LAIP STORI
Wanpela Papa i Lus—Kisim Wanpela Papa
PAPA bilong mi i bon long 1899, long biktaun Graz long Ostria, olsem na em i bin yangpela mangi long taim bilong Wol Woa 1. Ol i raitim nem bilong em long joinim ami bilong Jemani bihain stret long Wol Woa 2 i kirap long 1939. Long 1943, ol i kilim em i dai taim em i stap long pait long Rasia. Olsem na papa bilong mi i dai taim mi gat 2-pela krismas tasol. Mi no bin save gut long papa, na mi misim em moa yet taim mi luksave olsem planti mangi long skul i gat papa. Taim mi kamap tineja, mi kisim save olsem Papa bilong yumi long heven i winim olgeta narapela papa na em i no save dai, na dispela i bin mekim gut bel bilong mi.
MI JOINIM BOI SKAUT
Taim mi stap liklik boi
Taim mi gat 7-pela krismas, mi kamap memba bilong wanpela grup bilong Boi Skaut. Boi Skaut em wanpela oganaisesen ol i bin kamapim long 1908, na em i stap long olgeta hap bilong graun. Man i kamapim dispela oganaisesen em wanpela jeneral long ami bilong Briten, em Robert Stephenson Smyth Baden-Powell. Long 1916, em i kirapim grup bilong ol yangpela mangi em ol i wankrismas bilong mi, nem bilong dispela grup em Wolf Cubs (o Bebi Skaut).
Long ol wiken mipela i save go wokim kem long kantri sait, na mi save amamas tru—mipela i save slip long haus sel, werim ol yunifom, na bihainim pairap bilong dram na mats. Mi save amamas long bung wantaim ol narapela skaut, na sindaun raunim paia long nait na singsing, na pilai insait long bikbus. Na tu, mipela i kisim planti skul long plaua, diwai, na wara samting, na dispela i mekim na mi amamas long ol samting Krieta bilong yumi i bin wokim.
Ol memba bilong Boi Skaut i mas mekim gutpela wok long olgeta de. Dispela i olsem lo bilong stiaim ol. Taim mipela i tok gude, mipela i save tok “Redi Oltaim.” Mi laikim dispela pasin. Winim 100 mangi i stap long grup bilong mipela, na hap lain em ol Katolik, narapela hap lain em ol Protestan, na wanpela tasol i bilong lotu Buda.
Kirap long 1920, ol i mekim intenesenel miting bilong ol Skaut, olsem ol bikpela pilai, na ol i save mekim olsem bihain long olgeta 3-pela yia samting. Long Ogas 1951, mi go long namba 7 bikpela bung bilong ol skaut (World Scout Jamboree) long taun Bad Ischl long Ostria. Na tu, long Ogas 1957, mi go long namba 9 bikpela bung long Sutton Park, klostu long Birmingham, long Inglan. Long dispela taim, inap olsem 33 tausen skaut i kam long 85 kantri. Na tu, inap olsem 750 tausen manmeri i kam visitim mipela long dispela bung, na Kwin Elizabeth bilong Inglan tu i bin kam. Mi pilim olsem dispela em bikpela lain brata i stap long olgeta hap. Mi no bin ting olsem bihain liklik mi bai kisim save long wanpela lain brata em ol i bikpela lain moa—ol i stap lain brata long sait bilong bilip.
FES TAIM LONG BUNGIM WANPELA WITNES BILONG JEHOVA
Rudi Tschiggerl, man bilong wokim bret na kek, em fes man long autim tok long mi
Em yia 1958, na em klostu long taim mi bai pinisim trening bilong mekim wok weita long bikpela
hotel (Grand Hotel Wiesler) long biktaun Graz long Ostria. Long dispela taim, Rudolf Tschiggerl, em wanwok na man bilong wokim bret na kek, em i autim tok long mi. Mi no bin harim tok i tru long bipo. Em i stori long God Triwan na em i tok Baibel i no as bilong dispela bilip. Mi sambai long dispela bilip na mi laik soim olsem bilip bilong em i no stret. Mi laikim wanwok bilong mi, olsem na mi laik pulim tingting bilong em na kirapim em long kam bek long Misin Katolik.Rudolf, mipela i bin kolim em Rudi, em i bringim wanpela Baibel i kam long mi. Mi strong long em i mas bringim Baibel bilong Misin Katolik. Mi ritim dispela Baibel na i no longtaim mi lukim liklik nius em Rudi i bin putim insait long Baibel. Sosaiti Wastaua i bin prinim dispela nius. Mi no laikim dispela nius bikos mi pilim olsem ol inap raitim ol tok bilong en long pasin i luk olsem em i stret, tasol ating ol tok bilong en i no stret. Tasol mi amamas long stori wantaim em long tok bilong Baibel. Rudi i bihainim savetingting na em i no givim mi sampela moa buk na nius. Inap 3-pela mun, mipela i save toktok wantaim long ol tok bilong Baibel, na planti taim mipela i save toktok i go inap long biknait.
