TAIM mi na Gwen i gat 5-pela krismas, mipela i lain long danis. Mipela i no bung yet. Taim mipela i kamap bikpela, mipela i tingting strong long mekim danis balet olsem wok mani bilong mipela. Tasol mipela i lusim dispela wok klostu tru long taim mipela bai kisim biknem. Wai na mipela i lusim dispela wok?

David: Mi bon long 1945, long taun Shropshire, long Inglan. Papa i gat fam long kantri sait. Taim mi pinis long skul, mi save amamas long givim kaikai long ol kakaruk na kisim ol kiau bilong ol, na lukautim ol bulmakau na ol sipsip. Long taim bilong skul holide, mi save helpim long bungim ol kaikai i redi pinis, na sampela taim mi draivim ol trakta bilong mipela.

Tasol narapela laik i kamap strong moa. Taim mi liklik yet, Papa i lukim olsem mi save danis long olgeta taim mi harim musik. Olsem na taim mi gat 5-pela krismas, Papa i tokim Mama long kisim mi i go long skul bilong danis. Tisa i lukim olsem mi inap mekim gut danis balet, olsem na ol i skulim mi long mekim dispela danis. Taim mi gat 15 krismas, mi winim skolasip bilong i go long skul i gat biknem long London, em Royal Ballet School. Mi bungim Gwen long dispela skul, na ol i makim mitupela olsem poroman bilong danis.

Gwen: Mi bon long biktaun London long 1944. Taim mi liklik yet, mi bilip tru long God. Mi ritim Baibel, tasol mi hatwok long kliagut long tok bilong en. Taim mi gat 5-pela krismas, mi go long skul bilong lainim danis. Inap 6-pela yia bihain, mi insait long kompetisen bilong danis em planti man long Briten i insait long en, na mi winim prais—mi inap kamap sumatin long nambawan skul bilong danis, The Royal Ballet School. Dispela skul i stap insait long traipela haus i naispela tru, em White Lodge, na em i stap long Richmond Park long kantri sait bilong London. Ol tisa i skulim mi tu long danis balet. Taim mi gat 16 krismas, mi go skul long narapela brens bilong wankain skul long sentral London, na mi bungim David. Bihain tasol long sampela mun, mitupela i danis wantaim long Royal Opera House long Covent Garden, London.

David: Olsem Gwen i tok, mipela i go danis long Royal Opera House, na mipela i danis tu long London Festival Ballet (English National Ballet). Wanpela tisa bilong danis long Royal Ballet i kirapim wanpela intenesenel kampani long Wuppertal, Jemani, na em i makim mitupela long joinim kampani bilong em. Mipela i raun long planti hap bilong graun na danis long ol bikpela haus bung, na mipela i danis tu wantaim ol lain i gat biknem, olsem Margot Fonteyn, na Rudolf Nureyev. Mipela i pilim olsem mipela i gat biknem, na mipela i givim bel olgeta long dispela wok.

Gwen: Mi putim tingting olgeta long danis. Mitupela David i laik tru long kisim biknem. Mi save amamas long sainim nem long buk bilong ol manmeri, na kisim ol plaua, na harim ol man i paitim han long mi. Planti wanwok i smok, dring alkohol, na mekim pasin  pamuk. Olsem ol wanwok i mekim, mi holim ol liklik bis mi yusim olsem mejik.

David: Mi stap planti yia long wok bilong danis, na bihain mi pilim olsem mi les long pasin bilong raun oltaim. Mi kamap bikpela long fam, olsem na mi gat bikpela laik tru long sindaun isi long kantri sait. Olsem na long 1967, mi lusim wok bilong danis na mi go wok long bikpela fam klostu long hap papamama i stap long en. Fama i orait long mi ken rentim wanpela liklik haus. Mi ringim Gwen na askim em long maritim mi. Em i kisim bikpela namba long danis, na wok bilong em i kamap gutpela moa, olsem na em i painim hat long mekim disisen. Maski i olsem, em i orait long maritim mi na em i kam i stap wantaim mi long kantri sait—em i no save long dispela kain laip.

