“Nau Yupela i Lain Manmeri Bilong God”
“Bipo yupela i no lain manmeri bilong God, tasol nau yupela i lain manmeri bilong em.”—1 PITA 2:10.
1, 2. (a) Wanem senis i kamap long Pentikos bilong yia 33 C.E.? (b) Husat i kamap memba bilong dispela lain? (Lukim piksa long kirap bilong stadi.)
PENTIKOS bilong yia 33 C.E. em i bikpela samting long histori bilong ol manmeri bilong Jehova long graun. Wanpela bikpela senis i kamap. Long dispela de, Jehova i yusim holi spirit long kamapim nupela lain—em “lain Israel bilong God.” (Gal. 6:16) Em namba 1 taim we lain bilong God bai i no bihainim moa pasin bilong katim skin—em pasin we ol i bihainim kirap long taim bilong Abraham. Tasol Pol i kolim samting em olgeta wan wan memba bilong dispela nupela lain i mekim, na em i tok: “Pasin bilong em long katim skin em samting bilong bel na i kamap long rot bilong holi spirit.”—Rom 2:29.
2 Ol aposel na winim 1 handret arapela disaipel bilong Krais i bin bung long rum antap long Jerusalem, na ol i fes lain long kamap memba bilong nupela lain bilong God. (Apo. 1:12-15) God i kapsaitim holi spirit long ol, na mekim ol i kamap olsem ol pikinini bilong em. (Rom 8:15, 16; 2 Kor. 1:21) Dispela i kamapim klia olsem nupela kontrak i kirap pinis long mekim wok, na Krais i stap olsem namelman na blut bilong em i bin strongim dispela kontrak. (Luk 22:20; ritim Hibru 9:15.) Ol dispela disaipel i kamap memba bilong nupela lain manmeri bilong Jehova. Holi spirit i mekim na ol i autim tok long planti kain kain tokples bilong lain Juda na ol man i bin joinim lotu Juda. Ol dispela manmeri i bin lusim ol kantri em gavman Rom i bosim na ol i kam long Jerusalem bilong insait long bung bilong Pentikos, narapela nem bilong en em Bikpela De Bilong Amamas Long Kisim Kaikai Long Gaden. Ol Kristen i autim tok long tokples bilong ol dispela manmeri, na ol dispela manmeri i harim na ol i kliagut long ol “strongpela wok bilong God.”—Apo. 2:1-11.
NUPELA LAIN BILONG GOD
3-5. (a) Long de Pentikos, Pita i tokim ol Juda long mekim wanem samting? (b) Wanem ol samting i mekim na nupela lain bilong Jehova i kamap bikpela kirap long taim em i kamap nupela?
3 Jehova i yusim aposel Pita long go pas na opim rot long ol Juda na ol man i bin joinim lotu Juda long kamap memba bilong dispela nupela lain, em kongrigesen Kristen. Long de Pentikos, Pita i tokaut stret long lain Juda olsem ol i mas orait long Jisas, em man ol i bin “nilim em long pos,” long wanem, “God i mekim em i kamap Bikpela na Krais.” Taim bikpela lain manmeri i askim Pita long ol i mas mekim wanem, Pita i tok: “Yupela i mas tanim bel na yupela olgeta wan wan i mas kisim baptais long nem bilong Jisas Krais, na bai ol sin bilong yupela i ken tekewe. Yupela i mekim olsem na yupela bai kisim holi spirit olsem presen.” (Apo. 2:22, 23, 36-38) Long dispela de, inap olsem 3 tausen manmeri i joinim nupela lain Israel bilong God. (Apo. 2:41) Ol aposel i givim bel tru long autim tok na wok bilong ol i karim planti kaikai moa. (Apo. 6:7) Planti manmeri moa i kirap long joinim dispela nupela lain.
4 Bihain, wok autim tok i go kamap long lain Samaria, na gutpela samting i kamap. Filip i mekim wok evanselis na em i baptaisim planti bilong ol, tasol ol i no kisim yet holi spirit. Gavening bodi long Jerusalem i salim aposel Pita na aposel Jon long i go long ol dispela manmeri bilong lain Samaria, na tupela i “putim han antap long ol na ol i kisim holi spirit.” (Apo. 8:5, 6, 14-17) Ol dispela lain Samaria tu i kamap memba bilong lain Israel bilong God.
