1, 2. God i laik bai ol manmeri husat i lotuim em, ol yangpela na ol lapun wantaim, i mas mekim wanem?

 SAPOS yu wanpela yangpela, orait yu ken bilip tru olsem yu stap insait long lain bilong Jehova long olgeta hap bilong graun, olsem na Jehova i amamas tru long yu. Long planti kantri, planti moa yangpela i wok long kisim baptais, na ol i kirap long mekim wok bilong Jehova!

² Ating yu save amamas taim yu stap wantaim ol narapela yangpela. Olgeta man i save amamas taim ol i bung wantaim ol wankrismas bilong ol. Maski yumi yangpela o lapun, o yumi kam long wanem kain sindaun, God i laik bai yumi stap wanbel na lotuim em. Aposel Pol i tok, God “i laik kisim bek olgeta kain man na em i laik bai ol i kisim stretpela save long tok i tru.” (1 Tim. 2:3, 4) Revelesen 7:9 i tokim yumi olsem ol manmeri husat i lotuim God, “ol i bilong olgeta kantri na bilong olgeta lain na bilong olgeta lain pipol na bilong olgeta tokples.”

3, 4. (a) Planti yangpela bilong nau i holim wanem kain tingting? (b) Wanem pasin long nau i stret wantaim tok bilong Efesus 4:25?

³ Ol yangpela husat i mekim wok bilong Jehova, ol i stap narapela kain tru long ol yangpela bilong dispela graun! Planti yangpela husat i  no mekim wok bilong Jehova, ol i tingting tasol long inapim laik bilong ol yet. Sampela saveman i kolim ol yangpela bilong nau olsem “Lain Bilong Tingim Ol Yet.” Pasin bilong ol long toktok na bilas i soim olsem ol i luk daun long ol lapun, na ol i pilim olsem ol lapun i no gat save.

⁴ Dispela kain tingting i stap long olgeta hap. Olsem na ol yangpela husat i mekim wok bilong Jehova, ol i save taitim bun tru long abrusim dispela tingting na bihainim tingting bilong God. Long taim bilong ol aposel, Pol i bin kirapim ol wanbilip long abrusim “dispela win o tingting i wok nau insait long bel bilong ol pikinini bilong sakim tok.” (Ritim Efesus 2:1-3.) Yumi mas tok amamas long ol yangpela husat i sakim dispela kain tingting na ol i wok bung wantaim lain brata. Dispela pasin i stret wantaim tok bilong aposel Pol. Em i tok: “Yumi olgeta i olsem wan wan hap bilong wanpela bodi.” (Efe. 4:25) Yumi wok long i go klostu moa long pinis bilong dispela haptaim bilong nau em Satan i bosim, olsem na em i bikpela samting long yumi mas i stap wanbel na wok bung wantaim. Yumi ken skelim sampela eksampel bilong Baibel we bai helpim yumi long pilim tru olsem em i bikpela samting long yumi mas pas gut wantaim na stap wanbel.

5, 6. Stori bilong Lot na 2-pela pikinini meri bilong em i givim wanem skul long yumi long pasin bilong pas gut wantaim?

⁵ Long bipo, Jehova i bin amamas long lukautim lain bilong em taim ol i stap wanbel na helpim narapela narapela long karim hevi. Ol wokman bilong God long nau, ol yangpela na ol lapun wantaim, inap kisim skul long sampela man em Baibel i stori long ol. Wanpela em Lot.

⁶ Lot na famili bilong em i stap long wanpela haptaim i nogut tru bikos bagarap bai painim Sodom, em taun ol i stap long en. Ol ensel bilong God i tokim Lot long lusim taun na ranawe i go long ples maunten, na ol ensel i tok: “Yupela ranawe kwik, nogut yupela i dai”! (Stt. 19:12-22) Lot i bihainim tok, na 2-pela pikinini meri bilong em tu i bihainim em na ol i lusim taun. Tasol sori tru olsem sampela gutpela pren i no bihainim ol. Lot i toksave long 2-pela yangpela man husat bai maritim ol pikinini meri bilong em, “tasol tupela i ting em i tok pilai tasol.” Olsem na bagarap i painim ol. (Stt. 19:14) Tupela pikinini meri bilong Lot i pas gut wantaim em, olsem na ol 3-pela tasol i bin abrusim bagarap.

