1, 2. (a) Taim Jisas i stori wantaim ol disaipel husat i stap olsem ol gutpela pren, em i mekim wanem ol tok piksa? (Lukim piksa long kirap bilong stadi.) (b) Yumi mas kisim wanem stretpela save long tok piksa bilong ol sipsip na ol meme?

 JISAS i toktok wantaim Pita, Andru, Jems, na Jon, em ol gutpela pren bilong em. Em i stori long tok piksa bilong gutpela wokboi i gat savetingting, 10-pela yangpela meri, na mani talen. Orait nau em i mekim laspela tok piksa. Em i stori long wanpela taim bai kamap na “Pikinini bilong man” bai skelim “olgeta lain man.” Ating ol disaipel i kirap nogut tru long harim dispela tok piksa! Jisas i stori long 2-pela lain; em i kolim wanpela lain olsem ol sipsip na narapela lain olsem ol meme. Em i kolim namba 3 grup em ol i stap olsem “ol brata” bilong “King,” na dispela lain i gat bikpela wok.—Ritim Matyu 25:31-46.

² Inap planti yia, lain bilong Jehova i gat laik tru long save long mining bilong dispela tok piksa. I stret long ol i laik save long mining bilong en, long wanem, Jisas i stori long strafe bai painim ol manmeri. Em i stori long as na sampela bai kisim laip oltaim na sampela bai i dai na pinis olgeta. Em i bikpela samting long yumi mas kliagut long ol tok Jisas i autim na bihainim ol dispela tok, long wanem, dispela bai helpim yumi long kisim laip. Olsem na i stret long yumi askim olsem: Jehova i givim wanem ol stretpela save long yumi long dispela  tok piksa? Bilong wanem yumi ken tok dispela tok piksa i kamapim klia olsem wok autim tok em i bikpela samting? Husat i gat wok long autim tok? Bilong wanem na nau em taim bilong i stap gut long “King” na ol Kristen em Krais i kolim ol olsem “ol brata”?

3, 4. (a) Sapos yumi laik kliagut long tok piksa bilong ol sipsip na ol meme, orait pastaim yumi mas save long wanem 3-pela bikpela samting? (b) Long 1881, Wastaua bilong bipo i kamapim wanem mining long dispela tok piksa?

³ Sapos yumi laik kliagut long tok piksa bilong ol sipsip na ol meme, yumi mas save long 3-pela bikpela samting: ol lain insait long tok piksa i makim husat tru, kot bai kamap long wanem taim, na risen bilong Jisas long kolim wanpela lain olsem ol sipsip na narapela lain olsem ol meme.

⁴ Long yia 1881, Wastaua bilong bipo (Zion’s Watch Tower) i stori long dispela tok piksa na i tok, Jisas em i dispela “Pikinini bilong man,” o “King.” Long bipo, ol Sumatin Bilong Baibel i skelim King Jems Nupela Testamen na ol i tok dispela hap tok, “ol dispela brata bilong mi” i makim ol Kristen husat bai mekim wok king wantaim Krais na ol narapela manmeri husat bai kisim laip long graun na kamap gutpela olgeta. Ol i ting olsem wok bilong skelim ol sipsip na ol meme bai kamap insait long Wan Tausen Yia Bilong Krais i Stap King. Ol i ting olsem ol man bai i stap olsem sipsip sapos ol i bihainim lo bilong God long pasin laikim.

5. Long 1923, lain bilong yumi i kisim wanem nupela save long tok piksa bilong ol sipsip na ol meme?

⁵ Bihain long yia 1920, Jehova i helpim ol manmeri bilong em long kliagut moa long tok piksa bilong ol sipsip na ol meme. Was Taua bilong Oktoba 15, 1923, i tok Jisas em i “Pikinini Man bilong man.” Tasol Was Taua i kolim sampela skripsa bilong kamapim klia husat tru i stap olsem ol brata bilong Krais. Dispela lain bai mekim wok king wantaim Krais long heven. Na tu, Was Taua i tok ol lain i stap olsem ol sipsip, em ol Kristen husat i bilip na wet long kisim laip long graun aninit long Kingdom Bilong Krais. Wok bilong skelim ol man olsem ol sipsip na ol meme bai kirap long wanem taim? Was Taua i tok, ol brata bilong Krais bai mekim wok king wantaim Krais long heven long Taim Bilong Wan Tausen Yia Bilong Krais i Stap King, olsem na ol manmeri bilong graun i no inap helpim ol o givim baksait long ol. Olsem na wok bilong skelim ol sipsip na ol meme bai kirap paslain long Taim Bilong Wan Tausen Yia Bilong Krais i Stap King. Dispela Was Taua i stori long risen na ol man inap i stap olsem ol sipsip na i tok, ol i mas tingim Jisas olsem Bikpela bilong ol na ol i mas bilip olsem Kingdom bai bringim gutpela sindaun long bihain.

