LAIP STORI
Wok Fultaim Narapela Narapela Asainmen Mi Kisim
Mi tingim bek 65 yia bilong mi long mekim wok bilong God fultaim, na mi inap tok olsem laip bilong mi i bin pulap tru long amamas. Maski i olsem, sampela taim mi save bel hevi. (Sng. 34:12; 94:19) Tasol planti gutpela samting i bin kamap, na dispela i mekim na mi pilim olsem laip bilong mi i gat as tru bilong en!
LONG Septemba 7, 1950, mi kirap wok long Betel long Brooklyn. Long dispela taim, famili Betel i gat 355 bratasista bilong kain kain kantri na ol i gat kain kain krismas, namel long 19 na 80. Planti bilong ol em ol Kristen God i bin makim ol long holi spirit.
MI KIRAP MEKIM WOK BILONG JEHOVA
Mi baptais taim mi gat 10-pela krismas
Mama bilong mi i bin lainim mi long mekim wok bilong God, em “God bilong amamas.” (1 Tim. 1:11) Mama i bin kirap mekim wok bilong Jehova taim mi liklik mangi yet. Long Julai 1, 1939, taim mi gat 10-pela krismas, mi kisim baptais long kibung sekit long Columbus, Nebraska, long Amerika. Mipela i bung long wanpela haus ol i bin rentim na namba bilong mipela inap olsem 1 handret, na mipela i harim rekoding bilong wanpela tok, nem bilong en “Fascism or Freedom,” em Joseph Rutherford i mekim. Namel long dispela tok, sampela manmeri i kros na ol i kam bung ausait long haus mipela i mekim kibung long en. Ol i strong na kam insait na bagarapim kibung bilong mipela, na ol i rausim mipela long taun. Mipela i go bung long fam bilong wanpela brata husat i stap klostu liklik long taun, na mipela i harim ol narapela hap bilong program. Ol dispela samting i mekim na mi no inap lusim tingting long det mi bin kisim baptais!
Taim mi wok long kamap bikpela, Mama i bin wok strong tru long stiaim mi long bihainim tok i tru. Papa em i gutpela man, tasol em i no gat tingting liklik long lotu o long helpim mi long sait bilong bilip. Mama wantaim sampela Witnes long Omaha Kongrigesen i bin helpim mi na strongim tru bel bilong mi.
SENIS I KAMAP
Klostu long taim mi bai grediuet long haiskul, mi mekim disisen long samting mi bai mekim long laip bilong mi. Long taim bilong skul holide, mi save mekim wok painia haptaim wantaim sampela wankrismas bilong mi.
Tupela yangpela brata husat i grediuet nupela long namba 7 klas bilong Skul Gileat, em John Chimiklis na Ted Jaracz, ol i kisim wok olsem wasman raun long hap bilong mipela. Mi kirap nogut taim mi kisim save olsem tupela i gat 22 krismas samting. Long dispela taim, mi gat 18 krismas na klostu nau mi bai grediuet long haiskul. Brata Chimiklis i askim mi long samting mi laik mekim long laip bilong mi. Taim mi toksave long em, em i strongim mi na tok: “Gutpela, yu mas insait nau long fultaim sevis. Yu no save long ol narapela asainmen yu bai kisim
long bihain.” Dispela skultok, na pasin bilong dispela 2-pela brata, i kirapim tru tingting bilong mi. Taim mi grediuet long haiskul, mi kirap mekim wok painia long 1948.MI KAM WOK LONG BETEL
Long Julai 1950, mi wantaim papamama i go long kibung intenesenel long Yankee Stediam long New York City. Long kibung, mi go long miting bilong ol bratasista husat i laik wok long Betel. Mi raitim pas na toksave olsem mi bai amamas long i go wok long dispela hap.
