Yu Ting i Stret Yu Senisim Tingting Bilong Yu?
SAMPELA yangpela Kristen i pasim tok long i go lukim wanpela muvi. Ol i harim olsem planti wanskul bilong ol i bin amamas tru taim ol i lukim dispela muvi. Taim ol i kamap long haus piksa, ol i lukim ol piksa bilong ol masin bilong pait na ol piksa bilong ol meri i werim ol klos i no haitim gut skin. Ol bai mekim wanem? Ol bai go insait long haus piksa na lukim muvi, o nogat?
Dispela stori i soim olsem sampela disisen inap strongim pasin bilong yumi long pas gut wantaim Jehova, na sampela disisen inap bagarapim dispela pasin. Sampela taim, yumi tingting long mekim wanpela samting, tasol taim yumi skelim gen dispela samting, yumi save senisim tingting. Taim yumi mekim olsem, yu ting dispela i makim olsem yumi gat 2-pela tingting? O yu ting dispela i makim olsem yumi mekim disisen i stret?
Pasin Bilong Senisim Tingting —I NO STRET
Yumi laikim tru Jehova, olsem na dispela i kirapim yumi long dediket na kisim baptais. Yumi laik tru long i stap gut long God. Tasol Satan i tingting strong long bagarapim pasin bilong yumi long i stap gut long God. (Rev. 12:17) Yumi bin mekim disisen long mekim wok bilong Jehova na bihainim ol lo bilong em. Olsem na sapos yumi no tingim dediket bilong yumi long Jehova na yumi senisim tingting bilong yumi, bikpela hevi bai painim yumi! Yumi bai lus long kisim laip.
Winim 2,600 yia i go pinis, King Nebukatnesar bilong Babilon i wokim wanpela traipela imis gol, na em i tokim olgeta manmeri long brukim skru na lotuim dispela imis. Sapos wanpela man i no bihainim dispela tok, ol bai tromoim em i go insait long bikpela paia. Tripela man, em Satrak, Mesak, na Abetnego, ol i stap daun long Jehova na ol i no lotuim dispela imis. Olsem na ol soldia i tromoi ol i go insait long bikpela paia. Maski ol inap lusim laip bilong ol, ol i strong long bihainim disisen bilong ol long lotuim God, na Jehova i wokim Dan. 3:1-27.
mirakel na helpim ol long abrusim bagarap.—Maski ol i pretim profet Daniel na tok long tromoim em long hul bilong ol laion, em i no lusim pasin bilong beten. Em i bihainim yet pasin bilong beten long Jehova inap 3-pela taim long olgeta wan wan de. Daniel i no senisim tingting bilong em long pasin bilong lotuim God. Olsem na God i lukautim em na “ol laion i no bagarapim em.”—Dan. 6:1-27.
Ol wokman bilong God long nau tu i stap gut long dediket ol i mekim long God. Long wanpela skul long Afrika, sampela sumatin em ol i Witnes Bilong Jehova, ol i no laik insait long wanpela bung bilong lotuim samting i givim biknem long kantri. Ol lain long skul i pretim ol Witnes sumatin na tok long rausim ol long skul sapos ol i no bihainim ol narapela sumatin na lotuim dispela samting. Bihain, minista bilong ediukesen i go long hap bilong ol na em i toktok long sampela Witnes sumatin. Ol yangpela Witnes i no pret, na long pasin rispek ol i stori gut long bilip bilong ol. Kirap long dispela taim, kain hevi olsem i no kamap gen. Ol yangpela bratasista i go long skul na skul i no fosim ol long mekim samting we inap bagarapim pasin bilong ol long pas gut wantaim Jehova.
Tingim wanpela brata, nem bilong em Joseph. Meri bilong em i kisim sik kensa inap sotpela taim tasol na em i dai. Famili bilong Joseph i rispektim tingting bilong em long ol samting em i laik mekim long taim bilong fiuneral. Tasol ol wanfamili bilong meri i no insait long tok i tru, olsem na ol i laik mekim sampela kastam pasin we i no stret long ai bilong God. Joseph i tok: “Mi strong long bihainim tingting bilong mi, olsem na ol i laik kirapim ol pikinini bilong mi long bihainim laik bilong ol, tasol ol pikinini i sakim tingting bilong ol. Na tu, ol wanblut i laik mekim sampela pasin kastam long haus bilong mi, tasol mi tokim ol olsem sapos ol i strong long mekim pasin kastam, ol i no inap mekim long haus bilong mi. Ol i save olsem dispela pasin kastam i no stret wantaim bilip bilong mi na meri bilong mi. Mi toktok moa wantaim ol, olsem na ol i go mekim pasin kastam long narapela hap.
“Long dispela taim bilong hevi, mi beten strong na askim Jehova long helpim mi na ol pikinini na bai mipela i no ken brukim ol lo bilong em. Em i harim ol beten bilong mi na em i helpim mipela long stap strong yet long bilip maski famili i putim presa long mipela.” Joseph na ol pikinini i no senisim bilip bilong ol.
Pasin Bilong Senisim Tingting I ORAIT
Bihain liklik long Pasova bilong yia 32 C.E., wanpela meri long Fonisia i kam toktok long Jisas Krais taim Jisas i stap long hap bilong Saidon. Dispela meri i askim Jisas long rausim spirit nogut long pikinini meri bilong em. Jisas i no mekim wanpela tok. Em i tokim ol disaipel olsem: “God i salim mi i kam long ol sipsip bilong lain Israel i lus pinis, na i no long ol arapela lain.” Meri i strong yet, na Jisas i tok: “I no stret long kisim bret bilong ol pikinini na tromoi i go long ol liklik dok.” Dispela meri i gat strongpela bilip, olsem na em i tok: “Bikpela, yu tok tru. Tasol ol liklik dok i save kaikai ol pipia bilong bret i pundaun long tebol bilong ol papa bilong ol.” Jisas i harim tok bilong dispela meri na em i oraitim pikinini bilong dispela meri.—Mat. 15:21-28.
