Kirap Bek Bilong Jisas—Helpim Yumi Olsem Wanem?
“Em i kirap bek pinis.”—MAT. 28:6.
1, 2. (a) Sampela bikman bilong lotu i laik save long wanem samting? (b) Pita i tok wanem long ol? (Lukim piksa long kirap bilong stadi.) (c) Olsem wanem Pita inap strongim bel long dispela taim?
BIHAIN liklik long Jisas i dai, sampela man i laik birua long aposel Pita. Em ol bikman bilong lotu Juda—dispela lain tasol i bin stretim rot long kilim i dai Jisas. Ol i strong long Pita i mas tokaut long sampela samting. Pita i oraitim wanpela man husat i stap lek nogut kirap long taim em i bon. Olsem na ol i laik save Pita i kisim strong we na em i yusim nem bilong husat long oraitim dispela man. Aposel Pita i strongim bel na tok: “Long nem bilong Jisas Krais bilong Nasaret, em man yupela i bin nilim long pos na God i bin kirapim em bek long indai, long nem bilong em, dispela man i kamap orait na i sanap long ai bilong yupela.”—Apo. 4:5-10.
2 Paslain liklik, Pita i pret na inap 3-pela taim em i giaman olsem em i no save long Jisas. (Mak 14:66-72) Tasol olsem wanem na nau Pita inap strongim bel na sanap long ai bilong ol bikman bilong lotu? Holi spirit i strongim Pita, na tu, em i bilip tru olsem Jisas i bin kirap bek. Wanem samting i helpim aposel Pita long bilip tru olsem Jisas i stap laip? Bilong wanem yumi tu i ken holim wankain bilip?
3, 4. (a) Paslain long ol aposel bilong Jisas i kamap long graun, husat lain i bin kirap bek long dai? (b) Jisas i wokim mirakel na kirapim bek husat lain?
3 Ol aposel bilong Jisas i save olsem ol daiman inap stap laip gen bikos planti yia paslain long ol i kamap long graun, sampela man i bin kirap bek. Ol i save olsem God i bin givim strong long profet Elaija na profet Elisa na ol inap wokim mirakel na kirapim bek man i dai pinis. (1 Kin. 17:17-24; 2 Kin. 4:32-37) Wanpela daiman i kirap bek taim ol i tromoi bodi bilong em i go insait long wanpela matmat na bodi i go pas long ol bun bilong Elisa. (2 Kin. 13:20, 21) Ol Kristen bilong pastaim i bilipim ol dispela stori i stap long Rait Holi, na yumi tu i bilip olsem Tok Bilong God em i tru.
4 Ating yumi olgeta i pilim tru ol stori bilong ol mirakel em Jisas i bin wokim bilong kirapim bek ol man i dai. Wanpela wido i gat wanpela pikinini tasol na dispela pikinini i dai, na ating dispela wido i amamas nogut tru taim Jisas i kirapim bek dispela pikinini. (Luk 7:11-15) Long narapela taim, Jisas i kirapim bek wanpela gel i gat 12-pela krismas. Ating papamama i bel hevi tru taim em i dai, tasol taim Jisas i kirapim em bek, ating ol i amamas nogut tru! (Luk 8:49-56) Ating ol manmeri i kirap nogut taim ol i lukim Lasarus i kirap bek na lusim matmat na kam ausait!—Jon 11:38-44.
