1. Wanem samting i bikpela samting long wok lotu bilong yumi?

 OLSEM WANEM? Yu bin lukim nem bilong Jehova long wanpela haus o long sampela samting i stap long haus musium? Ating yu bin amamas tru long lukim dispela nem, a? I stret long yumi amamas, long wanem, nem bilong God i bikpela samting long wok lotu bilong yumi​—yumi ol Witnes Bilong Jehova! Long olgeta hap bilong graun, i no gat wanpela lain long nau i yusim nem bilong God wankain olsem yumi save mekim. Yumi amamas long nem bilong God i stap long lain bilong yumi, tasol yumi save olsem i gat wok yumi mas mekim.

2. Yumi amamas long nem bilong God i stap long lain bilong yumi, tasol yumi gat wok long mekim wanem?

² Taim yumi yusim nem bilong Jehova, dispela tasol i no makim olsem Jehova bai orait long yumi, nogat, yumi mas mekim sampela samting moa. Yumi mas bihainim ol stretpela lo bilong em. Long dispela risen, Baibel i kirapim yumi long tingim gen olsem lain bilong Jehova i mas “givim baksait long pasin nogut.” (Sng. 34:14) Aposel Pol i kamapim klia dispela stiatok taim em i tok: “Olgeta man i singaut long nem bilong Jehova ol i mas givim baksait long ol pasin i no stret.” (Ritim 2 Timoti 2:19.) Yumi stap olsem ol Witnes Bilong Jehova,  olsem na yumi gat nem olsem lain bilong tokaut long nem bilong God. Tasol yumi mas mekim wanem na bai yumi inap givim baksait long ol pasin i no stret?

3, 4. Inap longpela taim, ol saveman bilong Baibel i laik tru long kliagut long wanem skripsa? Bilong wanem?

³ Tingim stori bilong Baibel long risen bilong Pol long raitim tok i stap long 2 Timoti 2:19. Dispela skripsa i tok “God i planim pinis strongpela pos,” na i kolim 2-pela tokaut. Namba 1: “Jehova i save gut long ol manmeri bilong em yet,” na dispela hap tok i kam long Namba 16:5. (Lukim stadi i kamap paslain long dispela.) Namba 2: “Olgeta man i singaut long nem bilong Jehova ol i mas givim baksait long ol pasin i no stret.” Inap longpela taim pinis, ol saveman bilong Baibel i laik tru long kliagut long dispela tokaut. Bilong wanem?

⁴ Ol tok Pol i yusim i soim olsem em i bin kisim dispela tok long narapela hap. Tasol i no gat wanpela tok long Ol Skripsa Hibru i wankain olsem tok bilong Pol. Olsem na yu ting Pol i tingim wanem samting taim em i tok: “Olgeta man i singaut long nem bilong Jehova ol i mas givim baksait long ol pasin i no stret”? Paslain stret long Pol i mekim dispela tok, em i mekim wankain tok olsem tok i stap long Buk Namba sapta 16, em stori bilong pasin bikhet bilong Kora. Olsem na yu ting namba 2 tokaut i makim ol samting i bin kamap taim Kora i mekim pasin bikhet?

5-7. Wanem ol samting i bin kamap long taim bilong Moses na Pol i tingim dispela na em i raitim tok i stap long 2 Timoti 2:19? (Lukim piksa long kirap bilong stadi.)

⁵ Baibel i tok olsem Datan na Abiram, em ol pikinini man bilong Eliap, ol i bin poromanim Kora na go pas long mekim pasin bikhet long Moses na Aron. (Nam. 16:1-5) Ol i no rispektim Moses na ol i sakim wok bos em God i givim long Moses. Ol dispela bikhetlain i stap yet wantaim ol manmeri bilong Jehova na ol i wok long bagarapim bilip bilong ol stretpela manmeri. Taim Jehova i redi long kamapim klia husat lain i stap gut long lotuim em na husat lain i bikhetlain, em i tokaut stret long samting ol stretpela man i mas mekim.

