YUMI stap long wanpela haptaim we i pulap tru long ol hevi winim olgeta taim bipo. (2 Tim. 3:1-5) Yumi laikim tru Jehova na yumi tingting strong long bihainim ol stretpela lo bilong em, tasol traim i save painim yumi long olgeta de. Jisas i luksave long ol hevi bai kamap, olsem na em i tokim ol disaipel bilong em olsem em bai strongim ol na bai ol inap sanap strong i go inap long pinis. (Mat. 24:3, 13; 28:20) Em i laik strongim ol, olsem na em i makim gutpela wokboi long givim “kaikai long ol long taim stret” bilong strongim bilip bilong ol.—Mat. 24:45, 46.

Jisas i bin makim gutpela wokboi long 1919, na kirap long dispela taim, planti milion bilong “ol arapela wokboi” bilong olgeta tokples i kam bung long oganaisesen bilong God, na ol i wok long kisim kaikai bilong strongim bilip bilong ol. (Mat. 24:14; Rev. 22:17) Dispela kaikai bilong strongim bilip i no kamap long olgeta tokples, na i no olgeta inap kisim dispela kaikai long rot bilong ol tok i kamap long Intenet. Olsem: Planti manmeri i no gat rot long kisim ol vidio na ol buk na nius we i save kamap tasol long Web-sait, jw.org. Yu ting dispela i makim olsem sampela i sot long kisim kaikai bilong helpim ol long stap strong long bilip? Sapos yumi laik kisim bekim i stret long dispela askim, yumi ken skelim ol bekim bilong 4-pela bikpela askim.

Taim Satan i traim Jisas long tanim ol ston i kamap bret, Jisas i bekim tok olsem: “Man i no inap stap laip long bret tasol, nogat. Em i mas bihainim tu olgeta tok i kamap long maus bilong Jehova.” (Mat. 4:3, 4) Ol tok bilong Jehova i stap long Baibel. (2 Pita 1:20, 21) Olsem na Baibel i stap olsem nambawan kaikai bilong strongim bilip bilong yumi.—2 Tim. 3:16, 17.

Oganaisesen bilong Jehova i tanim Baibel New World Translation of the Holy Scriptures, na ol i tanim sampela hap bilong en o Baibel olgeta long winim 120 tokples, na long olgeta yia ol i tanim dispela Baibel long planti moa tokples. Na tu, i gat planti bilion kopi bilong ol narapela Baibel, em ol narapela lain i bin tanim sampela hap tasol o olgeta hap bilong en long planti tausen tokples. Dispela wok i stret long laik bilong Jehova, olsem “em i laik kisim bek olgeta kain man na em i laik bai ol i kisim stretpela save long tok i tru.” (1 Tim. 2:3, 4) “I no gat wanpela samting God i wokim i stap hait na em i no inap lukim,” olsem na yumi ken bilip tru olsem em i luksave long “ol man i hangre long kisim save long God” na em bai kirapim ol long kam long oganaisesen bilong em na givim kaikai bilong strongim bilip bilong ol.—Hib. 4:13; Mat. 5:3, 6; Jon 6:44; 10:14.

Sapos man i laik kisim strongpela bilip, orait em i mas ritim Baibel na mekim sampela samting moa. Em i mas save gut long insait bilong tok em i ritim na bihainim ol tok em i lainim. (Jems 1:22-25) Man Itiopia long taim bilong ol aposel i bin luksave long dispela samting. Em i wok long ritim Tok Bilong God taim Filip i askim em: “Yu save long samting yu wok long ritim?” Man Itiopia i bekim tok olsem: “Hau bai mi save sapos i no gat man i skulim mi?” (Apo. 8:26-31) Filip i helpim man Itiopia long kisim stretpela save long Tok Bilong God. Man Itiopia i pilim tru samting em i lainim na dispela i kirapim em long kisim baptais. (Apo. 8:32-38) Ol buk na nius bilong Baibel i bin helpim yumi long kisim stretpela save long tok i tru. Yumi bin pilim tru ol tok yumi kisim save long en na dispela i kirapim yumi long bihainim ol dispela tok.—Kol. 1:9, 10.

Long rot bilong ol buk na nius, ol wokman bilong Jehova i wok long kisim planti gutpela kaikai bilong strongim bilip. (Ais. 65:13) Olsem: Nius Wastaua em ol i bin tanim long planti tokples, winim 210 tokples, i save stori gut long ol tok profet bilong Baibel, helpim yumi long kliagut moa long ol strongpela tok i tru, na kirapim yumi long bihainim ol stiatok bilong Baibel. Ol i bin tanim nius Kirap! long 100 tokples samting, na ol tok bilong en i skulim yumi gut moa long ol samting Jehova i wokim, na soim yumi long olsem wanem yumi inap bihainim ol skultok bilong Baibel. (Snd. 3:21-23; Rom 1:20) Gutpela wokboi i save redim ol buk na nius bilong Baibel long winim 680 tokples! Olsem wanem? Long olgeta de yu save lusim sampela haptaim long ritim Baibel? Yu save ritim ol nupela magasin na olgeta nupela buk na nius i kamap long tokples bilong yu long olgeta yia?

