Yu Amamas Long Jehova i Lukim Ol Samting Yu Mekim?
“Bikpela i save lukim olgeta samting i kamap long olgeta hap. Em i lukim ol gutpela man na ol man nogut tu.”—SND. 15:3.
1, 2. Hau na pasin bilong Jehova long lukim ol samting yumi mekim i no wankain long wok bilong ol sekiuriti kamera?
LONG planti kantri, ol man i putim ol sekiuriti kamera insait long stua bilong rekodim raun bilong ol kastama na lukim sapos man i stil. Ol dispela vidio bai helpim ol long arestim stilman. Ol dispela kamera i mekim na i hatwok long ol man i stil na abrusim pe nogut.
2 Tasol, yu ting ol dispela kamera inap kirapim yumi long tingim pasin bilong Jehova, gutpela Papa bilong yumi? Baibel i tok ai bilong em “i save lukim olgeta samting i kamap long olgeta hap.” (Snd. 15:3) Tasol yu ting dispela i makim olsem oltaim em i skelim ol samting yumi mekim? Yu ting God i lukim ol samting yumi mekim, long wanem, em i laik strongim ol lo bilong em, na givim pe nogut long yumi? (Jer. 16:17; Hib. 4:13) Nogat tru! Jehova i save lukim ol samting yumi mekim, long wanem, em i laikim tru yumi olgeta wan wan na em i tingim tru yumi.—1 Pita 3:12.
3. Yumi bai skelim wanem 5-pela samting we i soim klia olsem God i laikim yumi na tingim tru yumi?
3 Wanem samting bai helpim yumi long pilim olsem God i laikim tru yumi, olsem na em i save lukim ol samting yumi mekim? Yumi ken skelim ol samting God i mekim. Em i save (1) givim tok lukaut taim yumi kisim ol tingting kranki, (2) stretim yumi taim yumi mekim popaia, (3) stiaim yumi long rot bilong ol stiatok bilong Baibel, (4) helpim yumi taim yumi bungim hevi, na (5) givim gutpela pe taim em i lukim ol gutpela pasin bilong yumi.
GOD I LUKLUK NA GIVIM TOK LUKAUT
4. Wai na Jehova i tok lukaut long Kein olsem sin “i redi long bagarapim” em?
4 Pastaim yumi ken stori long olsem wanem God i save givim tok lukaut taim yumi kisim tingting kranki. (1 Sto. 28:9) Yumi laik amamas long pasin bilong God long tingim yumi na lukim ol samting yumi mekim. Olsem na yumi ken skelim pasin em i bin mekim long Kein taim “Kein i kros nogut tru,” long wanem, God i no bin orait long em. (Ritim Stat 4:3-7.) Jehova i kirapim Kein long “mekim gutpela pasin.” Jehova i tok lukaut olsem sapos Kein i no senisim pasin, orait “sin bai i redi long bagarapim” em. God i tokim Kein olsem: “Yu mas strong na winim [sin].” God i laik bai Kein i bihainim tok lukaut na bai em i ken stap “amamas.” Man inap pas gut wantaim God sapos God i orait long em.
5. Long wanem ol rot Jehova i save givim tok lukaut taim yumi kisim tingting kranki?
5 Olsem wanem long yumi long nau? Ai bilong Jehova inap lukim olgeta tingting na laik i stap insait tru long bel bilong yumi. Jehova i laik bai yumi bihainim stretpela pasin, tasol em i no save fosim yumi long senisim pasin yumi bihainim. Em i save yusim tok bilong Baibel long givim tok lukaut taim yumi laik bihainim rot i no stret. Taim yumi ritim Baibel long olgeta de, yumi save lukim stori we i helpim yumi long daunim ol tingting kranki na laik nogut. Na tu, ol buk na nius bilong Baibel inap stori long hevi we i painim yumi, na helpim yumi long daunim dispela hevi. Long ol miting bilong kongrigesen, yumi olgeta i save kisim ol gutpela tok kaunsel we i save kamap long taim stret!
6, 7. (a) Wai na yumi ken tok olsem ol buk na nius em oganaisesen bilong God i redim bilong planti milion man long ritim i soim klia olsem God i laikim yu tru na tingim yu? (b) Jehova i tingim tru yu, na dispela inap helpim yu olsem wanem?
6 Olgeta tok lukaut i soim klia olsem Jehova i lukluk long ol samting yumi mekim, long wanem, em i laikim tru na tingim yumi olgeta wan wan. Em tru olsem tok bilong Baibel i stap inap planti handret yia pinis, na oganaisesen bilong God i redim ol buk na nius em planti milion man i ken ritim, na tok kaunsel i kamap long ol miting i bilong helpim olgeta long kongrigesen. Maski i olsem, Jehova i stiaim yu long tingim Tok bilong em na bai yu inap senisim tingting bilong yu. Dispela i soim klia olsem Jehova i laikim yu tru na em i tingim yu.