Papa i no gat tok long mi stap wantaim ol long haus na mekim wok painia, tasol em i pilim olsem mi mas givim hap mani bilong baim rum na kaikai bilong mi. Olsem na long kirap bilong mun Ogas, mi laik i go raun na painim wanpela wok mani. Tasol paslain long mi go, mi tingting long sekim meil boks bilong mipela. Mi lukim wanpela pas bilong mi i stap, em pas i kam long Brooklyn. Nathan H. Knorr i sainim dispela pas, na em i tok: “Mipela i kisim pinis aplikesen bilong yu long mekim wok long Betel. Mi lukim olsem yu amamas long i stap long Betel i go inap long taim Bikpela i kisim yu i go. Olsem na mi laik bai yu kam long Betel long 124 Columbia Heights, Brooklyn, New York, long Septemba 7, 1950.”
Long dispela de, taim Papa i pinis long wok na kam bek long haus, mi tokim em olsem mi painim pinis wanpela wok. Em i tok: “Gutpela. Bai yu wok we?” Mi tok: “Mi bai i go wok long Brooklyn Betel, na pe em 10 dola long olgeta mun.” Papa i kirap nogut long dispela, tasol em i tok sapos dispela em wok mi laik mekim, orait mi mas wok strong long mekim gut dispela wok. I no longtaim bihain, em i kisim baptais long wanpela kibung long Yankee Stediam, long 1953!
Mi wantaim painia poroman bilong mi, Alfred Nussrallah
Mi amamas olsem taim ol i singautim mi long i go wok long Betel, ol i bin singautim tu Alfred Nussrallah, em painia poroman bilong mi, olsem na mitupela i go wantaim. Bihain, em i marit na em wantaim meri bilong em Joan, i go long Skul Gileat, na ol i go mekim wok misineri long Lebanon, na bihain ol i go mekim wok olsem wasman raun long Amerika.
OL ASAINMEN LONG BETEL
Namba 1 asainmen bilong mi long Betel em long hap bilong wokim ol buk, na mipela i save samapim ol buk. Namba 1 buk mi wok long en, em buk What Has Religion Done for Mankind? Mi wok inap 8-pela mun long dispela hap, na bihain mi go wok long Dipatmen Bilong Wok Autim Tok, na mi wok aninit long Brata Thomas J. Sullivan. Em i bin stap planti yia insait long oganaisesen, olsem na mi amamas long wok wantaim em, long wanem, mi kisim bikpela helpim long gutpela tingting na save bilong em long sait bilong tok i tru.
Mi wok klostu 3-pela yia long Dipatmen Bilong Wok Autim Tok, na Max Larson, em ovasia bilong faktori, em i tokim mi olsem Brata Knorr i laik lukim mi. Mi tingting planti olsem nogut mi bin mekim wanpela rong. Tasol bel bilong mi i stap isi taim Brata Knorr i tok em i laik save olsem, mi tingting long lusim Betel long bihain o nogat. Em i nidim wanpela brata long wok long ofis bilong em inap sotpela haptaim, na em i laik save olsem mi inap mekim dispela wok o nogat. Mi tokim em olsem mi no gat tingting long lusim Betel. Olsem na mi mekim wok long ofis bilong em, na mi wok i go inap 20 yia.
