1. Taim lain Israel i tromoi lotu i tru, lain bilong wanem oganaisesen i senisim ol na kamap lain bilong Jehova? (Lukim piksa long kirap bilong stadi.)

 JEHOVA yet i kirapim kongrigesen Kristen long taim bilong ol aposel na Em yet i kirapim gen lotu i tru long taim bilong yumi. Olsem yumi bin skelim long stadi i kamap paslain, lain Israel i tromoi lotu i tru, olsem na oganaisesen em ol disaipel bilong Krais long pastaim i insait long en, ol i senisim lain Israel na kamap lain bilong Jehova. God i laikim tumas dispela nupela oganaisesen, olsem na lain bilong dispela oganaisesen i abrusim bagarap bilong Jerusalem long 70 C.E. (Luk 21:20, 21) Ol samting i kamap long taim bilong ol aposel i olsem piksa bilong ol samting bai kamap long ol wokman bilong Jehova long nau. Klostu nau dispela haptaim bilong Satan bai pinis, tasol oganaisesen bilong God bai abrusim bagarap long haptaim bilong las de. (2 Tim. 3:1) Wai na yumi ken bilip olsem dispela samting bai kamap?

2. Jisas i tok “traipela hevi tru” bai i wanem kain? “Traipela hevi tru” bai kirap olsem wanem?

² Jisas i stori long ol samting bai kamap bilong soim olsem em i kam i stap pinis na haptaim bilong nau i laik pinis. Em i tok: “Long dispela taim bai i gat traipela hevi tru. Kirap long taim God i wokim graun na i kam inap long nau, kain hevi olsem i no bin kamap, nogat,  na bai i no inap kamap gen.” (Mat. 24:3, 21) Dispela traipela hevi tru bai kirap taim Jehova i yusim lain politik long bagarapim “Bikpela Babilon,” em olgeta lotu giaman long graun. (Rev. 17:3-5, 16) Bihain, wanem samting bai kamap?

3. Taim ol lotu giaman i bagarap pinis, Satan na lain bilong em bai i laik mekim wanem long lain bilong Jehova?

³ Taim ol lotu giaman i bagarap pinis, Satan na lain bilong em long graun bai kirapim pait long ol wokman bilong Jehova. Baibel i tok profet long samting em “Gok, bilong graun Magok” bai mekim, olsem: “Taim mi salim yu wantaim ol ami bilong yu na ol soldia bilong ol arapela kantri i go pait long ol dispela manmeri, bai yupela i kamap long ol olsem bikpela win na ren na bai yupela i karamapim graun bilong ol, olsem bikpela klaut.” Ol Witnes Bilong Jehova i no gat lain ami o lain polis bilong ol na ol i lain bilong stap bel isi, olsem na Satan bai pilim olsem em inap tru long bagarapim ol. Tasol Satan bai lus tru!—Ese. 38:1, 2, 9-12.

4, 5. Jehova bai mekim wanem taim Satan i laik bagarapim ol wokman bilong Em?

⁴ God bai mekim wanem taim Satan i laik bagarapim lain bilong God? Jehova bai sambai long ol. Em bai soim olsem em i gat rait long stap King Bilong Heven na Graun. Taim ol birua i laik pait long ol wokman bilong Jehova, i olsem ol i laik pait long Jehova. (Ritim Sekaraia 2:8.) a Olsem na Papa bilong yumi long heven bai hariap long mekim samting bilong kisim bek yumi. Orait, taim em i kisim bek yumi, graun bilong Satan bai bagarap long Armagedon, em “pait long dispela bikpela de bilong God i Gat Olgeta Strong.”—Rev. 16:14, 16.

⁵ Baibel i tok profet long Armagedon olsem: “‘Bikpela i laik kotim olgeta manmeri bilong graun. Na em bai i salim ol birua i go kilim i dai ol manmeri i save mekim pasin nogut. Dispela em i tok bilong Bikpela.’ Bikpela I Gat Olgeta Strong i tok moa olsem, ‘Harim. Olgeta kantri bai i bagarap. Dispela bai i stat long wanpela kantri na bai i go i go na inapim olgeta kantri. Dispela bagarap i olsem traipela win na ren i kirap long ol longwe ples na i raun long olgeta hap bilong graun.’ Na long dispela taim Bikpela bai i kilim i dai planti manmeri moa na bai bodi bilong ol i stap nabaut long olgeta hap bilong graun. Na bai i no gat man i stap bilong krai sori long ol na bilong bungim ol bodi bilong ol na planim ol. Nogat. Ol bodi bai i stap nabaut long graun olsem pekpek bilong dok.” (Jer. 25:31-33) Pait bilong Armagedon bai pinisim haptaim nogut bilong nau. Graun bilong Satan bai pinis, tasol hap bilong oganaisesen bilong Jehova long graun bai abrusim bagarap.

