1, 2. (a) Lain bilong God i mas bihainim wanem kain pasin? (b) Dispela stadi bai bekim wanem ol askim?

 JEHOVA i kirapim aposel Pita long kolim tok i stap long Buk Wok Pris na Pita i tok yumi stap olsem ol Kristen, olsem na yumi mas bihainim pasin holi long olgeta wokabaut bilong yumi. (Ritim 1 Pita 1:14-16.) Jehova em “God holi” na em i laik bai ol Kristen Em i bin makim na “ol arapela sipsip” i wok strong long kamap holi long olgeta wokabaut bilong ol, na i no long sampela wokabaut tasol.—Jon 10:16.

² Yumi bai skelim sampela moa gutpela tok i stap long Buk Wok Pris, na taim yumi bihainim ol dispela tok, dispela bai helpim tru yumi long bihainim pasin holi long olgeta wokabaut bilong yumi. Yumi bai skelim ol dispela askim: Yumi mas holim wanem kain tingting long pasin bilong surik long holimpas bilip? Buk Wok Pris i givim wanem skul long yumi long pasin bilong i stap daun long nambawan wok bos bilong Jehova? Yumi inap kisim wanem skul long pasin bilong givim ol ofa?

3, 4. (a) Bilong wanem ol Kristen i mas abrusim pasin bilong surik long bihainim ol lo na ol stiatok bilong Baibel? (b) Bilong wanem yumi no ken bekim rong o bel kros?

³ Sapos yumi laik amamasim Jehova, yumi mas strong long bihainim ol lo na ol stiatok bilong em, na yumi mas holimpas bilip na  sakim pasin i no klin. Maski yumi no stap aninit long Lo Bilong Moses, ol tok bilong en i helpim yumi long save long wanem ol samting i stret na wanem ol samting i no stret long ai bilong God. God i tokim lain Israel olsem: “Yu no ken bekim rong wanpela wantok bilong yu i mekim long yu, na yu no ken kros oltaim long em. Yu mas laikim tru ol wantok olsem yu laikim yu yet. [“Mi Jehova,” NW].”—Wkp. 19:18.

⁴ Jehova i no laik bai yumi bekim rong ol narapela i mekim long yumi na em i no laik bai yumi bel kros yet long ol narapela. (Rom 12:19) Sapos yumi sakim ol lo na ol stiatok bilong God, Satan bai amamas tru na yumi bai nogutim nem bilong Jehova. Maski sapos wanpela i bagarapim bel bilong yumi, yumi no ken holim bel kros long em inap longpela taim. Yumi stap olsem “ol sospen graun” na God i givim yumi gutpela wok tru long autim tok. (2 Kor. 4:1, 7) Pasin bilong holim bel kros inap bagarapim yumi, olsem na yumi no ken holim dispela kain pasin!

5. Yumi inap kisim wanem skul long stori bilong Aron na indai bilong tupela pikinini man bilong em? (Lukim piksa long kirap bilong stadi.)

⁵ Wok Pris 10:1-11 i stori long bikpela hevi i bin painim Aron na famili bilong em. Ating ol i bel hevi tru taim paia i kam daun long heven na kukim Nadap na Abihu, em tupela pikinini man bilong Aron, long haus lotu sel na tupela i dai. God i tokim Aron na famili bilong em olsem ol i no ken krai sori long wanfamili bilong ol, na ating dispela i traim bilip bilong ol! Olsem wanem? Yu kamapim klia olsem yu stap holi na yu no bung wantaim ol wanfamili o ol narapela husat i raus long kongrigesen?—Ritim 1 Korin 5:11.

6, 7. (a) Taim yumi laik mekim disisen bilong i go long wanpela weding i kamap insait long wanpela haus lotu, yumi mas skelim gut wanem ol samting? (Lukim futnot.) (b) Hau bai yumi inap toktok gut wantaim ol wanfamili i no Witnes na tokim ol olsem yumi no inap i go long weding i kamap long haus lotu?

