Olsem wanem? Yu bin ritim gut ol tok bilong ol nupela Wastaua? Yu ken traim bekim ol dispela askim:

Long Nisan 14, ol i mas kilim sipsip bilong Pasova long wanem taim?

Sampela Baibel i tok ol i mas kilim sipsip bilong Pasova “long apinun tru,” taim san i go daun pinis na klostu tru long taim bilong tudak. (Kis. 12:6)—12/15, pes 18-19.

Ol yangpela inap yusim wanem ol stiatok bilong Baibel long mekim ol gutpela disisen?

Tripela stiatok em olsem (1) Painim Kingdom Bilong God pastaim na stretpela pasin bilong em. (Mat. 6:19-34) (2) Kisim amamas long mekim wok bilong helpim ol narapela. (Apo. 20:35) (3) Amamas long mekim wok bilong God taim yu yangpela yet. (Sav. 12:1)—1/15, pes 19-20.

Kirap long 1914, wanem 4-pela man i sindaun long hos na raun i stap?

Jisas i sindaun long waitpela hos, na em i bin rausim Satan na ol ensel nogut long heven. Man i sindaun long retpela hos i makim ol woa i bagarapim sindaun bilong ol man. Man i sindaun long blakpela hos i makim bikpela hangre. Man i sindaun long yelopela hos i bringim dai i kam long rot bilong ol bikpela sik, na kilim i dai planti milion manmeri. (Rev. 6:2-8)—2/1, pes 6-7.

Marit bilong Pikinini Sipsip bai kamap long wanem taim? (Rev. 19:7)

Marit bilong Pikinini Sipsip bai kamap bihain long King Jisas Krais i pinisim pait bilong em. Dispela i makim olsem em bai bagarapim pinis Bikpela Babilon na mekim pinis pait bilong Armagedon.—2/15, pes 10.

Wanem samting i kirapim ol Juda long taim bilong Jisas “long wetim” Mesaia long kamap? (Luk 3:15)

Yumi no gat rot long save sapos ol Juda long taim bilong ol aposel i bin gat wankain save olsem yumi long tok profet bilong Daniel long Mesaia. (Dan. 9:24-27) Ating ol i bin harim tok em ensel i bin autim long sampela wasman o tok em profet meri Ana i bin mekim taim em i lukim bebi Jisas long tempel. Na tu, ol glasman bilong ol sta i bin raun long painim “dispela pikinini mama i karim bilong kamap king bilong ol Juda.” (Mat. 2:1, 2) Bihain, Jon Bilong Baptais i tokaut olsem i no longtaim na Krais bai kamap.—2/15, pes 26-27.

Yumi ken mekim wanem na bai Yes bilong yumi i no ken minim Nogat? (2 Kor. 1:18)

Em tru olsem sampela taim, wanpela samting inap kamap na yumi senisim tok yumi bin pasim wantaim narapela. Tasol sapos yumi mekim wanpela tok promis, orait yumi mas wok strong tru long bihainim dispela tok.—3/15, pes 32.

Olsem wanem yumi inap sakim laik bilong lukim ponografi?

Tripela rot bilong helpim yumi em olsem (1) Taim piksa bilong pasin sem i kamap, tanim pes kwiktaim na no ken lukluk i stap. (2) Lukautim gut tingting bilong yumi na tingting long ol gutpela samting na beten long God. (3) Was gut long pasin bilong yumi na abrusim ol muvi o Web-sait we i soim ol piksa bilong ponografi.—4/1, pes 10-12.

Wanem ol hevi inap kamap sapos Kristen i lusim famili na em i go mekim wok mani long narapela kantri?

Taim papamama i lusim famili, ol pikinini inap bel hevi tru na pasin bilong ol inap kamap nogut. Ol bai kros long papa o mama, o tupela wantaim. Taim ol poroman marit i stap longwe long narapela narapela, traim inap painim ol long mekim pasin pamuk.—4/15, pes 19-20.

Taim ol i kilim i dai ol man bilong mekim rong, wai na ol i save brukim lek bilong ol?

Ol Rom i save hangamapim sampela man nogut long pos bilong kilim ol i dai. Ol Juda i askim ol long brukim lek bilong ol man nogut ol i bin hangamapim long ol pos i stap klostu long Jisas. Dispela bai mekim na i hatwok long ol i pulim win na ol bai dai kwik. Olsem na ol i no inap hangamap long pos inap long nait olgeta. (Lo 21:22, 23)—5/1, pes 11.

Taim yumi autim tok na bungim ol man, yumi mas tingim wanem 4-pela askim?

Ol i wanem kain ol man? Ol i stap long wanem hap? Wanem taim em i gutpela taim long autim tok long ol? Mi mas mekim wanem kain pasin taim mi autim tok long ol?—5/15, pes 12-15.

Pasin bilong smok i bin kilim i dai hamas man?

Insait long 1 handret yia i go pinis, pasin bilong smok i bin kilim i dai 1 handret milion manmeri. Long nau, pasin bilong smok i save kilim i dai 6 milion manmeri long olgeta wan wan yia.—6/1, pes 3.