1, 2. Jehova i yusim wanem ol rot long givim tok long ol wokman bilong em?

 OL STORI bilong Baibel i kamapim olsem Jehova i bin yusim kain kain rot long givim tok bilong stiaim ol man. Sampela taim God i yusim ol ensel, ol visen, o driman long toksave long ol man long ol samting bai kamap bihain. Na tu, Jehova i yusim ol dispela rot long toksave long ol man long wok ol i mas mekim. (Nam. 7:89; Ese. 1:1; Dan. 2:19) Long hap bilong oganaisesen bilong Jehova long graun, i gat ol man i go pas long mekim wok na Jehova i yusim ol dispela man long givim tok bilong stiaim ol narapela. Maski Jehova i yusim wanem rot long givim tok long ol manmeri bilong em, ol dispela tok i save helpim ol taim ol i bihainim.

² Long nau, Jehova i yusim Baibel, holi spirit, na kongrigesen long stiaim ol manmeri bilong em. (Apo. 9:31; 15:28; 2 Tim. 3:16, 17) Taim em i givim ol tok bilong stiaim yumi, ol dispela tok i klia tru na i olsem ‘yau bilong yumi yet i harim wanpela nek i kamap long baksait bilong yumi na i tok, “Dispela em i rot. Wokabaut long en.”’ (Ais. 30:21, NW) Na tu, Jisas i helpim yumi long harim nek bilong Jehova bikos em i yusim “gutpela wokboi i gat savetingting” long stiaim kongrigesen. (Mat. 24:45) Yumi mas bihainim gut ol tok yumi kisim, long wanem, dispela bai helpim yumi long kisim laip oltaim.—Hib. 5:9.

3. Wanem ol samting inap mekim na yumi no bihainim gut ol tok Jehova i givim bilong stiaim yumi? (Lukim piksa long kirap bilong stadi.)

³ Satan i strong long pulim tingting bilong yumi na bai yumi no  tingim tumas ol tok yumi kisim long Jehova, em ol tok we inap helpim yumi long abrusim bagarap. ‘Bel bilong yumi man i save tingting oltaim long mekim pasin giaman,’ na dispela inap mekim na yumi no bihainim gut ol tok Jehova i givim bilong stiaim yumi. (Jer. 17:9) Orait, yumi ken stori long ol samting yumi ken mekim na bai yumi no ken larim ol narapela samting i pasim yumi long harim nek bilong God. Na tu, yumi ken stori long olsem wanem pasin bilong toktok gut wantaim Jehova bai lukautim pasin bilong yumi long pas gut wantaim em.

4. Satan i yusim wanem ol samting long paulim tingting bilong ol man?

⁴ Satan i laik paulim tingting bilong ol man, olsem na em i kamapim ol tok giaman. (Ritim 1 Jon 5:19.) Long olgeta hap, Satan i kamapim ol tok giaman na em i yusim ol buk na niuspepa samting, redio, TV, na Intenet. Ol dispela nius na program i save kamapim ol gutpela stori, tasol planti taim ol i sapotim ol pasin na lo we i no stret wantaim ol lo bilong Jehova. (Jer. 2:13) Olsem: Nius na ol muvi i save strongim tok olsem i orait long man i maritim man na meri i maritim meri, na planti man i pilim olsem Baibel i mekim hatpela tok tumas long ol manmeri i bihainim dispela pasin.—1 Kor. 6:9, 10.

5. Yumi mas mekim wanem na bai yumi no ken larim ol tok giaman bilong Satan i pundaunim yumi?

⁵ Ol man husat i laikim stretpela pasin bilong God, ol i mas mekim wanem na bai ol tok giaman bilong Satan i no ken pundaunim ol? Hau bai ol inap luksave long wanem tok i stret na wanem tok i no stret? ‘Ol i mas bihainim tok bilong God na bai ol i stap klin’! (Sng. 119:9) Baibel i gat ol gutpela stiatok bilong helpim yumi long luksave long wanem tok em i tru na wanem tok em i giaman. (Snd. 23:23) Jisas i kamapim tok bilong Rait Holi na em i tok: “[Man] i mas bihainim tu olgeta tok i kamap long maus bilong Jehova.” (Mat. 4:4) Yumi mas lain long olsem wanem yumi inap bihainim ol stiatok bilong Baibel. Olsem: Planti yia paslain long Moses i raitim lo bilong Jehova we i tambuim pasin adaltri, Josep i bin stap yangpela mangi yet na em i kliagut olsem pasin adaltri em sin long ai bilong God. Taim meri bilong Potifar i laik grisim Josep long mekim rong, Josep i strong long bihainim tok bilong Jehova na em i sakim meri bilong Potifar. (Ritim Stat 39:7-9.) Inap sampela haptaim, meri bilong Potifar i traim long pulim Josep, tasol Josep i no larim tok bilong dispela meri i pasim em long putim yau long nek bilong God. Sapos yumi laik luksave long wanem samting i stret na wanem samting i no stret, orait yumi mas putim yau long nek bilong Jehova na no ken putim yau long tok giaman bilong Satan.