6, 7. (a) Dispela “bikpela lain manmeri” i kam long wanem hap? (b) Wanem ol gutpela samting i kamap long nau?

⁶ Hap bilong oganaisesen bilong God long graun i stap yet na i kamap bikpela, long wanem, God i orait long ol manmeri i stap long dispela oganaisesen. Baibel i tok: “Ai bilong Jehova i save lukluk long ol stretpela man, na em i save putim yau long ol taim ol i beten strong long em.” (1 Pita 3:12) Ol dispela stretpela man em ol “bikpela lain manmeri” husat bai “winim dispela traipela hevi tru.” (Rev. 7:9, 14) Ol i no wanpela lain nating, nogat. Ol i “bikpela lain manmeri” tru. Olsem wanem? Yu inap lukim yu yet i stap wantaim lain i abrusim bagarap long taim bilong “traipela hevi tru”?

⁷ Dispela bikpela lain i kam long wanem hap? Ol i kam bung wantaim bikos Jisas i tok profet olsem dispela samting bai kamap bilong soim olsem em i kam i stap. Em i tok: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.” (Mat.  24:14) Long dispela haptaim bilong las de, dispela em nambawan bikpela wok em oganaisesen bilong God i mekim. Ol Witnes Bilong Jehova i autim tok na skulim ol man long olgeta hap, na dispela i helpim planti milion man long lotuim God “long spirit na long pasin i tru.” (Jon 4:23, 24) Olsem: Insait long 10 pela yia i go pinis—namel long sevis yia bilong 2003 na 2012—winim 2 milion, 7 handret na 7 tausen manmeri i kisim baptais bilong soim olsem ol i dediket long God. Long olgeta hap bilong graun long nau, i gat moa long 7 milion, 9 handret tausen Witnes, na planti milion man moa i save bung wantaim ol long mekim bung bilong Memorial long olgeta yia. Planti lain moa i kam bung wantaim yumi, tasol yumi no apim nem bilong yumi yet, long wanem, “God i mekim kaikai i gro.” (1 Kor. 3:5-7) Yumi lukim klia tru olsem namba bilong dispela bikpela lain i wok long kamap bikpela moa long olgeta yia.

8. Wanem samting i mekim na namba bilong ol man long oganaisesen bilong Jehova long nau i wok long i go bikpela?

⁸ Namba bilong ol wokman bilong God i wok long i go bikpela bikos Jehova yet i sambai long ol Witnes bilong em. (Ritim Aisaia 43:10-12.) Baibel i bin tok profet olsem: “Ol lain i liklik tru bai ol i kamap planti moa olsem ol manmeri bilong ol bikpela na strongpela kantri. Mi Bikpela, mi tok, ol dispela samting bai i kamap hariap long taim mi makim pinis.” (Ais. 60:22) Long bipo, ol Kristen God i bin makim na ol i stap yet long graun, namba bilong ol i “liklik tru,” tasol bihain namba bilong ol i kamap bikpela taim ol arapela manmeri long lain Israel bilong God, ol i bilip na kam insait long oganaisesen bilong God. (Gal. 6:16) Jehova i wok long blesim lain bilong em, olsem na namba bilong bikpela lain manmeri i wok long i go antap.

9. Sapos yumi laik kisim gutpela laip long bihain olsem Baibel i tok promis long en, orait yumi mas mekim wanem?

⁹ Maski yumi bilong lain Kristen God i bin makim o yumi insait long bikpela lain, yumi inap kisim gutpela laip long bihain olsem Baibel i tok promis long en. Olsem na yumi mas mekim ol samting Jehova i laik bai yumi mekim. (Ais. 48:17, 18) Tingim lain Israel taim ol i stap aninit long Lo Bilong Moses. Wanpela wok bilong Lo em bilong lukautim lain Israel. Olsem: Em i kamapim ol stretpela lo long pasin i mas stap namel long man na meri, wok bisnis, wok bilong lukautim pikinini, na pasin ol i mas mekim long ol narapela. (Kis. 20:14; Wkp. 19:18, 35-37; Lo 6:6-9) Taim yumi mekim ol samting God i laik yumi mas mekim, dispela bai helpim yumi long wankain pasin olsem ol lo bilong em i bin helpim lain Israel, na yumi no bel hevi long mekim laik bilong God. (Ritim 1 Jon 5:3.) Wankain olsem Lo i bin lukautim lain Israel, taim yumi bihainim ol lo na ol stiatok bilong God Jehova, dispela i save lukautim yumi, na tu, em i strongim yumi na “bai bilip bilong [yumi] i ken i stap gut.”—Tai. 1:13.

