1. Ol manmeri i nidim wanem samting? Husat i ken inapim samting ol i nidim?

 OL MANMERI i nidim tru wanpela samting—ol i mas pilim olsem ol i pas gut wantaim ol arapela. Wanpela buk i tok, ol manmeri i save “pas gut taim ol i laikim tru na save gut long narapela narapela.” Yumi save stap amamas taim yumi pas gut wantaim ol wanfamili na ol pren husat i laikim yumi, amamas long yumi, na pilim tingting bilong yumi. Tasol i gat wanpela Man em yumi mas pas gut moa wantaim em—Nambawan Bikpela Krieta bilong yumi.—Sav. 12:1.

2. Jehova i tok promis long mekim wanem? Wai na planti man i no bilipim dispela tok promis?

² Long Baibel, Jehova i kirapim yumi long i “go klostu” long em, na em i tok promis olsem sapos yumi go klostu long em, orait “em bai kam klostu” long yumi. (Jems 4:8) Dispela i strongim tru bel bilong yumi! Tasol planti man i ting olsem God i no laik pas gut wantaim ol, na ol i pilim olsem ol i no gutpela inap long i go klostu long em, na tu, ol i pilim olsem em i stap longwe tumas. Yu ting i gat rot long i go klostu long Jehova?

3. Yumi mas kisim wanem stretpela save long Jehova?

³ Jehova “i no stap longwe long yumi olgeta wan wan” husat i laik painim em, na i gat rot long yumi inap i go klostu long em. (Ritim Aposel 17:26, 27; Song 145:18.) God i laik bai ol sinman i mas i go  klostu long em, na em i redi na amamas long kisim ol olsem ol pren bilong em. (Ais. 41:8; 55:6) Man bilong raitim song i tingim ekspiriens bilong em yet na em i tok long Jehova olsem: “Yu save harim beten bilong mipela. Olsem na mipela olgeta manmeri i mas i go long yu. Ol man yu save makim na bringim i go long haus bilong yu, ol i ken amamas.” (Sng. 65:2, 4) Stori bilong Baibel long King Asa bilong Juda i soim olsem em i go klostu long God, na Jehova i bin helpim em. a

4. King Asa i soim wanem gutpela pasin em ol Juda i ken bihainim?

⁴ King Asa i soim olsem em i givim bel tru long lotu i tru, olsem na maski ol man i strong long mekim pasin pamuk long tempel na lotuim ol god giaman, Asa i rausim ol dispela lain na pinisim ol pasin nogut. (1 Kin. 15:9-13) Em i tokim ol manmeri olsem “ol i mas strong long bihainim laik bilong God, Bikpela bilong ol tumbuna bilong ol, na bihainim olgeta lo na tok bilong en.” Long 10-pela yia kirap long taim Asa i mekim wok king, Jehova i blesim em na kantri i stap bel isi. Husat i helpim kantri long i stap bel isi? Asa i tok: “Nau yumi save stap gut long kantri bilong yumi, long wanem, yumi save strong long bihainim laik bilong God, Bikpela bilong yumi. Olsem na Bikpela i bin lukautim kantri bilong yumi gut na i no gat wanpela hevi i kamap long yumi.” (2 Sto. 14:1-7) Orait, wanem samting i kamap bihain?

5. Wanem hevi i kamap na i traim bilip bilong Asa? Wanem samting i painim ol birua?

⁵ Skelim ol samting i painim Asa, na tingim olsem ol dispela samting i bin painim yu. Sera, em man bilong kantri Sudan, em i kam bilong pait long Juda na em i kam wantaim 1 milion man na 3 handret karis bilong pait. (2 Sto. 14:8-10) Yu bai pilim olsem wanem sapos yu lukim bikpela ami olsem i mats i kam long kantri bilong yu? Namba bilong ol man long ami bilong yu em inap olsem 5 handret na 80 tausen tasol! Dispela i makim olsem 1-pela man long ami bilong yu bai pait long 2-pela man long ami bilong Sera. Ating yu bai tingting planti long wai na God i larim dispela hevi i kamap. Yu ting yu bai bihainim savetingting bilong yu yet na traim long stretim dispela hevi? Samting Asa i mekim i soim klia olsem em i pas gut tru wantaim Jehova na trastim em. Asa i singaut olsem: “Bikpela, yu save, ol ami bilong mi i no planti na mipela i no gat strong, na dispela man i gat bikpela lain ami tru. Tasol yu save helpim ol man i no gat strong na ol inap winim ol strongpela man.” God i mekim wanem bilong helpim Asa? Jehova “i daunim ol Sudan.” Olgeta birua i dai long dispela pait!—2 Sto. 14:11-13.

