Long taim bilong ol aposel, Pol i tokim ol elda bilong kongrigesen long Efesus olsem: “Yupela i mas was gut long yupela yet na long olgeta sipsip. Holi spirit i bin makim yupela olsem wasman bilong ol bai yupela i ken lukautim kongrigesen bilong God. Em kongrigesen em i bin baim long blut bilong Pikinini bilong em yet.” (Apo. 20:28) Long nau, olsem wanem holi spirit i makim ol elda na ol kongrigesen sevan?

Namba 1: Holi spirit i kirapim ol man bilong raitim Baibel long listim ol mak em ol brata i ken winim na bai ol inap kamap elda na kongrigesen sevan. Long 1 Timoti 3:1-7, Baibel i kolim 16 mak em ol brata i mas winim na bai ol inap mekim wok elda. Baibel i kolim sampela moa mak long Taitus 1:5-9 na Jems 3:17, 18. Long 1 Timoti 3:8-10, 12, 13, Baibel i kolim ol mak em ol man i mas winim bilong kamap kongrigesen sevan. Namba 2: Taim ol brata i laik rekomendim ol narapela long mekim wok olsem elda o kongrigesen sevan, ol i save beten askim Jehova long yusim holi spirit long stiaim ol na bai ol i ken skelim gut olsem brata i winim ol mak em Baibel i kolim o nogat. Namba 3: Brata ol i rekomendim i mas bihainim ol pasin em holi spirit i save kamapim. (Gal. 5:22, 23) Olsem na holi spirit i stiaim olgeta samting long wok bilong apoinim man long kisim wok insait long kongrigesen.

Tasol husat tru i save rekomendim ol brata? Bipo, taim ol brata i rekomendim man long mekim wok olsem elda o kongrigesen sevan, ol i save salim rekomendesen i go long brens ofis. Long brens ofis, ol brata em Gavening Bodi i makim, ol bai skelim rekomendesen bilong kongrigesen na makim ol brata long kisim wok. Brens ofis bai toksave long lain elda bilong kongrigesen. Orait ol elda bai toksave long ol brata husat i kisim nupela wok insait long kongrigesen, na ol bai askim ol dispela brata sapos ol i amamas long kisim dispela wok o nogat. Bihain ol bai toksave long kongrigesen.

Tasol long taim bilong ol aposel, olsem wanem ol i bin makim ol man long mekim wok insait long kongrigesen? Sampela taim, ol aposel i makim ol man long mekim wanpela wok stret. Olsem: Ol i makim 7-pela man long lukautim wok bilong tilim kaikai long olgeta de long ol wido. (Apo. 6:1-6) Ating ol dispela man i mekim wok pinis olsem ol elda paslain long ol i kisim dispela wok.

Maski Baibel i no stori stret long olsem wanem ol i bin makim ol man long mekim wok insait long kongrigesen long taim bilong ol aposel, yumi inap kisim sampela save long dispela. Taim Pol na Barnabas i mekim pinis namba 1 misineri raun na tupela  i wok long i go bek, “tupela i makim ol hetman long olgeta wan wan kongrigesen. Tupela i tambu long kaikai na tupela i beten, na long dispela pasin tupela i putim ol i go long han bilong Jehova, em man ol i bilip long em.” (Apo. 14:23) Taitus i save raun wantaim Pol, olsem na planti yia bihain, Pol i raitim pas i go long em na i tok: “Mi bin lusim yu long Krit bai yu ken stretim ol samting i no stret na makim ol hetman long olgeta taun, olsem mi bin tokim yu long mekim.” (Tai. 1:5) Timoti i raun planti taim wantaim aposel Pol, olsem na em tu i kisim wankain wok long makim ol hetman. (1 Tim. 5:22) Dispela i soim klia olsem ol wasman raun i save apoinim ol man long mekim wok insait long kongrigesen, na i no ol aposel na ol hetman long Jerusalem.

Gavening Bodi Bilong Ol Witnes Bilong Jehova i tingim ol dispela stori bilong Baibel, olsem na ol i senisim pasin ol i bihainim bilong makim ol man long kamap elda na kongrigesen sevan. Kirap long Septemba 1, 2014, ol i bihainim dispela pasin: Wasman sekit bai skelim gut ol rekomendesen bilong ol brata long sekit bilong em. Taim em i visitim kongrigesen, em bai painim rot bilong save gut long ol brata em kongrigesen i rekomendim, olsem na ating em bai poromanim ol long wok autim tok. Wasman sekit bai toktok wantaim lain elda long rekomendesen bilong ol, na bihain em bai apoinim ol nupela elda na ol kongrigesen sevan. Long dispela rot, ol i bihainim wankain pasin olsem ol Kristen i bin mekim long taim bilong ol aposel.