10. Wai na yumi mas makim haptaim bilong stadi long Baibel na mekim Famili Lotu long olgeta wik?

¹⁰ Hap bilong oganaisesen bilong Jehova long graun i wok long mekim planti gutpela wok. Olsem: Save bilong yumi long tok i tru bilong Baibel i wok long kamap klia moa. Yumi no kirap nogut long dispela bikos “rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.” (Snd. 4:18, 19) Tasol yumi ken askim yumi yet olsem: ‘Mi wok long bihainim ol nupela save yumi kisim long ol tok i tru bilong Baibel? Mi save ritim Baibel long olgeta de? Mi save amamas long ritim ol buk na nius bilong yumi? Mi na famili bilong mi i save mekim Famili Lotu long olgeta wik?’ Planti bilong yumi bai tok olsem i no hatwok tumas long mekim ol dispela samting. Tasol yumi yet i mas makim sampela haptaim long mekim ol dispela samting. Long nau, em i bikpela samting tru long yumi mas kisim stretpela save bilong Baibel, bihainim, na kamap strong long bilip, bikos traipela hevi tru i wok long kam klostu moa!

11. Olsem wanem ol bikpela bung bilong bipo i helpim lain Israel? Olsem wanem ol miting na ol kibung i kamap long nau i helpim yumi?

 ¹¹ Oganaisesen bilong Jehova i laik helpim yumi taim em i kirapim yumi long bihainim tok bilong aposel Pol, olsem: “Yumi wan wan i mas tingim ol arapela namel long yumi, na kirapim ol long mekim pasin laikim na mekim ol gutpela wok. Yumi no ken lusim pasin bilong bung wantaim, olsem sampela i save mekim, nogat. Yumi mas strongim bel bilong narapela narapela na mekim moa yet taim yumi lukim dispela de i kam klostu.” (Hib. 10:24, 25) Ol bikpela bung bilong olgeta yia na ol arapela bung bilong lotu i bin helpim ol Israel long stap strong long bilip. Na tu, ol kain bung olsem Ol Bikpela De Bilong i Stap Long Haus Win long taim bilong Nehemia, em taim bilong amamas. (Kis. 23:15, 16; Neh. 8:9-18) Taim yumi go long ol miting na ol kibung bilong yumi, dispela i save helpim yumi tu long i stap amamas na stap strong long bilip. Olsem na yumi no ken tru lusim pasin bilong i go long ol miting na ol kibung.—Tai. 2:2.

12. Yumi mas pilim olsem wanem long wok bilong autim tok bilong Kingdom?

¹² Yumi stap long oganaisesen bilong God, olsem na yumi amamas long mekim “wok bilong autim gutnius bilong God.” (Rom 15:16) Taim yumi mekim dispela wok, yumi stap olsem “ol wanwok” bilong Jehova, em “God holi.” (1 Kor. 3:9; 1 Pita 1:15) Taim yumi autim gutnius, dispela i mekim holi nem bilong Jehova. Yumi holim gutpela wok tru long autim “gutnius i nambawan tru na i kam long God bilong amamas.”—1 Tim. 1:11.

13. Yumi mas mekim wanem na bai yumi inap stap strong long bilip na kisim laip?

¹³ God i laik bai yumi pas gut wantaim em na mekim ol wok bilong sapotim oganaisesen bilong em, na dispela bai helpim yumi long stap strong long bilip. Moses i tokim lain Israel olsem: “I gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. Na bai mi singautim heven na graun long lukim yupela na save long wanem rot yupela i makim. Tasol mi laikim yupela i mas bihainim rot bilong i stap gut. Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim. Olsem na bai yupela na ol lain pikinini bilong yupela inap i stap longpela taim long dispela kantri Bikpela i bin promis long givim long ol tumbuna bilong yupela, Abraham na Aisak na Jekop.” (Lo 30:19, 20) Sapos yumi laik kisim laip, orait yumi mas mekim laik bilong Jehova, laikim em, bihainim tok bilong em, na pas gut wantaim em.