Taim Jisas i mekim olsem, em i bihainim pasin bilong Jehova. Jehova i save redi long senisim tingting bilong em sapos i gat as long mekim olsem. God i tingting long pinisim ol Israel taim ol i wokim bulmakau gol, tasol Em i bihainim tok bilong Moses na senisim tingting bilong Em.—Kis. 32:7-14.
Aposel Pol i bihainim pasin bilong Jehova na Jisas. Taim Pol i mekim misineri raun na visitim sampela hap, em i pilim olsem i no stret long kisim Jon Mak i go wantaim ol, long wanem, em i bin lusim Pol na Barnabas long fes misineri raun bilong ol. Tasol bihain, Pol i luksave olsem Mak i redi long mekim wok na em bai stap olsem gutpela helpim. Olsem na Pol i tokim Timoti: “Kisim Mak i kam wantaim yu, em i gutpela man bilong helpim mi long mekim wok bilong God.”—2 Tim. 4:11.
Papa bilong yumi long heven em i man bilong soim pasin laikim, pasin marimari, na pasin isi. Sapos yumi bihainim pasin bilong em, yumi bai luksave olsem i stret long yumi ken senisim tingting bilong yumi. Sampela taim yumi inap senisim tingting yumi gat long ol narapela. Yumi no wankain olsem Jehova na Jisas, long wanem, yumi gat sin. Tasol Jehova na Jisas i redi long senisim tingting bilong ol, olsem na yumi tu i mas tingim sindaun bilong ol narapela na redi long senisim tingting bilong yumi.
Sapos yumi laik winim sampela mak long mekim wok bilong God, orait em gutpela long yumi senisim tingting bilong yumi long sampela samting. Ating sampela i stadi long Baibel na ol i go long ol miting bilong kongrigesen, tasol ol i no tingting yet long kisim baptais. Na tu, sampela brata i no laik insait long wok painia maski ol inap tru long mekim bikpela wok moa long autim tok. Sampela brata i no tingting long winim ol mak na bai ol inap mekim sampela wok moa insait long kongrigesen. (1 Tim. 3:1) Olsem wanem? Yu holim kain tingting olsem? Jehova i laikim yu na em i opim rot long yu inap winim ol dispela mak. Olsem na i gutpela long yu senisim tingting bilong yu na givim strong na taim bilong yu long mekim wok bilong God na helpim ol narapela, na yu inap kisim amamas long mekim olsem.
Yu inap kisim blesing sapos yu senisim tingting bilong yu
Ella i wok long brens ofis bilong ol Witnes Bilong Jehova long Afrika, na em i tok: “Long namba 1 taim mi kam long Betel, mi no save sapos mi bai stap longpela taim o nogat. Mi gat laik tru long mekim wok bilong Jehova, tasol mi pilim hat tru long lusim famili bilong mi. Mi misim ol stret! Tasol rumeit bilong mi i strongim mi, olsem na mi mekim disisen long stap yet long Betel. Nau mi stap long Betel winim 10-pela yia pinis, na mi pilim olsem mi laik stap yet long Betel na helpim ol bratasista.”
Pasin Bilong Senisim Tingting —YU MAS MEKIM
Olsem wanem? Yu tingim samting i bin kamap long Kein taim em i jeles long brata Stt. 4:2-8.
bilong em na belhat nogut tru? Sapos Kein i tanim bel, God bai orait long em. God i tokim Kein long daunim sin, long wanem, sin “i redi long bagarapim” em. Kein inap tru long senisim tingting na pasin bilong em, tasol em i no bihainim tok bilong God. Sori tru olsem Kein i kilim i dai brata bilong em, na em i kamap fes man long kilim man i dai!—Wanem samting inap kamap sapos Kein i bin senisim tingting bilong em?
Tingim tu eksampel bilong King Usia. Em i mekim stretpela pasin long ai bilong Jehova na em i bihainim laik bilong God. Tasol bihain, Usia i kisim pasin antap. Maski em i no mekim wok pris, em i go insait long tempel long mekim ofa bilong smok i gat gutpela smel. Taim ol arapela pris i tok lukaut long Usia, yu ting em i senisim tingting? Nogat. Usia i “kros tru” na em i no tingim tok lukaut bilong ol pris. Long dispela as, Jehova i mekim sik lepra i kamap long em.—2 Sto. 26:3-5, 16-20.
Yes, i gat sampela taim we yumi mas senisim tingting bilong yumi. Yumi ken skelim stori bilong wanpela brata long taim bilong yumi. Joachim i bin kisim baptais long 1955, tasol em i raus long 1978. Bihain long 20 yia, em i tanim bel na kongrigesen i kisim em bek olsem wanpela Witnes Bilong Jehova. Wanpela elda i askim em long wai na em i wet longpela taim paslain long em i toksave olsem em i laik kam bek long kongrigesen. Joachim i tok: “Mi bin kros na bihainim pasin antap. Mi bel hevi olsem mi bin wet inap longpela taim tru. Taim mi stap raus yet, mi save olsem ol Witnes Bilong Jehova i save skulim ol man long tok i tru.” Em i mas senisim pasin bilong em na tanim bel.
Sampela samting inap kamap na yumi pilim olsem yumi mas senisim tingting na pasin bilong yumi. Yumi mas redi long mekim olsem na bai Jehova inap orait long yumi.—Sng. 34:8.