⁶ Ating yumi no inap bungim kain bikpela hevi olsem hevi i bin painim Aron na famili bilong em. Tasol yumi bai mekim wanem sapos yumi kisim invatesen bilong i go long wanpela haus lotu na stap long weding bilong wanfamili i no Witnes? Baibel i no kolim stret lo i tambuim yumi long i go long kain bung olsem. Tasol yu ting Baibel i gat ol stiatok we inap helpim yumi long mekim gutpela disisen? a

⁷ Sapos yumi tingting strong long i stap holi long ai bilong Jehova long kain taim olsem, ating ol wanfamili bai kirap nogut na tok bilas long yumi. (1 Pita 4:3, 4) Em tru olsem yumi no laik bagarapim bel bilong ol, tasol i gutpela long yumi toktok gut long ol na tokaut stret. I gutpela long mekim olsem paslain long dispela bung i kamap. Yumi ken tok tenkyu na tokim ol olsem yumi amamas long ol i bin invaitim yumi long dispela weding. Na tu, yumi ken tokim ol olsem yumi tingim bilip bilong yumi, olsem na yumi no inap insait long sampela pasin ol i bihainim long lotu bilong ol, na dispela inap daunim amamas bilong ol na semim ol. Dispela em wanpela wei we yumi inap soim olsem yumi no surik long holimpas bilip bilong yumi.

8. Olsem wanem Buk Wok Pris i kamapim klia olsem Jehova em i nambawan bos?

⁸ Buk Wok Pris i kamapim klia olsem Jehova em i nambawan bos. Winim 30 taim olgeta, ol lo bilong Buk Wok Pris i kolim pasin yumi mas bihainim na bai yumi inap givim biknem long Jehova. Moses i luksave long dispela na em i mekim samting Jehova i tokim em long mekim. (Wkp. 8:4, 5) Olsem tasol, Jehova em King bilong yumi, olsem na oltaim yumi mas bihainim laik bilong em. Oganaisesen bilong God i helpim yumi long mekim olsem. Tasol traim inap painim yumi taim yumi yet i stap wanpis, wankain olsem traim i painim Jisas taim em yet i stap wanpis long ples drai nating. (Luk 4:1-13) Sapos yumi tingim wok bos bilong God na yumi trastim em, yumi no inap larim ol narapela i pretim yumi na yumi surik long holimpas bilip.—Snd. 29:25.

9. Wai na ol man i save heitim tru lain bilong God long olgeta hap bilong graun?

 ⁹ Yumi stap olsem ol disaipel bilong Krais na ol Witnes Bilong Jehova, olsem na ol birua i mekim nogut long lain bilong yumi long olgeta hap bilong graun. Yumi no kirap nogut long dispela, long wanem, Jisas i tokim ol disaipel bilong em olsem: “Ol man bai mekim nogut long yupela na kilim yupela i dai. Na ol man bai heitim yupela, long wanem, nem bilong mi i stap long yupela.” (Mat. 24:9) Long kain taim olsem, yumi stap strong yet long autim tok bilong Kingdom na soim klia olsem yumi stap holi long ai bilong Jehova. Maski yumi save bihainim onest pasin, stap klin, na bihainim lo bilong kantri, wai na ol man i save heitim tru yumi? (Rom 13:1-7) Ol i heitim tru yumi, long wanem, yumi larim Jehova i stap Bikpela King bilong yumi! Yumi “mekim wok bilong em wanpela tasol,” na yumi no inap tru long larim wanpela samting i mekim na yumi surik long holimpas ol stretpela lo na ol stiatok bilong em.—Mat. 4:10.