KIRAP BEK BILONG JISAS I NARAPELA KAIN
5. Hau na kirap bek bilong Jisas i narapela kain long ol kirap bek i kamap paslain long em?
5 Ol aposel i save olsem kirap bek bilong Jisas i narapela kain long kirap bek bilong ol narapela paslain long em. Ol lain husat i kirap bek paslain long Jisas, ol i kirap bek wantaim bodi bilong graun na bihain ol i dai gen. Tasol Jisas i kirap bek wantaim bodi spirit na dispela bodi i no inap bagarap. (Ritim Aposel 13:34.) Pita i tok, “ol i kilim [Jisas] i dai, tasol em i kirap bek na i stap spirit long heven.” Pita i tok moa olsem: “Nau em i stap long han sut bilong God. Na God i putim ol ensel na olgeta lain i gat namba na olgeta samting i gat strong i stap aninit long em.” (1 Pita 3:18-22) Paslain long kirap bek bilong Jisas, sampela i bin kirap bek long rot bilong mirakel. Taim ol manmeri i lukim dispela, ol i kirap nogut tru na amamas, tasol kirap bek bilong Jisas i winim tru olgeta narapela kirap bek.
6. Olsem wanem kirap bek bilong Jisas i helpim ol disaipel?
6 Kirap bek bilong Jisas i helpim tru ol disaipel bilong em. Ol birua i ting olsem em i dai na stap long matmat. Tasol Jisas i kirap bek pinis na kisim bodi spirit na em i gat bikpela strong na i no gat wanpela man long graun inap bagarapim em. Kirap bek bilong em i soim klia olsem em i Pikinini Bilong God, olsem na ol disaipel i amamas nogut tru na ol i no bel hevi moa. Ol i strongim bel na ol i no pret moa long ol man. Kirap bek bilong Jisas i mas kamap na bai Jehova inap kamapim samting em i tingting pinis long mekim. Na tu, kirap bek bilong Jisas i mas kamap na bai ol inap strongim bel na autim gutnius long olgeta hap bilong graun.
7. (a) Jisas i mekim wanem wok long nau? (b) Yumi bai bekim wanem ol askim?
7 Yumi ol wokman bilong Jehova i save olsem Jisas i gat biknem tru, na tu, em i stap laip long nau na em i stiaim wanpela wok we bai helpim olgeta man long graun. Jisas Krais i stap olsem King long Kingdom Bilong God long heven, na klostu nau em bai pinisim olgeta pasin nogut long graun na mekim i kamap ples paradais we ol man bai stap oltaim long en. (Luk 23:43) Olgeta dispela samting i no inap kamap sapos Jisas i no bin kirap bek. Orait, wanem ol samting i kirapim yumi long bilip olsem Jisas i bin kirap bek long dai? Kirap bek bilong em i helpim yumi olsem wanem?
STRONG BILONG JEHOVA I WINIM STRONG BILONG DAI
8, 9. (a) Wai na ol hetman bilong lotu Juda i laik bai ol gad i was i stap long matmat bilong Jisas? (b) Wanem samting i kamap taim ol meri i kam long matmat?
8 Taim ol i kilim pinis Jisas, ol bikpris na ol Farisi i kam long Pailat na tok: “Bikman, mipela i tingim tok dispela man bilong giaman i bin mekim taim em i stap laip yet, em i bin tok olsem ‘Bihain long 3-pela de mi bai kirap bek.’ Olsem na yu mas tokim ol man long was gut long dispela matmat i go inap long namba 3 de na bai ol disaipel bilong en i no ken kam na stilim bodi na tokim ol manmeri olsem, ‘Em i kirap bek pinis long dai!’ Dispela tok giaman bai i nogut moa winim tok giaman bilong pastaim.” Pailat i tok: “Yupela kisim ol gad i go wantaim yupela bilong was gut long matmat. Go na mekim ol samting yupela inap mekim bilong was long en.” Orait, ol i go na mekim olsem.—Mat. 27:62-66.
9 Ol i putim bodi bilong Jisas insait long wanpela matmat ol i katim long ston, na ol i yusim traipela ston long pasim maus bilong matmat. Jisas i dai pinis, na ol hetman bilong lotu Juda i laik bai em i stap olsem tasol long dispela ples matmat. Tasol Jehova i gat narapela tingting. Taim Maria Makdala na narapela Maria i kam long matmat long namba 3 de, ol i lukim olsem ston i no stap moa long pasim maus bilong matmat, na wanpela ensel i sindaun antap long dispela ston. Ensel i tokim ol meri long lukluk i go insait long matmat na bai ol inap luksave olsem Jisas i no stap moa. Ensel i tok: “Em i no stap long hia, long wanem, em i kirap bek pinis.” (Mat. 28:1-6) Tru tumas, Jisas i kirap bek pinis na em i stap laip!
