1, 2. Jisas i mekim wanem long apinun bilong Nisan 14, long yia 33 C.E? (Lukim piksa long kirap bilong stadi.)

 PLES i tudak pinis, tasol mun i lait gut tru long Jerusalem. Em apinun bilong Nisan 14, long yia 33 C.E. Jisas na ol aposel bilong em i mekim bung bilong Pasova. Ol i mekim olsem bilong tingim de God i bin kisim bek lain Israel taim ol i stap kalabus long Isip inap 1 tausen 5 handret yia i go pinis. Jisas i kamapim wanpela spesel bung wantaim 11-pela aposel husat i stap gut long em—dispela bung i bilong tingim dai bilong em. Em i dai long wankain de ol i mekim dispela bung. a—Mat. 26:1, 2.

² Jisas i beten na em i kisim bret i no gat yis na tilim long ol aposel, na em i tok: “Yupela kisim na kaikai.” Em i kisim kap wain na em i beten gen na tok tenkyu, na em i tok: “Yupela olgeta dring long dispela kap.” (Mat. 26:26, 27) Long dispela nait, Jisas i no givim ol narapela kaikai long ol disaipel, nogat, em i tokim ol long sampela bikpela samting.

3. Yumi bai skelim wanem ol askim long dispela stadi?

³ Long dispela nait, Jisas i kamapim Memorial bilong tingim dai bilong em. Narapela nem bilong dispela bung em “kaikai bilong Bikpela.” (1 Kor. 11:20) Ating sampela man i laik save: Bilong wanem yumi mas  tingim dai bilong Jisas? Bret na wain i makim wanem samting? Yumi ken mekim wanem bilong redim yumi yet long bung bilong Memorial? Husat inap kisim bret na wain? Olsem wanem ol Kristen i soim olsem ol i tingim tru blesing em Baibel i tok ol bai kisim long bihain?

4. Dai bilong Jisas i opim rot long yumi inap kisim wanem blesing?

⁴ Yumi ol tumbuna pikinini bilong Adam, olsem na yumi olgeta i gat sin na yumi save dai. (Rom 5:12) I no gat wanpela sinman inap givim pe long God bilong baim bek laip bilong em yet na laip bilong ol narapela manmeri. (Sng. 49:5-9) Bodi bilong Jisas i no gat sin, olsem na taim em i dai, bodi na blut bilong em i olsem pe bilong baim bek ol man, na God i orait long kisim dispela pe. Taim Jisas i givim laip bilong em olsem pe long God, em i opim rot long yumi inap lusim kalabus bilong sin na dai, na yumi inap kisim presen bilong laip oltaim.—Rom 6:23; 1 Kor. 15:21, 22.

5. (a) Olsem wanem yumi save olsem God na Krais i laikim tru ol manmeri? (b) Bilong wanem yumi mas i go long bung bilong tingim dai bilong Jisas?

⁵ Taim Jisas i givim laip bilong em olsem ofa bilong baim bek yumi, dispela i soim klia olsem God i laikim tru olgeta manmeri. (Jon 3:16) Ofa bilong Jisas i soim olsem em tu i laikim tru yumi. Paslain long Jisas i kam long graun, God i makim em long i stap olsem “saveman i bosim wok,” na Jisas i ‘amamas long lukim ol manmeri’! (Snd. 8:30, 31) Sapos yumi tenkyu tru long God na Pikinini bilong em, dispela bai kirapim yumi long i go long bung bilong tingim dai bilong Jisas. Taim yumi mekim olsem, yumi bai bihainim dispela tok bilong Jisas: “Yupela i mas mekim olsem yet bilong tingim mi.”—1 Kor. 11:23-25.

6. Long bung bilong Memorial, bret na wain i makim wanem samting?

⁶ Taim Jisas i kamapim bung bilong Memorial, em i no mekim mirakel na senisim bret na wain na mekim i kamap bodi tru na blut tru bilong em, nogat. Em i kisim bret na em i tok: “Dispela i makim bodi bilong mi.” Bihain, em i kisim kap wain na em i tok: “Dispela i makim ‘blut bilong mi bilong kontrak,’ dispela blut bai kapsait bilong helpim planti manmeri.” (Mak 14:22-24) Dispela i soim klia olsem bret na wain i stap olsem piksa na i makim bodi na blut bilong Jisas.

7. Bret yumi yusim long taim bilong Memorial i makim wanem samting?

⁷ Taim Jisas i kamapim dispela spesel bung long yia 33 C.E., em i yusim hap bret i stap yet bihain long ol i mekim bung bilong Pasova. Dispela bret i no gat yis long en. (Kis. 12:8) Sampela taim, Baibel i yusim yis olsem tok piksa bilong makim sin. (Mat. 16:6, 11, 12; Luk 12:1) Taim Jisas i yusim bret i no gat yis, dispela i makim bodi bilong em—bodi i no gat sin. (Hib. 7:26) Olsem na yumi save yusim dispela kain bret long taim bilong Memorial.