Pita i autim tok long Kornilius na ol wanhaus bilong em (Lukim paragraf 5)
5 Long 36 C.E., gavening bodi i salim gen Pita long opim rot long ol narapela lain long joinim nupela lain Israel bilong God. Dispela samting i bin kamap taim Pita i autim tok long wanpela ami ofisa bilong Rom, nem bilong em Kornilius, na lain famili na ol pren bilong em. (Apo. 10:22, 24, 34, 35) Baibel i tok: “Pita i toktok yet . . . na holi spirit i kam daun long olgeta man [i no bilong lain Juda] i harim tok bilong God. Na ol brata i bin kam wantaim Pita, em ol i bilong lain i bin katim skin, ol i kirap nogut, long wanem, presen bilong holi spirit i kam daun tu long ol manmeri bilong ol arapela lain.” (Apo. 10:44, 45) Rot i op long ol man bilong ol narapela lain husat i no bin katim skin, long ol inap insait long dispela nupela lain Israel bilong God.
‘LAIN EM NEM BILONG JEHOVA I STAP LONG OL’
6, 7. (a) Olsem wanem ol memba bilong dispela nupela lain Israel i mas i stap olsem “wanpela lain em nem bilong [Jehova] i ken stap long ol”? (b) Olsem wanem ol i bin inapim dispela wok?
6 Long wanpela miting bilong gavening bodi long yia 49 C.E., disaipel Jems i tok: “Simeon i stori gut long olsem wanem God i bin tingim ol man bilong ol arapela lain long namba 1 taim. Na God i mekim olsem bilong kisim wanpela lain em nem bilong en i ken stap long ol.” (Apo. 15:14) Ol Juda na ol man i no bilong lain Juda, olgeta i insait long dispela nupela lain husat i holim nem bilong Jehova. (Rom 11:25, 26a) Bihain, Pita i tok: “Bipo yupela i no lain manmeri bilong God, tasol nau yupela i lain manmeri bilong em.” Pita i stori gut moa long wok bilong ol, olsem: “Yupela i ‘wanpela lain God i makim, yupela ol pris i mekim wok king, yupela wanpela lain holi, yupela ol manmeri bilong God stret. Na yupela i ken tokaut long olgeta hap long ol gutpela pasin’ bilong dispela man i bin singautim yupela long lusim tudak na kam insait long gutpela lait bilong em.” (1 Pita 2:9, 10) Ol i mas mekim wok bilong givim biknem long Man em nem bilong em i stap long ol, na litimapim nem bilong em. Ol i mas strongim bel long i stap olsem ol witnes bilong Jehova, em King Bilong Heven na Graun.
7 Wankain olsem Jehova i bin tok long lain Israel bilong bipo, em i tok tu long nupela lain Israel olsem: “Mi bin mekim ol dispela manmeri i kamap lain manmeri bilong mi yet, bai ol i ken amamas na tokaut long biknem bilong mi.” (Ais. 43:21) Ol Kristen bilong pastaim i strongim bel na tokaut olsem Jehova tasol em i God tru, na dispela i kamapim ples klia ol giaman god em ol i bin lotuim long dispela taim bipo. (1 Tes. 1:9) Ol i autim tok na stori long ol man long Jehova na Jisas “long Jerusalem na long olgeta hap bilong Judia na Samaria, na i go inap long olgeta hap bilong graun.”—Apo. 1:8; Kol. 1:23.
8. Pol i givim wanem tok lukaut long ol manmeri bilong God long taim bilong ol aposel?
8 Long taim bilong ol aposel, Pol em wanpela bilong “lain em nem bilong [Jehova] i ken stap long ol,” na em i gat strongpela bel. Em i strongim bel na sanap long ai bilong ol saveman bilong lain haiden na em i sambai long wok bos bilong Jehova, em “dispela God husat i bin wokim graun na olgeta samting i stap long en, em i Bikpela bilong heven na graun.” (Apo. 17:18, 23-25) Paslain long Pol i pinisim namba 3 misineri raun bilong em, em i tok lukaut long lain em nem bilong God i stap long ol olsem: “Mi save olsem taim mi lusim yupela pinis, ol wulf nogut bai i kam namel long yupela na ol bai i no isi long ol sipsip. Na sampela man long lain bilong yupela yet bai kirap na mekim ol tok kranki bilong pulim ol disaipel i go bihainim ol.” (Apo. 20:29, 30) Dispela pasin apostet i kamap long pinis bilong yia 100 C.E. samting.—1 Jon 2:18, 19.