6. Yumi mas bihainim wanem pasin bilong Asa?

⁶ Wanem samting i helpim Asa long bilip tru olsem God bai stiaim em na lukautim em? Baibel i tok, “Asa i mekim gutpela pasin long ai bilong Bikpela” na “oltaim em i save laikim tumas Bikpela na i aninit tru long em.” (1 Kin. 15:11, 14) Yumi tu i mas laikim tumas God na lotuim em. Em i bikpela samting long yumi mas mekim olsem sapos yumi laik pas gut wantaim God long nau na long bihain. Yumi tenkyu tru olsem Jehova i stretim rot bilong kirapim yumi long i go klostu long em na helpim yumi long kisim na holimpas pasin bilong pas gut wantaim em! Yumi ken skelim 2-pela rot em God i yusim bilong kirapim yumi long mekim ol dispela samting.

7. (a) Jehova i mekim wanem na dispela i kirapim yumi long i go klostu long em? (b) Wanem samting i stap olsem nambawan bikpela rot God i yusim bilong kirapim yumi long i go klostu long em?

⁷ Taim Jehova i wokim graun i kamap olsem naispela ples bilong yumi ken i stap long en, em i soim olsem em i laikim tru yumi. Em i wok yet long soim pasin laikim long yumi, long wanem,  em i save givim ol samting yumi nidim bilong i stap laip, olsem kaikai na wara samting. (Apo. 17:28; Rev. 4:11) Bikpela samting moa em olsem, Jehova i save givim ol samting yumi nidim bilong helpim yumi long stap strong long bilip. (Luk 12:42) Na tu, em i strongim yumi olsem em yet i save putim yau taim yumi beten long em. (1 Jon 5:14) Tasol ofa bilong baim bek man em nambawan bikpela rot God i yusim bilong kirapim yumi long i go klostu long em. (Ritim 1 Jon 4:9, 10, 19.) Jehova i salim “Pikinini tru bilong en” i kam long graun bambai em inap kisim bek yumi long kalabus bilong sin na dai.—Jon 3:16.

8, 9. Jisas i mekim wanem wok bilong kamapim samting Jehova i tingting pinis long mekim?

⁸ Jehova i stretim rot na ol man husat i stap paslain long taim bilong Krais, ol tu inap kisim helpim long pe bilong baim bek man. Kirap stret long taim Jehova i tokaut olsem em bai salim Man Bilong Kisim Bek ol man, long ai bilong em i olsem em i givim pinis pe bilong baim bek man, long wanem, em i save olsem i no gat wanpela samting inap pasim Em long kamapim samting em i tingting pinis long mekim. (Stt. 3:15) Planti handret yia bihain, aposel Pol i tok tenkyu long God long “wok bilong Krais Jisas long givim pe bilong baim bek man.” Pol i tok moa olsem: “[God] i bin lusim sin ol man i bin mekim long bipo, long taim em i isi long ol man.” (Rom 3:21-26) Tru tumas! Jisas i bin mekim bikpela wok tru bilong helpim yumi long i go klostu long God!

⁹ Long rot bilong Jisas tasol ol man inap kisim save long Jehova na pas gut wantaim em. Olsem wanem Baibel i kamapim klia dispela samting? Pol i tok: “God i soim pasin laikim bilong em long yumi long dispela rot: Krais i dai bilong helpim yumi taim yumi stap sinman yet.” (Rom 5:6-8) God i stretim rot long Jisas i givim pe bilong baim bek man, long wanem, God i laikim tru yumi, na i no olsem yumi yet i gutpela olgeta, nogat. Jisas i tok: “I no gat man inap kam long mi sapos Papa, husat i bin salim mi i kam, i no kirapim em long kam long mi.” Long narapela taim, Jisas i tok: “I no gat man inap kam long Papa long narapela rot, nogat, long rot bilong mi tasol.” (Jon 6:44; 14:6) Jehova i yusim holi spirit, na long rot bilong Jisas, Em i kirapim ol man long i go klostu long Em na helpim ol long stap insait long pasin laikim bilong Em na bilip na wet long kisim laip oltaim. (Ritim Jut 20, 21.) Yumi ken skelim narapela rot em Jehova i yusim long kirapim yumi long i go klostu long em.