10. Pol i tok wanem bilong kamapim klia olsem Jisas i bin kirap bek?
10 Ol samting i kamap insait long 40 de i soim klia olsem Jisas i kirap bek pinis. Aposel Pol i stori long dispela samting na em i tokim ol Kristen long Korin olsem: “Mi bin tokim yupela long ol nambawan bikpela samting. Em ol tok mi tu i bin kisim, olsem Krais i bin i dai bilong kisim bek yumi long sin olsem Rait Holi i tok. Na ol i bin planim em, na long namba 3 de em i kirap bek olsem Rait Holi i tok. Na em i kamap long Sifas, na bihain em i kamap long ol 12-pela aposel. Bihain long dispela em i kamap long 500 brata wantaim. Planti bilong ol i stap yet wantaim yumi, tasol sampela ol i dai pinis. Bihain long dispela em i kamap long Jems, na bihain em i kamap long olgeta aposel. Na las tru em i kamap long mi. Mi olsem pikinini em mama i karim paslain long taim stret bilong en.”—1 Kor. 15:3-8.
YUMI SAVE OLSEM JISAS I BIN KIRAP BEK
11. Olsem wanem kirap bek bilong Jisas i kamap tru olsem “Rait Holi i tok”?
11 Namba 1 samting i mekim na yumi save olsem Jisas i bin kirap bek em olsem, “Rait Holi i tok” dispela samting i bin kamap. Rait Holi i tok profet olsem Jisas bai kirap bek. Devit i tok, God i no inap larim “dispela man i stap gut long [em]” i sting long Matmat. (Ritim Aposel 13:35.) Long Pentikos bilong yia 33 C.E., aposel Pita i stori gut long olsem wanem dispela tok profet i kamap tru long Jisas, na em i tok: “[Devit] i save pinis na autim tok long kirap bek bilong Krais, olsem God i no lusim em i stap long Matmat na bodi bilong em i no sting na bagarap.”—Apo. 2:23-27, 31.
12. Husat lain i lukim Jisas bihain long em i kirap bek?
12 Namba 2 samting i mekim na yumi bilip olsem Jisas i bin kirap bek na kisim laip em olsem, planti man i lukim em bihain long em i kirap bek na ol i tokaut long dispela samting. Bihain long Jisas i kirap bek, inap 40 de olgeta em i kamap long ol disaipel long gaden we matmat i stap long en, na tu, long rot i go long Emeus, na long sampela narapela hap. (Luk 24:13-15) Long ol dispela taim, em i toktok long ol wan wan man, na tu, em i toktok long Pita na long planti man. Wanpela taim, winim 500 manmeri i bung i stap na Jisas i kamap long ol! Sapos planti man i lukim wanpela samting na stori long en, dispela i makim olsem dispela samting i bin kamap tru.
13. Ol disaipel i givim bel tru long autim tok, na olsem wanem dispela i soim olsem ol i bilip tru olsem Jisas i bin kirap bek?
13 Namba 3 samting i mekim na yumi bilip olsem Jisas i bin kirap bek em olsem, ol disaipel i bin givim bel tru long autim dispela tok. Taim ol i givim bel tru long autim tok long kirap bek bilong Krais, dispela i kirapim ol birua long mekim nogut long ol, na ol i karim pen na hevi, na sampela i dai. Ol hetman bilong lotu i heitim Jisas na ol yet i bin stretim rot na kilim em i dai. Sapos Jisas i no bin kirap bek, o sapos stori bilong kirap bek bilong em i wanpela stori nating, Pita i no inap autim tok long ol hetman bilong lotu olsem Krais i bin kirap bek. Tasol Pita na ol narapela disaipel i bilip tru olsem Jisas i stap laip na em i stiaim dispela wok em God i laik bai ol i mekim. Kirap bek bilong Jisas i strongim bilip bilong ol disaipel olsem ol tu bai kirap bek sapos ol i dai. Olsem: Stiven i dai, tasol em i bin bilip tru olsem ol daiman bai kirap bek.—Apo. 7:55-60.