Planti taim mi save tok, mi no inap tru long baim skul mi bin kisim taim mi wok wantaim Brata Sullivan na Brata Knorr na ol narapela long Betel, olsem Milton Henschel, Klaus Jensen, Max Larson, Hugo Riemer, na Grant Suiter. a
Ol brata mi bin wok wantaim ol, ol i mekim gut wok bilong helpim oganaisesen. Brata Knorr em i man bilong taitim bun na wok strong, na em i laik lukim wok
bilong Kingdom i kamap bikpela tru long olgeta hap. Ol brata husat i wok wantaim em, ol i no pret long toktok wantaim em. Maski mipela i gat narapela tingting long wanpela samting, mipela i no pret long kamapim tingting bilong mipela long em, na em i save orait yet long mipela.Wanpela taim, Brata Knorr i tokim mi olsem em i bikpela samting long yumi mas mekim gut ol wok we i luk olsem ol i liklik wok tasol. Em i stori olsem taim em i mekim wok olsem ovasia bilong faktori, Brata Rutherford i save ringim em na tok: “Brata Knorr, taim yu lusim faktori na yu kam long kaikai bilong belo, orait kisim sampela raba bilong pensil na bringim i kam long mi. Mi nidim sampela raba.” Brata Knorr i tok, fes samting em i save mekim em olsem, em i save go long rum i gat ol samting bilong ofis na kisim ol raba na pulimapim long poket bilong em. Orait long belo em i save kisim i go long ofis bilong Brata Rutherford. Em tru olsem em i liklik samting, tasol Brata Rutherford i yusim ol dispela samting long mekim bikpela wok. Orait Brata Knorr i tokim mi olsem: “Mi laik bai ol pensil long des bilong mi i sap. Olsem na inap yu sapim ol long olgeta moning?” Inap planti yia, mi no save lusim tingting long sapim ol pensil bilong em.
Planti taim Brata Knorr i tokim mipela olsem, mipela i mas putim gut yau taim ol narapela i askim mipela long mekim wanpela wok. Wanpela taim, em i stori gut tru long olsem wanem mi mas mekim wanpela wok, tasol mi no putim gut yau long tok bilong em. Pasin mi mekim i givim bikpela sem long em. Bel bilong mi i bagarap stret, olsem na mi raitim liklik pas na tok sori long pasin mi bin mekim, na mi ting i gutpela sapos em i givim narapela wok long mi na mi no ken wok moa long ofis bilong em. Bihain liklik long dispela moning yet, Brata Knorr i kam long lukim mi. Em i tok: “Robert, mi kisim pinis pas bilong yu. Yu bin mekim popaia. Mi toktok pinis wantaim yu long dispela samting, na mi save olsem bihain bai yu mekim gut dispela wok. Orait nau yumi ken go bek long wok.” Mi pilim tru gutpela pasin bilong em long tingim mi.
MI GAT LAIK LONG MARIT
Mi wok inap 8-pela yia pinis long Betel na mi no gat tingting long mekim narapela samting—mi laik wok yet long Betel. Tasol bihain, senis i kamap. Long taim bilong kibung intenesenel long Yankee Stediam na Polo Grounds long 1958, mi lukim Lorraine Brookes, em wanpela sista mi bin bungim long 1955 taim em i mekim wok painia long Montreal, Kanada. Mi laikim pasin bilong em long holim stretpela tingting long fultaim sevis na pasin bilong em long redi long i go long wanem wanem hap oganaisesen bilong Jehova i laik salim em i go long en. Lorraine i putim mak long i go long Skul Gileat. Long 1956, taim em i gat 22 krismas, ol i singautim em long i go long namba 27 klas. Taim em i grediuet, ol i salim em i go mekim wok misineri long Brasil. Long 1958, mi bungim em gen na mi askim em long marit, na em i orait long dispela. Mitupela i pasim tok long mipela bai marit long yia antap na mipela i ken mekim wok misineri wantaim.
Taim mi tokim Brata Knorr olsem mi laik marit, em i tok i gutpela sapos mipela i wet 3-pela yia moa na
bihain mipela i ken marit, na mipela inap mekim wok long Betel long Brooklyn. Long dispela taim, sapos man na meri i laik i stap yet long Betel taim tupela i marit pinis, orait wanpela i mas mekim wok long Betel inap 10-pela yia pinis, na narapela inap 3-pela yia pinis. Olsem na Lorraine i orait long mekim wok long Betel long Brasil inap 2-pela yia, na bihain em bai mekim wok inap 1-pela yia long Betel long Brooklyn paslain long mipela i marit.Insait long dispela 2 pela yia, mitupela i save toktok wantaim long rot bilong pas tasol. I gat bikpela pe bilong ring long telefon, na long dispela taim i no gat E-meil! Taim mitupela i marit long Septemba 16, 1961, mipela i amamas tru long Brata Knorr i mekim tok bilong marit. Mipela i wet inap 3-pela yia, tasol dispela i olsem longpela taim. Tasol nau mipela i marit na stap wantaim winim 50 yia pinis, na taim mipela i tingim bek ol dispela yia, mipela i belgut tru na amamas na mipela i pilim olsem dispela 3-pela yia mipela i bin wet, em i liklik samting tasol!