6. Long 1995, yumi bin kisim wanem stretpela save?

⁶ Dispela nupela save i mekim na ol manmeri bilong Jehova i kisim tingting olsem: Jisas i skelim ol manmeri long pinis bilong dispela haptaim bilong nau. Em i tingim pasin ol i mekim taim ol i harim tok bilong Kingdom, na dispela i stiaim em long kolim ol olsem ol sipsip na ol meme. Tasol bihain long 1990, save bilong yumi long dispela tok piksa i kamap klia moa. Tupela atikol long Wastaua bilong Oktoba 15, 1995, i stori long ol samting i wankain namel long tok bilong Jisas long Matyu 24:29-31 (ritim) na Matyu 25:31, 32. (Ritim.) a Namba 1 atikol i tok: “Wok bilong skelim ol manmeri [olsem] ol i sipsip o meme em bilong bihain.” Dispela wok bai kamap long wanem taim? Em “bai kamap taim ‘bikpela hevi’ em Matyu 24:29, 30 i stori long en i kirap pinis na Pikinini Bilong Man ‘i kam wantaim bikpela lait.’ . . . Long las de bilong pasin nogut bilong nau, Jisas bai mekim kot na em bai makim na givim strafe long ol lain bilong dispela graun.”

7. Long nau, yumi gat wanem stretpela save long tok piksa bilong ol sipsip na ol meme?

 ⁷ Long nau, yumi kisim stretpela save long tok piksa bilong ol sipsip na ol meme. Tok piksa i stori long sampela lain, na yumi laik save long ol i husat tru. Jisas i stap olsem “Pikinini bilong man,” em King. Dispela lain em Jisas i kolim olsem “ol brata bilong mi,” em ol man na ol meri em God i bin makim ol long holi spirit, na ol bai mekim wok king wantaim Krais long heven. (Rom 8:16, 17) “Ol sipsip” na “ol meme” i makim olgeta wan wan man bilong olgeta lain man. God i no makim ol dispela lain long holi spirit. Wok bilong skelim ol man olsem ol sipsip na ol meme bai kirap long wanem taim? Dispela wok bai kirap klostu long pinis bilong taim bilong traipela hevi tru. Olsem wanem long risen bilong Jisas long kolim wanpela lain olsem ol sipsip na narapela lain olsem ol meme? Em i tingim pasin ol i mekim long ol brata bilong em, em ol Kristen God i bin makim na ol i stap yet long graun. Yumi stap klostu tru long pinis bilong dispela haptaim bilong nau, olsem na yumi amamas tru long Jehova i helpim yumi long kisim stretpela save long dispela tok piksa na ol narapela tok piksa i stap long Matyu sapta 24 na sapta 25!

8, 9. Bilong wanem Jisas i kolim ol sipsip olsem “ol stretpela man”?

⁸ Long tok piksa bilong ol sipsip na ol meme, Jisas i no kolim stret wok autim tok. Orait, wai na yumi inap tok olsem dispela tok piksa i strongim wok autim tok?

⁹ Namba 1: Jisas i yusim tok piksa long skulim ol man. Em i no toktok long wok bilong tilim ol sipsip tru na ol meme tru. Olsem tasol, taim Jisas i kolim ol manmeri olsem ol sipsip, tok bilong em i no makim olsem ol i givim kaikai tru, givim klos, lukautim, na visitim wanpela bilong ol brata bilong em long kalabus, nogat. Tok bilong em i makim tingting ol i holim long ol brata bilong em. Em i kolim ol sipsip olsem “ol stretpela man,” long wanem, ol i luksave olsem Krais i gat ol brata bilong em i stap long graun, em ol Kristen God i bin makim. Ol manmeri husat i stap olsem ol sipsip, ol i helpim gut ol brata bilong Krais long dispela haptaim nogut bilong las de.—Mat. 10:40-42; 25:40, 46; 2 Tim. 3:1-5.