8. Kap wain long bung bilong Memorial i makim wanem samting?

⁸ Long Nisan 14 bilong yia 33 C.E., Jisas i bin yusim wain na dispela i makim blut bilong em, na i wankain tu long wain yumi yusim long mekim bung bilong Memorial long nau. Long Golgota, em ples ausait long Jerusalem, blut bilong em i kapsait na i opim rot long God inap “lusim sin” bilong yumi. (Mat. 26:28; 27:33) Bret na wain long bung bilong Memorial i makim ofa em Jisas i bin givim. Dispela ofa i dia tumas na em bai helpim olgeta manmeri husat i bihainim tok bilong God. Yumi tenkyu tru long dispela ofa, olsem na i stret long yumi olgeta wan wan i mas redim yumi yet long i go long bung bilong tingim Kaikai Bilong Bikpela.

9. (a) Wai na yumi mas bihainim sediul bilong ritim Baibel long wik bilong Memorial? (b) Yu pilim olsem wanem long ofa bilong Jisas long baim bek ol man?

⁹ Buklet Skelim Sampela Tok Bilong Baibel Long Olgeta De i gat sediul bilong ritim Baibel long taim bilong Memorial. Taim yumi bihainim dispela sediul, yumi inap tingim tingim ol samting Jisas i  mekim paslain long em i dai. Dispela bai helpim yumi long redim tingting na bel bilong yumi long i go long Kaikai Bilong Bikpela. Wanpela sista i tok: “Mipela i amamas tru long bung bilong Memorial bai kamap. Long olgeta yia, amamas bilong mi long dispela bung i save kamap bikpela moa. Mi tingim taim we mi bin sanap insait long fiuneral haus na lukluk long bodi bilong papa bilong mi, na long dispela taim mi tenkyu tru long ofa bilong Jisas long baim bek yumi. . . . Mi save long olgeta skripsa na mining bilong ol! Tasol taim Papa i dai, dispela i givim bikpela bel hevi tru long mi. Long dispela taim, mi tingim olsem ofa bilong Jisas i opim rot na yumi inap kisim ol gutpela blesing long bihain, na dispela i mekim mi amamas.” Taim yumi redim yumi yet long i go long bung bilong Memorial, yumi mas tingim olsem ofa bilong Jisas i helpim yumi long lusim kalabus bilong sin na dai.

10. Taim yumi redim yumi yet long i go long bung bilong Memorial, dispela bai kirapim yumi long mekim wanem?

¹⁰ Long mun bilong Memorial, yumi ken redim yumi yet na lusim bikpela haptaim moa long autim tok, na yumi ken mekim wok painia haptaim. Taim yumi singautim ol Baibel sumatin na ol narapela long kam long bung bilong tingim Kaikai Bilong Bikpela, yumi bai amamas taim yumi stori long ol long God, Pikinini bilong em, na ol blesing Jehova bai givim long ol man i mekim laik bilong Em na litimapim nem bilong em.—Sng. 148:12, 13.

11. Olsem wanem sampela Kristen long Korin i no bihainim stretpela pasin taim ol i kisim bret na wain?

¹¹ Taim yu redim yu yet long i go long bung bilong tingim Kaikai Bilong Bikpela, tingim tok em aposel Pol i givim long ol Kristen long kongrigesen long Korin. (Ritim 1 Korin 11:27-34.) Pol i kamapim klia olsem sapos wanpela Kristen i mekim rong na em i kisim bret na wain, “orait em bai i gat asua long bodi na long blut bilong Bikpela,” Jisas Krais. Olsem na sapos wanpela Kristen i save olsem God i bin makim em, orait em “i mas skelim em yet bilong save olsem em i winim mak o nogat,” na bihain em i ken kisim bret na wain. Sapos Kristen i no mekim olsem, orait i olsem “em i bringim kot i kam long em yet.” Planti Kristen long Korin i no bihainim stretpela pasin, olsem na ol “i no strong na [ol] i gat sik, na planti bilong [ol] i dai pinis” long sait bilong bilip. Ating sampela bilong ol i kaikai planti tumas na dring planti tumas paslain long Memorial o long taim bilong Memorial, olsem na ol i no redim tingting na bel bilong ol long pilim tru mining bilong dispela bung. Olsem na God i no orait long ol taim ol i kisim bret na wain.

12. (a) Pol i stori olsem wanem long bung bilong Memorial? (b) Em i givim wanem tok lukaut? (c) Sapos wanpela Kristen i save kisim bret na wain na bihain em i mekim bikpela rong, orait em i mas mekim wanem?

