Helpim Ol Wanbilip Husat i Divos—Hau?
Ating yu save long wanpela o sampela manmeri em ol i divos pinis bikos planti manmeri i save divos. Olsem: Wok painimaut long Polan i soim olsem ol manmeri husat i gat 30 krismas na marit bilong ol i stap inap 3-pela yia pinis, ol inap divos paslain long ol i winim 6-pela yia. Tasol i no dispela lain tasol inap divos, nogat.
Wanpela lain (Institute for Family Policy) long Spen i mekim wok painimaut na ol i tok, “ol ripot [long Yurop] i soim olsem namel long ol manmeri i marit, 50 pesen bilong ol bai divos.” Wankain samting i kamap long ol arapela kantri i gat planti wok bisnis.
KAIN KAIN FILINGS
Wanem samting i mekim na ol marit lain i divos? Wanpela savemeri bilong Isten Yurop husat i mekim wok bilong givim skultok long ol marit, em i tok: “Divos i soim klia olsem hevi i kamap pinis—tupela poroman marit i no stap wanbel moa, na ol i bin seperet, na dispela i givim bikpela bel hevi long ol.” Dispela savemeri i tok moa olsem, bihain long dispela hevi i kamap, ol manmeri i save “kros, rigret, bel hevi, na pilim sem.” Sampela taim dispela i save kirapim ol long tingting long suasaid. Dispela savemeri i tok: “Taim kot i tok orait long tupela marit i divos, narapela hevi gen i save kamap. Ol i pilim olsem ol i no stap amamas moa na ol i stap wanpis, na ol inap tingting olsem: ‘Nau mi divos pinis, na mi husat tru? Mi stap laip long mekim wanem?’”
Wanpela meri nem bilong em Ewa, em i tingim bek samting i bin kamap sampela yia i go pinis, na em i tok: “Bihain long mi divos, ol neiba na ol poroman bilong mi i kolim mi olsem ‘divos meri,’ na dispela i mekim na mi pilim sem nogut tru. Mi belhat nogut tru. Mi gat 2-pela liklik pikinini, na mi mas mekim wok mama na wok papa wantaim.” a Adam i mekim wok elda inap 12-pela yia pinis, na em i tok: “Mi luk daun long mi yet na sampela taim mi save belhat nogut tru, na mi laik stap longwe long olgeta manmeri.”
HATWOK LONG KISIM BEK STRETPELA TINGTING
Sampela manmeri husat i bin divos, ol i tingting planti long ol samting bai painim ol long bihain, olsem na maski planti yia i lus pinis, ol i hatwok long kisim bek stretpela tingting. Ol inap kisim tingting olsem ol narapela i no tingim ol. Wanpela niusmeri husat i save raitim stori bilong ol marit i divos, em i tok olsem ol dispela marit i mas “senisim pasin bilong ol na lain long karim hevi.”
Wanpela man nem bilong em Stanisław, em i tok: “Taim mipela i divos, olpela meri bilong mi i pasim mi long lukim 2-pela liklik pikinini meri bilong mi. Dispela i mekim na mi pilim olsem i no gat man i tingim mi moa, na ating Jehova tu i givim baksait long mi. Mi no gat laik moa long stap laip.
Bihain mi luksave olsem mi no bin tingting stret.” Man bilong Wanda i bin divosim em na Wanda i tingting planti long laip bilong em long bihain, na em i tok: “Mi bin ting olsem bihain liklik, ol manmeri na ol wanbilip tu bai i no inap moa long tingim mi na ol pikinini bilong mi. Tasol nau mi lukim olsem ol bratasista i sambai long mipela, na ol i helpim mi taim mi wok strong long lukautim ol pikinini na bai ol i ken lotuim Jehova.”Ol kain tok olsem i helpim yu long luksave olsem bihain long ol manmeri i divos, tingting kranki i save daunim ol. Ol inap kisim tingting kranki long ol yet, na pilim olsem ol i no gutpela moa na i no gat wok long ol arapela i tingim ol. Na tu, ol inap sutim tok long ol arapela. Dispela inap mekim na ol i ting olsem ol bratasista long kongrigesen i no gat pasin laikim na pasin sori. Tasol ekspiriens bilong Stanisław na Wanda i soim olsem ol manmeri em poroman marit i bin divosim ol, ol inap luksave olsem ol bratasista i tingim tru ol. Ating pastaim ol i no luksave, tasol bihain ol inap luksave.
PILIM OLSEM OL I STAP WANPIS NA OL ARAPELA I SAKIM OL
Yumi mas tingim olsem, maski yumi wok strong long helpim ol wanbilip husat i bin divos, sampela taim ol inap bel hevi long i stap wanpis. Ol sista husat i divos, ol inap pilim olsem wan wan bratasista tasol i tingim ol. Wanpela sista nem bilong em Alicja, em i tok: “Inap 8-pela yia i go pinis mi bin divos. Tasol sampela taim mi save pilim olsem mi no gat gutnem. Long kain taim olsem, mi save stap wanpis na mi save krai na sori long mi yet.”
Ol manmeri husat i divos, em nomol long ol bai pilim olsem, tasol Baibel i kirapim ol long abrusim pasin bilong i stap wanpis. Sapos ol i no bihainim dispela tok kaunsel, dispela inap mekim na ol i sakim olgeta “gutpela tingting.” (Snd. 18:1) Sapos meri i bel hevi long em i stap wanpis, orait em i mas abrusim pasin bilong i go oltaim long wanpela man long kisim helpim, o sapos man i bel hevi long em i stap wanpis, orait em i mas abrusim pasin bilong i go oltaim long wanpela meri long kisim helpim. Long dispela rot, ol i no inap kisim tingting nogut long narapela narapela.
Taim ol wanbilip bilong yumi i divos, ol inap kisim kain kain tingting, kain olsem ol i tingting planti long ol samting bai painim ol long bihain na ol i pilim olsem ol i stap wanpis na ol arapela i sakim ol. Yumi luksave olsem planti manmeri i save kisim kain kain tingting kranki na i hatwok long daunim ol dispela tingting, olsem na yumi mas bihainim pasin bilong Jehova na helpim gut ol bratasista bilong yumi. (Sng. 55:22; 1 Pita 5:6, 7) Yumi ken bilip olsem ol bai amamas tru long olgeta kain helpim yumi givim long ol. Tru tumas, insait long kongrigesen ol inap kisim helpim i kam long ol pren tru!—Snd. 17:17; 18:24.
a Mipela i bin senisim sampela nem.