7. Taim lain Israel i lusim Isip, olsem wanem Jehova i helpim ol manmeri husat i gat pasin bilong i stap wanbel?

⁷ Tingim narapela eksampel. Taim lain Israel i lusim Isip, ol i no bruk long ol liklik grup na bihainim laik bilong ol yet na i go. Na tu, taim Moses “i litimapim han bilong en na i makim solwara” na Jehova i brukim solwara i go 2-pela hap, Moses i no go em yet o kisim liklik lain tasol na i go, nogat. Jehova i lukautim lain Israel olgeta na ol i go long hapsait bilong solwara. (Kis. 14:21, 22, 29, 30) Ol i stap wanbel wantaim, na “planti arapela lain manmeri” i bihainim ol i go—ol dispela manmeri i no bilong lain Israel. (Kis. 12:38) Ol yangpela i no bihainim tingting bilong ol yet na makim rot ol i laik bihainim. Sapos ol i bin mekim olsem, dispela bai soim olsem ol i no gat gutpela tingting na Jehova i no inap lukautim ol.—1 Kor. 10:1.

8. Long taim bilong Jehosafat, olsem wanem lain bilong God i soim olsem ol i stap wanbel?

⁸ Long taim bilong King Jehosafat, “bikpela lain ami” bilong ol kantri i stap klostu i laik pait long ol manmeri bilong God. (2 Sto. 20:1, 2) Ol wokman bilong God i no yusim strong bilong ol yet long daunim ol birua, nogat. Ol i askim Jehova long helpim ol. (Ritim 2 Stori 20:3, 4.) Olgeta wan wan man i no bihainim tingting bilong ol yet, nogat. Baibel i tok: “Olgeta man bilong Juda wantaim ol meri na pikinini bilong ol i sanap long ai bilong Bikpela, klostu long haus bilong en.” (2 Sto. 20:13) Ol yangpela na ol lapun, olgeta i bilip na wok bung wantaim long bihainim tok bilong Jehova, olsem na Jehova i lukautim ol na daunim ol birua. (2 Sto. 20:20-27) Yumi stap olsem lain bilong God, na dispela stori i givim gutpela skul long yumi long olsem wanem yumi inap karim ol hevi.

9. Pasin na tingting bilong ol Kristen long taim bilong ol aposel i givim wanem skul long yumi?

⁹ Long taim bilong ol aposel tu, ol Kristen i gat  pasin bilong wok bung wantaim. Planti Juda na ol man i bin joinim lotu Juda, ol i kamap Kristen na ol i putim tingting bilong ol i go long “tok bilong ol aposel, na long helpim narapela narapela, na kaikai wantaim, na beten.” (Apo. 2:42) Dispela pasin bilong ol long i stap wanbel i kamap klia moa long taim ol birua i mekim nogut long ol, long wanem, long dispela taim ol i nidim narapela narapela long mekim gut long ol. (Apo. 4:23, 24) Long taim bilong hevi, em i bikpela samting long yumi mas wok bung wantaim.

10. Wanem kain taim bai i kamap na em i bikpela samting long ol lain bilong God i mas i stap wanbel?

¹⁰ Klostu nau taim nogut bai painim ol lain man, na hevi i kamap long dispela taim bai winim olgeta narapela hevi i bin kamap bipo. Profet Joel i tok, “dispela De . . . bai i tudak tru.” (Jol. 2:1, 2; Sef. 1:14) Ol manmeri bilong God bai i stap wanbel tru long dispela taim. Tingim dispela tok bilong Jisas: “Olgeta kingdom i bruk tupela lain ol bai bagarap.”—Mat. 12:25.

11. Olsem wanem tok bilong Song 122:3, 4 i stret long ol manmeri bilong God long nau? (Lukim piksa long kirap bilong stadi.)

¹¹ Klostu nau, bikpela hevi bai kamap na dispela haptaim bilong nau bai pinis, olsem na yumi mas i stap wanbel tru. Long dispela taim, pasin wanbel bilong yumi i mas i stap strong tru, kain olsem pasin ol i bihainim long sanapim ol haus long Jerusalem bilong bipo. Man bilong raitim song i tok, Jerusalem i olsem “wanpela taun we ol haus i stap klostu klostu olsem wanpela hauslain.” Dispela i opim rot long ol manmeri inap helpim na lukautim narapela narapela. Ol i pas gut wantaim, na long sait bilong bilip tu, lain olgeta bilong ol i stap wanbel taim olgeta “lain bilong Ja” i bung long mekim lotu. (Ritim Song 122:3, 4.) a Long nau na long taim bikpela hevi tru i kamap, yumi tu i mas “stap klostu klostu olsem wanpela hauslain.”

