1, 2. (a) Wanem mining bilong dispela tok, witnes? Olsem wanem ol niuslain bilong dispela graun i no inapim wok bilong ol? (b) Wai na Jehova i no nidim ol niuslain bilong dispela graun?

 WANEM mining bilong dispela tok, witnes? Wanpela dikseneri i tok: “[Witnes em] man husat i lukim wanpela samting i kamap na em i stori long ol narapela long dispela samting.” Olsem: Long taun Pietermaritzburg long Saut Afrika, ol i gat wanpela niuspepa, nem bilong en Witnes (The Witness), na ol i wokim dispela niuspepa winim 160 yia nau. Dispela nem i stret bikos wok bilong niuspepa em long kamapim stretpela stori long ol samting i kamap long graun. Man i kamapim dispela niuspepa, em i bin tok promis olsem dispela niuspepa bai stori long “tok i tru, olgeta tok i tru, na tok i tru tasol.”

² Tasol sori tru olsem ol niuslain bilong dispela graun i no kamapim nius bilong ol stori we i bikpela samting tru long sindaun bilong ol man, na tu, ol i paulim ol dispela stori. Ol i mekim olsem long tok em God i Gat Olgeta Strong i bin mekim long rot bilong profet Esekiel, olsem: “Ol lain man i mas save olsem mi Jehova.” (Ese. 39:7, NW) Tasol Nambawan King bilong heven na graun i no nidim ol niuslain bilong dispela graun long tokaut long biknem bilong em, nogat. Em i gat 8 milion Witnes na ol i save go long ol manmeri bilong olgeta lain man na tokim ol long nem bilong God, ol pasin bilong em, na ol samting em i mekim long ol lain man long bipo na long nau. Dispela lain Witnes i tokaut tu long ol blesing em God i tok promis long givim long ol lain man long bihain. Taim yumi putim dispela wok witnes i stap  namba 1 samting long laip bilong yumi, yumi soim klia olsem yumi inapim tru dispela nem em God yet i bin givim long yumi, olsem i stap long Aisaia 43:10, em i tok: “Yupela i witnes bilong mi. Mi bin makim yupela bilong i stap wokman bilong mi.”

3, 4. (a) Wanem taim ol Sumatin Bilong Baibel i kisim nupela nem? Ol i pilim olsem wanem long dispela nupela nem? (Lukim piksa long kirap bilong stadi.) (b) Yumi bai skelim wanem ol askim?

³ Yumi holim nem Jehova na dispela em i gutpela blesing, long wanem, em i “King bilong oltaim oltaim.” Em i tok: “Dispela em i nem bilong mi i go inap oltaim oltaim, na dispela em i nem ol i mas tingim mi long en i go inap long olgeta taim bihain.” (1 Tim. 1:17; Kis. 3:15, NW; skelim Saveman 2:16) Long 1931, ol Sumatin Bilong Baibel i kisim nem olsem ol Witnes Bilong Jehova. Bihain, planti bratasista i raitim ol pas bilong tok amamas long dispela nem, na nius Wastaua i kamapim tok bilong ol dispela pas. Wanpela kongrigesen long Kanada i tok, “Mipela i amamas tru long kisim dispela gutpela toksave olsem yumi stap ol ‘witnes bilong Jehova,’ na dispela i strongim tingting bilong mipela long inapim mining i stap long dispela nupela nem.”

⁴ Yu ken mekim wanem bilong soim olsem yu amamas long holim nem bilong God? Na tu, yu ting yu inap stori long skripsa yumi kisim nem bilong yumi long en, em dispela nem, ol Witnes Bilong Jehova?

5, 6. (a) Olsem wanem ol papamama long lain Israel i stap olsem ol witnes bilong Jehova? (b) Ol papamama long lain Israel i gat wok long mekim wanem? Wai na ol papamama long nau tu i mas mekim olsem?