10. Wanpela brata i bin surik long holimpas bilip na em i joinim ami, na wanem samting i bin kamap?

¹⁰ Yumi “no insait long ol samting bilong dispela graun.” Olsem na yumi no insait long ol pait na ol wok politik bilong dispela graun. (Ritim Jon 15:18-21; Aisaia 2:4.) Sampela husat i bin dediket long God, ol i surik long holimpas bilip na ol i joinim ami. Tasol bihain, planti bilong ol i tanim bel na Papa bilong yumi long heven i marimari long ol na ol inap pas gut gen wantaim em. (Sng. 51:17) Wan wan tasol i no tanim bel. Long taim bilong Wol Woa 2, ol bosman bilong lain ami i kisim 160 brata bilong yumi long olgeta banis kalabus long Hangari, em krismas bilong ol i aninit long 45, na bungim ol long wanpela taun. Ol i fosim ol brata long joinim ami. Ol brata i sanap strong na ol i no laik insait long pait, tasol 9-pela bilong ol i mekim strongpela tok promis long joinim ami na ol i kisim yunifom bilong ami. Tupela yia bihain, wanpela bilong ol i painimaut olsem ol i makim em tu long holim gan bilong sutim ol Witnes. Brata tru bilong em i insait long dispela lain Witnes! Tasol senis i kamap, na ol i no kilim ol Witnes i dai.

11, 12. Long taim bilong lain Israel bilong bipo, Jehova i putim lo long wanem kain ofa ol i mas givim, na dispela inap givim wanem skul long ol Kristen long nau?

¹¹ Lo Bilong Moses i soim olsem ol Israel i mas givim ofa i stret. (Wkp. 9:1-4, 15-21) Samting ol i givim olsem ofa i no ken i gat bagarap long en bikos ol dispela ofa i makim ofa bilong Jisas, em ofa i gutpela olgeta. Lo i kolim stret sampela kain samting ol i mas mekim taim ol i redim ofa. Tingim samting em wanpela meri i mas mekim taim em i karim nupela bebi. Wok Pris 12:6 i tok: “Ol dispela de bilong mekim mama i kamap klin gen i pinis, orait mama i mas kisim wanpela pikinini sipsip i gat wanpela krismas, bilong ofa bilong paia i kukim olgeta, na wanpela bilong ol dispela pisin ol i kolim balus, bilong ofa bilong rausim sin. Em i mas bringim dispela tupela ofa i go long pris long dua bilong haus sel bilong mi.” God i kolim stret wanem kain ofa ol manmeri i mas givim, tasol Lo i soim klia olsem Em i gat pasin laikim na pasin isi. Sapos meri i sot long mani bilong baim pikinini sipsip, orait em i ken givim 2-pela pisin balus. (Wkp. 12:8) Maski dispela meri i stap rabis, God i laikim em tru na amamas long ofa em i givim, wankain olsem em i laikim na amamas long man husat i bringim ofa i gat bikpela pe long en. Yumi inap kisim wanem skul long dispela samting?

¹² Aposel Pol i tokim ol wanbilip long ‘givim biknem long God, na dispela i olsem sakrifais yumi givim long God.’ (Hib. 13:15) Yumi mas yusim maus bilong yumi long tokaut long nem holi bilong Jehova. Ol bratasista husat i yaupas, ol i yusim tokples Sain bilong ol yaupas long givim biknem long God. Ol Kristen husat i sik o lapun na ol i no inap lusim haus, ol i save givim biknem long God long rot bilong raitim pas, autim tok long rot bilong telefon, na autim tok long ol visita na ol man i lukautim ol. Taim yumi givim biknem long Jehova, olsem yumi autim nem  bilong em na autim gutnius, yumi mas tingim helt na strong bilong yumi. Yumi mas mekim wok inap tru long skel bilong yumi.—Rom 12:1; 2 Tim. 2:15.

