TAIM lain bilong God i lusim Babilon long 537 B.C.E., Jehova i lukautim ol taim ol i stap long rot i go long Jerusalem. Em i tokim ol: “Stretim gut rot, bilong ol manmeri bilong yupela i wok long kam bek. Redim gut rot bilong ol, na rausim ol ston i stap long rot.” (Ais. 62:10) Piksaim long tingting hau sampela Juda i bin mekim olsem. Ating sampela bilong ol i go pas na pulapim ol baret i stap long rot na stretim gut ol rot we i no gutpela tumas. Wok ol i mekim i helpim wanlain bilong ol husat i bihainim dispela rot na go bek long ples bilong ol.

Dispela stori inap helpim yumi long kliagut long olsem wanem yumi inap winim ol mak long sait bilong wok lotu. Jehova i laik bai olgeta wokman bilong em i bihainim dispela rot na i no gat wanpela samting i ken pasim ol. Baibel i tok: “Tingting gut long wokabaut bilong yu, na olgeta pasin bilong yu bai i kamap gutpela.” (Snd. 4:26) Maski sapos yu yangpela o nogat, em i savetingting long bihainim dispela skultok i kam long God.

Ating yu harim ol man i mekim kain tok olsem long wanpela tineja: ‘Planti gutpela samting i wok long kamap long em’ o ‘Em i save go long ol narapela kantri.’ Ol yangpela i gat gutpela helt, ol i smat tru long tingting, na ol i gat laik long mekim gut wok. Tok bilong Baibel i stret, em i tok: “Ol yangpela man i gat strong, na dispela i mekim ol manmeri i amamas long ol.” (Snd. 20:29) Sapos wanpela yangpela i yusim save na strong bilong em long mekim wok bilong Jehova, dispela yangpela bai winim ol mak bilong wok lotu na stap amamas tru.

Tasol ating yu luksave olsem ol manmeri bilong dispela graun i laikim tru save bilong ol yangpela. Taim yangpela Witnes i kisim ol gutpela mak long skul, ating man bilong givim skultok long ol sumatin, wanpela tisa, o narapela sumatin bai putim presa long yangpela Witnes long kisim bikpela skul na dispela bai opim rot long em inap kisim gutpela sindaun long dispela haptaim bilong nau. O sapos wanpela yangpela  brata o yangpela sista i save gut long spots, ating ol trena bai grisim em long insait long spots na kisim biknem. Kain samting olsem i bin painim yu? O yu save long wanpela husat i bungim kain hevi olsem? Wanem samting bai helpim wanpela Kristen long mekim gutpela disisen?

Tok bilong Baibel inap redim yu long wokabaut long nambawan gutpela rot i go long laip. Saveman 12:1 i tok: “God i bin wokim yumi olgeta. Olsem na long taim yupela i yangpela yet, yupela i mas tingim em.” Olsem wanem yu o ol narapela yangpela inap “tingim” Bikpela Krieta bilong yupela?

Tingim samting i bin kamap long Eric a long Wes Afrika. Em i save laikim tru soka. Taim Eric i gat 15 krismas, ol i makim em long pilai long nesenel tim. Dispela i makim olsem em inap i go kisim trening long Yurop, na ating em inap kisim biknem long spots. Tasol hau bai Eric i bihainim skultok bilong “tingim” Bikpela Krieta bilong em? Yu na ol narapela yangpela inap kisim wanem skul long samting i painim Eric?

Taim Eric i stap long skul, em i kirap stadi long Baibel wantaim ol Witnes Bilong Jehova. Em i kisim save olsem Krieta bilong yumi bai stretim olgeta hevi bilong ol man. Eric i luksave olsem em i bikpela samting long yusim taim na strong bilong em long mekim laik bilong God. Olsem na em i no wok strong long kisim biknem long spots. Em i kisim baptais na wok strong long sait bilong lotu. I no longtaim em i kamap kongrigesen sevan na bihain em i kisim invatesen long i go long Baibel Skul Bilong Ol Singel Brata.

Sapos Eric i bin insait tru long spots, ating em inap kisim biknem na planti mani kago. Tasol em i luksave olsem dispela stiatok bilong Baibel em i tru: “Ol maniman i ting, mani bilong ol i banisim ol, na bai ol i stap gut, olsem taun i gat strongpela banis.” (Snd. 18:11) Taim man i kisim planti mani kago, i luk olsem dispela inap lukautim em, tasol dispela em i wanpela driman nating. Tasol ol man husat i wok strong long kamap maniman, ol i save karim planti hevi, i olsem “ol i sutim ol yet long ol samting i givim pen long ol.”—1 Tim. 6:9, 10.