6, 7. Yumi mas mekim wanem na bai yumi inap abrusim ol tok bilong Satan, em ol tok we i no stret?

⁶ Dispela graun i pulap tru long planti kain kain bilip bilong lotu, olsem na planti man i pilim olsem sapos ol i traim long painim lotu i tru, hatwok bilong ol bai lus nating. Tasol sampela man i amamas long kisim ol tok i kam long Jehova, olsem na Jehova i helpim ol long kliagut long tok bilong em. Yumi yet i mas makim olsem yumi bai putim yau long husat. Yumi no inap putim yau long 2-pela nek long seim taim, olsem na yumi mas “save long nek” bilong Jisas na putim yau long em. Jehova i gat ol sipsip na em i makim Jisas  long lukautim ol dispela sipsip.—Ritim Jon 10:3-5.

⁷ Jisas i tok: “Putim gut yau long ol tok yupela i wok long harim.” (Mak 4:24) Tok kaunsel bilong Jehova i stret na yumi inap kliagut long en, tasol yumi mas redim bel bilong yumi long kisim ol dispela tok. Sapos yumi no was gut, yumi inap putim yau long ol tok bilong Satan, em ol tok we i no stret, na yumi no putim yau long ol gutpela tok kaunsel i kam long God. No ken larim ol samting bilong graun i kontrolim laip bilong yu, em ol kain samting olsem ol musik, ol vidio, ol program bilong TV, ol buk, ol poroman, ol tisa, na ol saveman.—Kol. 2:8.

8. (a) Hau na bel inap giamanim yumi na yumi no luksave long ol trik bilong Satan? (b) Wanem hevi inap kamap sapos yumi luksave long ol tingting kranki bilong yumi na yumi no stretim ol dispela tingting?

⁸ Satan i save olsem yumi gat ol laik nogut bilong mekim sin, olsem na em i laik kirapim yumi long bihainim ol dispela laik. Dispela i mekim na yumi pilim hatwok long holimpas pasin bilong stap gut long God. (Jon 8:44-47) Hau bai yumi inap holimpas pasin bilong i stap gut long God? Tingim olsem: Wanpela man i laik inapim laik bilong sotpela taim tasol, olsem na em i mekim wanpela rong we em i no bin ting olsem em bai mekim. (Rom 7:15) Wanem samting i kirapim em long mekim dispela rong? Ating isi isi dispela man i lusim pasin bilong putim yau long nek bilong Jehova. Ating em i no luksave long ol senis i kamap long tingting bilong em, o ating em i luksave, tasol em i no laik stretim ol dispela tingting. Ating em i lusim pasin bilong beten, na em i no givim bel moa long autim tok, na em i kirap long lusim ol miting. I no longtaim, em i bihainim laik nogut bilong em. Yumi no inap mekim kain bikpela rong olsem sapos yumi luksave long ol tingting kranki bilong yumi na yumi kirap kwik long stretim ol dispela tingting. Sapos yumi putim yau long nek bilong Jehova, yumi no inap kisim tingting bilong ol apostet.—Snd. 11:9.

9. Wai na yumi mas luksave kwik long ol tingting nogut i stap long bel?

⁹ Sapos man i luksave kwik olsem bikpela sik i laik painim em, dispela inap helpim em long abrusim bagarap. Olsem tasol, yumi inap abrusim bagarap sapos yumi luksave kwik long ol laik nogut we inap pulim yumi long pundaun long traim. Taim yumi luksave, orait yumi mas kirap kwik long daunim ol laik nogut paslain long ‘Satan i holimpas yumi bilong bihainim laik bilong em.’ (2 Tim. 2:26) Yumi mas mekim wanem sapos yumi luksave olsem isi isi tingting na laik bilong yumi i no kirapim yumi moa long mekim ol samting Jehova i laik yumi mas mekim? Kwiktaim yumi mas daunim yumi yet na kam bek long Jehova, putim yau long tok kaunsel bilong em, na givim bel olgeta long bihainim tok bilong em. (Ais. 44:22) Yumi mas luksave olsem sapos yumi no mekim gutpela disisen, dispela inap  bagarapim tru gutpela pasin bilong yumi na yumi inap karim ol bikpela hevi long dispela haptaim bilong nau. Yumi mas hariap long daunim ol tingting nogut na bai yumi no ken mekim ol kain bikpela rong olsem!

