MI NO wari long liklik lain tasol i kam harim tok bilong mi long 1957. Mi man bilong sem nogut tru. Taim mi yangpela yet, mi save hait taim ol visita i kam long haus bilong mipela, maski mi save long ol.

Ating bai yu kirap nogut long save olsem klostu olgeta asainmen mi bin kisim long oganaisesen bilong Jehova, em ol kain wok we mi mas toktok wantaim planti man—ol pren na ol man mi no save long ol. Tasol mi save sem yet na pilim olsem mi no inap mekim gut wok, olsem na maski ol gutpela samting i kamap long wok mi bin mekim, mi no inap tok olsem mi yet i bin mekim dispela wok. Mi bin lukim olsem tok promis bilong Jehova i tru, em i tok: “Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.” (Ais. 41:10) Nambawan bikpela rot we Jehova i bin helpim mi, em long rot bilong sapot i kam long ol wanbilip Kristen. Mi laik stori long sampela bilong ol, kirap long taim mi liklik yet.

Long 1943 samting, long wanpela Sande moning taim san i lait gut tru, Elsie Huntingford i kam long fam bilong mipela long saut-wes Ontario. Mama i opim dua, na Papa em man bilong sem wankain olsem mi, olsem na em i sindaun wantaim mi insait long haus  na putim yau. Papa i ting olsem Sista Huntingford i kam bilong salim ol samting na Mama bai baim samting mipela i no nidim, olsem na Papa i go long dua na i tok mipela i no laikim samting em i bringim. Sista Huntingford i tok: “Yupela i no laik stadi long Baibel, a?” Papa i tok: “Nogat, i no olsem, dispela em samting mipela i laikim.”

Sista Huntingford i kam long gutpela taim stret. Papamama em ol strongpela memba bilong Yunaitet Sios bilong Kanada, tasol ol i bin lusim dispela sios. Wai? Bikos insait long sios, pasto i putim pepa we ol i listim nem bilong ol man i givim donesen na hamas mani ol i bin givim; man i givim bikpela donesen, nem bilong em i stap antap long lista. Papamama bilong mi i no gat planti mani, olsem na planti taim nem bilong ol i stap daunbilo long lista, na ol elda bilong sios i putim presa long ol i mas givim sampela mani moa. Narapela pasto i laik holim yet wok bilong em, olsem na em i tokaut stret olsem em i skulim sios long ol samting em yet i no bilip long en. Olsem na mipela i lusim sios, tasol mipela i painim yet rot bilong go klostu long God.

Gavman bilong Kanada i tambuim wok bilong ol Witnes Bilong Jehova, olsem na taim Sista Huntingford i stadi wantaim famili bilong mipela, em i yusim Baibel na sampela tok em i bin raitim long wanpela liklik blakpela buk. Bihain, em i luksave olsem mipela i no inap putim em long han bilong ol bikman bilong gavman, olsem na em i bringim ol buk na nius bilong Baibel i kam long mipela. Bihain long olgeta wan wan stadi, mipela i save haitim gut ol dispela buk na nius. a

Maski ol man i birua na i gat ol narapela hevi, Sista Huntingford i givim bel tru long autim gutnius. Dispela pasin bilong em i kirapim mi long kisim tok i tru. Inap 1-pela yia bihain long papamama i baptais na kamap Witnes Bilong Jehova, mi baptais long soim olsem mi dediket pinis long God. Mi baptais long Februeri 27, 1949, long traipela metal dis ol fama i save yusim long givim wara long ol animal. Mi gat 17 krismas. Bihain long dispela, mi tingting strong long insait long fultaim sevis.

Mi surik liklik long kirap hariap long mekim wok painia. Inap liklik haptaim, mi wok long benk na  long wanpela ofis, bikos mi tingting olsem mi mas kisim sampela mani bilong sapotim wok painia bilong mi. Tasol mi yangpela man, olsem na mi tromoi mani hariap long baim ol samting. Wanpela brata, nem bilong em Ted Sargent, em i kirapim mi long bilip long Jehova na no ken pret. (1 Sto. 28:10) Dispela gutpela tok i mekim na mi kirap mekim wok painia long Novemba 1951. Mi gat 40 dola tasol, olpela baisikol, na nupela beg, tasol oltaim Jehova i lukautim mi na mi gat ol samting mi nidim. Mi amamas tru olsem Ted i bin kirapim mi long mekim wok painia! Dispela i opim rot na mi inap kisim sampela moa blesing.