Yumi amamas long lukim olsem planti yangpela i insait long fultaim sevis na dispela i helpim ol long kisim gutpela sindaun na stap amamas. Eric i tok: “Mi joinim wanpela bikpela ‘tim’ bilong ol fultaim sevan bilong Jehova. Dispela em nambawan gutpela tim mi inap stap long en, na mi tenkyu long Jehova i soim mi long dispela wanpela rot tasol bilong i stap amamas tru na kisim gutpela sindaun.”

Olsem wanem long yu? Yu no ken tingting long kisim ol samting bilong dispela graun, nogat. I gutpela long yu mekim wok painia na dispela bai helpim yu long stretim “olgeta pasin bilong yu” long ai bilong Jehova.—Lukim blok “ Kisim Ol Gutpela Samting Yunivesiti i No Inap Givim.”

Taim tupela marit i go visitim brens ofis long Amerika, ol i luksave long amamas bilong ol lain husat i mekim wok bilong Jehova long Betel. Sista i tok: “Mipela i pilim olsem wok mipela i mekim em inap, na mipela i no laik mekim sampela wok moa.” Dispela tupela marit i mekim disisen long yusim sampela haptaim na strong bilong ol long mekim sampela bikpela wok moa bilong autim tok.

Dispela tupela marit i laik mekim ol senis we i hatwok tru long ol. Tasol ol i tingim tingim wanpela skripsa we i kamap long teks bilong de. Dispela skripsa i kam long Jon 8:31, we Jisas i tok: “Sapos yupela i holimpas tok bilong mi, orait yupela i disaipel tru bilong mi.” Ol i tingting olsem: “Maski mipela i lusim wanem ol samting, i stret tru long mipela i mekim olsem.” Ol i salim bikpela haus bilong ol, rausim ol samting ol i no nidim, na ol i go long wanpela kongrigesen i nidim helpim. Long nau, ol i mekim wok painia, na tu, ol i helpim wok bilong sanapim ol Haus Kingdom na volantia long taim bilong kibung distrik. Ol i pilim olsem wanem? “Mipela i kirap nogut olsem maski mipela i no gat planti mani kago, mipela i stap amamas na mipela i mekim samting em oganaisesen bilong Jehova i kirapim mipela long mekim.”

Solomon i tok: “Yu mas lukluk stret long rot yu laik i go long en. Yu no ken lukluk nabaut.” (Snd. 4:25) Wankain olsem draiva i lukluk stret long rot, yumi no ken larim ol narapela samting i pulim tingting bilong yumi na pasim yumi long putim na winim ol mak long sait bilong lotu.

Yu inap putim na winim wanem ol mak long sait bilong lotu? Em gutpela long yu putim mak long insait long fultaim sevis. Ating yu ken putim mak long wok wantaim kongrigesen i stap klostu na ol i nidim ol pablisa bilong helpim ol long inapim bikpela teritori  bilong ol. O ating yu ken wok wantaim wanpela kongrigesen i gat planti gutpela pablisa, tasol ol i sot long ol elda na kongrigesen sevan. Olsem wanem? Yu inap putim mak long mekim wanpela bilong ol dispela samting? Yu ken toktok long wasman sekit na painimaut sapos yu winim mak bilong mekim kain wok olsem. Sapos yu gat laik long i go long wanpela hap longwe long ples bilong yu, yu ken askim long kisim sampela save moa long ol kongrigesen i stap longwe na ol i nidim helpim. b

Yumi ken skelim gen stori i stap long Aisaia 62:10. Ating sampela lain Juda i bin wok strong long stretim gut rot i go bek long ples bilong ol, na bai lain bilong God inap i go kamap long ples ol i laik go long en. Sapos yu taitim bun long winim ol mak long mekim wok lotu, orait no ken givap. God inap helpim yu long winim ol dispela mak. Wok yet long askim Jehova long givim yu savetingting taim yu laik rausim ol samting i pasim rot bilong yu. Bihain, yu bai luksave long olsem wanem em i helpim yu long “tingting gut long wokabaut bilong yu.”—Snd. 4:26.