14. Wanpela brata i bin holim wanem tingting long hap bilong oganaisesen bilong God long graun?

¹⁴ Brata Pryce Hughes i bin strongim tingting na em i pas gut wantaim God na wok gut wantaim oganaisesen bilong Em, na em i tok: “Mi amamas tru olsem paslain liklik long 1914, mi kisim save long ol samting em Jehova i tingting pinis long mekim . . . Mi pilim olsem em i bikpela samting tru long mi mas pas gut wantaim hap bilong oganaisesen bilong Jehova long graun. Samting i painim mi long pastaim i skulim mi olsem, em i no stretpela tingting long bilip long save bilong ol man. Taim mi wokim tingting pinis long dispela samting, mi tingting strong long pas gut wantaim dispela oganaisesen. Mi mas mekim ol dispela samting na bai Jehova i ken orait long mi na blesim mi.”

15. Kolim wanpela stori bilong Baibel we i kamapim klia tingting yumi mas i gat taim ol senis i kamap long save bilong yumi long ol tok bilong Baibel.

¹⁵ Sapos yumi olgeta wan wan i laik bai Jehova i orait long yumi na blesim yumi, orait yumi mas sapotim oganaisesen bilong em na orait long ol nupela save yumi kisim long tok bilong Baibel. Tingim: Bihain long dai bilong Jisas, planti tausen Juda husat i kamap Kristen, ol i givim bel tru long bihainim Lo Bilong Moses na ol i hatwok  long lusim dispela pasin. (Apo. 21:17-20) Tasol pas em Pol i raitim i go long ol Hibru i helpim ol long luksave olsem ol i bin kamap klin, na i no long rot bilong “ol sakrifais ol i mekim olsem Lo i makim,” nogat, ol i kamap klin “long rot bilong ofa bilong bodi bilong Jisas Krais, em ofa em i bin mekim wanpela taim tasol.” (Hib. 10:5-10) Planti bilong ol dispela Juda Kristen i bin senisim tingting bilong ol na kamap strong moa long bilip. Yumi tu i mas stadi gut, na redi long kisim ol nupela senis i kamap long save bilong yumi long Tok Bilong God na wok bilong yumi long autim tok.

16. (a) Wanem ol blesing bai mekim yumi amamas taim yumi kisim laip long nupela taim? (b) Yu yet i laik tru long kisim wanem blesing long nupela taim?

¹⁶ Jehova bai wok yet long blesim olgeta man husat i stap gut long em na oganaisesen bilong em. Ol Kristen God i bin makim em ol i stap gut long God, ol bai kisim gutpela blesing tru long mekim wok king wantaim Krais long heven. (Rom 8:16, 17) Sapos yumi bilip na wet long kisim laip long graun, tingim bikpela amamas yumi bai kisim taim Paradais i kamap long graun. Yumi stap long oganaisesen bilong Jehova, olsem na yumi amamas tru long tokim ol narapela long tok promis bilong God long kamapim nupela taim! (2 Pita 3:13) Song 37:11 i tok: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” Ol “bai i wokim ol haus na stap long ol” na ol bai “amamas long ol samting ol yet i bin hatwok long kamapim.” (Ais. 65:21, 22) Hevi bilong i stap rabis na sot long kaikai bai pinis olgeta, na i no gat man bai mekim hatpela pasin na daunim ol narapela. (Sng. 72:13-16) Bikpela Babilon bai i no inap moa long giamanim ol man bikos em bai i no stap moa. (Rev. 18:8, 21) Ol man i dai pinis ol bai kirap bek na ol inap kisim laip oltaim. (Ais. 25:8; Apo. 24:15) Planti gutpela samting bai painim ol man husat i dediket pinis long Jehova! Sapos yumi olgeta wan wan i laik lukim truim bilong ol dispela tok promis, orait yumi mas wok yet long kamap strong long bilip, na oltaim yumi mas wok gut wantaim oganaisesen bilong God.

17. Yumi mas holim wanem tingting long oganaisesen bilong Jehova na pasin bilong lotuim Em?

¹⁷ Klostu nau, dispela haptaim bilong nau bai pinis, olsem na yumi mas stap strong yet long bilip na pilim tru pasin em God i makim bilong lotuim em. Devit i bin holim dispela tingting, na em i singim song olsem: “Mi bin askim God long wanpela samting tasol, na mi laikim tumas bai em i mekim olsem. Mi askim em bai mi ken i stap long haus bilong em inap olgeta de mi gat laip. Mi laik amamas long em i gutpela tumas long mi. Na mi laik askim em long soim mi gutpela rot.” (Sng. 27:4) Yumi olgeta i mas pas gut wantaim God, wok gut wantaim lain bilong em, na wok gut yet wantaim oganaisesen bilong Jehova.