Taim mi pinisim trening long hotel long asples bilong mi long biktaun Graz, Mama i baim skulfi na mi inap go long skul bilong kamap maneja bilong hotel. Olsem na mi go long taun Bad Hofgastein long veli bilong ol maunten Alps, em ples we skul i stap long en. Dispela skul i wok bung wantaim Grand Hotel long taun Bad Hofgastein, na sampela taim mi go wok long dispela hotel na bai mi inap kisim ekspiriens.
TUPELA MISINERI SISTA I KAM VISITIM MI
Ilse Unterdörfer na Elfriede Löhr i stadi wantaim mi long Baibel long 1958
Rudi i salim nupela atres bilong mi i go long brens ofis long Vienna, na brens i salim i go long 2-pela misineri sista, Ilse Unterdörfer na Elfriede Löhr. Wanpela taim risepsenis long hotel i ringim mi na tokim mi olsem 2-pela meri i kam long kar na ol i wet ausait long hotel na ol i laik lukim mi. Mi tingting planti bikos mi no save long ol. Tasol mi go ausait long lukim ol. Bihain mi kisim save olsem, taim gavman Natsi i tambuim wok bilong ol Witnes paslain long Wol Woa 2, dispela 2-pela sista i bin tilim ol nius bilong ol Witnes long Jemani. Taim woa i no kirap yet, lain polis bilong Hitler ol i kolim Gestapo, i kalabusim dispela 2-pela sista na salim tupela i go long banis kalabus nogut long Lichtenburg. Long taim bilong woa, ol i salim tupela i go long banis kalabus nogut long Ravensbrück, klostu long Berlin.
Krismas bilong dispela 2-pela sista i wankain long krismas bilong mama bilong mi, olsem na mi rispektim ol. Mi pilim olsem, sapos mi toktok wantaim ol na bihain long sampela wik mi tokim ol olsem mi no laik stori moa, dispela bai makim olsem mi westim nating taim bilong ol. Olsem na mi tokim ol long bringim lista i gat ol skripsa i stori long bilip bilong Misin Katolik, olsem ol pop i kisim wok bilong ol aposel. Mi tokim ol olsem mi bai kisim dispela lista i go long pris na toktok wantaim em. Mi ting olsem mi bai luksave long wanem bilip em i tru.
KISIM SAVE LONG PAPA HOLI I STAP LONG HEVEN
Bilip bilong Misin Katolik i tok olsem ol pop i kisim wok bilong ol aposel na dispela wok i bin kirap long taim bilong aposel Pita. (Misin i paulim tok bilong Jisas long Matyu 16:18, 19.) Misin i bilip olsem pop i no save popaia taim em i mekim wok bilong em na kamapim ol bilip bilong misin. Mi tu mi holim dispela bilip. Misin i kolim pop olsem Papa Holi, na mi bilip olsem tok bilong Pop em i tru taim em i kolim ol bilip em Misin i mas bihainim. Olsem na sapos em i tok olsem bilip bilong God Triwan em i tru, orait mi bilip olsem dispela tok em i tru. Tasol sapos em i save popaia, orait dispela bilip i no tru. Olsem na nambawan bikpela bilip long tingting bilong planti Katolik em dispela bilip olsem ol pop i kisim wok bilong ol aposel, long wanem, em i stap olsem as tok bilong olgeta narapela bilip bilong misin!
Taim mi visitim pris, em i no inap bekim ol askim bilong mi. Em i givim mi wanpela buk we i kolim ol bilip bilong ol Katolik, na dispela buk i stori long hau ol pop i kisim wok bilong ol aposel. Mi bihainim tok bilong em na kisim buk i go long haus na mi ritim, na mi kam bek long lukim em wantaim sampela moa askim. Pris i no inap bekim ol askim bilong mi, olsem na em i tok: “Mi no inap senisim tingting bilong yu na yu no inap senisim tingting bilong mi. . . . Gutpela samting i ken painim yu!” Em i no laik stori moa wantaim mi.