9. Bihain long indai bilong ol aposel, wanem samting i kamap long “lain em nem bilong [Jehova] i ken stap long ol”?
9 Bihain long indai bilong ol aposel, pasin apostet i kamap bikpela na kamapim ol lotu Kristendom. Ol apostet Kristen i no stap olsem “lain em nem bilong [Jehova] i ken stap long ol,” long wanem, ol i rausim nem bilong God long planti Baibel ol i bin tanim. Ol i bihainim sampela pasin haiden, na tu, ol i bagarapim gutnem bilong God taim ol i kamapim ol bilip em Baibel i no as bilong en, na ol i insait long “ol pait holi,” na bihainim pasin pamuk. Olsem na inap planti handret yia, Jehova i gat liklik lain manmeri tasol husat i stap gut long lotuim em, na i no gat wanpela lain stret i stap olsem “lain em nem bilong en i ken stap long ol.”
LAIN BILONG GOD I KIRAP GEN
10, 11. (a) Long tok piksa bilong Jisas long wit na gras nogut, em i bin tok profet long wanem samting? (b) Olsem wanem tok piksa bilong Jisas i kamap tru bihain long 1914? (c) Dispela i kamapim wanem samting?
10 Long tok piksa bilong Jisas long wit na gras nogut, em i tok profet olsem taim pasin apostet i kamap, ol man bai lusim bilip, i olsem ol i slip long sait bilong bilip. Em i tok olsem “taim ol man i slip i stap,” Satan bai planim ol gras nogut long gaden we Pikinini bilong man i bin planim ol sid bilong wit long en. Tupela bai gro wantaim inap long “pinis bilong dispela taim.” Jisas i stori gut olsem “ol gutpela sid” i makim “ol pikinini bilong Kingdom” na ol “gras nogut” i makim “ol pikinini bilong Satan.” Long taim bilong pinis, Pikinini bilong man bai salim “ol man bilong bungim kaikai,” em ol ensel, long bungim ol wit i go long wanpela sait na rausim ol gras nogut i go long hapsait. Ol bai bungim ol pikinini bilong Kingdom. (Mat. 13:24-30, 36-43) Olsem wanem bai ol i bungim ol? Olsem wanem dispela i soim olsem Jehova i gat wanpela lain long graun?
11 “Pinis bilong dispela taim” i kirap long 1914. Pait i kirap long yia 1914, na long dispela taim i gat sampela tausen manmeri i stap olsem ol Kristen God i bin makim, “em ol pikinini bilong Kingdom,” na ol i stap kalabus long Bikpela Babilon. Long yia 1919, Jehova i kisim bek ol, na dispela i soim klia olsem husat i stap olsem ol pikinini bilong Kingdom na husat i stap olsem ol “gras nogut,” em ol giaman Kristen. Em i bungim “ol pikinini bilong Kingdom” na mekim ol i kamap wanpela oganaisesen na dispela i truim tok profet bilong Aisaia, em i tok: “Ating wanpela kantri inap kamap long wanpela de tasol, a? Ating wanpela bikpela lain manmeri inap kamap wantu tasol, a? Tasol taim Saion i stat tasol long pilim pen bilong karim pikinini, wantu tasol em bai i karim ol pikinini bilong en.” (Ais. 66:8) Saion i makim lain ensel bilong Jehova long heven, na ol i kamapim wanpela lain pikinini bilong God na mekim ol i kamap wanpela kantri.
12. Long nau, olsem wanem ol Kristen God i bin makim i stap olsem ‘wanpela lain em nem bilong Jehova i stap long ol’?
12 Wankain olsem ol Kristen bilong pastaim, “ol pikinini bilong Kingdom” em God i makim i mas i stap olsem ol witnes bilong Jehova. (Ritim Aisaia 43:1, 10, 11.) Olsem na ol i stap narapela kain, long wanem, ol i bihainim pasin Kristen na autim “dispela gutnius bilong Kingdom . . . bai olgeta lain man i ken harim.” (Mat. 24:14; Fili. 2:15) Long dispela rot, ol i helpim planti milion manmeri long kamap stretpela manmeri long ai bilong Jehova.—Ritim Daniel 12:3.
“MIPELA I LAIK KAMAP WANLAIN WANTAIM YUPELA”
13, 14. (a) Ol manmeri i no insait long lain Israel bilong God, ol i mas mekim wanem na bai Jehova i orait long ol i lotuim em na mekim wok bilong em? (b) Baibel i mekim wanem tok profet long dispela samting?