10. Baibel i givim wanem skul long yumi na dispela i helpim yumi long i go klostu moa long God?

¹⁰ Long dispela stadi, yumi kolim pinis ol skripsa i kam long 14 narapela narapela buk bilong Baibel. Baibel i helpim yumi long save olsem yumi inap i go klostu long Krieta bilong yumi. Na tu, Baibel i helpim yumi long kisim save long ofa bilong baim bek man, na long rot bilong Jisas yumi inap i go klostu long Jehova. Jehova i yusim spirit bilong em long stiaim ol man long raitim Baibel, na dispela i skulim yumi long ol gutpela pasin bilong em, na ol bikpela samting em i tingting pinis long mekim. Olsem: Long Kisim Bek 34:6, 7, (NW) Jehova i toktok wantaim Moses na stori long pasin bilong em yet olsem, “em i God bilong marimari na tingim man, em i no save belhat kwik na gutpela pasin sori bilong em i bikpela tru na em i save tok tru oltaim, na em i save mekim gutpela-pasin-sori long planti tausen manmeri, na lusim rong na asua na sin bilong ol.” Yu ting ol man bai les long i go klostu long man i gat kain gutpela pasin olsem? Jehova i save olsem taim yumi kisim planti save moa long em long rot bilong Baibel, yumi bai tingim em olsem Man i stap tru na yumi bai i go klostu moa long em.

11. Wai na yumi mas wok strong long kisim save long ol pasin bilong God? (Lukim piksa long kirap bilong stadi.)

¹¹ Long buk Go Klostu Long Jehova, tok i go pas i stori long hau yumi inap pas gut wantaim God, na i tok: “Taim yumi laik kamap pren bilong wanpela man, dispela pasin pren inap kamap  taim yumi save long em, laikim na tingim tru ol pasin bilong em. Olsem na em i bikpela samting long kisim save long ol pasin bilong God na ol pasin bilong em long mekim ol samting olsem Baibel i kamapim.” Yumi ken tenkyu tru olsem Jehova i larim ol man i raitim ol tok bilong Baibel long pasin we yumi inap kliagut long en!

12. Wai na Jehova i yusim ol man long raitim Baibel?

¹² Ol ensel i save tingim tru yumi na ol wok yumi mekim, olsem na Jehova inap makim ol long raitim ol tok bilong Baibel. (1 Pita 1:12) Yumi save olsem ol ensel inap raitim tok em God i laik givim long ol man. Tasol yu ting ol inap holim wankain tingting olsem yumi ol man? Yu ting ol inap save long ol samting yumi laikim, pilim bel hevi bilong yumi taim yumi mekim rong, na save long ol mak yumi laik winim? Nogat. Jehova i save olsem ol i no inap mekim ol dispela samting. Taim Jehova i yusim ol man long raitim Baibel, dispela i soim olsem Jehova i tingim tru yumi. Yumi inap pilim tingting bilong ol man bilong raitim Baibel na ol arapela em Baibel i stori long ol. Yumi inap pilim tingting bilong ol taim ol i bel hevi, tingting planti, pret, mekim rong, na tu, long taim ol i amamas na ol gutpela samting i painim ol. Wankain olsem profet Elaija, olgeta man bilong raitim Baibel ol i “man wankain olsem yumi.”—Jems 5:17.

13. Yu pilim olsem wanem long beten bilong Jona?

¹³ Skelim: Yu ting wanpela ensel inap stori gut long profet Jona i pilim olsem wanem taim em i ranawe long wok em God i bin givim long em? Em gutpela moa olsem Jehova i larim Jona yet long raitim stori bilong em, na em i stori tu long beten em i mekim taim em i stap aninit tru long solwara! Jona i tok: “Bikpela, mi pilim olsem mi laik i dai, olsem na mi tingting long yu.”—Jona 1:3, 10; 2:1-9.

14. Wai na yumi inap pilim tingting bilong Aisaia long tok em i raitim bilong stori long pasin bilong em yet?

¹⁴ Skelim tu tok em Jehova i larim Aisaia long raitim taim em i stori long ekspiriens bilong em yet. Profet Aisaia i lukim glori bilong God long rot bilong visen na dispela i kirapim em long tingim ol rong bilong em yet, na em i tok: “Tru  tumas, bai mi bagarap. Oltaim maus bilong mi i save mekim toktok nogut tasol. Na mi stap wantaim ol manmeri bilong mekim toktok nogut. Mi man bilong sin, na nau mi lukim pinis dispela King, em Bikpela I Gat Olgeta Strong. Olsem na bai mi dai.” (Ais. 6:5) Yu ting ensel bai inap long mekim kain tok olsem? Aisaia inap mekim ol dispela tok, na yumi inap pilim tingting bilong em.