Na tu, oganaisesen bilong Jehova i redim ol autlain bilong ol tok i kam long Baibel na ol i yusim ol dispela autlain long mekim ol tok long taim bilong ol miting na ol kibung. Olsem wanem? Yu save amamas long harim ol tok, lukim ol drama, ol soim, na ol intaviu i save kamap long ol dispela bung? Tru tumas, Jehova i save redim bikpela kaikai bilong strongim bilip bilong yumi!—Ais. 25:6.

Bekim em nogat. Yumi no ken kirap nogut olsem sampela taim sampela wokman bilong Jehova i gat rot long kisim planti moa kaikai bilong strongim bilip, winim ol narapela. Bilong wanem? Tingim samting i painim ol aposel. Ol i kisim planti kaikai moa bilong strongim bilip, winim planti arapela disaipel. (Mak 4:10; 9:35-37) Maski i olsem, ol arapela disaipel i no sot olgeta long kaikai bilong strongim bilip; ol i bin kisim kaikai inap long ol.—Efe. 4:20-24; 1 Pita 1:8.

I gutpela long yumi luksave olsem Gutnius i no stori long planti arapela samting Jisas i bin mekim taim em i stap long graun. Aposel Jon i tok: “Tru tumas, i gat planti arapela samting Jisas i bin mekim, na sapos ol i raitim stori bilong olgeta dispela samting, mi ting graun yet bai i no inap holim ol skrol ol i raitim.” (Jon 21:25) Maski ol disaipel bilong pastaim i save gut moa long ol samting Jisas i bin mekim, dispela i no makim olsem yumi sot long save, nogat. Jehova i stretim rot na yumi inap kisim save long Jisas na bai yumi inap stap olsem ol disaipel bilong em.—1 Pita 2:21.

Tingim tu ol pas em ol aposel i salim i go long ol kongrigesen. Baibel i no kamapim wanpela moa pas em Pol i bin raitim. (Kol. 4:16) Yumi no gat rot long save long ol tok i stap long dispela pas, olsem na yu ting dispela i mekim na yumi sot long kaikai bilong strongim bilip? Nogat. Jehova i save long ol samting yumi nidim na em i givim kaikai bilong helpim yumi long stap strong long bilip.—Mat. 6:8.

Long nau, sampela wokman bilong Jehova i gat planti kaikai moa bilong strongim bilip, na ol arapela i no gat. Olsem wanem? Yu mekim wanpela tokples we i no gat planti pablisa i stap long en? Sapos i olsem, orait yu mas save olsem Jehova i tingim yu. Stadi long ol buk na nius yu gat, na sapos rot i op, orait yu ken i go long ol miting i kamap long tokples yu inap kliagut long en. Yu ken save tru olsem Jehova bai strongim bilip bilong yu.—Sng. 1:2; Hib. 10:24, 25.

Web-sait bilong yumi i kamapim ol tok bilong ol magasin na ol narapela buk na nius em ol man inap yusim bilong stadi long Baibel. Web-sait i kamapim tu ol tok bilong helpim ol marit, ol tineja, na ol papamama i gat ol liklik pikinini. Ol dispela tok inap helpim ol famili sapos ol i skelim long taim bilong Famili Lotu. Na tu, Web-sait bilong yumi i save kamapim ol stori bilong ol spesel bung olsem gretiuesen bilong Skul Gileat na Annual Miting, na helpim lain brata long olgeta hap long kisim save long ol bikpela disasta i kamap long wanem hap na ol ripot bilong ol kot keis em lain bilong Jehova i insait long en. (1 Pita 5:8, 9) Web-sait bilong yumi i stap olsem nambawan gutpela rot bilong autim tok, olsem na ol man i stap long ol kantri we gavman i putim tambu long wok bilong yumi, ol inap kisim save long gutnius.

Maski yu gat rot long yusim Web-sait bilong yumi o nogat, yu inap stap strong yet long bilip. Gutpela wokboi i wok hat tru long redim na prinim ol buk na nius samting bilong strongim bilip bilong ol arapela wokboi. Olsem na i no olsem yu mas baim wanpela kompiuta samting bilong lukim jw.org. Ating sampela bai stretim rot long prinim sampela buk na nius samting long Web-sait na givim long ol narapela husat i no gat rot long kisim tok long Intenet, tasol ol kongrigesen i no gat wok long mekim olsem.

Yumi amamas olsem Jisas i truim promis bilong em long givim kaikai bilong strongim bilip bilong yumi. Klostu tru nau dispela haptaim bilong las de we i gat planti hevi tru long en bai pinis, na yumi ken bilip strong olsem Jehova bai wok yet long givim ‘kaikai long taim stret’ bilong strongim bilip bilong yumi.