 ¹² Pol i tok, bung bilong Memorial i kain olsem wanpela kaikai we ol narapela tu i stap, na em i tok lukaut olsem: “Yupela i no inap dring long kap bilong Jehova na long kap bilong ol spirit nogut wantaim. Na yupela i no inap kaikai long ‘tebol bilong Jehova’ na long tebol bilong ol spirit nogut wantaim.” (1 Kor. 10:16-21) Ating wanpela Kristen i kisim bret na wain long Kaikai Bilong Bikpela inap sampela yia pinis. Sapos em i mekim wanpela bikpela rong, orait em i mas kisim helpim long ol elda. (Ritim Jems 5:14-16.) Tasol sapos dispela Kristen i “kamapim ol kaikai i stret wantaim pasin bilong tanim bel,” na em i kisim bret na wain long taim bilong Memorial, orait dispela i no makim olsem em i luk daun long ofa bilong Jisas.—Luk 3:8.

13. Wai na yumi mas beten na tingim tingim ol blesing God i redim long yumi bai kisim long bihain?

¹³ Taim yumi redim yumi yet long i go long bung bilong Memorial, yumi mas beten na tingim tingim ol blesing em God i redim long yumi bai kisim long bihain. Maski sapos wanpela man i dediket long Jehova na em i stap gutpela disaipel bilong Jisas, tasol i no gat wanpela samting i soim klia olsem God i makim em long holi spirit, orait em i no ken kisim bret na wain long taim bilong Memorial bikos dispela bai makim olsem em i no rispektim ofa bilong Jisas. Olsem na hau bai Kristen i ken save sapos em inap kisim bret na wain?

14. Taim Kristen i kisim bret na wain long taim bilong Memorial, olsem wanem dispela i stret long nupela kontrak?

¹⁴ Ol Kristen husat i save kisim bret na wain long taim bilong Memorial, ol i bilip tru olsem ol i stap insait long nupela kontrak. Jisas i kisim kap wain na em i tok: “Dispela kap i makim nupela kontrak mi mekim long rot bilong blut bilong mi.” (1 Kor. 11:25) Long rot bilong profet Jeremaia, God i tok em bai mekim nupela kontrak we bai i narapela kain long kontrak bilong Lo i stap namel long Em na lain Israel. (Ritim Jeremaia 31:31-34.) God i mekim nupela kontrak wantaim nupela lain Israel. (Gal. 6:15, 16) Dispela kontrak i kamap taim Krais i givim em yet olsem ofa, na taim Krais i kapsaitim blut bilong em, dispela i opim rot na dispela kontrak i gat strong long mekim wok. (Luk 22:20) Jisas i stap olsem namelman bilong dispela nupela kontrak. Ol Kristen em God i bin makim na ol i stap insait long dispela kontrak, ol bai kisim laip long heven.—Hib. 8:6; 9:15.

15. (a) Husat i stap insait long kontrak bilong Kingdom? (b) Ol bai kisim wanem blesing sapos ol i stap gut long bilip?

¹⁵ Ol Kristen husat i kisim bret na wain long taim bilong Memorial, ol i save olsem ol i insait long kontrak bilong Kingdom. (Ritim Luk 12:32.) Taim man i kamap disaipel bilong Jisas, na God i makim em long holi spirit, na em i bihainim gut lek mak bilong Jisas, na karim wankain hevi olsem Jisas i bin karim, em bai mekim wok king wantaim Jisas long heven. (Fili. 3:10) Ol dispela Kristen bai mekim wok king wantaim Krais long heven inap oltaim oltaim, long wanem, ol i stap insait long kontrak bilong Kingdom. (Rev. 22:5) Olsem na i stret long ol dispela Kristen i kisim bret na wain long bung bilong tingim Kaikai Bilong Bikpela.

16. Stori long mining bilong Rom 8:15-17.

¹⁶ Sapos spirit bilong God i tokaut long wanpela Kristen olsem em i pikinini bilong God, orait dispela i makim olsem em inap kisim bret na wain long bung bilong Memorial. (Ritim Rom 8:15-17.) Tingim: Pol i yusim dispela tok “Aba,” em wanpela tok Aram na mining bilong en “Papa!” Pikinini inap yusim dispela tok taim em i toktok long papa bilong em, long wanem, dispela tok i makim olsem pikinini i pas gut wantaim Papa, na tu, em i rispektim Papa. God i save yusim “spirit” bilong em long “adoptim” ol Kristen, na long dispela rot ol i stap olsem ol pikinini em God yet i makim. Spirit bilong Jehova i save stiaim tingting bilong ol, na dispela i helpim ol long luksave olsem Jehova i makim ol long i stap olsem ol pikinini bilong em.  Dispela i no makim olsem ol i no amamas moa long i stap long graun, nogat. Ol i bilip tru olsem sapos ol i stap gut long God i go inap long taim ol i dai, ol bai mekim wok King wantaim Jisas long Kingdom bilong heven. Long nau, liklik lain tasol bilong lain 144,000 disaipel bilong Krais i stap yet long graun, na ol i “kisim holi spirit long God.” (1 Jon 2:20; Rev. 14:1) Holi spirit i kirapim ol long singaut na tok, “Aba, Papa!” Em gutpela blesing tru long ol inap pas gut wantaim God!

