Askim
Jisas i tokim ol Sadyusi olsem ol manmeri husat i kirap bek, “ol bai i no marit.” (Luk 20:34-36) Yu ting tok bilong em i makim ol manmeri husat bai kirap bek long graun?
Dispela em wanpela bikpela askim, moa yet long ol lain em poroman marit bilong ol i dai. Ol dispela lain i laik tru long maritim gen poroman marit bilong ol taim poroman marit i kirap bek long nupela taim. Wanpela man em meri bilong em i dai, em i tok: “Mi na meri bilong mi i no laik tru long brukim marit bilong mitupela. Mitupela i laik tru long stap yet olsem ol poroman marit na lotuim God inap oltaim oltaim. Mi holim yet dispela tingting.” Yu ting i gat gutpela risen long yumi ken ting olsem ol poroman marit bai inap long marit gen taim ol i kirap bek? I no gat rot long yumi inap bekim stret dispela askim.
Jisas i bin stori long kirap bek na sait bilong marit, na inap planti yia ol pablikesen bilong yumi i tok dispela i makim kirap bek bilong graun, na ol lain i kirap bek na kisim laip long nupela taim, ol bai i no inap marit. a (Mat. 22:29, 30; Mak 12:24, 25; Luk 20:34-36) Yumi no inap strongim dispela tok, tasol yu ting tok bilong Jisas i makim kirap bek bilong kisim laip long heven? Orait yumi ken skelim tok bilong Jisas.
Skelim ol samting i kamap. (Ritim Luk 20:27-33.) Ol Sadyusi i no bilip long kirap bek, olsem na ol i laik trikim Jisas na ol i mekim wanpela askim bilong kirap bek na pasin bilong maritim tambu. b Jisas i bekim tok olsem: “Ol pikinini bilong dispela taim i save marit, tasol ol lain em ol i gutpela inap long stap long dispela taim i kamap bihain na ol i kirap bek long dai, ol bai i no marit. Ol i no inap dai moa, ol bai stap olsem ol ensel. God bai kirapim bek ol, olsem na ol bai stap ol pikinini bilong em.”—Luk 20:34-36.
Wai na ol pablikesen bilong yumi i tok olsem ating Jisas i toktok long kirap bek bilong graun? I gat 2-pela risen. Namba 1: Ating ol Sadyusi i tingting long kirap bek bilong kisim laip long graun na ol i ting olsem Jisas bai bekim stret askim bilong ol. Namba 2: Taim Jisas i laik pinisim tok bilong em, em i kolim Abraham, Aisak, na Jekop—em ol gutpela wokman bilong em husat bai kirap bek na kisim laip long graun.—Luk 20:37, 38.
Tasol i luk olsem Jisas i toktok long kirap bek bilong kisim laip long heven. Wai na yumi inap tok olsem? Yumi ken skelim 2-pela bikpela tok.
“Ol lain em ol i gutpela inap long . . . ol i kirap bek long dai.” Ol Kristen God i bin makim na ol i stap gut long God, ol “i gutpela inap long go insait long kingdom bilong God.” (2 Tes. 1:5, 11) Long rot bilong pe bilong baim bek man, God i tok ol i stretpela manmeri na ol i no inap dai olsem ol sinman. (Rom 5:1, 18; 8:1) Ol dispela manmeri “ol i holi na ol i amamas” na i stret long ol i kirap bek na kisim laip long heven. (Rev. 20:5, 6) Tasol namel long ol man husat bai kirap bek na kisim laip long graun, “ol man nogut” tu bai kirap bek. (Apo. 24:15) Yu ting i stret long tok olsem ol i “gutpela inap” long God i kirapim bek ol?
“Ol i no inap dai moa.” Jisas i no tok: “Ol bai i no inap dai moa.” Nogat. Em i tok: “Ol i no inap 1 Kor. 15:53, 54) Dai i no gat strong moa long daunim ol lain husat bai kirap bek na kisim laip long heven. c
dai moa.” Ol narapela Baibel i tanim dispela tok olsem “dai i no inap moa long daunim ol” na “dai i no gat strong long daunim ol.” Ol Kristen God i bin makim na ol i stap gut long God na pinisim wok bilong ol hia long graun, ol bai kirap bek na kisim laip long heven, na ol i no inap i dai moa—laip bilong ol bai i no gat pinis bilong en. (Ol samting yumi stori pinis long en i givim wanem save long yumi? I stret long tok olsem tok bilong Jisas long marit na kirap bek i makim kirap bek bilong kisim laip long heven. Sapos i olsem, orait ating tok bilong Jisas bai tokim yumi long sampela samting long ol lain husat bai i go long heven olsem: Ol bai i no marit, ol i no inap dai, na ol i kain olsem ol ensel husat i stap long heven. Dispela i kamapim sampela askim.
