KRIETA bilong yumi i bin givim gutpez2la presen tru long ol man, olsem ol i stap fri long makim wanem rot ol i laik bihainim. Na tu, em i save blesim ol man i yusim dispela presen long mekim lotu i tru i kamap bikpela moa, na ol i wok strong long mekim holi nem bilong em na sapotim samting em i tingting pinis long mekim. Jehova i no save fosim yumi, pretim yumi, o grisim yumi na bai yumi ken bihainim tok bilong em, nogat. Sapos yumi yet i laikim tru God na pilim tru ol pasin bilong em na dispela i kirapim yumi long givim bel tru long mekim wok bilong em, orait em bai laikim tru yumi.

Olsem: Taim ol Israel i stap long ples drai nating bilong Sainai, Jehova i tokim ol long wokim wanpela haus lotu. Em i tok: “Yupela i mas givim sampela samting long em. Olgeta manmeri i laik givim ol samting long em, ol i mas bringim [ol] samting.” (Kis. 35:5) Olgeta wan wan Israel i ken givim samting ol inap givim, na givim long laik bilong ol yet—maski ol i givim wanem samting o ol i givim hamas—ol inap yusim dispela samting long inapim samting God i tingting pinis long mekim. Orait, ol Israel i mekim wanem?

Olgeta manmeri em bel i kirapim ol, na “olgeta manmeri i laik” givim samting, ol i givim olsem ofa long laik bilong ol yet. Ol man na ol meri i bringim kain kain samting bilong yusim long mekim wok bilong Jehova, olsem yauring, ring bilong pinga, gol, silva, bras, blupela tret, retpela gras bilong sipsip, retpela laplap, gutpela laplap linen, gras bilong meme, skin bilong sipsip man ol i penim long retpela pen, skin bilong bulmakau bilong solwara, diwai akas, ol gutpela gutpela ston, sanda, na wel. Bihain, “olgeta samting ol manmeri i bringim pinis em inap tru long mekim olgeta wok bilong haus sel na i winim mak, na sampela i stap nating.”—Kis. 35:21-24, 27-29; 36:7.

Maski ol manmeri i bringim planti samting, dispela i no stap olsem nambawan samting Jehova i amamas long en, nogat. Em i amamas moa yet long tingting i stap long bel bilong ol manmeri, olsem ol i laik tru long helpim lotu i tru. Na tu, bel i kirapim ol long givim haptaim na strong bilong ol long mekim wok. “Olgeta meri i save pinis long wokim tret, ol i kisim blupela na retpela gras bilong sipsip na wokim tret. . . . Na sampela meri i save gut long wokim tret long gras bilong meme, ol i wokim.” Na tu, Jehova i helpim Besalel long kisim “gutpela save na tingting bilong mekim olgeta gutpela wok.” God i givim gutpela save long Besalel na Oholiap na ol inap mekim olgeta wok em i givim long ol.—Kis. 35:25, 26, 30-35.

Taim Jehova i singautim ol Israel long givim ol samting, em i bilip tru olsem olgeta manmeri em bel i kirapim ol, ol bai helpim lotu i tru. Em i blesim na stiaim ol dispela manmeri na ol i kisim bikpela amamas tru. Jehova i soim klia olsem taim em i blesim ol manmeri husat i givim bel tru long wok bilong em, ol i no inap sot liklik long ol samting o ol gutpela save bilong kamapim laik bilong em. (Sng. 34:9) Taim yu daunim laik bilong yu yet na amamas long mekim wok bilong Jehova, orait yu ken bilip olsem em bai blesim yu.