⁵ Long taim bilong Aisaia, olgeta wan wan man long lain Israel i stap olsem ol “witnes” bilong Jehova, na lain olgeta bilong ol i stap olsem “wokman” bilong God. (Ais. 43:10) Wanpela rot ol papamama long lain Israel i stap olsem ol witnes em olsem, ol i skulim ol pikinini long ol samting God i bin mekim long ol tumbuna papa bilong ol. Taim God i tokim lain Israel long tingim Pasova long olgeta yia, em i tok: “Ol pikinini bilong yupela bai i askim yupela olsem, ‘Wanem as  bilong dispela kaikai?’ Orait yupela i mas tokim ol olsem, ‘Mipela i save mekim dispela ofa long Bikpela bilong makim de em i bin larim mipela i stap gut. Mipela i tingting long taim em i bin kilim i dai ol namba wan pikinini man bilong Isip. Tasol em i abrusim ol haus bilong yumi Israel, na em i larim ol pikinini bilong mipela i stap gut.’” (Kis. 12:26, 27) Ating ol dispela papamama i bin stori tu long ol pikinini olsem, long namba 1 taim Moses i go lukim Fero long kisim tok orait long lain Israel i ken i go long ples drai nating na bai ol inap lotuim Jehova, Fero i bekim tok olsem: “[“Jehova,” NW] em i husat? Bilong wanem mi mas harim tok bilong en na larim yupela Israel i go?” (Kis. 5:2) Na tu, bihain long 10-pela bikpela hevi i bagarapim Isip na lain Israel i ranawe long ami bilong ol Isip long solwara Retsi, olgeta man i lukim samting Jehova i mekim bilong bekim askim bilong Fero. Oltaim Jehova i stap olsem God i Gat Olgeta Strong. Na tu, lain Israel i stap olsem witnes long lukim olsem Jehova em i God tru na em i Man Bilong Inapim ol tok promis bilong em.

⁶ Ol manmeri bilong lain Israel em ol i amamas long holim nem bilong Jehova, ol i stori long ol dispela gutpela samting long ol pikinini bilong ol, na ol i stori tu long ol manmeri bilong narapela lain husat i stap sleiv long lain famili bilong ol. Na tu, God i tokim lain Israel olsem ol i mas trenim ol pikinini long bihainim ol stretpela lo bilong God. Jehova i tok: “Yupela i mas i stap holi . . . Long wanem, mi God, Bikpela bilong yupela, mi holi.” (Wkp. 19:2; Lo 6:6, 7) Dispela i stap olsem gutpela piksa tru em ol papamama Kristen long nau i ken bihainim. Ol i mas skulim ol pikinini long bihainim pasin bilong i stap holi, na long dispela rot ol bai helpim ol pikinini long onarim nem bilong God!​—Ritim Sindaun 1:8; Efesus 6:4.

7. (a) Taim lain Israel i stap gut long Jehova, dispela i mekim wanem long ol narapela lain i stap klostu? (b) Olgeta man husat i holim nem bilong God, ol i mas mekim wanem?

⁷ Taim lain Israel i stap gut long God, dispela pasin bilong ol i stap olsem gutpela witnes na i tokaut long nem bilong God. God i tokim ol olsem: “Olgeta lain man long graun i mas lukim olsem nem bilong Jehova i stap long yupela, na bai ol i pret long yupela.” (Lo 28:10, NW) Tasol sori tru, planti taim lain Israel i no stap gut long God. Ol i save lotuim ol imis em ol man yet i bin wokim. Ol i lotuim ol god bilong lain Kenan, na ol i kirap bihainim pasin bilong ol dispela god na mekim hatpela pasin na ofaim ol pikinini bilong ol na daunim ol rabisman. Dispela i givim bikpela skul long yumi: Oltaim yumi mas wok strong long bihainim pasin holi wankain olsem Man i Holi Tru em nem bilong em i stap long yumi!

8. Jehova i givim wanem wok long Aisaia? Aisaia i pilim olsem wanem?

⁸ Jehova i bin tok profet olsem lain Israel bai stap olsem ol witnes na lukim em i mekim bikpela wok tru long kisim bek ol long wok kalabus. (Ais. 43:19) Kirap long sapta 1 i go inap long sapta 6 bilong Buk Aisaia, i gat ol tok lukaut long bagarap bai painim Jerusalem na ol narapela taun i stap klostu. Jehova inap lukim tingting i stap long bel bilong ol man, olsem na em i tokim Aisaia long autim yet dispela tok lukaut maski ol man i no laik harim tok. Aisaia i kirap nogut na em i laik save long wanem taim lain bilong God bai tanim bel. God i tok wanem? “Inap long taim olgeta taun i bagarap na graun i bagarap na ol haus i stap nating, na i no gat man moa i stap long ol.”​—Ritim Aisaia 6:8-11.

9. (a) Tok profet bilong Aisaia long Jerusalem i kamap tru long wanem taim? (b) Wanem wok i kamap long nau na yumi mas was i stap?