Namba 1: Ating ol Sadyusi i tingim ol lain husat bai kirap bek na kisim laip long graun, olsem na taim Jisas i bekim askim bilong ol, wai na em i stori long kirap bek bilong kisim laip long heven? Taim Jisas i bekim tok bilong ol birua, sampela taim em i no save bekim tok i stret long tingting bilong ol. Olsem: Lain Juda i strong long Jisas i mas wokim wanpela mirakel, na em i tok: “Brukim dispela tempel na insait long 3-pela de bai mi kirapim gen.” Ating Jisas i save olsem ol i tingim haus tempel, “tasol dispela tempel Jisas i tok long en, em bodi bilong em yet.” (Jon 2:18-21) Ating Jisas i pilim olsem i no gat nid long bekim askim bilong ol Sadyusi bikos ol i no bilip long kirap bek, na tu, ol i no bilip olsem i gat ol ensel. (Snd. 23:9; Mat. 7:6; Apo. 23:8) Tasol em i tingim ol disaipel bilong em, olsem na ating em i laik givim stretpela save long ol long kirap bek bilong kisim laip long heven, long wanem, ol bai insait long dispela kain kirap bek.
Namba 2: Taim Jisas i pinisim tok bilong em, wai na em i kolim nem bilong Abraham, Aisak, na Jekop, em ol bai kirap bek na kisim laip long graun? (Ritim Matyu 22:31, 32.) Tingim olsem paslain long Jisas i kolim nem bilong ol dispela bilipman, em i mekim dispela tok, “long kirap bek bilong ol man i dai pinis.” Dispela hap tok inap makim olsem Jisas i laik toktok long narapela samting. Ol Sadyusi i tok olsem ol i bilip long ol rait bilong Moses, olsem na Jisas i yusim ol tok em Jehova i mekim long Moses long diwai i paia, na em i laik soim klia olsem kirap bek bilong graun em samting God i tingting pinis long mekim.—Kis. 3:1-6.
Namba 3: Sapos tok bilong Jisas long kirap bek na marit i makim kirap bek bilong kisim laip long heven, yu ting ol manmeri husat bai kirap bek na kisim laip long graun bai marit, o nogat? Baibel i no kolim stret bekim bilong dispela askim. Sapos tok bilong Jisas i makim kirap bek bilong kisim laip long heven, orait dispela i no givim save long yumi olsem ol manmeri i kirap bek long graun bai marit long nupela taim, o nogat.
Baibel i tok olsem dai i save pinisim marit. Olsem na sapos poroman marit bilong wanpela man o meri i dai, orait dispela man o meri i no ken pilim olsem em i mekim rong sapos em i laik marit gen. Dispela em disisen ol yet i ken mekim, na ol narapela i no ken sutim tok long ol.—Rom 7:2, 3; 1 Kor. 7:39.
Yumi bai gat planti askim long wanem kain sindaun yumi bai kisim long nupela taim. Yumi no ken ges nating long ol bekim bilong ol dispela askim, nogat, yumi mas wet tasol na lukim wanem ol samting bai kamap bihain. Tasol yumi ken bilip tru olsem: Ol manmeri husat i bihainim tok bilong God ol bai amamas, long wanem, Jehova bai inapim olgeta samting ol i nidim na laikim.—Sng. 145:16.
a Lukim The Watchtower, Jun 1, 1987, pes 30-31.
b Long taim bilong ol man i bin raitim Baibel, pasin bilong maritim tambu em kastam we man bai maritim meri bilong brata bilong em husat i no gat pikinini man na bai ol i ken kamapim pikinini na lain famili bilong brata bilong em i no ken lus.—Stt. 38:8; Lo 25:5, 6.
c Ol manmeri husat bai kirap bek long graun, ol inap kisim laip oltaim, tasol ol inap lusim dispela laip. Bilong kisim sampela save moa long olsem wanem laip ol man i kisim long heven i narapela kain long laip ol man i kisim long graun, lukim The Watchtower, Epril 1, 1984, pes 30-31.