⁶ Baibel i tok: “Bikpela i tokim Moses olsem, ‘Tokim ol manmeri long ol i mas lusim ol haus sel bilong Kora na Datan na Abiram na go sanap longwe liklik.’ Orait Moses wantaim ol lida bilong Israel i go lukim Datan na Abiram. Na Moses i tokim olgeta manmeri olsem, ‘Yupela surik i go bek longwe liklik long ol haus sel bilong ol dispela man nogut. Na yupela i no ken pas long wanpela samting bilong ol. Nogut yupela i stap klostu long ol na yupela i dai wantaim ol long sin bilong ol.’ Ol manmeri i harim na ol i surik na lusim ol haus sel bilong Kora na Datan na Abiram.” (Nam. 16:23-27) Jehova i kilim i dai olgeta manmeri husat i bikhet. Tasol em i lukautim laip bilong ol manmeri husat i stap gut long em—​em ol manmeri husat i givim baksait long pasin i no stret na surik i go sanap longwe.

⁷ Jehova i save lukim tingting i stap long bel bilong ol man! Em i luksave long ol manmeri husat i stap gut long em. Tasol ol gutpela wokman bilong em i mas kirap kwik long givim baksait long ol manmeri i no bihainim stretpela pasin. Olsem na ating Pol i tingim stori i stap long Namba 16:5, 23-27, na em i tok: “Olgeta man i singaut long nem bilong Jehova ol i mas givim baksait long ol pasin i no stret.” Dispela bai stret wantaim tok bilong Pol, olsem: “Jehova i save gut long ol manmeri bilong em yet.”​—2 Tim. 2:19.

8. Maski yumi yusim nem bilong Jehova o yumi stap insait long kongrigesen Kristen, wai na dispela tasol i no inap helpim yumi?

⁸ Taim Pol i toktok long ol samting i bin kamap long taim bilong Moses, em i laik helpim Timoti long holim strongpela tingting long lukautim pasin bilong em long pas gut wantaim  Jehova. Long taim bilong Moses, ol man i wok long singaut long nem bilong Jehova, tasol ol i mas mekim sampela samting moa. Olsem tasol, long nau yumi stap insait long kongrigesen Kristen, tasol yumi mas mekim sampela samting moa. Ol man husat i stap gut long lotuim God, ol i mas holim strongpela tingting na givim baksait long ol pasin i no stret. Orait dispela i bin kirapim Timoti long mekim wanem? Lain bilong Jehova long nau inap kisim wanem ol skul long tok em Pol i bin mekim?

9. “Pasin bilong tok resis long ol longlong tok na ol tok i no gat as bilong en” i mekim wanem long kongrigesen Kristen bilong pastaim?

⁹ Baibel i kolim stret ol pasin nogut em ol Kristen i mas givim baksait long en o sakim. Long 2 Timoti 2:19, Pol i tokim Timoti olsem em i “no ken tok pait long ol wan wan wed” na em i mas “sakim ol toktok nating.” (Ritim 2 Timoti 2:14, 16, 23.) Sampela insait long kongrigesen i wok long strongim pasin apostet. Na tu, ol narapela i wok long kirapim tok pait. Maski ol dispela tok i no kalapim stret tok bilong Baibel, ol inap kamapim pasin bilong brukim lain. Ol dispela tok i kirapim ol man long tok pait long ol wan wan wed, na dispela i nogutim bilip bilong ol. Olsem na Pol i tok stret olsem ol i mas “sakim pasin bilong tok resis long ol longlong tok na ol tok i no gat as bilong en.”

10. Yumi mas mekim wanem taim yumi bungim ol apostet?

¹⁰ Long nau, lain bilong Jehova i no kisim tumas hevi long pasin apostet insait long kongrigesen. Tasol taim yumi harim sampela tok em Baibel i no as bilong en, maski dispela tok i kam long husat, yumi mas holim strongpela tingting long sakim ol dispela tok. I no gutpela long tok pait wantaim ol apostet, o raitim tok long Web-sait bilong ol, o yusim sampela narapela rot. Maski sapos yumi laik helpim ol na yumi toktok wantaim ol, dispela bai i no stret wantaim tok bilong Baibel em nau tasol yumi skelim. Yumi ol manmeri bilong Jehova i mas abrusim tru pasin apostet, yes, yumi mas sakim dispela pasin.

11. Wanem samting inap kirapim pasin bilong “tok resis long ol longlong tok i no gat as bilong en”? Olsem wanem ol elda Kristen inap stap olsem gutpela eksampel?