Mi kirap stadi long Baibel wantaim Ilse na Elfriede. Ol i helpim mi long kisim planti save long Papa Holi i stap long heven, em God Jehova. (Jon 17:11) I no gat kongrigesen long dispela hap, olsem na dispela 2-pela sista i lukautim ol miting long haus bilong wanpela famili husat i amamas long kisim save long tok i tru. Liklik lain tasol i kam bung. Dispela 2-pela sista i save skelim ol tok bai kamap long miting bikos i no gat baptais brata i stap bilong go pas long mekim miting. Wan wan taim tasol, wanpela brata i save kam na givim pablik tok long ples ol i rentim.
KIRAP LONG AUTIM TOK
Ilse na Elfriede i kirap stadi wantaim mi long Baibel long Oktoba 1958, na bihain long 3-pela mun mi kisim baptais long Janueri 1959. Paslain long mi kisim baptais, mi askim ol sapos mi inap raun wantaim ol long autim tok long ol haus na bai mi inap save long pasin bilong autim tok. (Apo. 20:20) Bihain long namba 1 taim mi raun wantaim ol, mi askim ol long makim teritori bilong mi yet. Ol i makim wanpela ples we mi yet i ken autim tok long en na mekim gobek long ol man i amamas long harim tok. Fes brata mi wok wantaim em long autim tok long ol haus em wasman sekit, na bihain em i kam visitim mipela.
Long 1960, mi pinisim trening bilong mi long wok bilong hotel na mi go bek long asples na mi laik helpim ol wanblut long kisim save long ol tok i tru bilong Baibel. I kam inap long nau, i no gat wanpela wanblut i kisim tok i tru, tasol sampela bilong ol i gat laik long harim tok i tru.
FULTAIM SEVIS
Mi gat 25 krismas samting
Long 1961, brens ofis i salim ol pas bilong strongim ol painia, na ol i ritim ol dispela pas long ol kongrigesen. Mi stap singel na mi gat gutpela helt, olsem na mi pilim olsem i no gat wanpela samting i pasim mi long mekim wok painia. Mi toktok wantaim Kurt Kuhn, em wasman sekit, na mi tokim em olsem mi laik wok mani inap sampela mun moa na bai mi inap baim kar bilong helpim mi long mekim wok painia. Taim mi askim em long kamapim tingting bilong em, em i tok: “Yu ting Jisas na ol aposel i bin nidim kar bilong helpim ol long fultaim sevis?” Dispela tok i bin stretim tingting bilong mi! Olsem na mi mekim disisen long kirap kwik long mekim wok painia. Tasol mi wok long wanpela restron bilong hotel na mi save wok inap 72 aua long olgeta wan wan wik, olsem na mi mas mekim sampela senis.
Mi askim bos sapos mi inap wok 60 aua tasol. Em i tok orait, na em i givim wankain pe long mi. Bihain liklik, mi askim sapos mi inap wok 48 aua long
olgeta wan wan wik. Em i tok orait gen na givim yet wankain pe. Bihain, mi askim gen sapos mi inap wok 36 aua—wok 6-pela de na wok inap 6-pela aua—na em i tok orait. Mi kirap nogut olsem mi kisim yet wankain pe! I luk olsem bos i no laik bai mi lusim wok. Dispela sediul i helpim mi na mi kirap long mekim wok painia oltaim. Long dispela taim, aua bilong ol painia em inap olsem 100 aua long olgeta wan wan mun.Fopela mun bihain, ol i makim mi long kamap painia salim na kongrigesen seven long wanpela liklik kongrigesen long provins Carinthia, long taun Spittal an der Drau. Long dispela taim, ol painia salim i mas inapim 150 aua long olgeta wan wan mun. Mi no gat painia poroman. Tasol taim mi mekim wok autim tok, mi amamas long helpim mi kisim long sista Gertrude Lobner husat i mekim wok olsem helpim bilong kongrigesen seven. a
SENIS SENIS LONG OL ASAINMEN
Long 1963, ol i singautim mi long mekim wok sekit. Sampela taim mi kalap long tren na raun long visitim ol kongrigesen, na mi save karim ol sutkeis i hevi nogut tru. Planti brata i no gat kar, olsem na i no gat wanpela i save stap redi long kisim mi taim mi kam daun long tren. Mi inap kisim teksi na go long hap mi bai stap long en, tasol mi no laik bai ol narapela i ting olsem mi gat biknem, olsem na mi save wokabaut i go.