⁹ Aisaia i kisim dispela wok long laspela yia bilong King Usia long mekim wok king, klostu long yia 778 B.C.E. Em i mekim wok profet i go inap long yia 732 B.C.E., em long taim bilong King Hesekia. Em i mekim wok profet winim 46 yia. Aisaia i bin mekim wok profet inap 125 yia paslain long Jerusalem i bagarap long 607 B.C.E. Olsem na paslain yet, lain bilong God i bin kisim toksave long samting bai painim lain bilong ol long  bihain. Long nau tu, Jehova i tokim lain bilong em long givim toksave long ol manmeri long samting bai kamap bihain. Kirap long taim nius Wastaua i kamap long namba 1 taim na i kam inap long nau, em olsem 135 yia olgeta, dispela nius i bin kirapim ol man long luksave olsem klostu nau wok bos nogut bilong Satan bai pinis na Jisas Krais bai mekim wok king inap Wan Tausen Yia.​—Rev. 20:1-3, 6.

10, 11. Taim lain Israel i stap long Babilon, ol i bin lukim truim bilong wanem tok profet bilong Aisaia?

¹⁰ Planti lain Juda husat i harim tok na givim ol yet long lain Babilon, ol i abrusim bagarap na ol i go kalabus long Babilon. (Jer. 27:11, 12) Inap 70 yia bihain, lain bilong God i lukim truim bilong narapela tok promis: “God, Bikpela bilong Israel, em God bilong mekim gutpela na stretpela pasin olgeta, na em man bilong sambai long yupela na helpim yupela, em i tok olsem, ‘Bilong helpim yupela ol manmeri bilong mi, bai mi salim ol soldia i kam pait long Babilon.’”​—Ais. 43:14.

¹¹ Long wanpela nait long Oktoba 539 B.C.E., wanpela bikpela samting i kamap bilong inapim dispela tok profet. King bilong Babilon na ol bikman bilong em i dring wain long ol dis gol ol i bin kisim long tempel long Jerusalem na ol i litimapim nem bilong ol giaman god bilong ol. Long dispela taim stret, Sairus i bringim lain ami bilong Midia na Persia i go na ol i daunim Babilon. Long 538 B.C.E. o 537 B.C.E., Sairus i tokim lain Juda long i go bek long Jerusalem na wokim gen tempel bilong God. Aisaia i bin tok profet long ol dispela samting. Na tu, Aisaia i autim tok promis bilong Jehova olsem, taim liklik lain manmeri bilong Jehova i tanim bel na ol i go bek long Jerusalem, orait Jehova bai lukautim ol. God i tok: “Mi bin mekim ol dispela manmeri i kamap lain manmeri bilong mi yet, bai ol i ken amamas na tokaut long biknem bilong mi.” (Ais. 43:21; 44:26-28) Taim dispela liklik lain i go bek long Jerusalem na sanapim gen tempel bilong Jehova, ol i stap olsem ol witnes na luksave olsem Jehova wanpela tasol em i God tru, na oltaim em i save truim tok bilong em.

12, 13. (a) Husat lain i bung wantaim lain Israel taim ol i kirap gen long lotuim Jehova? (b) Olsem wanem ol “arapela sipsip” i ken sapotim wok em “lain Israel bilong God” i mekim? Ol “arapela sipsip” i bilip na wet long kisim wanem blesing?

¹² Planti tausen manmeri bilong ol narapela lain i joinim dispela liklik lain Juda, na bihain planti manmeri i joinim lotu Juda. (Esr. 2:58, 64, 65; Est. 8:17) Ol Kristen God i bin makim, ol i stap olsem “lain Israel bilong God,” na long nau “bikpela lain manmeri” bilong ol “arapela sipsip” bilong Jisas i sapotim wok bilong ol dispela Kristen. (Rev. 7:9, 10; Jon 10:16; Gal. 6:16) Bikpela lain manmeri tu i holim nem olsem ol Witnes Bilong Jehova.

¹³ Taim ol man i kirap bek insait long Wan Tausen Yia bilong Krais, bikpela lain manmeri bai amamas tru long stori long ol i pilim olsem wanem  long stap olsem ol Witnes Bilong Jehova long dispela haptaim bilong las de. Yumi inap mekim olsem sapos long nau yet yumi stap gut long nem yumi holim na yumi wok strong long i stap holi. Na tu, long olgeta de yumi mas beten askim God long fogivim yumi sapos yumi popaia na yumi no bihainim pasin holi, long wanem, yumi ol sinman na yumi kisim gutpela blesing tru long holim nem bilong God.​—Ritim 1 Jon 1:8, 9.