¹¹ Na tu, i gat ol narapela samting we inap bagarapim bel isi bilong kongrigesen. Olsem: Sapos yumi gat narapela narapela tingting long sait bilong amamas, dispela inap mekim na yumi “tok resis long ol longlong tok na ol tok i no gat as bilong en.” Taim ol man i strong long kisim ol amamas we i kalapim ol stretpela lo bilong Jehova, ol elda Kristen i no ken pret tasol long kirapim tok pait na larim ol dispela bikhetlain i stap yet long kongrigesen. (Sng. 11:5; Efe. 5:3-5) Ol elda i save was gut, nogut ol i strong long bihainim tingting bilong ol yet. Ol i save bihainim gut tok kaunsel em Baibel i givim long ol elda, olsem: “Yupela ol hetman i mas lukautim gut ol sipsip bilong God i stap aninit long yupela. . . . Yupela i no ken strong long bosim ol manmeri bilong God, tasol yupela i mas i stap gutpela piksa bilong ol dispela sipsip.”​—1 Pita 5:2, 3; ritim 2 Korin 1:24.

12, 13. (a) Ol Witnes Bilong Jehova i holim wanem tingting long ol samting ol i ken mekim bilong kisim amamas? Ol i bihainim wanem ol stiatok bilong Baibel? (b) Olsem wanem ol stiatok yumi skelim long paragraf 12 i stret tu long ol narapela samting long laip bilong yumi?

¹² Long sait bilong amamas, oganaisesen bilong yumi i no kolim stret wanem muvi, vidio gem, buk, o singsing yumi mas abrusim. Bilong wanem? Baibel i kirapim yumi olgeta wan wan long “lainim gut tingting bilong [yumi] long kliagut long wanem samting i stret na wanem samting i no stret.” (Hib. 5:14) Baibel i gat ol stiatok em ol Kristen inap skelim taim ol i laik makim amamas ol i laik kisim. Long olgeta samting yumi mekim, yumi mas “wok yet long skelim gut ol samting em Bikpela i orait long en.” (Efe. 5:10) Baibel i tok het bilong famili i gat rait long mekim wok bos, olsem na em inap makim wanem kain amamas ol wanhaus i no ken insait long en. a​—1 Kor. 11:3; Efe. 6:1-4.

 ¹³ Ol stiatok bilong Baibel we yumi skelim pinis, ol inap stiaim yumi long ol narapela samting tu. Ol man i gat narapela narapela tingting long pasin bilong bilas na mekim gut skin, helt na gutpela kaikai, na ol narapela samting bilong ol yet, olsem na dispela inap kirapim tok pait. Sapos lain bilong Jehova i no brukim ol stiatok bilong Baibel, i gutpela long ol i no ken tok pait long ol kain samting olsem, long wanem, “wokboi bilong Bikpela i no gat wok long pait, nogat. Em i gat wok long isi long olgeta man.”​—2 Tim. 2:24.

14. Pol i yusim wanem tok piksa long kamapim klia olsem ol Kristen i mas abrusim ol poroman nogut?

¹⁴ Ol lain husat i “singaut long nem bilong Jehova,” ol i mas mekim wanem samting moa na bai ol inap “givim baksait long ol pasin i no stret”? Ol i no ken pas tumas wantaim ol manmeri husat i bihainim pasin i no stret. Pol i mekim tok piksa long “God i planim pinis strongpela pos,” na bihain em i mekim narapela tok piksa. Em i tok: “Wanpela bikpela haus i gat ol dis gol na dis silva na ol dis ol i wokim long diwai na ston. Sampela dis i bilong mekim ol wok i gat biknem na sampela dis i bilong mekim ol wok i no gat biknem.” (2 Tim. 2:20, 21) Em i kirapim ol Kristen long “stap longwe,” o no ken bung wantaim ol dis em ol man i yusim long “mekim ol wok i no gat biknem.”

15, 16. Yumi inap kisim wanem skul long tok piksa bilong “wanpela bikpela haus”?

¹⁵ Wanem mining bilong dispela tok piksa? Pol i tok kongrigesen Kristen i kain olsem “wanpela bikpela haus,” na olgeta wan wan bratasista insait long kongrigesen i olsem “ol dis,” o ol tul i stap long haus. Ol marasin nogut na ol samting i doti inap bagarapim sampela dis o tul, olsem na papa bilong haus bai putim ol dispela dis na tul i stap longwe long ol klinpela dis, kain olsem ol dis ol i save yusim long redim kaikai.