10. Olsem wanem ol sipsip i ken helpim ol brata bilong Krais?

¹⁰ Namba 2: Skelim ol narapela tok i stap klostu. Em i stori long ol samting bai kamap bilong soim olsem em i kam i stap na haptaim bilong nau i laik pinis. (Mat. 24:3) Taim Jisas i kirapim tok bilong em, em i tok wanpela bikpela wok bai i stap olsem hap bilong ol sain bilong las de—“ol bai autim dispela gutnius bilong Kingdom long olgeta hap bilong graun.” (Mat. 24:14) Paslain long em i stori long tok piksa bilong ol sipsip na ol meme, em i mekim tok piksa bilong mani talen. Long stadi i kamap paslain, Jisas i mekim tok piksa bilong mani talen bilong kamapim klia long ol disaipel em God i bin makim, em “ol brata” bilong em, olsem ol i mas givim bel tru long mekim wok autim tok. Namel long ol Kristen God i bin makim, liklik lain bilong ol i stap yet long graun. Ol i gat bikpela wok tru long mekim insait long haptaim we Jisas i kam i stap. Ol i mas autim tok “long olgeta hap bilong graun,” na ol i mas mekim dispela wok paslain long pinis bilong dispela haptaim nogut. Tok piksa bilong ol sipsip na ol meme i soim olsem i gat wanpela lain bai helpim ol brata bilong Krais. Olsem na nambawan rot bilong ol sipsip long helpim ol brata bilong Krais em olsem, ol i ken helpim ol long sait bilong wok autim tok. Ol i ken mekim wanem ol samting bilong helpim ol? Yu ting dispela i makim olsem ol i mas givim tasol ol samting olsem ol klos na kaikai, na mekim gut bel bilong ol, na em tasol?

11. Wanem askim inap kamap? Bilong wanem?

¹¹ Long nau, namba bilong ol disaipel bilong Jisas em inap olsem 8 milion, na bikpela hap  lain em ol arapela sipsip. Ol i no kisim mani talen em Jisas i givim long ol wokboi em God i bin makim ol long holi spirit. (Mat. 25:14-18) Olsem na dispela askim inap kamap, ‘Ol Kristen em God i no makim long holi spirit, yu ting i stret long ol tu i mekim dispela wok bilong autim tok?’ Yes, i stret long ol i mekim dispela wok. Skelim sampela risen.

12. Yumi kisim wanem skul long tok bilong Jisas long Matyu 28:19, 20?

¹² Jisas i tokim olgeta disaipel bilong em long autim tok. Bihain long Jisas i kirap bek, em i tokim lain bilong em long kamapim ol disaipel na skulim ol long bihainim “olgeta samting” em i bin tokim ol long mekim. Wanpela bilong ol dispela samting em wok autim tok. (Ritim Matyu 28:19, 20.) Olsem na olgeta disaipel bilong Krais i mas autim tok, maski ol i bilip na wet long kisim laip long heven o long graun.—Apo. 10:42.

13. Wanem mining bilong ol samting Jon i lukim long visen?

¹³ Buk Revelesen i makim olsem ol Kristen God i bin makim na ol arapela manmeri, olgeta bai mekim wok autim tok. Jisas i stretim rot long aposel Jon inap lukim wanpela visen, na em i lukim “meri i laik marit,” em 144,000 manmeri em God i bin makim na ol bai mekim wok king wantaim Krais long heven, na ol i singautim ol manmeri long “kisim wara bilong laip, [na] ol i ken kisim fri.” (Rev. 14:1, 3; 22:17) Dispela wara i makim ol blesing em Jehova i redim bilong yumi inap kisim long rot bilong ofa bilong Krais long baim bek ol man, na yumi bai kamap fri long hevi bilong sin na dai. (Mat. 20:28; Jon 3:16; 1 Jon 4:9, 10) Taim yumi autim tok, wanpela bikpela tok yumi skulim ol man long en, em ofa bilong Krais long baim bek ol man, na ol Kristen God i bin makim i go pas long helpim ol man long kisim save long dispela ofa na kisim helpim long en. (1 Kor. 1:23) Tasol Jon i lukim ol narapela lain tu long visen, na ol i no insait long lain husat bai stap olsem meri bilong marit. Ol tu i mas tok, “Yu kam!” Ol i bihainim dispela tok na singautim planti man moa long kam kisim wara bilong  laip. Dispela lain manmeri em ol lain husat i bilip na wet long kisim laip long graun. Dispela visen i kamapim klia olsem olgeta husat i harim dispela singaut long “kam,” ol tu i mas autim tok long ol narapela.

