HISTORI BILONG YUMI
Lait i Kamap Long Ples Bilong Sankamap
Ol i tilim ol invatesen bilong pablik tok long Tokyo, na yusim ol balus long tromoim i go daun long Osaka
LONG Septemba 6, 1926, wanpela wasman raun em mama i bin karim em long Japan, tasol em i stap long Amerika, em i go bek long Japan long mekim wok misineri. Wanpela man i wet long bungim em. Dispela man i save kisim sabskripsen bilong nius Was Taua, na em i bin kirapim wanpela Baibel stadi grup long Kobe. Long Janueri 2, 1927, ol Sumatin Bilong Baibel i mekim fes kibung bilong ol long dispela siti. Inap 36 manmeri i bung, na 8-pela i kisim baptais. Tasol hau bai dispela liklik grup inap helpim 60 milion manmeri long Japan husat i no lukim yet lait bilong tok i tru bilong Baibel?
Long Me 1927, ol Sumatin Bilong Baibel i kirapim wok bilong autim tok bilong tokaut long ol pablik tok bai kamap. Fes pablik tok bai kamap long Osaka, na ol bratasista i putim ol sain arere long rot bilong wokabaut, na ol i putim ol bikpela sain long olgeta hap bilong siti, na salim 3,000 invatesen i go long ol manmeri i gat biknem. Ol i tilim 150,000 liklik nius na putim edvetaismen bilong pablik tok long ol bikpela niuspepa bilong Osaka, na long 400,000 tiket bilong tren. Long de bilong dispela pablik tok, 2-pela balus i flai antap long siti na tromoi 100,000 liklik nius i go daun long ol manmeri. Inap olsem 2,300 manmeri i kam bung long Ples Bung Bilong Osaka Asahi long harim dispela pablik tok, “Kingdom Bilong God i Klostu Pinis.” Ol i tokim 1,000 manmeri long i go bek, long wanem, i no gat spes moa long ples bung. Bihain long pablik tok, winim 600 manmeri i gat ol askim, olsem na ol i stap bek bilong kisim bekim. Long ol mun i kamap bihain, ol i mekim ol pablik tok long Kyoto na long ol narapela siti long hap wes bilong Japan.
Long Oktoba 1927, ol Sumatin Bilong Baibel i stretim rot long mekim ol pablik tok long Tokyo. Long dispela taim tu, ol i givim invatesen long ol manmeri i gat biknem—na ol i givim tu long praim minista, ol memba bilong palamen, na ol hetman bilong ol lotu na lain ami. Ol i putim ol toksave long ol posta, ol niuspepa, na tu, long 710,000 liklik nius, na inap 4,800 manmeri i kam bung long harim 3-pela pablik tok long nambawan biktaun bilong Japan.
OL STRONGPELA PAINIA
Katsuo na Hagino Miura
Ol painia i mekim bikpela wok tru long bringim tok bilong Kingdom i go long olgeta man. Matsue Ishii em wanpela bilong ol fes lain long mekim wok painia long Japan, na nem bilong man bilong en em Jizo. Tupela i autim tok long planti hap bilong Japan, kirap long hap not bilong Sapporo na i go olsem long Sendai, Tokyo, Yokohama, Nagoya, Osaka, Kyoto, Okayama, na Tokushima. Sista Ishii na wanpela lapun sista, Sakiko Tanaka, ol i save pasim klos kimono taim ol i laik visitim ol bikman bilong gavman. Wanpela bikman i askim long kisim 300 kopi bilong buk The Harp of God and Deliverance bilong putim long laibreri bilong banis kalabus.
Katsuo na Hagino Miura i kisim ol buk em Sista Ishii i givim long ol, na ol i luksave olsem dispela em tok i tru. Tupela i kisim baptais long yia 1931, na ol i kirap mekim wok painia. Paslain liklik long 1930, Haruichi na Tane Yamada wantaim planti wanblut bilong ol i
harim tok bilong Kingdom na ol i bilipim dispela tok. Haruichi na Tane Yamada i kirap mekim wok painia, na pikinini meri bilong ol, Yukiko, i go mekim wok long Betel long Tokyo.OL BIKPELA NA LIKLIK “JEHU”
Bikpela Jehu i karim 6-pela painia
Long dispela taim bipo, i hatwok tru long baim kar, na ol rot i bagarap. Olsem na Kazumi Minoura na ol narapela yangpela painia i yusim ol haus kar i no gat ensin long en. Ol i kolim ol dispela haus kar olsem Jehu bikos ol i tingim Jehu, em man bilong draivim karis, na bihain em i kamap king bilong Israel. (2 Kin. 10:15, 16) Ol i gat 3-pela Bikpela Jehu. Longpela bilong olgeta wan wan i winim 2 mita, na bikpela bilong ol em klostu 2 mita, na longpela bilong ol kirap long daunbilo na i go antap long rup em klostu 2 mita, na ol inap karim 6-pela painia. Na tu, long brens ofis long Japan, ol i wokim 11-pela liklik haus kar ol i kolim olsem Bebi Jehu, na wan wan bilong ol inap karim 2-pela man, na ol i save yusim baisikol long pulim Bebi Jehu. Kiichi Iwasaki i bin helpim long wokim ol dispela haus kar, na em i tok, “Wan wan haus kar i gat kenves na bateri bilong kar we i save givim pawa bilong onim lait.” Ol painia i bringim lait bilong tok i tru i go long olgeta hap bilong Japan, na ol i save pusim na pulim ol haus kar i go antap na i go daun long ol maunten na katim namel long ol ples daun bilong Hokkaido long hap not na i go daun olgeta long Kyushu long hap saut.
Bebi Jehu inap karim 2-pela painia
Ikumatsu Ota em painia, na em i tok: “Taim mipela i kamap long taun, mipela i save putim haus kar klostu long wara o long wanpela hap i gat bikpela spes. Pastaim, mipela i save visitim ol bikman bilong taun, kain olsem meya, na bihain mipela i save go long olgeta wan wan haus na tilim ol nius. Taim mipela i inapim pinis teritori, mipela i save go long narapela taun.”
Long dispela taim, “wok i no go het hariap,” tasol dispela liklik lain Sumatin Bilong Baibel long Kobe em namba bilong ol inap 36, ol i mekim fes kibung bilong ol. (Sek. 4:10) Tasol 5-pela yia bihain, long 1932, inap olsem 103 painia na ol pablisa long Japan i putim ripot bilong wok autim tok, na ol i tilim moa long 14,000 buk. Long nau, ol i oganaisim gut wok bilong autim tok long ol pablik ples long Japan, na klostu 220,000 pablisa i larim lait bilong ol i go long olgeta hap bilong Ples Bilong Sankamap.—Histori bilong yumi long Japan.
Ol drowing bilong Kiichi Iwasaki, em man i wokim ol haus kar long Betel long Japan