PITA i giaman na em i tok em i no save long Jisas, na bihain em i krai nogut tru. Maski Pita i mas wok strong long strongim gen bilip bilong em, Jisas i laik yusim em long helpim ol arapela. Olsem na Jisas i tokim em: “Taim yu kam bek, strongim ol brata bilong yu.” (Luk 22:32, 54-62) Pita i kamap strongpela pos long kongrigesen Kristen long taim bilong ol aposel. (Gal. 2:9) Olsem tasol, sapos wanpela man i bin lusim wok elda, em inap mekim gen dispela wok na kisim amamas long strongim bilip bilong ol bratasista.

Sampela i bin mekim wok wasman na kongrigesen i pinisim wok bilong ol, na ating dispela i mekim na ol i pilim olsem ol i no inap mekim ol gutpela wok. Julio, a em wanpela brata husat i mekim wok elda long Saut Amerika winim 20 yia, em i tok: “Mi lusim bikpela haptaim bilong mi long redim ol tok, visitim ol bratasista, na mekim sepeding visit long ol bratasista long kongrigesen! Wantu dispela wok i lus long han bilong mi na mi pilim olsem mi no inap mekim gutpela wok moa long laip bilong mi. Mi bin stap bel hevi tru long dispela haptaim.” Long nau, Julio i mekim wok gen olsem elda.

Disaipel Jems i tok: “Ol brata bilong mi, taim kain kain traim i kamap long yupela, yupela i mas tingim olsem em samting bilong amamas tru long en.” (Jems 1:2) Tok bilong Jems i makim ol hevi i painim yumi taim ol birua i mekim nogut long yumi na long taim yumi yet i mekim ol popaia. Em i kolim pasin bilong man long tingim laik bilong bel, na mekim gut long sampela man tasol, na ol kain pasin olsem. (Jems 1:14; 2:1; 4:1, 2, 11) Taim Jehova i stretim yumi, dispela inap mekim yumi bel hevi. (Hib. 12:11) Tasol ol dispela hevi i no ken pinisim amamas bilong yumi.

Maski sapos kongrigesen i pinisim yumi long sampela wok yumi mekim insait long kongrigesen, rot i  op yet long yumi inap skelim bilip bilong yumi na soim olsem yumi laikim Jehova. Yumi ken tingim tu wanem samting i kirapim yumi long mekim dispela wok. Yumi laik helpim yumi yet? O, yumi laik soim olsem yumi laikim God na yumi bilip olsem God yet i stap Papa bilong kongrigesen na i stret long yumi mas lukautim gut? (Apo. 20:28-30) Ol brata husat i no mekim moa wok elda, ol i amamas long mekim yet wok bilong God na soim klia long olgeta man, na Satan tu, olsem ol i laikim tru Jehova.

King Devit i mekim ol bikpela rong na God i givim tok bilong stretim em, na Devit i orait long kisim dispela tok, na God i fogivim em. Devit i singim song olsem: “Sapos God i lusim pinis rong bilong wanpela man, na i rausim sin bilong em, dispela man i ken amamas. Sapos Bikpela i tok olsem, dispela man i no gat rong nau, na dispela man i no save bihainim pasin giaman, orait dispela man i ken amamas.” (Sng. 32:1, 2) Taim God i givim tok bilong stretim Devit, dispela i helpim Devit long mekim pasin bilong em i kamap gutpela moa, olsem na em inap mekim gut wok olsem wasman bilong lain manmeri bilong God.

Planti taim, ol brata husat i kirap gen long mekim wok elda, ol i save mekim gut wok wasman winim wok bilong ol long pastaim. Wanpela elda i tok: “Nau mi kliagut long hau mi inap helpim ol arapela husat i mekim rong.” Narapela elda i tok: “Nau mi pilim moa yet gutpela wok bilong mi long helpim ol bratasista.”