Long 1965, taim mi stap singel yet, mi kisim invatesen bilong i go long namba 41 klas bilong Skul Gileat. Planti wanklas ol i singel. Long taim bilong gretiuesen, mi kirap nogut long ol i makim mi long i go bek long asples bilong mi long Ostria na mekim yet wok sekit. Tasol paslain long mi lusim Amerika, ol i askim mi long wok wantaim wanpela wasman sekit inap 4-pela wik. Mi amamas tru long wok wantaim Anthony Conte, em wanpela brata husat i laikim tru wok autim tok na em i save mekim gut dispela wok. Mitupela i wok wantaim long New York, long hap bilong Cornwall.
Weding de bilong mipela
Taim mi go bek long Ostria, mi kisim asainmen bilong lukautim wanpela sekit, na long dispela hap mi bungim Tove Merete, em naispela sista husat i stap singel. Em i kamap bikpela long tok i tru taim em i gat 5-pela krismas. Taim ol bratasista i askim mipela long hau mipela i bung, mipela i save tok pilai na tok, “Brens ofis i bin stretim rot na mipela i bung.” Wanpela yia bihain, long Epril 1967, mitupela i marit na brens i orait long mitupela i ken insait yet long wok bilong wasman raun.
Long 1968, mi luksave olsem Jehova i soim bikpela pasin helpim long mi na em i makim mi long kamap pikinini bilong em. Kirap long dispela taim, mi pas gut tru wantaim Papa bilong mi long heven, na mi pas gut tu wantaim ol arapela em Rom 8:15 i tok ol i “singaut olsem, ‘Aba, Papa!’”
Mitupela Merete i stap long wok sekit na wok distrik i go inap long 1976. Long taim bilong kol, sampela taim mitupela i save slip long ol betrum we i kol nogut tru olsem ais. Wanpela taim mipela i kirap namel long slip na painimaut olsem sait bilong blanket we i karamapim pes bilong mipela i kamap strong olsem ais, long wanem, win i kamaut long nus bilong mipela i kol nogut tru! Dispela i mekim na mipela i stat long karim liklik elektrik hita bilong helpim mipela long nait. Long sampela hap, toilet i stap ausait
long haus, olsem na sapos mipela i laik yusim toilet long nait, mipela i save wokabaut long sno na pilim strongpela kolwin. Na tu, mipela i no gat haus bilong mipela yet, olsem na taim mipela i visitim pinis wanpela kongrigesen, mipela i save stap long wankain haus long Mande. Orait, long Tunde moning mipela i save go long narapela kongrigesen.Mi amamas tru olsem insait long ol yia i go pinis na i kam inap long nau, oltaim meri bilong mi i save sambai long mi na helpim mi gut tru. Em i laikim tru wok autim tok, na i no gat wanpela taim we mi mas strongim em long i go autim tok. Em i laikim tru ol pren bilong mipela na em i tingim tru ol arapela. Dispela i helpim mi tru.
Long 1976, mipela i kisim invatesen long i go wok long brens ofis bilong Ostria long Vienna, na ol i makim mi long kamap memba bilong Brens Komiti. Long dispela taim, brens ofis bilong Ostria i lukautim wok autim tok long sampela kantri bilong Isten Yurop, na ol i oganaisim wok bilong bringim ol buk na nius i go long ol dispela kantri. Brata Jürgen Rundel i go pas long dispela wok, na em i redi long mekim olgeta kain samting bilong inapim dispela wok. Mi amamas long wok wantaim em, na bihain ol i askim mi long lukautim wok bilong tanim tok i go long 10-pela tokples bilong Isten Yurop. Jürgen na meri bilong em, Gertrude, i mekim wok yet olsem ol painia salim long Jemani. Kirap long 1978, brens ofis long Ostria i redim tok bilong prinim long ol magasin na ol i yusim liklik masin long prinim magasin long 6-pela tokples. Na tu, sampela kantri i putim sabskripsen bilong kisim ol magasin, olsem na mipela i salim ol magasin i go long ol tu. Otto Kuglitsch i bin go pas long mekim dispela wok, na nau em na meri bilong em, Ingrid, i mekim wok long brens ofis long Jemani.