14. Yumi ken mekim wanem bilong soim olsem yumi bihainim “lo bilong Krais”?

¹⁴ Olgeta manmeri husat i stap aninit long “lo bilong Krais,” ol i mas autim tok. (Gal. 6:2) Jehova i givim wankain lo long ol manmeri bilong olgeta lain man. Em i tokim lain Israel olsem: “I gat wankain lo bilong ol Israel na bilong ol man bilong narapela lain i kam i stap wantaim yupela.” (Kis. 12:49; Wkp. 24:22) Ol Kristen i no stap aninit long Lo Bilong Moses. Tasol yumi olgeta, maski yumi bilong lain Kristen God i bin makim o nogat, yumi olgeta i stap aninit long “lo bilong Krais.” Dispela lo i makim olgeta tok em Jisas i bin skulim ol man long en. Bikpela tok em Jisas i skulim ol disaipel long en em olsem, ol i mas soim pasin laikim. (Jon 13:35; Jems 2:8) Nambawan rot bilong soim olsem yumi laikim tru God, laikim tru Krais, na ol narapela manmeri, em long rot bilong autim gutnius bilong Kingdom.—Jon 15:10; Apo. 1:8.

15. Bilong wanem yumi ken tok olsem tok bilong Jisas i stret long olgeta disaipel bilong em?

¹⁵ Tok Jisas i givim long liklik grup i stret tu long bikpela grup. Olsem: Jisas i mekim kontrak bilong Kingdom wantaim 11-pela disaipel, tasol dispela kontrak i stret tu long olgeta Kristen bilong lain 144,000. (Luk 22:29, 30; Rev. 5:10; 7:4-8) Olsem tasol, taim Jisas i tokim ol disaipel long mekim wok autim tok, em i givim dispela tok long sampela disaipel tasol, em ol disaipel em i bin kamap long ol bihain long em i kirap bek. (Apo. 10:40-42; 1 Kor. 15:6) Tasol olgeta disaipel long taim bilong ol aposel i luksave olsem ol tu i mas autim tok maski ol yet i no bin harim Jisas i mekim dispela tok. (Apo. 8:4; 1 Pita 1:8) Long nau tu, Jisas yet i no toktok long wanpela bilong ol 8 milion pablisa husat i autim tok bilong Kingdom. Tasol olgeta i luksave olsem ol i gat wok long bilip long Krais na autim dispela bilip long rot bilong wok autim tok.—Jems 2:18.

16-18. (a) Ol manmeri husat i laik i stap olsem ol sipsip, olsem wanem ol i ken helpim ol brata bilong Krais? (b) Bilong wanem na nau em taim bilong ol long helpim gut ol brata bilong Krais?

¹⁶ Satan i pait yet long ol brata bilong Krais em God i bin makim na ol i stap yet long graun, na “em i gat sotpela taim tasol bilong i stap,” olsem na em bai birua moa yet taim haptaim bilong em i wok long pinis. (Rev. 12:9, 12, 17) Maski ol dispela Kristen i karim planti hevi, ol i wok strong yet long go pas long mekim nambawan bikpela wok bilong autim tok. Dispela i soim klia tru olsem Jisas i stap wantaim ol na stiaim ol.—Mat. 28:20.

¹⁷ Planti manmeri moa i wok long bung wantaim lain arapela sipsip, na ol i amamas tru long helpim ol brata bilong Krais long mekim wok autim tok. Na tu, ol i mekim sampela narapela samting bilong helpim ol. Olsem: Ol i givim kontribiusen bilong helpim wok bilong sanapim ol Haus Kingdom, ol Haus Kibung, na ol brens ofis, na ol i bihainim gut tok bilong ol man em “gutpela wokboi i gat savetingting” i givim namba long ol long mekim wok bos.—Mat. 24:45-47; Hib. 13:17.

¹⁸ Klostu nau ol ensel bai lusim win bilong kamapim bagarap long taim bilong traipela hevi tru. Dispela samting bai kamap bihain long ol brata bilong Krais husat i stap yet long graun i kisim pinis laspela mak bilong ol. (Rev. 7:1-3) Ol Kristen God i bin makim, ol bai go long heven paslain long pait bilong Armagedon. (Mat. 13:41-43) Olsem na sapos ol manmeri i laik bai Jisas i kolim ol olsem ol sipsip, orait nau em taim bilong ol long helpim gut ol brata bilong Krais.