De bilong marit. Kirap long han kais: Nathan H. Knorr, Patricia Brookes (susa bilong Lorraine), Lorraine na mi, Curtis Johnson, Faye na Roy Wallen (papamama bilong mi)
OL NARAPELA ASAINMEN
Long 1964, mi kisim wok bilong raun long ol narapela kantri olsem wasman son. Long dispela taim bipo, ol meri i no inap poromanim man bilong ol long ol dispela raun. Tasol long 1977, ol i kamapim senis na ol meri i kirap raun wantaim man bilong ol. Long dispela yia, mitupela Lorraine i poromanim Grant na Edith Suiter na visitim ol brens ofis long Jemani, Ostria, Grik, Saiprus, Teki, na Israel. Taim mi mekim dispela wok, mi bin visitim planti kantri, inap olsem 70.
Long 1980, mipela i go long Brasil na mipela i go long biktaun Belém, em taun we bipo Lorraine i bin mekim wok misineri long en. Na tu, mipela i go lukim ol brata long taun Manaus. Long wanpela tok i kamap long stediam, mipela i lukim wanpela grup i sindaun wantaim na ol i no bihainim pasin bilong ol Brasil olsem ol meri i givim kis long wasket bilong narapela narapela na ol brata i sekan. Bilong wanem ol i no mekim olsem?
Em ol bratasista, na ol i kam long komiuniti bilong ol lepraman na ol i stap long bikbus bilong Amason. Olsem na ol i no sekanim ol narapela long stediam, nogut sik lepra i kalap long ol narapela. Tasol mipela i bel sori tru, na mipela i no inap lusim tingting long samting mipela i lukim, olsem ol i amamas tru na pes bilong ol i lait! Tok bilong Jehova i tru olgeta, em i tok: “Bel bilong ol wokman bilong mi bai i pulap long amamas na bai ol i singim ol song bilong amamas.”—Ais. 65:14.
LAIP I GUTPELA NA I GAT AS TRU BILONG EN
Mitupela Lorraine i mekim wok bilong Jehova winim 60 yia olgeta, na planti taim mitupela i save tingim wok mitupela i bin mekim. Mipela i bin larim Jehova long yusim oganaisesen bilong em long stiaim mipela, na mipela i amamas tru long ol blesing mipela i bin kisim. Long nau, mi no inap raun moa long olgeta hap bilong graun olsem bipo mi bin mekim, tasol mi inap mekim wok long olgeta de olsem helpim bilong Gavening Bodi, na mi wok wantaim Komiti Bilong Ol Kodineta na Sevis Komiti. Mi amamas olsem long dispela rot mi inap mekim liklik wok bilong helpim lain brata i stap long olgeta hap. Mitupela i amamas tru long lukim olsem planti yangpela man na yangpela meri i insait long fultaim sevis na ol i gat wankain tingting olsem Aisaia, em i tok: “Mi stap! Salim mi.” (Ais. 6:8, NW) Pasin bilong ol dispela yangpela man na meri i stret wantaim tok em wasman sekit i bin mekim long mi long bipo, em i tok: “Yu mas insait nau long fultaim sevis. Yu no save long ol narapela asainmen yu bai kisim long bihain.”
a Bilong ritim laip stori bilong sampela bilong ol dispela brata, lukim ol dispela Wastaua: Thomas J. Sullivan (Ogas 15, 1965, tok Inglis); Klaus Jensen (Oktoba 15, 1969, tok Inglis); Max Larson (Ogas 1, 1990); Hugo Riemer (Septemba 15, 1964, tok Inglis); na Grant Suiter (Septemba 1, 1983, tok Inglis).