14. Wai na yu bilip olsem Jisas i stap laip?
14 Namba 4 risen na yumi save olsem Jisas i bin kirap bek em olsem, ol samting i soim klia olsem nau em i mekim wok King na em i stap olsem Het bilong kongrigesen Kristen. Wok bilong em i mekim na lotu Kristen tru i wok long kamap bikpela. Yu ting dispela samting bai kamap sapos Jisas i no bin kirap bek? Sapos tru tru Jisas i no bin kirap bek, ating yumi no inap save long stori bilong em. Tasol i gat as tru na yumi ken bilip olsem Jisas i stap laip na nau em i wok long stiaim yumi taim yumi mekim wok bilong autim gutnius long olgeta hap bilong graun.
KIRAP BEK BILONG JISAS I HELPIM YUMI
15. Wai na kirap bek bilong Jisas i strongim bel bilong yumi long mekim wok autim tok?
15 Kirap bek bilong Krais i strongim bel bilong yumi long autim tok. Inap olsem 2 tausen yia nau, ol birua bilong God i yusim olgeta kain rot long pinisim wok bilong autim gutnius—pasin apostet, tok bilas, pait long lain bilong yumi, tambuim wok autim tok, givim pen long lain bilong yumi na kilim sampela i dai. Tasol maski i olsem, “i no gat wanpela bilong ol dispela samting” inap stopim wok bilong yumi long autim tok bilong Kingdom na kamapim ol disaipel. (Ais. 54:17) Yumi no pret long ol wokboi bilong Satan. Jisas i stap wantaim yumi na sambai long yumi olsem em i bin tok promis long mekim. (Mat. 28:20) I gat as tru na yumi no ken pret long ol birua bikos maski ol i wok strong long pasim yumi long autim tok, wok bilong ol bai lus nating!
Kirap bek bilong Jisas i strongim bel bilong yumi long autim tok (Lukim paragraf 15)
16, 17. (a) Olsem wanem kirap bek bilong Jisas i strongim olgeta tok em i bin skulim ol man long en? (b) Olsem Jon 11:25 i kamapim, God i givim strong long Jisas long mekim wanem?
16 Kirap bek bilong Jisas i strongim olgeta tok em i bin skulim ol man long en. Pol i tok olsem sapos Krais i no bin kirap bek long dai, bilip Kristen na wok autim tok bai i no gat as tru bilong en. Wanpela saveman bilong Baibel i tok: “Sapos Krais i no bin kirap bek, . . . ol Kristen i stap olsem tarangu lain husat i bilipim nating wanpela bikpela tok giaman.” Sapos Jisas i no bin kirap bek, stori bilong ol Gutnius bai kamap olsem stori nating bilong wanpela saveman em ol birua i bin kilim em i dai. Tasol Krais i bin kirap bek, na dispela i kamapim klia olsem olgeta tok bilong em i tru, em ol tok em i bin skulim ol man long en, na tok bilong em long ol samting bai kamap bihain.—Ritim 1 Korin 15:14, 15, 20.
17 Jisas i tok: “Kirap bek em mi yet na laip em mi yet. Man i bilip long mi, maski em i dai, em bai kisim laip gen.” (Jon 11:25) Dispela tok bai kamap tru olgeta. Jehova i givim strong long Jisas long kirapim bek lain husat bai kisim laip olsem ol spirit long heven, na tu, em bai kirapim bek planti bilion manmeri husat bai stap laip oltaim long graun. Jisas i bin givim ofa bilong tekewe sin bilong yumi, na em i bin kirap bek, na dispela i makim olsem dai bai pinis olgeta. Olsem wanem? Dispela save i strongim yu long karim olgeta kain hevi na sanap strong taim dai i laik painim yu?