Yumi skulim maus bilong bel long bihainim tok bilong Baibel, na dispela i helpim yumi long abrusim hevi (Lukim paragraf 6, 7)
7 Sapos yumi laik bai ol tok lukaut bilong God i helpim yumi, orait pastaim yumi mas luksave olsem em i tingim tru yumi. Yumi mas bihainim gut Tok Bilong God, na wok strong long rausim olgeta tingting em God i no amamas long en. (Ritim Aisaia 55:6, 7.) Sapos yumi bihainim ol tok lukaut, yumi bai abrusim planti hevi. Tasol olsem wanem sapos yumi bihainim ol tingting kranki bilong yumi yet? God i redim wanem ol samting bilong helpim yumi?
GUTPELA PAPA I STRETIM YUMI
8, 9. Jehova i save givim tok kaunsel long rot bilong ol wokman bilong em, na olsem wanem dispela i soim olsem em i tingim tru yumi? Stori long dispela.
8 Taim yumi kisim tok bilong stretim yumi, yumi inap luksave olsem Jehova i tingim tru yumi. (Ritim Hibru 12:5, 6.) Em tru olsem yumi no save amamas taim yumi kisim tok kaunsel o tok bilong stretim yumi. (Hib. 12:11) Tasol, tingim wanem samting i kirapim man long givim tok kaunsel long yumi. Ating em i luksave olsem yumi wok long mekim samting we inap bagarapim pasin bilong yumi long pas gut wantaim God Jehova, na em i tingim tru filings bilong yumi, na em i amamas long lusim sampela haptaim na strong bilong em long yusim Baibel long soim yumi long olsem wanem yumi ken stretim pasin bilong yumi na bihainim pasin God i amamas long en. Man husat i tingim tru yumi em Man husat i kamapim dispela tok kaunsel, em Jehova.
9 Orait nau yumi ken stori long olsem wanem ol saveman bilong graun inap bihainim pasin bilong God long tingim yumi. Paslain long wanpela brata i kisim tok i tru, em i save lukim ponografi long olgeta taim, tasol em i bin lusim dispela pasin. Tasol, laik nogut bilong em i stap yet, na i olsem sit bilong paia i lait yet i stap. Taim em i kisim nupela mobail fon, dispela i kirapim gen laik nogut bilong em. (Jems 1:14, 15) Em i yusim mobail fon long lukim ol Web-sait long Intenet we i soim ol piksa nogut bilong ponografi. Orait, wanpela taim em i mekim wok bilong autim tok long rot bilong telefon, na em i larim wanpela elda i yusim fon bilong em long sekim sampela atres. Taim elda i yusim fon bilong em, em i lukim ol atres bilong ol Web-sait we i no gutpela. Dispela i opim rot long brata inap kisim helpim. Em i kisim tok kaunsel long taim stret, na stretim pasin, na isi isi em i daunim ol tingting na laik nogut. Yumi ken tenkyu tru olsem Papa bilong yumi long heven i tingim tru yumi, na em i lukim ol sin yumi mekim long pasin hait na em i stretim yumi paslain long yumi mekim bikpela rong!
BIHAINIM OL STIATOK BILONG BAIBEL
10, 11. (a) Jehova i yusim wanem samting long stiaim yumi? (b) Taim wanpela famili i larim tok bilong Jehova i stiaim ol, wanem gutpela samting i painim ol?
10 Man bilong raitim song i singim song long Jehova na i tok: “Yu save givim mi gutpela tok bilong stiaim wokabaut bilong mi.” (Sng. 73:24) Taim yumi nidim tok bilong stiaim yumi, orait yumi ken “tingting strong” long Jehova. Bilong mekim olsem, yumi ken skelim tok bilong Baibel long painimaut tingting bilong em long ol samting. Taim yumi bihainim ol stiatok bilong Baibel, dispela i helpim yumi long pas gut wantaim God, na tu, sampela taim dispela i helpim yumi long lukautim yumi yet long sait bilong klos na kaikai samting.—Snd. 3:6.