Long wanpela apinun long Ogas 1952, ol brata long brens ofis bilong ol Witnes Bilong Jehova long Toronto, Kanada, i ringim mi na singautim mi long kirap wok long Betel long Septemba. Maski mi man bilong sem na mi no bin visitim brens ofis bipo, mi amamas long go bikos ol narapela painia i bin tokim mi long planti gutpela samting long Betel. Taim mi go, wantu mi amamas long stap long Betel.

Tupela yia bihain long mi kam long Betel, mi kisim wok em Bill Yacos i bin mekim bipo olsem kongrigesen sevan (nau ol i kolim olsem kodineta bilong lain elda) long wanpela kongrigesen long Toronto. Mi gat 23 krismas tasol, na mi pilim olsem mi wanpela boi i kam long fam na mi no gat planti save. Tasol long pasin daun na gutpela pasin, Brata Yacos i lainim mi long ol samting mi mas mekim. Na Jehova i helpim mi gut tru.

Brata Yacos em strongpela man, na em man bilong smail, na em i save tingim tru ol man. Em i laikim tru ol brata, na ol tu i laikim em. Oltaim em i save visitim ol long haus bilong ol, long gutpela taim na long taim bilong hevi. Bill Yacos i strongim mi long bihainim pasin bilong em na wok wantaim ol brata na sista long wok autim tok. Em i tok: “Ken, soim ol brata olsem yu tingim ol. Dispela bai karamapim planti pasin kranki.”

Kirap long Janueri 1957, Jehova i helpim mi long wanpela spesel wei. Long dispela mun mi maritim Evelyn, em i bin gretiuet long namba 14 klas bilong Skul Gileat. Paslain long mipela i marit, em i bin mekim wok autim tok long provins Quebec we ol i save mekim tokples Frans. Long dispela taim bipo, Misin Katolik i bosim Quebec, olsem na asainmen bilong Evelyn i no isi, tasol em i stap gut long en na long Jehova.

Evelyn i bin stap gut long mi tu. (Efe. 5:31) Bihain stret long mipela i marit, wanpela traim i painim em! Mipela i bin plen long go raun long Florida, Amerika, tasol long de bihain long weding bilong mipela, brens i askim mi long kam long Kanada Betel long wanpela miting we bai stap inap 1-pela wik. Dispela miting i bagarapim plen bilong mipela, tasol mitupela Evelyn i laik mekim ol samting Jehova i askim mipela long mekim. Olsem na mipela i kenselim hanimun bilong mipela. Long dispela wik, Evelyn i autim tok klostu long brens ofis. Maski dispela teritori i narapela kain olgeta long teritori bilong Quebec, em i no givap.

Long pinis bilong dispela wik, mi kisim asainmen mi kirap nogut long en—ol i makim mi long kamap wasman sekit long noten Ontario. Mi marit  nupela, mi gat 25 krismas tasol, na mi no gat planti save long mekim wok, tasol mipela i bilip long Jehova na i go. Long taim bilong bikpela kol long Kanada, mipela i kalap long tren wantaim sampela narapela wasman raun husat i laik go bek long asainmen bilong ol. Ol i strongim tru mipela! Wanpela brata i strong long mipela i stap long hap bilong tren we em i bin bukim bilong em yet, we ol pasindia i ken slip, bambai mitupela Evelyn i no ken sindaun inap long nait olgeta. Long neks moning, inap 15 de bihain long weding bilong mipela, mipela i visitim liklik grup long Hornepayne, olsem mi stori long en long pastaim.

Sampela senis moa i painim mitupela Evelyn. Taim mipela i mekim wok distrik long 1960, mi kisim invatesen bilong i go long namba 36 klas bilong Skul Gileat. Dispela kos em bilong 10-pela mun na em i kirap long Februeri 1961 long Brooklyn, New York. Mi amamas tru, tasol ol i no invaitim Evelyn, olsem na amamas bilong mi i go daun liklik. Tasol, olsem ol narapela meri marit, Evelyn i mas raitim pas we em i tok orait long mitupela i stap seperet inap 10-pela mun. Evelyn i krai, tasol mipela i wanbel olsem mi mas i go long dispela skul, na em i amamas long mi bai kisim gutpela trening long Gileat.

Taim mi stap long skul, Evelyn i wok long brens bilong Kanada. Em i serim rum wantaim sista Margaret Lovell, em wanpela bilong lain Kristen God i bin makim. Mitupela Evelyn i misim tru narapela narapela, tasol Jehova i helpim mipela na mipela i mekim gut asainmen bilong mipela. Mi pilim tru pasin bilong Evelyn long redi long stap seperet bambai mipela i ken mekim gut wok bilong Jehova na oganaisesen bilong em.