Gwen: Mi pilim hatwok long stap long fam. Mi no save long wok bilong milkim ol bulmakau, na givim kaikai long ol pik na kakaruk. Inap 9-pela mun olgeta, David i kisim kos long sait bilong fam, na dispela kos i skulim em long ol nupela pasin bilong mekim wok long fam. Em i save kam bek long haus long nait, olsem na mi save pilim olsem mi stap wanpis. Long dispela taim, mi karim pinis namba 1 pikinini meri, em Gilly. Mi bihainim tok bilong David na mi lain long draivim kar. Wanpela taim mi draiv i go long wanpela taun klostu na mi bungim Gael. Mi save long Gael taim em i wok long wanpela stua long dispela taun.

Gael i singautim mi i go long haus bilong em long dring ti. Mi soim em ol poto bilong weding bilong mi na em i soim mi ol poto bilong weding bilong em. Long poto bilong em, mi lukim sampela manmeri i sanap ausait long wanpela haus ol i kolim Haus Kingdom. Mi laik painimaut long dispela lotu. Mi amamas tru taim em i tokim mi olsem em na man bilong em ol i Witnes Bilong Jehova. Dispela i kirapim mi long tingim bek wanpela anti bilong mi, em tu i wanpela Witnes. Na tu, mi tingim olsem papa bilong mi i belhat stret long Anti na tromoi ol buk na nius bilong em long pipia dram. Papa i gat pasin pren na Anti i gat gutpela pasin, olsem na mi laik save long wai na Papa i kros nogut tru long Anti.

Nau rot i op long mi inap save long wai na ol bilip bilong Anti i narapela kain long ol bilip bilong ol narapela lotu. Gael i soim mi long ol tok bilong Baibel. Mi kirap nogut long lukim olsem bilip bilong God Triwan na dispela bilip olsem yumi gat tewel i no save dai, ol i no stret wantaim tok bilong Baibel. (Sav. 9:4, 5, 10; Jon 14:28; 17:3) Na tu, em fes taim bilong mi long lukim nem bilong God, Jehova, long Baibel.—Kis. 6:3, NW.

David: Gwen i tokim mi long ol samting em i lainim.  Taim mi liklik yet, Papa i tokim mi olsem mi mas ritim Gutpela Buk (Baibel). Olsem na mitupela Gwen i kirap stadi long Baibel wantaim Gael na man bilong em, Derrick. Inap 6-pela mun bihain, mipela i go sindaun long Oswestry, em liklik taun long provins Shropshire. Rot i op long mipela inap rentim liklik fam bilong mipela yet. Deirdre em wanpela Witnes long dispela hap, na em i mekim Baibel stadi wantaim mipela. Mipela i bisi stret long lukautim ol animal long fam, olsem na mipela i no kamap strong kwik long sait bilong bilip. Tasol isi isi tok i tru i go daun long bel bilong mipela.

Gwen: Bilip giaman bilong ol tumbuna i stap olsem wanpela bikpela hevi mi mas winim. Aisaia 65:11 i helpim mi long kisim save long tingting Jehova i holim long ol man ‘i save lotuim ol giaman god.’ Bikpela haptaim i lus na mi beten planti bambai mi inap rausim olgeta paspas mi yusim olsem mejik. Mi kisim save olsem “man i litimapim em yet, em bai kisim sem. Tasol man i daunim em yet, em bai kisim biknem.” (Mat. 23:12) Nau mi luksave long wanem kain man na meri Jehova i laikim. Mi laik mekim wok bilong dispela God husat i tingim tru yumi na em i givim gutpela Pikinini bilong em olsem pe bilong baim bek yumi. Long dispela taim, mipela i gat narapela pikinini meri, na mi amamas tru long kisim save olsem mipela inap i stap oltaim long paradais bai kamap long graun.