10, 11. (a) Man bai mekim wanem sapos em i gat pasin antap? (b) Yumi kisim wanem skul long pasin bikhet bilong Kora, Datan, na Abiram?

¹⁰ Yumi mas luksave olsem laik bilong bel inap pulim yumi long lusim bilip. Strongpela laik bilong bel i save putim bikpela presa long yumi! Tingim pasin antap na pasin gridi. Ol dispela pasin inap mekim na yumi no putim gut yau long nek bilong Jehova na yumi inap bihainim rot nogut. Man i gat pasin antap i save pilim olsem em i gutpela moa winim ol narapela. Ating em i pilim olsem em i gat rait long mekim olgeta samting em i laik mekim, na i no gat man inap tokim em long samting em i mas mekim. Ating em inap pilim olsem em i no nidim ol tok kaunsel i kam long ol wanbilip Kristen, ol elda, na oganaisesen bilong God. Long kain man olsem, pastaim em i harim klia nek bilong Jehova, tasol nau em i no inap harim gut.

¹¹ Long taim lain Israel i wokabaut long ples drai nating, Kora, Datan, na Abiram i bikhet long wok bos bilong Moses na Aron. Ol dispela bikhet man i gat pasin antap, olsem na ol yet i makim pasin ol bai bihainim long lotuim Jehova. Jehova i mekim wanem? Em i kilim ol i dai. (Nam. 26:8-10) Yumi kisim bikpela skul long dispela stori! Sapos yumi bikhet long Jehova, bikpela hevi inap painim yumi. Yumi mas tingim tu olsem “pasin bilong hambak na litimapim nem bilong [yumi] yet bai i mekim [yumi] i pundaun na bagarap.”—Snd. 16:18; Ais. 13:11.

12, 13. (a) Stori long olsem wanem pasin gridi inap bagarapim yumi. (b) Stori long olsem wanem pasin gridi inap kamap bikpela sapos yumi no daunim dispela pasin.

¹² Orait nau yumi ken stori long olsem wanem pasin gridi inap bagarapim yumi. Sapos man i gat pasin gridi, em bai bihainim laik bilong em yet na em i no inap bihainim lo bilong stretpela pasin. Naman em kepten bilong ami bilong Siria na em i bin kisim sik lepra. Taim profet Elisa i oraitim Naman long sik lepra, Naman i laik givim ol presen long em, tasol Elisa i no laik kisim. Gehasi, em wokman bilong Elisa, em i mangalim ol dispela presen. Gehasi i tok long em yet olsem: “Long nem bilong Bikpela i stap oltaim, mi tok tru tumas, bai mi ran i go bihainim Naman na bai mi kisim sampela samting long em.” Gehasi i hait long Elisa na em i ran na bihainim Naman i go, na em i tok giaman na askim Naman long givim “wanpela bek silva na tupela gutpela klos.” Taim Gehasi i mekim dispela pasin na giamanim profet bilong Jehova, wanem samting i painim em? Gehasi i bihainim pasin gridi, olsem na sik lepra bilong Naman i kisim em!—2 Kin. 5:20-27.

¹³ Man inap gridi long ol liklik samting, tasol sapos em i no daunim dispela pasin, pasin gridi inap kamap bikpela na bagarapim em. Stori bilong Akan long Baibel i soim klia olsem pasin gridi i gat strong long pundaunim man. Akan i gat pasin gridi na kwiktaim dispela pasin i kamap bikpela. Em i tok: “Mi lukim wanpela naispela klos bilong ol Babilon na hap silva, hevi bilong en inap 4 kilogram, na hap gol inap wan kilogram. Mi mangalim tumas ol dispela samting na mi kisim ol.” Akan i no sakim dispela laik nogut, nogat, em i stilim ol dispela samting na haitim insait long haus sel bilong em. Taim pasin nogut bilong Akan i kamap ples klia, Josua i tokim em olsem Jehova bai bagarapim em. Long dispela de yet, ol i stonim Akan na famili bilong en. (Jos. 7:11, 21, 24, 25) Pasin gridi inap bagarapim yumi. Olsem na yumi mas “sakim olgeta kain pasin mangal.” (Luk 12:15) Sampela taim yumi inap kisim tingting nogut o long tingting yumi inap piksaim ol pasin doti, olsem na em i bikpela samting long bosim gut tingting na no ken larim ol laik nogut i kamap bikpela na pulim yumi long mekim sin.—Ritim Jems 1:14, 15.

14. Yumi mas mekim wanem sapos yumi luksave olsem yumi holim ol tingting i makim olsem yumi gat pasin antap na pasin gridi?

