet olsem Sol i bin mekim, yumi mas wok strong long sakim ol laik nogut we inap pulim yumi long bihainim dispela pasin. Sapos yumi kisim tok kaunsel, yumi no ken givim ol eskius na bai i luk olsem yumi no mekim bikpela rong, na yumi no ken sutim tok long ol narapela. Yumi mas redi long kisim tok kaunsel, na yumi no ken sakim tok olsem Sol i bin mekim.—Ritim Song 141:5.
12. Sapos yumi bihainim pasin bilong daunim laik bilong yumi yet, olsem wanem dispela inap helpim yumi taim yumi mekim wanpela bikpela rong?
12 Tasol olsem wanem sapos yumi mekim wanpela bikpela rong? Sol i laik holim yet biknem bilong em, olsem na dispela i pasim em long stretim gen pasin bilong em long pas gut wantaim God. Sapos yumi daunim laik bilong yumi yet, yumi bai i no inap sem long askim ol arapela long helpim yumi. (Snd. 28:13; Jems 5:14-16) Olsem: Wanpela brata i kirap long lukim ponografi taim em i gat 12-pela krismas, na long pasin hait em i wok yet long mekim olsem winim 10-pela yia. Brata i tok: “I hatwok tru long mi tokaut long meri bilong mi na ol elda long samting mi wok long mekim. Mi pilim olsem mi karim wanpela hevi kago long sol bilong mi, tasol nau mi tokaut pinis long dispela samting, na mi pilim olsem dispela hevi kago i no stap moa. Sampela pren i bel hevi taim kongrigesen i tekewe wok bilong mi olsem wanpela kongrigesen sevan, i olsem ol i no amamas long mi. Tasol tingting Jehova i holim long mi, dispela em i bikpela samting moa. Mi save olsem bipo mi wok long lukim ponografi, olsem na Jehova i no bin amamas long wok mi mekim, tasol nau em i amamas tru long wok mi mekim.”
PITA I DAUNIM PASIN BILONG TINGIM EM YET
13, 14. Olsem wanem Pita i soim olsem em i tingim em yet tasol?
13 Aposel Pita i soim pasin bilong daunim laik bilong em yet taim Jisas i wok long trenim em. (Luk 5:3-11) Maski i olsem, em i mas wok strong long daunim pasin bilong tingim em yet tasol. Olsem: Em i kros taim aposel Jems na aposel Jon i askim long kisim biknem long Kingdom Bilong God, wanpela bai sindaun long sia long han sut na narapela bai sindaun long sia long han kais. Ating Pita i tingting olsem em bai sindaun long wanpela bilong ol dispela sia, long wanem, Jisas i tok pinis olsem Pita bai kisim wanpela bikpela wok. (Mat. 16:18, 19) Jisas i tok lukaut long Jems na Jon, na Pita wantaim olgeta arapela aposel, olsem ol i no ken tingim laik bilong ol yet na “strong tumas long bosim” ol brata bilong ol.—Mak 10:35-45.
14 Maski Jisas i stretim tingting bilong Pita, Pita i hatwok yet long stretim tingting bilong em yet. Taim Jisas i tokim ol aposel olsem ol bai givim baksait long em inap sampela haptaim, Pita i daunim ol narapela na apim nem bilong em yet na tok olsem em tasol bai stap gut yet long Jisas. (Mat. 26:31-33) Tasol tok bilong em i no kamap tru, long wanem, long dispela nait yet em i no daunim laik bilong em yet. Pita i laik lukautim em yet, olsem na inap 3-pela taim em i tok olsem em i no save long Jisas.—Mat. 26:69-75.
15. Bilong wanem eksampel bilong Pita inap strongim yumi?
15 Maski ol dispela samting i bin painim Pita, gutpela eksampel bilong em inap strongim yumi. Pita yet i wok strong na holi spirit i helpim em, olsem na em inap daunim ol tingting kranki, na em inap bosim bel, na daunim laik bilong em yet na helpim ol narapela. (Gal. 5:22, 23) Em i sanap strong na karim ol hevi we i bikpela moa winim ol hevi we i bin pundaunim em long pastaim. Em i soim olsem em i gat pasin daun taim aposel Pol i stretim em long ai bilong ol narapela. (Gal. 2:11-14) Taim Pita i kisim pinis tok kaunsel, em i no bel nogut long Pol, na em i no pilim olsem tok bilong Pol i bagarapim nem bilong em, nogat. Pita i wok yet long soim pasin laikim long Pol. (2 Pita 3:15) Eksampel bilong Pita inap helpim yumi long kisim pasin bilong daunim laik bilong yumi yet.