Long Ostria, mi bihainim kain kain pasin bilong autim tok, na autim tok tu long rot
Na tu, sampela brata long Isten Yurop i stap long kantri bilong ol yet na yusim ol liklik masin na olpela film long wokim ol buk na nius. Tasol ol i nidim yet helpim i kam long ol narapela kantri. Jehova i bin lukautim dispela wok, na mipela ol lain i wok i stap long brens, mipela i laikim tru ol bratasista husat i mekim wok maski bikpela hevi tru i painim ol na gavman i putim tambu long wok inap planti yia.
SPESEL VISIT LONG ROMENIA
Long 1989, mi amamas tru long go wantaim Brata Theodore Jaracz, em memba bilong Gavening Bodi, na mipela i go long Romenia. Gavening Bodi i laik helpim bikpela lain brata long Romenia long kamap wanbel gen wantaim oganaisesen. Kirap long 1949, sampela samting i mekim na ol i no laik pas
moa wantaim oganaisesen na ol i kamapim ol kongrigesen bilong ol yet. Tasol ol i wok yet long autim tok na baptaisim ol man. Na tu, ol i no insait long ol samting bilong graun, olsem na gavman i putim ol long kalabus, na wankain samting olsem i painim ol arapela bratasista husat i stap insait long oganaisesen em hetkota i orait long en. Gavman i putim tambu long wok bilong ol Witnes long Romenia, olsem na long pasin hait mipela i bung long haus bilong Brata Pamfil Albu. Mipela i bung wantaim 4-pela elda husat i go pas long wok, na ol mausman bilong Kantri Komiti bilong Romenia em hetkota i orait long en. Na tu, mipela i bringim wanpela man bilong tanim tok i go wantaim mipela, em Rolf Kellner bilong Ostria.Long namba 2 nait, Brata Albu i pulim tingting bilong 4-pela brata husat i mekim wok elda wantaim em, na em i tok, “Sapos yumi no wanbel wantaim ol long nau, yumi bai i no gat rot moa long bihain.” Dispela i opim rot na inap olsem 5 tausen bratasista i kamap wanbel gen wantaim oganaisesen. Jehova i winim pait, na dispela i bin daunim tru Satan!
Klostu long pinis bilong 1989, paslain long gavman Komiunis i lusim strong bilong en long Isten Yurop, Gavening Bodi i singautim mi na meri bilong mi long i go wok long hetkota long New York. Mipela i kirap nogut tru long kisim dispela asainmen. Mipela i kirap wok long Brooklyn Betel long Julai 1990. Long 1992, ol i makim mi long kamap helpim bilong wanpela komiti bilong Gavening Bodi, em Komiti Bilong Wok Autim Tok. Kirap long Julai 1994, mi kisim gutpela blesing long kamap memba bilong Gavening Bodi.
TINGIM OL SAMTING BILONG BIPO NA OL SAMTING BAI KAMAP BIHAIN
Mi na meri bilong mi long Brooklyn, New York
Planti yia i lus pinis bihain long mi lusim wok bilong mi olsem weita long hotel. Nau mi amamas long insait long wok bilong redim na tilim kaikai bilong strongim bilip bilong ol bratasista long olgeta hap bilong graun. (Mat. 24:45-47) Mi stap insait long fultaim sevis winim 50 yia, na taim mi tingim bek olgeta wok i bin kamap, mi tenkyu tru na amamas tru long ol blesing em Jehova i givim long lain brata bilong yumi long olgeta hap. Mi save laikim tumas long stap long ol intenesenel kibung bikos yumi save kisim ol tok we i kirapim yumi long kisim save long tok i tru bilong Baibel, na kisim save tu long Jehova, em Papa bilong yumi long heven.
Mi beten olsem planti milion manmeri moa bai stadi long Baibel, kisim tok i tru, na stap wanbel wantaim lain brata Kristen bilong olgeta hap na mekim wok bilong Jehova. (1 Pita 2:17) Na tu, mi wetim taim we mi bai stap long heven na lukim ol manmeri long graun i kirap bek, na mi inap lukim papa bilong mi long graun. Mi laik tru bai Papa, Mama, na ol arapela wanblut bilong mi i ken lotuim Jehova long Paradais.
Mi wetim taim we mi bai stap long heven na lukim ol manmeri long graun i kirap bek, na mi inap lukim papa bilong mi long graun
a Long nau, lain elda i gat kodineta na seketeri, na i no gat moa kongrigesen seven na helpim bilong em.