13. Bilong wanem yumi mas givim ripot long wok autim tok yumi bin mekim?

¹³ Taim yumi mekim ol wok i givim biknem long God, dispela i olsem ol ofa yumi givim long laik bilong yumi yet, long wanem, yumi laikim em. (Mat. 22:37, 38) Tasol yumi mas givim ripot long wok autim tok yumi bin mekim. Olsem na yumi mas holim wanem kain tingting long dispela pasin? Ripot bilong yumi long olgeta mun i soim klia olsem yumi givim bel tru long God. (2 Pita 1:7) Yumi no ken tingting tasol long raitim ol bikpela namba long ripot bilong wok autim tok, long wanem, dispela inap mekim na yumi bai pilim bikpela presa long lusim planti aua long autim tok. Sapos wanpela pablisa i lapun na em i no gat strong moa o sampela hap bilong bodi i bagarap, orait em inap raitim 15 minit long ripot bilong em. Jehova i tingim ol dispela minit olsem gutpela ofa tru, na dispela i soim olsem pablisa i laikim tru Jehova na amamas tru long i stap olsem Witnes bilong Em. Wankain olsem ol Israel husat i no inap long givim ol ofa i gat bikpela pe long en, ol gutpela wokman bilong Jehova tu inap givim ripot maski sampela samting i pasim ol long mekim wok inap long skel bilong ol. Ol i save bungim ripot bilong yumi wantaim ol ripot i kam long olgeta hap, na dispela i save helpim oganaisesen long plenim wok yumi bai mekim long autim tok bilong Kingdom. Olsem na yu ting em bikpela wok tumas long givim ripot long wok autim tok yumi bin mekim?

14. Stori long as na yumi mas skelim gut pasin bilong yumi yet long stadi.

¹⁴ Yumi skelim pinis sampela gutpela tok i stap long Buk Wok Pris, olsem na ating yu tingting olsem, ‘Nau mi kliagut long as na dispela buk tu em wanpela bilong ol Rait Holi.’ (2 Tim. 3:16) Ating nau yu tingting strong long soim klia olsem yu bihainim pasin holi, long wanem, Jehova i laik bai yu mekim olsem, na tu, i stret long yu wok strong long amamasim em. Ating skul yu kisim long Buk Wok Pris long dispela 2-pela stadi i kirapim laik bilong yu long kisim sampela save moa long olgeta tok bilong Baibel. (Ritim Sindaun 2:1-5.) Beten na skelim gut pasin bilong yu yet long stadi. Yu laik bai Jehova i amamas long ol wok yu mekim bilong givim biknem long em. Olsem wanem? Yu save larim ol program long TV, vidio gem, spots, o ol narapela samting i pulim tingting bilong yu na i pasim yu long kamap strong moa long bilip? Sapos olsem, yu inap kisim gutpela helpim taim yu skelim gut sampela tok bilong aposel Pol long Buk Hibru.

15, 16. Bilong wanem Pol i tokaut stret taim em i raitim pas i go long ol Kristen bilong lain Juda?

¹⁵ Pol i tokaut stret long sampela samting taim em i raitim pas i go long ol Kristen bilong lain Juda. (Ritim Hibru 5:7, 11-14.) Em i tokim ol olsem ol “i no kirap kwik long harim tok.” Bilong wanem Pol i tokaut stret long ol? Ol dispela Kristen i no kamap strong yet long sait bilong bilip, i olsem ol i dring susu yet, olsem na Pol i soim klia olsem Jehova i laikim ol na tingim ol. Em i bikpela samting long yumi mas save long ol bikpela  tok bilong bilip Kristen. Tasol yumi mas kisim “strongpela kaikai” bilong helpim yumi long kamap strong long bilip.

¹⁶ Ol Kristen bilong lain Juda i no kamap strong long bilip, olsem na ol i nidim narapela long skulim ol. Dispela samting i kamap, long wanem, ol i no laik kisim “strongpela kaikai.” Askim yu yet: ‘Mi holim stretpela tingting long strongpela kaikai long sait bilong bilip? Mi wok long kisim dispela kaikai? O mi no save beten tumas na stadi gut long Baibel? Sapos olsem, nogut pasin bilong mi yet long stadi i givim hevi long mi?’ Yumi gat wok long autim tok, na tu, yumi mas skulim ol man na kamapim ol disaipel.—Mat. 28:19, 20.