11 Ekspiriens bilong wanpela fama long ples maunten bilong Masbate, long Filipins, i soim klia olsem wanem Jehova i bin stiaim sampela wokman bilong em. Dispela fama na meri bilong em i gat bikpela famili, na tupela wantaim i mekim wok painia oltaim. Ol i kirap nogut taim papagraun i tokim ol long lusim dispela hap ol i stap long en. Wai na papagraun i mekim olsem? Ol narapela i bin sutim tok olsem famili bilong dispela brata i mekim pasin giaman. Maski dispela brata i tingting planti long wanem hap famili bai i go stap long en, em i tok: “Jehova bai lukautim mipela. Maski wanem wanem hevi i kamap, oltaim God i save lukautim yumi long ol samting yumi nidim.” Bilip bilong dispela brata i no lus nating. Sampela de bihain, dispela famili i amamas long harim olsem ol i no inap lusim dispela hap ol i stap long en. Wanem samting i kamap? Papagraun i luksave olsem maski em i sutim tok long dispela famili Witnes, ol i bihainim ol stiatok bilong Baibel na soim yet pasin rispek na stap bel isi. Papagraun i pilim tru dispela pasin, olsem na em i tok orait long ol i ken stap bek, na tu, em i givim sampela hap graun moa long ol na bai ol inap mekim wok long en. (Ritim 1 Pita 2:12.) Jehova i yusim Baibel long stiaim yumi na helpim yumi long karim ol hevi i painim yumi.
PREN I HELPIM YUMI LONG KARIM HEVI
12, 13. Wanem ol samting inap kamap na sampela i kisim tingting olsem God i lukim hevi ol i karim, o nogat?
12 Sampela taim, wanpela hevi inap stap longpela taim na i no pinis. Ating yumi gat sik we i no pinis hariap, ol wanblut i birua long yumi inap longpela taim, o oltaim ol i mekim nogut long yumi. Na olsem wanem long ol liklik kros yumi gat wantaim ol narapela insait long kongrigesen?
13 Olsem: Ating yu bel hevi, long wanem, wanpela brata i mekim wanpela hap tok long yu, na yu pilim olsem dispela tok i no stret. Ating yu tok olsem, ‘Dispela kain pasin i no ken kamap insait long oganaisesen bilong God!’ Tasol dispela brata husat i mekim dispela tok long yu i mekim ol gutpela wok insait long kongrigesen na ol narapela i amamas long em. Ating yu tingting olsem, ‘Hau na dispela samting i kamap? Jehova i lukim dispela samting, o nogat? Em bai stretim dispela hevi, o nogat?’—Sng. 13:1, 2; Hab. 1:2, 3.
14. Wanem wanpela risen na God i no inap mekim sampela samting bilong stretim ol hevi bilong yumi yet?
14 Ating Jehova i gat ol gutpela risen na em i no mekim yet sampela samting bilong stretim dispela hevi. Olsem: Ating yu pilim olsem narapela brata o sista i gat bikpela asua moa, tasol God i gat narapela tingting. Ating long tingting bilong God, bikpela asua moa i stap long yu. Ating dispela tok yu bel hevi long en, em tok kaunsel we i stret long yu tingim gut. Brata Karl Klein i bin stap memba bilong Gavening Bodi na long laip stori bilong em, em i stori long wanpela taim we Brata J. F. Rutherford i bin givim tok bilong stretim em. Bihain, taim Brata J. F. Rutherford i bungim Brata Klein, em i amamas na tok, “Helo Karl!” Tasol Brata Klein i bel hevi yet long tok kaunsel em i bin kisim, olsem na em i no opim maus olgeta na tok gude. Brata Rutherford i luksave olsem Brata Klein i bel hevi yet, olsem na em i tok lukaut olsem Brata Klein i no ken pundaun long trap long Satan. Bihain, Brata Klein i tok: “Sapos yumi bel nogut yet long wanpela brata, na moa yet sapos dispela brata i mekim wok bilong em na em i givim sampela tok long yumi, orait yumi opim rot long yumi inap pundaun long ol trap bilong Satan.” a
15. Yu mas luksave long wanem samting na dispela bai helpim yu long stap isi na wet long Jehova long helpim yu long karim hevi?
15 Taim hevi i painim yumi na i luk olsem dispela hevi i no inap pinis, dispela inap mekim na yumi pilim olsem yumi laik givap long karim dispela hevi. Tasol, wanem samting inap helpim yumi long karim dispela hevi? Tingim olsem yu draivim kar na planti kar i stap long rot, olsem na kar bilong yu i no inap i go kwik. Yu no save long hamas aua yu mas wet. Sapos yu kros na traim long painim narapela rot, ating yu inap paul long rot na bikpela haptaim inap lus paslain long yu kamap long ples yu laik i go long en. Tasol dispela hevi i no inap kamap sapos yu stap isi na wet. Olsem tasol, sapos yu larim Tok Bilong God i soim rot long yu, bihain yu bai kamap long hap yu laik i go long en.