Bihain long Pita i kisim tok kaunsel, em i mekim wanem? Yumi bai mekim wankain pasin olsem Pita, o nogat? (Lukim paragraf 15)
16. Long taim bilong hevi, olsem wanem yumi inap daunim laik bilong yumi yet?
16 Tingim pasin yu save mekim taim hevi i painim yu. Pita na ol arapela aposel i autim tok, olsem na ol birua i kalabusim ol na yusim wip long paitim ol. Tasol Pita na ol aposel “i amamas long God i ting ol i gutpela inap long ol i ken kisim sem long nem bilong Jisas.” (Apo. 5:41) Taim ol birua i mekim nogut long yu, yu ken tingim olsem rot i op long yu inap bihainim pasin bilong Pita na Jisas, na daunim laik bilong yu yet na karim hevi. (Ritim 1 Pita 2:20, 21.) Dispela kain tingting inap helpim yu taim yu kisim gutpela tok kaunsel long ol elda. Bihainim pasin bilong Pita na no ken belhat kwik.—Sav. 7:9.
17, 18. (a) Yumi ken givim wanem askim long yumi yet taim yumi laik winim ol mak long wok bilong God? (b) Yumi mas mekim wanem sapos yumi luksave olsem yumi stat long kisim pasin bilong tingim yumi yet tasol?
17 Eksampel bilong Pita inap helpim yu taim yu putim ol mak yu laik winim long wok bilong Jehova. Taim yu wok strong long winim ol mak yu putim, dispela i soim olsem yu gat pasin bilong daunim laik bilong yu yet. Tasol yu mas was gut, nogut yu wok strong long winim ol dispela mak, long wanem, yu laik kisim biknem. Olsem na askim yu yet, ‘Nogut mi laik mekim planti samting moa long wok bilong Jehova, long wanem, mi laik kisim biknem o namba, olsem Jems na Jon i bin mekim taim ol i kamapim askim bilong ol long Jisas?’
18 Sapos yu luksave olsem yu stat long kisim pasin bilong tingim laik bilong yu yet tasol, orait yu mas askim Jehova long helpim yu long stretim tingting na laik bilong yu, na wok strong long litimapim nem bilong God na i no bilong yu yet. (Sng. 86:11) Na tu, yu ken wok strong long winim ol mak we olgeta man i no inap luksave long en. Olsem: Ating yu hatwok long bihainim sampela pasin em holi spirit i save kamapim, olsem na yu ken wok strong moa long kisim ol dispela pasin. O sapos yu redim gut ol hap bilong miting, tasol yu no laik klinim Haus Kingdom, orait yu ken putim mak long bihainim stiatok i stap long Rom 12:16.—Ritim.
19. Yumi inap mekim wanem na bai yumi no ken bel hevi long ol samting yumi luksave long en taim yumi ritim Baibel na skelim yumi yet?
19 Taim yumi ritim Baibel na skelim gut yumi yet, na yumi luksave long sampela popaia o yumi luksave olsem yumi gat pasin bilong tingim laik bilong yumi yet, ating yumi inap bel hevi. Sapos dispela samting i kamap long yu, orait tingim tok piksa bilong Jems long man i lukluk long mira. Jems i no stori planti olsem dispela man i bin stretim kwik ol hevi bilong em o nogat, na em i no stori tu sapos dispela man i bin stretim olgeta popaia o nogat. Tasol Jems i tok dispela man i wok yet long “lukluk gut long dispela lo i gutpela olgeta.” (Jems 1:25) Dispela man i tingim samting em i lukim long mira na em i wok yet long stretim dispela samting. Olsem na yu mas holim stretpela tingting long yu yet na long ol popaia bilong yu. (Ritim Saveman 7:20.) Yu mas wok yet long lukluk gut long lo i gutpela olgeta, na wok strong long holim yet pasin bilong daunim laik bilong yu yet. Jehova i redi long helpim yu, wankain olsem em i bin helpim planti brata na sista bilong yu, em ol tu i sinman, tasol God inap orait long ol na givim blesing long ol.