17. (a) Ol Kristen em God i bin makim i bilip na wet long kisim wanem blesing? (b) Ol i holim wanem tingting long dispela blesing?

¹⁷ Sapos yu wanpela bilong ol Kristen God i bin makim, na yu bilip na wet long kisim laip long heven, orait em i bikpela samting long yu mas kolim dispela blesing taim yu mekim ol beten bilong yu yet. Baibel i stori olsem God i makim wanpela lain husat i stap olsem “meri bilong maritim” Krais, na taim yu tingim olsem yu yet i wanpela bilong dispela lain, yu bai amamas tru long dispela blesing. (2 Kor. 11:2; Jon 3:27-29; Rev. 21:2, 9-14) Taim God i yusim tok bilong Baibel long soim klia olsem em i laikim tru ol pikinini bilong em, yu inap tok, “Dispela tok i makim mi.” Taim Jehova i yusim tok bilong Baibel long givim skultok long ol Kristen Em i makim, holi spirit i kirapim yu long bihainim tok, na tu, em i kirapim yu long tok, “Dispela tok i stret long mi.” Olsem na spirit bilong God i strongim tingting bilong yu long bilip tru olsem yu bai kisim laip long heven.

18. (a) Ol “arapela sipsip” i bilip na wet long kisim wanem blesing? (b) Yu pilim olsem wanem long dispela blesing?

¹⁸ Tasol sapos yu wanpela bilong lain “arapela sipsip,” em “bikpela lain manmeri,” orait God i opim rot long yu inap kisim laip oltaim long graun. (Rev. 7:9; Jon 10:16) Yu laik stap oltaim long Paradais long graun, na yu amamas taim yu tingim tingim tok bilong Baibel long ol blesing yu bai kisim. Yu amamas tru olsem yu bai stap bel isi tru na bung wantaim ol wanfamili na ol narapela stretpela manmeri. Yu laik tumas long lukim taim bihain we kaikai bai i no sot moa, ol man bai i no stap rabis moa, ol sik bai pinis, na bai i no gat dai moa. (Sng. 37:10, 11, 29; 67:6; 72:7, 16; Ais. 33:24) Yu gat bikpela laik tru long welkamim ol manmeri i kirap bek long matmat na ol inap kisim laip oltaim long graun. (Jon 5:28, 29) Yu tenkyu tru olsem Jehova i opim rot long yu inap bilip na wet long kisim laip oltaim long graun! Maski yu no wanpela bilong ol Kristen husat i save kisim bret na wain, yu go long Memorial bilong soim olsem yu tenkyu tru long ofa bilong Jisas Krais long baim bek ol man.

19, 20. (a) Yu mas mekim wanem na bai yu inap kisim ol blesing em God i opim rot long yu bai kisim long bihain? (b) Bilong wanem yu mas i go long bung bilong tingim Kaikai Bilong Bikpela?

¹⁹ Maski yu bilip na wet long kisim laip long graun o long heven, dispela inap kamap tru sapos yu bilip long God Jehova, Jisas Krais, na ofa bilong baim bek yumi. Taim yu go long Memorial, rot bai op long yu inap tingim tingim samting yu bilip na wet long en, na olsem wanem dai bilong Jisas inap helpim yu. Long ol Haus Kingdom na long ol narapela ples bung long olgeta hap bilong graun, planti milion manmeri bai i go long bung bilong tingim Kaikai Bilong Bikpela. Dispela bung bai kamap bihain long san i go daun long Fraide, Epril 3, 2015, olsem na yu mas putim mak na yu tu i mas i go long dispela bung.

²⁰ Taim yu go long Memorial, dispela bai kirapim yu long pilim tru na tenkyu long ofa bilong Jisas long baim bek man. Taim yu putim gut yau long tok i kamap long dispela bung, dispela bai kirapim yu long soim pasin laikim long ol narapela man. Yu bai tokim ol long ol samting yu bin kisim save long en long pasin laikim bilong Jehova, na samting em i tingting pinis long mekim long helpim olgeta lain man. (Mat. 22:34-40) Olsem na yu no ken larim wanpela samting i pasim yu long i go long bung bilong tingim Kaikai Bilong Bikpela.