Em “Save Long Rot”
GUY HOLLIS PIERCE, em memba bilong Gavening Bodi Bilong Ol Witnes Bilong Jehova, em i pinisim ol wok bilong em long graun long Tunde, Mas 18, 2014. Em i gat 79 krismas, na em i dai na kirap bek na kisim laip long heven wantaim Krais.—Hib. 2:10-12; 1 Pita 3:18.
Mama i bin karim Guy Pierce long Auburn, California, Amerika, long Novemba 6, 1934, na em i kisim baptais long 1955. Em i maritim Penny long 1977, na ol i kamapim sampela pikinini. Em i bin lukautim gut famili, olsem na em i gat gutpela pasin olsem papa. Long 1982, em wantaim Penny i insait long wok painia, na kirap long 1986, em i mekim wok olsem wasman sekit inap 11-pela yia long Amerika.
Long 1997, Guy na Penny Pierce i kirap mekim wok long Betel long Amerika. Brata Pierce i wok long Sevis Dipatmen, na long 1998 ol i makim em long i stap olsem helpim bilong Komiti Bilong Lukautim Ol Wokman. Long Oktoba 2, 1999, long miting bilong Watch Tower Bible and Tract Society of Pennsylvania we i save kamap long olgeta yia, ol i tokaut olsem Brata Pierce i kamap memba bilong Gavening Bodi. Long ol yia bihain, em i bin wok wantaim Komiti Bilong Lukautim Ol Wokman, Komiti Bilong Raitim Tok, Komiti Bilong Wokim Ol Buk Samting, na Komiti Bilong Ol Kodineta.
Ol man bilong kain kain ples na sindaun i save laikim Brata Pierce, long wanem, em i man bilong smail na amamas. Em i gat pasin laikim, pasin daun, em i rispektim ol stretpela lo na ol stiatok bilong Baibel, na em i bilip strong long Jehova. Long tingting bilong Guy Pierce, maski sapos san i no inap kam antap long moningtaim, ol tok promis bilong Jehova bai kamap tru long olgeta taim, olsem na em i laik autim dispela tok i tru long olgeta man long graun.
Brata Pierce i bin taitim bun tru long mekim wok bilong Jehova, na em i save kirap long bikmoning yet na sampela taim em i save wok i go inap long biknait. Em i bin raun long planti hap bilong graun na strongim ol bratasista. Maski em i gat planti wok, em i save putim yau long ol bratasista long Betel husat i laik toktok wantaim em, kisim edvais, na kisim helpim. Ol wanbilip i save tingim yet gutpela pasin bilong em, pasin pren, na pasin bilong em long yusim ol tok bilong Baibel long strongim ol.
Brata bilong yumi i dai na em i lusim meri na 6-pela pikinini, wantaim ol bubu pikinini na ol pikinini bilong ol bubu bilong em. Na tu, em i gat planti pikinini insait long tok i tru. Long Sarere, Mas 22, 2014, Mark Sanderson em wanpela memba bilong Gavening Bodi, em i mekim wanpela tok bilong tingim Brata Pierce long Brooklyn Betel. Em i toktok long samting Brata Pierce i bilip na wet long en. Olsem, Brata Pierce i gat bilip bilong i go antap long heven. Brata Sanderson i ritim tok bilong Jisas olsem: “Long haus bilong Papa bilong mi i gat planti hap bilong stap long en. . . . Mi bai go na redim hap bilong yupela, na bai mi kam bek na kisim yupela i go wantaim mi, na hap mi stap long en yupela tu bai i stap. Na hap mi laik go long en, yupela i save long rot bilong i go long dispela hap.”—Jon 14:2-4.
Em tru olsem yumi bai misim tru Brata Pierce. Tasol yumi amamas olsem em i “save long rot” i go long hap em bai i stap long en.