Man bilong raitim song i tok olsem “[God] i no save kros nating” na painim rong long yumi. (Sng. 103:9) Olsem na yumi no ken ting olsem God i no inap trastim gen man husat i mekim bikpela rong. Ricardo i bin mekim wok elda inap planti yia na bihain kongrigesen i pinisim em long dispela wok, na em i tok: “Mi bel hevi tru olsem mi yet i bin popaia. Mi pilim olsem mi no gat save long mekim wok, olsem na inap planti yia dispela tingting i pasim mi long mekim gen wok wasman na helpim ol bratasista. Mi pilim olsem mi no inap soim ol narapela olsem ol inap bilip long mi. Tasol mi save amamas long helpim ol arapela, olsem na mi inap lukautim ol Baibel stadi, strongim ol bratasista long Haus Kingdom, na autim tok wantaim ol. Dispela i strongim mi, na nau mi inap mekim gen wok elda.”

Sapos brata i holim bel kros, dispela inap pasim em  long mekim wok elda. Em i gutpela moa long bihainim pasin bilong Devit, em wokman bilong Jehova. Devit i bin ranawe taim King Sol i jeles long em! Devit i no laik bekim rong maski rot i op long Devit inap mekim olsem. (1 Sml. 24:4-7; 26:8-12) Taim Sol i dai long pait, Devit i krai sori long em, na em i tok long Sol na pikinini man bilong em Jonatan olsem: “Ol manmeri i save laikim Sol na Jonatan. Tupela i gutpela man tru.” (2 Sml. 1:21-23) Devit i no holim bel kros.

Sapos yu pilim olsem ol arapela i tingting kranki long yu o ol i no mekim pasin i stret, no ken tingting oltaim long dispela samting. Olsem: William em wanpela brata long Briten husat i mekim wok elda inap olsem 30 yia. Taim kongrigesen i pinisim wok bilong em, dispela i mekim na em i bel kros long sampela elda. Wanem samting i helpim William long kisim bek stretpela tingting? William i tok: “Taim mi ritim buk bilong Jop, dispela i bin helpim mi. Jehova i bin helpim Jop long kamap wanbel gen wantaim 3-pela poroman bilong em, olsem na Jehova inap helpim mi tu long kamap wanbel gen wantaim ol elda!”—Jop 42:7-9.

Sapos yu yet bin lusim wok bilong yu olsem wasman bilong sipsip bilong God, orait i gutpela long skelim wanem samting i bin kirapim yu long mekim olsem. Olsem wanem? Ol hevi bilong yu yet i bin daunim yu? Ol narapela samting i bin stap olsem bikpela samting moa long laip bilong yu? Ol pasin kranki bilong ol narapela i mekim yu bel hevi? Maski i gat wanem risen, tingim olsem taim yu bin mekim wok elda, yu bin mekim planti samting moa bilong helpim ol arapela. Ol tok yu mekim i strongim ol, eksampel bilong yu i kirapim ol long wok strong, na ol sepeding visit bilong yu i bin helpim ol long sanap strong long karim ol hevi bilong ol. Taim yu mekim gut wok bilong yu olsem elda, dispela i bin mekim Jehova i belgut, wankain olsem yu yet i bin pilim.—Snd. 27:11.

Jehova i bin kirapim gen laik bilong ol man na ol inap kisim gen amamas bilong i go pas long kongrigesen. Sapos yu yet i bin lusim wok elda o kongrigesen i pinisim wok bilong yu, orait yu inap winim mak gen long “kamap wasman.” (1 Tim. 3:1) “Oltaim [Pol] i save beten” askim God long helpim ol Kristen long Kolosi long kisim stretpela save long laik bilong God na “bai [ol] inap wokabaut olsem ol manmeri tru bilong Jehova na olgeta samting [ol] i mekim bai amamasim em.” (Kol. 1:9, 10) Sapos rot i op na yu mekim gen wok elda, orait askim Jehova long strongim yu na helpim yu long bihainim pasin isi na stap belgut. Long dispela haptaim bilong las de, ol wasman i mas strongim bilip bilong lain bilong God. Olsem wanem? Yu redi na amamas long strongim ol brata bilong yu?