¹⁴ Pasin antap na pasin gridi inap bagarapim yumi. Sapos yumi tingim tingim ol hevi inap kamap  taim yumi bihainim rot nogut, dispela bai helpim yumi na yumi no inap larim ol tingting nogut i pasim yumi long harim nek bilong Jehova. (Lo 32:29) Long Baibel, God i tokim yumi long stretpela rot yumi mas bihainim, na em i stori long ol blesing yumi bai kisim taim yumi bihainim dispela rot, na tu, em i stori long ol hevi bai painim yumi sapos yumi bihainim rot nogut. Sapos bel i kirapim yumi long tingim tingim wanpela samting na yumi pilim olsem yumi kisim pasin antap o pasin gridi, orait yumi mas tingim ol hevi bai kamap sapos yumi bihainim dispela pasin! Yumi mas tingting long olsem wanem dispela rong bai putim hevi long yumi, na famili bilong yumi, na bagarapim pasin bilong yumi long pas gut wantaim Jehova.

15. Yumi inap kisim wanem skul long pasin bilong Jisas long toktok wantaim God?

¹⁵ Jehova i laik bai yumi stap gut na stap amamas. (Sng. 1:1-3) Em i givim planti gutpela tok yumi nidim bilong stiaim yumi. (Ritim Hibru 4:16.) Maski Jisas i no gat sin na em i gutpela olgeta, oltaim em i save toktok wantaim Jehova, na em i save beten long olgeta taim. Jehova i yusim kain kain rot long sambai long Jisas na stiaim em. Em i salim ol ensel bilong sambai long Jisas, na yusim holi spirit long helpim em na stiaim em taim em i makim 12-pela aposel. Nek bilong Jehova i kamap long heven na em i tokaut olsem em i orait long Jisas na amamas long em. (Mat. 3:17; 17:5; Mak 1:12, 13; Luk 6:12, 13; Jon 12:28) Wankain olsem Jisas, yumi mas beten long God na kamapim olgeta tingting i stap long bel bilong yumi. (Sng. 62:7, 8; Hib. 5:7) Long rot bilong beten, yumi inap kisim pasin bilong toktok gut wantaim Jehova na bihainim rot we inap givim biknem long em.

16. Yumi mas mekim wanem sapos yumi laik bai Jehova i helpim yumi na yumi inap harim nek bilong em?

¹⁶ Jehova i save amamas long givim ol skultok, tasol em i no save fosim ol man long bihainim ol dispela tok. Yumi mas askim God long givim holi spirit long yumi, na em bai amamas long givim. (Ritim Luk 11:10-13.) Em i bikpela samting long yumi mas ‘skelim gut pasin bilong yumi long harim tok.’ (Luk 8:18) Olsem: Sapos yumi askim Jehova long helpim yumi long daunim laik bilong mekim pasin pamuk, tasol yumi lukim yet ponografi o ol muvi i gat pasin pamuk long en, orait dispela em pasin bilong tupela maus. Yumi mas stap long ol ples o ol bung we spirit bilong Jehova i stap long en. Yumi save olsem spirit bilong God i stap long ol miting bilong kongrigesen. Planti wokman bilong Jehova i bin abrusim bagarap bikos ol i bihainim tok ol i kisim long Jehova long rot bilong ol miting. Ol i luksave long ol laik nogut i kamap long bel bilong ol na ol i stretim pasin bilong ol na daunim ol dispela laik nogut.—Sng. 73:12-17; 143:10.

17. Wai na yumi no ken bihainim tingting bilong yumi yet?

¹⁷ Tingim samting i painim King Devit bilong Israel bilong bipo. Taim em i stap yangpela yet, em i winim pait na daunim traipela man Goliat bilong Filistia. Devit i kamap soldia, king, man bilong lukautim lain bilong em, na man bilong mekim disisen bilong kantri. Tasol taim Devit i bihainim tingting bilong em yet, bel bilong em i giamanim em na em i mekim bikpela rong wantaim Batseba, na tu, em i stretim rot long kilim i dai Uria, man bilong Batseba. Taim Devit i kisim tok bilong stretim em, em i daunim em yet na tokaut long sin bilong em, na em i strongim gen pasin bilong em long pas gut wantaim Jehova.—Sng. 51:4, 6, 10, 11.

18. Wanem samting inap helpim yumi long wok yet long putim yau long nek bilong Jehova?

¹⁸ Yumi mas bihainim skultok i stap long 1 Korin 10:12, na yumi no ken bilip long strong bilong yumi yet. Yumi no inap ‘bosim wokabaut bilong yumi yet,’ olsem na yumi inap putim yau long nek bilong Jehova o nek bilong Birua bilong God. (Jer. 10:23) Oltaim yumi mas beten, larim holi spirit i stiaim yumi, na oltaim yumi mas putim gut yau long nek bilong Jehova.