Baibel i no tambuim pasin bilong kukim bodi bilong man i dai pinis.

I gat sampela stori long Baibel long ol i bin kisim bodi o bun bilong ol man i dai pinis na kukim long paia. (Jos. 7:25; 2 Sto. 34:4, 5) Ating dispela i makim olsem ol i man nogut, olsem na ol i no inap planim ol long matmat. Tasol taim ol i kukim bodi bilong ol man, dispela i no makim olsem olgeta man i man nogut.

Dispela i kamap klia long dai bilong King Sol na 3-pela pikinini man bilong em. Fopela wantaim i dai taim ol i pait long ol Filistia. Wanpela pikinini bilong King Sol em Jonatan, em gutpela pren husat i save sapotim tru Devit. Ol strongpela man Israel long Jabes i kisim save long dispela samting, na ol i go kisim 4-pela bodi na kukim long paia, na planim ol bun. Bihain, Devit i litimapim nem bilong ol dispela man Israel long samting ol i mekim.—1 Sml. 31:2, 8-13; 2 Sml. 2:4-6.

Baibel i tok, God bai givim laip gen long ol man i dai pinis na ol bai kirap bek. Maski ol i kukim bodi bilong man o nogat, Jehova inap tru long givim laip gen long man wantaim nupela bodi. Taim King Nebukatnesar i tok long tromoi 3-pela man Hibru i go insait long bikpela paia, ol i no pret long paia bai kukim ol na ol i dai bikos ol i bilip olsem God inap kirapim bek ol. (Dan. 3:16-18) Wankain samting i bin painim ol gutpela wokman bilong Jehova, em ol Natsi i bin kalabusim ol na kilim ol i dai na kukim bodi bilong ol. Sampela wokman bilong God i bin i dai taim ol samting olsem bom i pairap na bodi bilong ol i paia na i pinis olgeta. Tasol yumi save tru olsem ol bai kirap bek.—Rev. 20:13.

Jehova i no gat wok long bungim gen ol hap hap bodi bilong man bambai em i ken kirapim bek dispela man, nogat. Dispela i kamap klia long olsem wanem God i kirapim bek ol Kristen em i bin makim na ol i kisim laip long heven. Wankain olsem Jisas husat “i kirap bek na i stap spirit long heven,” ol Kristen God i bin makim ol tu i kirap bek wantaim seim tingting na pasin, tasol ol i kisim bodi spirit. Ol i no kirap bek wantaim wanpela hap bodi bilong ol bilong graun.—1 Pita 3:18; 1 Kor. 15:42-53; 1 Jon 3:2.

Yumi bilip olsem ol daiman inap kirap bek, long wanem, yumi bilip olsem God inap tru na em i gat laik tumas long truim ol tok promis bilong em. (Apo. 24:15) Em tru olsem yumi no kliagut long olsem wanem God i bin wokim mirakel na kirapim bek ol man long bipo, o em bai mekim olsem wanem long bihain. Maski i olsem, yumi bilip tru long Jehova. Em i bin kirapim bek Jisas, na dispela i soim klia olsem “tru tru dispela samting bai kamap.”—Apo. 17:31; Luk 24:2, 3.

Ol Kristen i mas tingim gut pasin bilong ples, tingting bilong ol man, na lo em gavman i putim long samting ol i ken mekim long bodi bilong man i dai pinis. (2 Kor. 6:3, 4) Olsem na man yet o famili bilong em i ken mekim disisen long samting ol bai mekim long bodi, olsem ol bai kukim o nogat.