Husat i go pas long stiaim dispela wok? Oltaim “gutpela wokboi i gat savetingting” i mekim wok bilong givim kaikai long ol arapela wokboi. (Mat. 24:45-47) Holi spirit i save stiaim dispela wokboi taim wokboi i skelim ol tok bilong Baibel. Wokboi bai toksave long olsem wanem ol kongrigesen long olgeta hap inap bihainim ol stiatok bilong Baibel na oganaisim ol wok insait long kongrigesen. Na tu, gutpela wokboi i save makim ol brata husat bai mekim wok olsem wasman sekit na memba bilong Brens Komiti. Orait, brens ofis i save helpim kongrigesen long bihainim tok i kam long gutpela wokboi. Taim lain elda i rekomendim ol brata long kisim wok insait long kongrigesen, ol i mas skelim gut sapos ol dispela brata i winim ol mak olsem i stap long Baibel. Wasman sekit i gat bikpela wok long beten na skelim gut ol rekomendesen i kam long ol elda na bihain em i ken makim ol brata husat i winim mak.

Taim yumi kliagut long hau ol elda i makim ol brata long kisim wok insait long kongrigesen, dispela i helpim yumi long kliagut olsem holi spirit i stiaim dispela wok. Dispela i kirapim yumi long trastim na rispektim ol brata husat i kisim wok insait long kongrigesen Kristen.—Hib. 13:7, 17.

Revelesen 11:3 i stori long tupela man husat bai autim tok inap 1,260 de. Baibel i stori olsem wel animal bai “daunim tupela na kilim tupela i dai.” Tasol bihain long “3 na hap de,” dispela tupela man bai kisim laip gen na olgeta manmeri husat i lukim tupela, ol bai kirap nogut tru.—Rev. 11:7, 11.

Husat i stap olsem dispela tupela man bilong autim tok? Ol narapela ves i stap klostu bai givim sampela save long yumi. Namba 1: Yumi kisim save olsem “tupela diwai oliv na tupela lam i makim” dispela tupela man. (Rev. 11:4) Dispela i kirapim yumi long tingim gen tok profet bilong Sekaraia we em i kolim lam na 2-pela diwai oliv. Ol dispela diwai oliv i makim “tupela man Bikpela . . . i bin kapsaitim wel long het bilong tupela bilong makim tupela,” em Gavana Serubabel na Het Pris Josua, na tupela i “mekim wok” bilong “Bikpela bilong olgeta hap bilong graun.” (Sek. 4:1-3, 14) Namba 2: Baibel i stori olsem dispela tupela man bilong autim tok i wokim ol wankain mirakel olsem Moses na Elaija i bin mekim.—Skelim Revelesen 11:5, 6 wantaim Namba 16:1-7, 28-35 na 1 King 17:1; 18:41-45.

Wanem samting i wankain long dispela 2-pela stori bilong Baibel? God i bin makim ol Kristen long holi spirit, na dispela 2-pela stori i makim dispela lain Kristen husat i go pas long wok long wanpela haptaim i pulap tru long ol hevi. Taim Kingdom Bilong God i kamap long heven long 1914, ol dispela brata i go pas long wok na i olsem ol i “pasim laplap bilong sori” na autim tok inap 3 na hap yia, olsem na Revelesen sapta 11 i kamap tru long dispela taim.

Bihain long ol i pasim laplap bilong sori na mekim wok autim tok, ol birua i putim ol long kalabus inap sotpela haptaim, na olsem tok profet i makim, i olsem ol i stap kalabus inap 3 na hap de. Long ai bilong ol man husat i birua long lain bilong God, i olsem wok bilong dispela tupela man i dai, olsem na ol birua i kisim bikpela amamas.—Rev. 11:8-10.

Tasol olsem tok profet i makim, long pinis bilong 3 na hap de, dispela tupela man i kirap bek na kisim laip. Long dispela taim, ol Kristen God i bin makim i lusim kalabus, na tu, God i yusim Bikpela Jisas Krais long givim wok long ol Kristen husat i stap gut long God. Long 1919, God i makim ol tu long mekim wok olsem “gutpela wokboi i gat savetingting,” na ol bai lukautim lain bilong God long haptaim bilong las de na givim kaikai bilong strongim bilip.—Mat. 24:45-47; Rev. 11:11, 12.

Revelesen 11:1, 2 i soim olsem ol dispela samting bai kamap long wanpela haptaim we God bai skelim pasin ol manmeri i bihainim long lotuim em. Malakai sapta 3 tu i stori olsem God bai skelim pasin ol manmeri i bihainim long lotuim em, na em bai klinim na stretim lain bilong em. (Mal. 3:1-4) Wok bilong skelim na klinim lotu i kirap na i pinis long wanem taim? Dispela wok i kirap long 1914 na i pinis bihain liklik long 1919. Dispela haptaim i wankain long 1,260 de (42 mun) na 3 na hap de em Revelesen sapta 11 i stori long en.

Yumi amamas tru olsem Jehova i stretim rot long mekim wanpela lain pipol i kamap klin na bai ol inap mekim ol gutpela wok! (Tai. 2:14) Na tu, yumi amamas tru long gutpela pasin bilong ol Kristen God i bin makim, em lain husat i go pas long mekim wok long haptaim bilong hevi na ol i stap olsem tupela man bilong autim tok em tok profet i bin stori long en. a