17, 18. (a) Bilong wanem na oltaim yumi mas kisim kaikai bilong helpim yumi long kamap strong long bilip? (b) Yumi mas holim wanem kain tingting long pasin bilong dring alkohol paslain long i go long ol miting Kristen?

¹⁷ Ating planti bilong yumi i pilim hatwok long stadi long Baibel. Jehova i laik kirapim lain bilong em long stadi, tasol em i no laik mekim ol i pilim olsem ol i gat asua. Maski yumi bin dediket long God na stap olsem ol wokman bilong em inap planti yia o sampela yia tasol, yumi mas wok yet long kisim ol strongpela kaikai long sait bilong bilip. Yumi mas mekim olsem sapos yumi laik bihainim pasin bilong i stap holi.

¹⁸ Sapos yumi laik i stap holi, orait yumi mas skelim gut ol tok bilong Baibel na mekim samting God i laik yumi mas mekim. Tingim ol pikinini man bilong Aron, em Nadap na Abihu. God i bin kilim ol i dai, bikos, ‘tupela i bringim paia long Bikpela olsem ofa, tasol Bikpela i no bin tokim tupela long bringim kain paia olsem,’ na ating ol i bin spak long dispela taim. (Wkp. 10:1, 2) Tingim tok God i givim long Aron. (Ritim Wok Pris 10:8-11.) Yu ting dispela tok i makim olsem yumi no ken dring alkohol paslain long yumi go long ol miting Kristen? Tingim: Yumi no stap aninit long Lo Bilong Moses. (Rom 10:4) Long sampela kantri, sampela wanbilip bilong yumi i save kisim liklik alkohol long taim bilong kaikai paslain long ol i go long miting. Long taim bilong Pasova, ol i bin yusim 4-pela kap wain. Taim Jisas i kamapim bung bilong Memorial, em i tokim ol aposel bilong em long dring wain na dispela i makim blut bilong em. (Mat. 26:27) Baibel i tambuim pasin bilong dring planti na spak. (1 Kor. 6:10; 1 Tim. 3:8) Long planti Kristen, ating maus bilong bel bai kirapim ol long sakim pasin bilong dring alkohol paslain long ol i mekim wok bilong God. Tasol long olgeta kantri, ol man i bihainim narapela narapela pasin, olsem na em i bikpela samting long ol Kristen i mas “skelim wanem samting i klin long ai bilong [God] na wanem samting i no klin,” na long dispela rot ol inap bihainim pasin holi na dispela bai amamasim God.

19. (a) Yumi mas mekim wanem ol samting long sait bilong famili lotu na stadi bilong yumi yet? (b) Yu tingting strong long mekim wanem bilong soim klia olsem yu stap holi?

¹⁹ Sapos yu stadi gut long ol tok bilong Baibel, yu bai painim planti gutpela tok. Yusim ol buk samting yu gat pinis na mekim wok painimaut na dispela bai helpim famili lotu na stadi bilong yu yet long kamap gutpela moa. Kisim sampela save moa long Jehova na ol samting em i tingting pinis long mekim. Go klostu moa long em. (Jems 4:8) Beten long God olsem man bilong raitim song i bin mekim, em i tok: “Yu kliaim tingting bilong mi bai mi inap save gut long olgeta gutpela gutpela tok i stap long lo bilong yu.” (Sng. 119:18) No ken tru surik na luk daun long ol lo na ol stiatok bilong Baibel. Stap daun long lo bilong Jehova, em “God holi,” na givim bel tru long “insait long wok bilong autim gutnius bilong God.” (1 Pita 1:15; Rom 15:16) Kamapim ples klia olsem yu stap holi long dispela haptaim nogut bilong las de. Yumi olgeta i mas i stap holi long olgeta wokabaut bilong yumi, na long dispela rot yumi stap daun long nambawan wok bos bilong God holi bilong yumi, em Jehova.