12. Ol birua bai laik pait long lain bilong God, olsem na yumi mas mekim wanem na bai yumi inap abrusim bagarap?

¹² Long dispela taim, bilong wanem em i bikpela samting tru long yumi mas “i stap klostu klostu olsem wanpela hauslain”? Esekiel sapta 38 i tok profet olsem ‘Gok bilong graun Magok’ bai birua long ol manmeri bilong God. Long dispela taim, yumi no ken larim wanpela samting i bagarapim pasin bilong yumi long i stap wanbel wantaim. Yumi no ken tru askim ol lain bilong dispela graun long helpim yumi. Yumi mas pas gut tru wantaim ol bratasista bilong yumi. Tasol maski yumi stap olsem wanpela grup, i no dispela tasol bai helpim yumi long abrusim bagarap, nogat. Long dispela taim nogut, Jehova na Pikinini bilong em bai kisim bek olgeta manmeri husat i singaut long nem bilong Jehova. (Jol. 2:32, NW; Mat. 28:20) Orait, olsem wanem long ol manmeri husat i no stap wanbel moa wantaim lain bilong God? Yu ting i stret long holim tingting olsem God bai kisim bek ol?—Mai. 2:12.

13. Ol yangpela husat i stap gut long God, ol inap kisim wanem skul long ol samting yumi stori pinis long en?

¹³ Yumi no ken bihainim tingting bilong ol yangpela husat i laik stap ol yet na bihainim tingting na laik bilong ol yet. Yumi wok long i go klostu moa long wanpela taim we em i bikpela samting long yumi mas pas gut tru wantaim narapela narapela. Dispela i makim yumi olgeta, ol yangpela na ol lapun wantaim! Yes, nau em taim we yumi mas lain long wok bung wantaim na kamapim pasin bilong i stap wanbel, na dispela pasin bai helpim tru yumi.

14, 15. (a) Bilong wanem Jehova i wok long skulim ol yangpela na ol lapun long nau? (b) Jehova i givim wanem tok bilong strongim yumi long i stap wanbel?

¹⁴ Long nau, Jehova i helpim yumi long “wok gut wantaim long mekim wok bilong em.” (Sef.  3:8, 9, NW) Em i wok long trenim yumi na bai yumi stap redi taim em i kamapim samting em i tingting pinis long mekim. Em bai mekim wanem? Em i tingting pinis long “bungim olgeta samting gen long Krais.” (Ritim Efesus 1:9, 10.) Em i laik bungim olgeta lain long heven na graun bambai ol i stap olsem wanpela lain tasol, na em bai inapim tru dispela wok. Sapos yu wanpela yangpela, orait dispela stadi bai helpim yu long luksave olsem em i bikpela samting long yu mas i stap wanbel na wok gut wantaim oganaisesen bilong Jehova.

¹⁵ Jehova i wok long skulim yumi na bai yumi inap i stap wanbel long nau, na yumi inap bihainim yet dispela pasin i go inap oltaim oltaim. Planti taim Baibel i kirapim yumi long “tingim ol arapela,” “sori na laikim tumas ol arapela wanbilip,” “mekim isi bel bilong narapela narapela,” na “strongim narapela narapela.” (1 Kor. 12:25; Rom 12:10; 1 Tes. 4:18; 5:11) Jehova i save olsem ol Kristen ol i sinman, na dispela inap mekim na i hatwok long yumi stap wanbel wantaim narapela narapela, olsem na yumi mas “redi long fogivim narapela narapela.”—Efe. 4:32.

16, 17. (a) Wanem wanpela wok bilong ol miting Kristen? (b) Ol yangpela inap kisim wanem skul long pasin Jisas i bin mekim taim em i stap yangpela yet?

¹⁶ Na tu, Jehova i opim rot long yumi inap mekim ol miting Kristen, na dispela i helpim yumi long lain long pas gut wantaim narapela narapela. Planti taim yumi save ritim dispela tok long Hibru 10:24, 25. Wanpela wok bilong ol dispela miting em olsem, ol i kirapim yumi long “tingim ol arapela namel long yumi, na kirapim ol long mekim pasin laikim na mekim ol gutpela wok.” Tasol bikpela wok bilong ol dispela miting em olsem, em i opim rot long yumi inap “strongim bel bilong narapela narapela na mekim moa yet taim yumi lukim dispela de i kam klostu.”

¹⁷ Kirap long taim Jisas i yangpela yet, em i save laikim tru ol kain bung olsem. Taim em i gat 12 krismas, em i go wantaim papamama long wanpela bikpela bung bilong lotu. Long dispela taim, em i lusim ol na i go, tasol em i no raun wantaim ol narapela yangpela, nogat. Josep na Maria i painim em i go na ol i lukim em i toktok i stap wantaim ol tisa long tempel.—Luk 2:45-47.