18. Kirap bek bilong Jisas i strongim yumi long bilip tru long wanem samting?
18 Kirap bek bilong Jisas i strongim yumi long bilip tru olsem Jehova bai bihainim ol stretpela lo bilong em na skelim ol man. Pol i toktok long ol manmeri long taun Atens bilong bipo, na em i tok: “Long stretpela pasin [God] bai mekim wok jas na skelim ol manmeri bilong graun. Em bai mekim olsem long rot bilong wanpela man em i makim pinis. Na em i bin kirapim bek dispela man long dai na bai olgeta manmeri i ken save olsem tru tru dispela samting bai kamap.” (Apo. 17:31) God i makim Jisas long mekim wok Jas, olsem na yumi ken bilip tru olsem em bai bihainim stretpela pasin na pasin laikim taim em i mekim wok jas.—Ritim Aisaia 11:2-4.
19. Yumi bilip long kirap bek bilong Krais, na dispela i helpim yumi olsem wanem?
19 Sapos yumi bilip long kirap bek bilong Jisas, dispela bai kirapim yumi long mekim laik bilong God. Sapos em i no bin i dai na givim ofa bilong baim bek yumi, na sapos em i no bin kirap bek, yumi bai stap kalabus yet long sin na dai. (Rom 5:12; 6:23) Sapos tru tru Jisas i no bin kirap bek, yumi inap tok: “Yumi kaikai na dring, long wanem, tumora bai yumi dai.” (1 Kor. 15:32) Tasol yumi no putim tingting i go long ol samting bilong kisim amamas tasol, nogat. Yumi bilip tru olsem ol daiman bai kirap bek, na yumi tenkyu tru long dispela bilip, olsem na yumi mas larim Jehova i stiaim yumi long olgeta samting.
20. Olsem wanem kirap bek bilong Jisas i kamapim klia bikpela strong bilong God?
20 I no olgeta man i bin lukim kirap bek bilong Krais, tasol em i kamapim klia bikpela strong bilong Jehova, em man i save “givim gutpela pe long ol man i wok strong long painim em.” (Hib. 11:6) Jehova i bin kirapim bek Jisas na em i kisim laip long heven na em i no inap i dai moa, na dispela i soim klia olsem Jehova i gat bikpela strong na savetingting! Na tu, God i soim olsem em inap truim olgeta tok promis bilong Em. Wanpela bilong ol dispela tok promis em tok profet bilong wanpela “pikinini” bai kamap na mekim bikpela wok long stretim bek gutnem bilong God. Dispela tok promis bai kamap tru sapos Jisas i dai na kirap bek na kisim laip.—Stt. 3:15, NW.
21. Bilip bilong kirap bek i helpim yu olsem wanem?
21 Olsem wanem? Yumi tenkyu long Jehova long em i bin stretim rot na yumi inap bilip tru olsem ol daiman inap kirap bek? Baibel i strongim bilip bilong yumi na i tok: “Harim! Haus sel bilong God i stap wantaim ol manmeri, na God bai i stap wantaim ol, na ol bai i stap ol lain manmeri bilong em. Na God yet bai i stap wantaim ol. Na em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.” Aposel Jon i harim wanpela nek i kamap long heven na i tok: “Yu mas raitim ol dispela tok, long wanem, ol man inap bilip tru long ol dispela tok na ol dispela tok i tru olgeta.” Husat i tokim Jon long ol dispela samting? Em i kisim ol dispela tok long rot bilong Jisas Krais, em man husat i kirap bek pinis.—Rev. 1:1; 21:3-5.