¹⁶ Olsem tasol, lain bilong Jehova long nau i wok strong long i stap klin, olsem na ol i mas abrusim pasin bilong bung wantaim ol arapela long  kongrigesen husat i save sakim ol stiatok bilong Jehova. (Ritim 1 Korin 15:33.) Sapos yumi mas abrusim sampela insait long kongrigesen, orait yumi mas wok strong moa long “givim baksait” long ol lain ausait long kongrigesen, em planti bilong ol i ‘laikim tumas mani, sakim tok bilong papamama, i no stap gut long narapela, bagarapim gutnem bilong ol arapela, wail olgeta, i no laikim ol gutpela pasin, birua long ol pren bilong ol, na i no laikim God, nogat, ol i laikim kain kain amamas’!​—2 Tim. 3:1-5.

17. Sampela bilong lain Israel i bin stap gut long God, na olsem wanem ol i sanap strong long sakim pasin nogut?

¹⁷ Baibel i kolim stret pasin lain Israel i mekim taim Moses i tokim ol long “lusim ol haus sel bilong Kora na Datan na Abiram na go sanap longwe liklik.” Baibel i tok ol i “harim na [“kwiktaim,” NW] ol i surik na lusim ol haus sel bilong Kora na Datan na Abiram.” (Nam. 16:24, 27) Ol i no les o westim taim. Baibel i kamapim tu olsem ol i bihainim gut olgeta liklik tok ol i kisim. Ol man i stap gut long Jehova, ol i no laik mekim pasin we bai givim hevi long ol. Ol i no givim hap bel tasol long stap gut long God, nogat. Ol i givim bel olgeta long stap long sait bilong Jehova na sakim pasin nogut. Yumi inap kisim wanem ol skul long dispela stori?

18. Wai na Pol i kirapim Timoti long “ranawe long ol laik i save kamap long bel bilong ol yangpela”?

¹⁸ Sapos yumi laik lukautim pasin bilong yumi long pas gut wantaim Jehova, orait yumi mas holim strongpela tingting na kirap kwik long mekim samting. Dispela em samting Pol i laik bai Timoti i mekim, olsem na em i tokim Timoti long “ranawe long ol laik i save kamap long bel bilong ol yangpela.” (2 Tim. 2:22) Long dispela taim Timoti i kamap bikpela man pinis, ating em i winim pinis 30 krismas. Maski i olsem, ol manmeri i gat bikpela krismas tu i save kisim ol “laik i save kamap long bel bilong ol yangpela.” Taim Timoti i kisim ol kain laik olsem, em i mas “ranawe” long en. Em i mas “givim baksait long ol pasin i no stret.” Jisas tu i bin kamapim wankain tingting taim em i tok: “Sapos ai bilong yu i wok long pundaunim yu, orait kamautim na tromoi i go.” (Mat. 18:9) Long nau, ol Kristen husat i tingim tru dispela stiatok, ol i save holim strongpela tingting na hariap long sakim ol samting we inap bagarapim bilip bilong ol.

19. Olsem wanem sampela long nau i holim strongpela tingting na abrusim ol samting we inap bagarapim bilip?

¹⁹ Sampela man i bin i gat hevi long alkohol, na taim ol i kamap Witnes, ol yet i mekim disisen long sakim olgeta kain alkohol. Maski sampela amamas i no gat rong long en, sampela man i abrusim tu ol dispela amamas bikos ol dispela amamas inap kirapim gen sampela laik nogut bilong ol. (Sng. 101:3) Olsem: Paslain long wanpela brata i kamap Witnes, em i save amamas long go long ol danis we pasin pamuk i stap long en. Tasol bihain long em i kisim save long tok i tru, em i abrusim olgeta kain danis. Em i abrusim tu ol danis i kamap long bung bilong ol Witnes, long wanem, dispela inap kirapim gen ol laik nogut na ol tingting kranki bilong em bilong bipo. Ol Kristen i ken kisim sampela alkohol, insait long sampela danis, o mekim sampela narapela samting we i no gat rong long en. Tasol yumi olgeta i mas holim strongpela tingting na wok strong long abrusim ol samting we inap bagarapim bilip bilong yumi.

20. Sampela taim i hatwok long “givim baksait long pasin nogut,” tasol wanem samting inap strongim yumi na mekim yumi amamas?

²⁰ Yumi amamas long nem bilong God i stap long lain bilong yumi, tasol i gat wok yumi mas mekim. Yumi mas “givim baksait long ol pasin i no stret” na “lusim ol pasin nogut.” (Sng. 34:14, NW) Sampela taim i hatwok long mekim olsem. Yumi amamas long save olsem oltaim Jehova bai laikim “ol manmeri bilong em yet,” em ol manmeri husat i bihainim ol stretpela pasin bilong em.​—2 Tim. 2:19; ritim 2 Stori 16:9.