15, 16. (a) Hau na yumi inap pilim tingting bilong ol arapela man? Stori long sampela eksampel. (b) Wanem samting bai helpim yumi long i go klostu moa long Jehova?

¹⁵ Yu ting ol ensel inap tok olsem ol i “no gutpela” wankain olsem Jekop i tok, o ol i “sinman” wankain olsem Pita i bin pilim? (Stt. 32:10; Luk 5:8) Yu ting ol bai “pret” wankain olsem ol disaipel bilong Jisas i bin pilim, o yu ting ol stretpela ensel i mas “strongim bel na i no surik” long autim gutnius taim ol man i birua, wankain olsem Pol na ol narapela i bin mekim? (Jon 6:19; 1 Tes. 2:2) Nogat. Ol ensel i gutpela olgeta na ol i gat bikpela strong winim yumi ol man. Taim ol man bilong graun i kamapim kain tok olsem, kwiktaim yumi bai pilim tingting bilong ol bikos yumi tu yumi man nating bilong graun. Taim yumi ritim Tok Bilong God, yumi inap tru long “amamas wantaim ol man i amamas, na krai wantaim ol man i krai.”—Rom 12:15.

¹⁶ Sapos yumi tingim tingim stori bilong Baibel long ol samting Jehova i mekim long ol gutpela wokman bilong em long bipo, yumi bai kisim planti gutpela save long God, em man husat i soim pasin isi long yumi na long pasin laikim em i kam klostu long yumi. Olsem na rot i op long yumi inap save gut long Jehova na laikim em tru. Long dispela rot, yumi inap i go klostu moa long em.—Ritim Song 25:14.

17. (a) Asaria i givim wanem gutpela tok long Asa? (b) Olsem wanem Asa i sakim tok bilong Asaria? Wanem samting bai painim Asa na lain bilong em?

¹⁷ Bihain long King Asa i winim pait na daunim tru lain ami bilong Sudan, profet Asaria i givim sampela tok bilong stiaim Asa na lain bilong em. Asaria i tok: “Sapos yupela i stap klostu long Bikpela, orait bai em i stap wantaim yupela. Na sapos yupela i wok long painim em, orait bai yupela inap i kam klostu long em. Tasol sapos yupela i givim baksait long em, orait bai em i givim baksait long yupela.” (2 Sto. 15:1, 2) Bihain long sampela yia, Asa i no bihainim dispela tok. Taim lain Israel long hap not i laik i go pait long Asa na lain bilong em, Asa i askim lain Siria long helpim em. Em i no askim gen Jehova, nogat, em i askim lain haiden long helpim em. Olsem na i stret long profet i tokim Asa olsem: “Dispela pasin yu bin mekim long askim king bilong Siria long helpim yu, em i kranki tru. Olsem na nau bai yu wantaim ol Juda i no inap sindaun isi moa. Nogat. Oltaim bai ol birua i kam pait long yupela.” (2 Sto. 16:1-9) Yumi kisim wanem skul long dispela stori?

18, 19. (a) Yumi mas mekim wanem sapos nau yumi no pas gut tumas wantaim God? (b) Olsem wanem yumi inap i go klostu moa long Jehova?

¹⁸ Yumi no ken tru lusim Jehova na i go longwe long em. Sapos nau yumi stap longwe liklik long Jehova, orait yumi mas bihainim tok bilong Hosea 12:6, em i tok: “Yupela i mas bilip long God bilong yupela na kam bek long em. Na yupela i mas bihainim em tru na mekim stretpela pasin, na wetim em i helpim yupela.” Olsem na yumi mas wok strong moa long mekim ol samting we bai helpim yumi long i go klostu moa long Jehova, olsem yumi mas tingim tingim na pilim tru pe bilong baim bek man na wok strong long stadi long tok bilong God i stap long Baibel.—Ritim Lo 13:4.

¹⁹ Man bilong raitim song i tok: “Mi stap klostu long [God] na dispela i gutpela tru.” (Sng. 73:28) Yumi olgeta i mas wok yet long kisim ol nupela save long Jehova na pilim tru ol samting we inap kirapim yumi long laikim em. Yumi laik bai Jehova i kam klostu moa long yumi long nau na i go inap long olgeta taim bihain!