13 Long stadi i kamap paslain long dispela, yumi bin kisim save olsem long taim bilong lain Israel bilong bipo, Jehova i orait long ol manmeri bilong narapela kantri long lotuim em, tasol ol dispela manmeri i mas bung wantaim lain em Jehova i bin mekim kontrak wantaim ol. (1 Kin. ) Long nau tu, ol manmeri em ol i no stap olsem lain Israel bilong God, ol i mas bung wantaim lain bilong Jehova, em “ol pikinini bilong Kingdom”—em ol Kristen God i bin makim na ol i stap olsem ol Witnes Bilong Jehova. 8:41-43
14 Tupela profet long bipo i tokaut olsem, nau long dispela taim bilong pinis, planti manmeri bai kam lotuim Jehova. Aisaia i tok profet olsem: “Ol lain manmeri bilong olgeta hap bai i tok olsem, ‘Kam, yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ Ol bai i tok olsem, long wanem, Jerusalem bai i stap ples bilong Bikpela i skulim ol manmeri na autim tok bilong em long ol.” (Ais. 2:2, 3) Sekaraia tu i tok profet olsem “ol manmeri bilong planti bikpela na strongpela kantri bai i kam long Jerusalem bilong lotu long Bikpela I Gat Olgeta Strong, na askim em long mekim gut long ol.” Em i tok ol i olsem “10-pela man bilong ol longwe ples,” long tok piksa i olsem ol i holim lain Israel bilong God, na ol i tok: “Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.”—Sek. 8:20-23.
15. “Ol arapela sipsip” i “kamap wanlain wantaim” lain Israel bilong God, na ol i mekim wanem wok?
15 “Ol arapela sipsip” i “kamap wanlain wantaim” lain Israel bilong God long wok bilong autim gutnius bilong Kingdom. (Mak 13:10) Ol i kamap wanlain wantaim ol manmeri bilong God, na ol i stap “wanpela lain sipsip” wantaim ol Kristen God i bin makim, na ol i gat “gutpela wasman,” em Krais Jisas.—Ritim Jon 10:14-16.
BUNG WANTAIM LAIN BILONG JEHOVA NA ABRUSIM BAGARAP
16. Olsem wanem Jehova bai kirapim laspela hap bilong “traipela hevi tru”?
16 Bihain long Bikpela Babilon i bagarap, ol birua bai laik bagarapim ol manmeri bilong Jehova, na long dispela taim yumi mas i stap aninit long gutpela pasin lukaut em Jehova bai givim long ol wokman bilong em. Dispela pasin birua bai kirapim laspela hap bilong “traipela hevi tru,” olsem na Jehova yet bai redim rot long helpim lain bilong em. (Mat. 24:21; Ese. 38:2-4) Long dispela taim, Satan bai i laik bagarapim ‘ol manmeri i bin lusim ol arapela kantri na i kam bek,’ em ol manmeri bilong Jehova. (Ese. 38:10-12) Dispela bai kirapim Jehova long bagarapim Satan na ol manmeri bilong em. Jehova bai kamapim klia olsem em i gat rait long i stap nambawan bos na mekim holi nem bilong em, na em i tok: “Bai ol i save gut olsem, mi yet mi [“Jehova,” NW].”—Ese. 38:18-23.
Long taim bilong “traipela hevi tru,” yumi mas pas gut tru wantaim ol bratasista long kongrigesen bilong yumi (Lukim paragraf 16-18)
17, 18. (a) Jehova bai givim wanem tok long lain bilong Em taim Satan i laik bagarapim ol? (b) Sapos yumi laik bai Jehova i lukautim yumi, orait yumi mas mekim wanem?
17 Taim Satan i kirapim pait bilong em, Jehova bai tokim ol wokman bilong em: “Yupela lain bilong mi, yupela go insait long rum bilong yupela insait tru long haus na pasim dua. Yupela i mas hait i stap inap sotpela taim, inap long taim kros i pinis.” (Ais. 26:20, NW) Long dispela taim bilong traipela hevi tru, Jehova bai tokim yumi long ol samting yumi mas mekim bilong abrusim bagarap, na ol kongrigesen bilong yumi bai stap olsem “rum bilong [yumi] insait tru long haus,” we yumi ken i go bilong hait long en.
18 Sapos yumi laik bai Jehova i lukautim yumi long taim bilong traipela hevi tru, yumi mas luksave olsem Jehova i gat lain bilong em long graun na ol i stap insait long ol kongrigesen. Yumi mas wok yet long stap wanlain wantaim lain bilong God na pas gut yet wantaim ol bratasista long ol kongrigesen bilong yumi. Yumi mas givim bel tru long bihainim pasin bilong man bilong raitim song, na tokaut olsem: “Bikpela, yu wanpela tasol yu save kisim bek mipela na mipela i no save bagarap. Yu ken mekim gut long ol manmeri bilong yu.”—Sng. 3:8.