16. Ating i gat wanem risen na Jehova i no kirap kwik long mekim sampela samting bilong stretim hevi bilong yumi?
16 Ating Jehova i no inap kirap kwik long mekim sampela samting bilong stretim ol hevi bilong yumi, long wanem, em i laik bai yumi kisim trening. (Ritim 1 Pita 5:6-10.) God i no save kamapim ol hevi. (Jems 1:13) “Satan, dispela birua bilong yupela,” em i wok long kamapim planti hevi. Tasol, God inap yusim bikpela hevi long helpim yumi long pas gut moa wantaim em. Em i lukim pen na hevi yumi karim, na em “i save wari” long yumi, olsem na em bai mekim na dispela hevi i stap “inap liklik haptaim” tasol. Olsem wanem? Taim yu karim hevi, yu amamas olsem Jehova i tingim tru yu na em i lukim olgeta samting i kamap, na yu bilip olsem em bai helpim yu long winim dispela hevi?—2 Kor. 4:7-9.
AMAMAS OLSEM GOD I ORAIT LONG YU
17. Jehova i lukluk long helpim wanem kain ol manmeri? Bilong wanem?
17 God i skelim gut olgeta samting yumi mekim, long wanem, i gat gutpela risen tru. Long rot bilong profet Hanani, God i tokim King Asa olsem: “Oltaim Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.” (2 Sto. 16:9) God i lukim olsem Asa i no givim bel olgeta long em, tasol God bai ‘helpim na strongim’ yu sapos yu wok yet long bihainim stretpela pasin.
18. Taim yu pilim olsem i no gat man i amamas long wok yu mekim, orait yu mas tingim wanem pasin bilong Jehova? (Lukim piksa long kirap bilong stadi.)
18 God i laik bai yumi “mas bihainim gutpela pasin,” na “mekim gutpela pasin” na bai em i ken “sori” long yumi. (Amo. 5:14, 15; 1 Pita 3:11, 12) Jehova i save tingim ol stretpela manmeri na mekim gut long ol. (Sng. 34:15) Olsem: Tingim Sifra na Pua, em 2-pela meri bilong lain Hibru husat i helpim ol mama long taim ol i laik karim pikinini. Taim lain Israel i stap kalabus long Isip, Fero i bin tokim dispela 2-pela meri long kilim i dai olgeta pikinini man bilong lain Hibru taim ol i bon, tasol dispela 2-pela meri i pret moa long God na ol i no pret long Fero. Maus bilong bel i kirapim ol long bihainim lo bilong God, olsem na ol i no kilim i dai ol bebi. Bihain, God i givim blesing long Sifra na Pua, olsem na tupela tu inap karim pikinini. (Kis. 1:15-17, 20, 21) Jehova i lukim olgeta samting i kamap, na em i luksave tu long gutpela wok ol i mekim. Sampela taim, yumi inap pilim olsem i no gat man i tingim gutpela wok yumi mekim. Tasol Jehova i tingim tru yumi. Em i tingim olgeta gutpela wok yumi bin mekim, na em bai givim gutpela pe long yumi.—Mat. 6:4, 6; 1 Tim. 5:25; Hib. 6:10.
19. Olsem wanem wanpela sista i kisim save olsem Jehova i tingim tru gutpela wok bilong yumi?
19 Wanpela sista long Ostria i kisim save olsem God i tingim tru bikpela wok em i bin mekim. Famili bilong em i bilong Hangari, olsem na em i kisim atres bilong wanpela meri Hangari na bai em inap i go autim tok long em. Kwiktaim em i go long lukim dispela meri, tasol i no gat man i stap long haus. Em i go bek gen inap planti taim. Sampela taim em i pilim olsem i gat man i stap, tasol i no gat man i save kam opim dua. Em i bin lusim ol kain samting olsem buk na nius, ol pas, na atres na telefon namba bilong em. Bihain long em i go i kam long dispela haus winim 1 na hap yia, wanpela meri i kam opim dua! Dispela meri i gat gutpela pasin pren, na em i tok: “Plis kam insait. Mi ritim pinis olgeta samting yu bin lusim long mi, na mi wok long wetim yu long kam.” Dispela meri i wok long kisim kimoterapi bilong stretim sik kensa, olsem na em i no redi long bungim ol narapela. Sista i kirapim Baibel stadi wantaim dispela meri. Yes, God i blesim gutpela wok bilong dispela sista!
20. Yu pilim olsem wanem long pasin bilong Jehova long tingim yu na lukim olgeta samting yu mekim?
20 Jehova i luksave long olgeta samting yu mekim, na bihain em bai givim gutpela pe long yu. Taim yu luksave olsem God i lukim olgeta samting yu mekim, orait yu no ken pilim olsem sekiuriti kamera i rekodim ol samting yu mekim na yu bai kisim pe nogut long en, nogat. Dispela i ken kirapim yu long pas gut moa wantaim dispela God husat i tingim yu tru!
a Laip stori bilong Brata Klein i stap long Wastaua bilong Jun 1, 1985.