18. Olsem wanem ol beten bilong yumi inap strongim pasin bilong yumi long i stap wanbel?

¹⁸ Olsem yumi stori pinis, ol miting Kristen i opim rot long yumi inap kisim pasin bilong laikim narapela narapela na strongim pasin bilong i stap wanbel, na tu, ol miting i opim rot long yumi inap beten long helpim ol narapela. Taim yumi beten na kolim stret ol samting yumi laik bai Jehova i mekim bilong helpim ol bratasista, dispela i soim klia olsem yumi tingim ol. I no  olsem ol bikpela manmeri tasol i mas mekim ol dispela samting, nogat. Sapos yu wanpela yangpela, orait yu mas tingim ol miting na pasin bilong beten olsem rot bilong kisim pasin bilong pas gut moa wantaim ol bratasista. Taim yu mekim olsem, dispela bai helpim yu long sakim pasin bilong dispela graun i go inap long pinis bilong dispela haptaim.

19-21. (a) Wanem nambawan rot bilong soim olsem “yumi olgeta wan wan i stap olsem ol hap bodi i join wantaim”? Stori long sampela eksampel. (b) Yu kisim wanem skul long pasin ol bratasista i bin soim long taim bilong ol disasta?

¹⁹ Ol manmeri bilong Jehova i bihainim pinis stiatok i stap long Rom 12:5: “Yumi olgeta wan wan i stap olsem ol hap bodi i join wantaim.” Dispela pasin i save kamap ples klia long taim bilong ol disasta. Long Disemba 2011, bikpela win na ren i mekim na bikpela tait i kamap long ailan Mindanao long Filipins. Insait long wanpela nait tasol, inap olsem 40 tausen haus i bagarap, na sampela em ol haus bilong ol wanbilip bilong yumi. Brens ofis i kamapim ripot olsem, “paslain long ol rilif komiti i stretim rot long givim helpim, ol bratasista long ol narapela hap i kirap pinis long salim helpim.”

²⁰ Wankain samting i bin kamap long Japan. Traipela guria na sunami i kamap long hap is bilong Japan na i bagarapim tru ol haus na ol kago bilong planti bratasista. Sampela bratasista i lusim olgeta kago. Wanpela sista nem bilong em, Yoshiko, em i stap 40 kilomita longwe long Haus Kingdom, na tait wara i bagarapim haus bilong em. Yoshiko i tok: “Mipela i kirap nogut olsem long de bihain long guria, wasman sekit na narapela brata i kam painim mipela.” Yoshiko i smail na i tok moa: “Mipela i amamas tru olsem long rot bilong kongrigesen, mipela inap kisim planti samting bilong lukautim mipela long sait bilong bilip. Na tu, mipela i kisim ol saket, ol su, ol beg, na ol klos bilong pasim long taim bilong slip.” Wanpela brata long rilif komiti i tok: “Ol bratasista long olgeta hap bilong Japan i wok bung wantaim na mekim ol wok bilong helpim narapela narapela. Sampela bratasista bilong Amerika tu i kam bilong givim helpim. Taim mipela i askim ol long wai na ol i kam maski ol i stap longwe tru, ol i tok, ‘Mipela i stap wanbel wantaim ol bratasista bilong mipela long Japan, na ol i nidim helpim.’” Yumi olgeta wan wan i ken amamas tru olsem yumi stap insait long oganaisesen we i save tingim tru ol lain bilong en! Yumi ken bilip tru olsem Jehova i amamas tru long lukim dispela pasin bilong i stap wanbel.

²¹ Sapos yumi gat dispela pasin long nau, yumi bai i stap wanbel yet wantaim ol bratasista na karim ol hevi i painim yumi maski yumi stap long wanem wanem hap. Dispela pasin i trenim yumi long karim ol hevi we inap painim yumi taim bagarap i painim dispela haptaim bilong nau em Satan i bosim. Wanpela sista nem bilong em Fumiko, em tu i bin karim hevi taim saiklon i kamap long Japan na bagarapim haus na ol kago bilong em, na em i tok: “Pinis bilong dispela haptaim bilong nau i kam klostu tru. Yumi mas wok yet long helpim ol wanbilip na wetim haptaim bai kamap bihain we bai i no gat moa ol disasta.”

22. Taim yumi wok strong long i stap wanbel olsem ol Kristen, olsem wanem dispela inap helpim tru yumi?

²² Ol yangpela na ol lapun em ol i wok strong long i stap wanbel long nau, ol i redim ol yet long abrusim bagarap long pinis bilong dispela haptaim nogut bilong nau we i no gat pasin wanbel long en. Olsem God i bin mekim long bipo, em bai kisim bek lain bilong em. (Ais. 52:9, 10) Oltaim yu mas tingim olsem, sapos yu wok strong long i stap wanbel wantaim lain bilong God, orait yu tu bai i stap olsem wanpela bilong ol manmeri em God bai kisim bek ol. Narapela samting we bai helpim yumi em olsem, yumi mas pilim tru ol samting em God i givim pinis long yumi. Yumi bai stori long dispela samting long neks stadi.