Taim mi stap long skul Gileat inap 3-pela mun pinis, Brata Nathan Knorr husat i go pas long lukautim wok long olgeta hap, em i givim narapela kain invatesen long mi. Em i askim mi sapos mi orait long lusim Skul Gileat long dispela taim na go bek long Kanada na mekim wok tisa long Skul Bilong Wok Kingdom long brens ofis. Brata Knorr i tok, i no olsem mi mas ekseptim dispela asainmen. Sapos mi laik, mi ken pinisim Skul Gileat na bihain mi inap kisim asainmen olsem misineri. Em i tok tu olsem sapos mi go bek long Kanada, ating ol bai i no inap invaitim mi gen long go long Skul Gileat, na bihain bai mi kisim gen asainmen long mekim wok autim tok long Kanada. Em i larim mi long wokim disisen long dispela samting bihain long mi toktok wantaim meri bilong mi.

Evelyn i tokim mi pinis long tingting em i gat long ol asainmen i kam long oganaisesen, olsem na kwiktaim mi tokim Brata Knorr olsem, “Mipela i amamas long mekim wanem ol wok oganaisesen bilong Jehova i laik bai mipela i mekim.” Oltaim mipela i bin pilim olsem maski mipela i gat laik bilong mipela yet, mipela i mas i go long olgeta hap oganaisesen bilong Jehova i makim mipela long i go long en.

Olsem na long Epril 1961, mi lusim Brooklyn na go bek long Kanada bilong mekim wok tisa long  Skul Bilong Wok Kingdom. Bihain, mipela i kamap memba bilong Betel famili. Bihain gen, mi kirap nogut long kisim invatesen bilong i go long klas namba 40 bilong Skul Gileat, em i kirap long 1965. Long dispela taim tu, Evelyn i mas raitim pas bilong tok olsem em i orait long mipela i stap seperet inap sampela haptaim. Tasol sampela wik bihain, mitupela wantaim i amamas tru taim em i kisim invatesen bilong i go wantaim mi long skul.

Taim mipela i kamap pinis long Skul Gileat, Brata Knorr i tokim mipela olsem ol sumatin husat i go long klas bilong lainim tokples Frans olsem mipela i bin mekim, ol bai go long Afrika. Tasol long gretiuesen bilong mipela, ol i makim mipela long go long Kanada! Ol i makim mi long kamap wasman bilong brens (nau ol i kolim olsem kodineta bilong Brens Komiti). Mi gat 34 krismas tasol, na mi tokim Brata Knorr olsem, “Mi yangpela yet.” Tasol em i strongim bel bilong mi. Stat long taim mi kirap mekim dispela wok, mi askim ol brata long Betel husat i gat bikpela krismas na bikpela save moa, long givim tingting long mi paslain long mi mekim ol bikpela disisen.

Taim mi wok long Betel, dispela i bin opim rot long mi inap kisim skul long ol narapela. Mi rispektim na amamas tru long ol arapela memba bilong Brens Komiti. Na tu, mi bin kisim gutpela skul long planti handret gutpela man na meri Kristen—ol yangpela na lapun—em mipela i bin bungim hia long brens na long narapela narapela kongrigesen mipela i bin go long en.

Taim mi wok long Betel, rot i op long mi inap skulim ol narapela na strongim bilip bilong ol. Aposel Pol i tokim Timoti: “Yu mas bihainim yet ol samting ol arapela i bin lainim yu long en.” Em i tok tu olsem: “Ol tok yu bin harim long mi, na planti arapela tu i bin harim, dispela tok yu mas givim long ol man i save holimpas bilip. Na ol bai inap tru long winim mak bilong skulim ol arapela.” (2 Tim. 2:2; 3:14) Sampela taim ol wanbilip Kristen i askim mi long ol lesen mi bin lainim insait long 57 yia mi wok long Betel. Mi save tok, “Yu mas amamas na hariap long mekim ol samting oganaisesen bilong Jehova i laik bai yu mekim, na askim Jehova long helpim yu.”

I olsem asde tasol mi kam long Betel long fes taim olsem yangpela man bilong sem na i no gat bikpela save. Tasol insait long olgeta dispela yia, Jehova i bin ‘sambai long mi.’ Long rot bilong gutpela pasin na pasin helpim ol wanbilip i bin givim long mi long taim stret, God i wok yet long tokim mi olsem: ‘Yu no ken pret. Bai mi helpim yu.’—Ais. 41:13.