14. Wanem mining bilong dispela nem, Jehova?

¹⁴ Yumi kisim gutpela blesing tru, olsem yumi holim nem bilong God, na sapos yumi laik pilim tru dispela samting, orait yumi mas tingim tingim long bel mining bilong dispela nem. Nem “Jehova” i kam long wanpela tok Hibru we ol i save yusim taim ol i stori long wanpela samting i kamap, na ol inap tanim dispela tok olsem “kamap.” Olsem na long tok Hibru, mining bilong dispela nem i olsem “Em i Mekim i Kamap.” Mining bilong dispela nem i stret long wok bilong Jehova olsem Krieta bilong ol samting bilong ples antap na graun, ol ensel na ol man, na tu, em i Man Bilong Inapim samting em i tingting pinis long mekim. Jehova i wok yet long kamapim laik bilong em na inapim samting em i tingting pinis long mekim maski ol birua, olsem Satan, i laik pasim rot bilong Em.

15. Taim Jehova i stori long mining bilong nem bilong em, olsem wanem dispela i kamapim klia wanpela pasin bilong em? (Lukim blok “ Nem i Gat Bikpela Mining.”)

¹⁵ Taim Jehova i makim Moses long go pas long bringim lain bilong em i kamaut lusim Isip, Jehova i kamapim klia wanpela pasin bilong em taim em i yusim wanpela hap tok long stori long mining bilong nem bilong em. Baibel i tok: “God i tokim Moses: ‘Mi Bai Kamap Wanem Wanem Kain Mi Laikim.’ Na em i tok moa olsem: ‘Yu mas tokim ol Israel olsem, “Mi Bai Kamap em i bin salim mi i kam long yupela.”’” (Kis. 3:14, NW) Olsem na Jehova bai mekim olgeta kain samting bilong inapim samting em i tingting pinis long mekim. Lain Israel i bin kalabus long bipo, na Jehova i bin kamap Man Bilong Kisim Bek ol, Man Bilong Lukautim ol, Man Bilong Stiaim ol, na Man Bilong Givim olgeta samting ol i nidim bilong i stap laip na bilong pas gut wantaim God.

16, 17. (a) Olsem wanem yumi inap soim olsem yumi amamas long holim nem bilong God? (b) Yumi bai skelim wanem samting long stadi i kamap bihain long dispela?

¹⁶ Long nau, Jehova i wok yet long inapim mining bilong nem bilong em taim em i givim olgeta samting yumi nidim bilong i stap laip na bilong pas gut wantaim Em. Mining bilong nem bilong God i no makim tasol ol samting em God yet i mekim, nogat. Dispela mining i makim tu ol samting em i larim i kamap long wok em lain Witnes bilong em i mekim bilong inapim samting em i tingting pinis long mekim. Taim yumi tingim tingim long bel ol dispela samting, dispela bai kirapim yumi long wok strong yet long inapim nem bilong God. Kåre em wanpela brata long Nowe na em i gat 84 krismas. Em i stap strongpela Witnes inap 70 yia nau, na em i tok: “Mi pilim olsem mi kisim gutpela blesing tru long mekim wok bilong Jehova, em King bilong oltaim oltaim, na mi inap stap wanpela bilong ol manmeri husat i holim nem holi bilong God. Taim mi toktok wantaim ol narapela na stori gut long tok i tru bilong Baibel na lukim ol i amamas long kisim save, dispela i save givim bikpela amamas long mi. Bel bilong mi i save stap isi tru taim mi skulim ol olsem ofa bilong Krais bilong baim bek ol man inap helpim ol, na long rot bilong dispela ofa ol inap kisim laip oltaim long nupela taim i gat bel isi na stretpela pasin long en.”

¹⁷ Long sampela teritori, i hatwok tru long painim ol man husat i gat laik long kisim save long God. Tasol taim yu painim man husat i amamas long harim tok na yu skulim em long nem bilong Jehova, yu tu i save kisim bikpela amamas wankain olsem Kåre, a? Orait, hau bai yumi inap i stap olsem ol Witnes Bilong Jehova, na long wankain taim, yumi inap stap olsem ol witnes bilong Jisas? Yumi bai skelim dispela askim long stadi i kamap bihain long dispela.