David: Taim mi kliagut long truim bilong ol tok profet bilong Baibel, olsem ol tok profet bilong Matyu sapta 24 na Buk Daniel, mi bilip olsem dispela em tok i tru. Mi luksave olsem i no gat wanpela samting bilong dispela graun i gutpela olsem pasin bilong pas gut wantaim Jehova. Olsem na isi isi, mi no gat strongpela laik moa long kisim biknem long wok mani. Mi luksave olsem mi mas tingim gut meri na ol pikinini meri long wankain pasin olsem mi save tingim mi yet. Filipai 2:4 i skulim mi olsem mi no ken tingim mi yet tasol, na mi no ken tingting tumas long kisim bikpela fam. Mi mas putim wok bilong Jehova i stap namba 1 samting long laip bilong mi. Mi lusim pasin bilong smok. Ples miting i stap 10 kilomita longwe long hap mipela i stap long en. Tasol mipela i hatwok long stretim rot bilong i go long ol dispela miting, long wanem, mipela i mas milkim ol bulmakau long dispela taim. Gwen i stap olsem gutpela helpim, olsem na mipela i no lusim wanpela miting, na tu, mipela i save kisim ol pikinini meri bilong mipela i go autim tok long olgeta Sande moning bihain long mipela i milkim ol bulmakau.

Ol wanblut i no amamas long mipela i mekim dispela senis long laip bilong mipela. Inap 6-pela yia olgeta, papa bilong Gwen i no toktok wantaim em. Papamama bilong mi tu ol i wok strong long pasim mipela long bung wantaim ol Witnes.

Gwen: Jehova i helpim mipela long karim ol dispela hevi na sanap strong. Bihain, ol bratasista long Oswestry Kongrigesen i kamap olsem nupela famili bilong mipela, na ol i soim pasin laikim na helpim mipela long sanap strong na karim ol hevi. (Luk 18:29, 30) Mipela i dediket long Jehova na kisim baptais long 1972. Mi laik wok strong long helpim planti manmeri  long kisim save long tok i tru, olsem na mi mekim wok painia.

David: Insait long ol yia mipela i bin i stap long fam, mipela i wok strong tru long lukautim ol animal, tasol mipela i traim bes tu long soim gutpela eksampel em ol pikinini meri bilong mipela i ken bihainim long sait bilong lotu. Bihain, gavman i daunim mani bilong helpim ol fama, olsem na mipela i lusim fam. Mipela i no gat haus na wok mani, na namba 3 pikinini meri i gat 1-pela krismas tasol, olsem na mipela i beten askim Jehova long helpim mipela na soim rot long mipela. Mipela i pasim tok long yusim save bilong mipela long kirapim wanpela skul bilong danis, na long dispela rot mipela inap kisim mani bilong lukautim famili. Mipela i tingting strong long putim wok bilong Kingdom i stap namba 1, na dispela i karim gutpela kaikai. Mipela i amamas tru olsem 3-pela pikinini meri wantaim i mekim wok painia taim ol i pinisim skul. Gwen tu i mekim wok painia, olsem na long olgeta de em inap wok wantaim ol na helpim ol.

Mipela i pasim skul bilong danis bihain long marit bilong 2-pela bikpela pikinini meri, em Gilly na Denise. Mipela i raitim pas i go long brens ofis long painimaut wanem hap mipela inap i go na helpim wok autim tok. Ol i tokim mipela long i go long ol taun i stap long hap saut-is bilong Inglan. Wanpela pikinini tasol, Debbie, i stap yet wantaim mipela, olsem na mi mekim wok painia. Inap 5-pela yia bihain, ol i askim mipela long i go helpim ol narapela kongrigesen long hap not. Taim Debbie i marit, inap 10-pela yia mipela inap insait long intenesenel konstraksen long Simbabwe, Moldova, Hangari, na Kot Diwa. Bihain, mipela i go bek long Inglan long helpim wok konstraksen long London Betel. Mi gat ekspiriens long wok long fam, olsem na ol i askim mi long wok long fam long Betel. Long nau, mipela i mekim wok painia long hap not-wes bilong Inglan.

Gwen: Bipo mipela i dediketim laip bilong mipela long danis balet na mipela i kisim amamas long en, tasol dispela amamas i stap sotpela taim tasol na i pinis kwiktaim. Tasol nau mipela i dediketim laip bilong mipela long Jehova, na dispela em nambawan bikpela samting tru—na mipela i kisim bikpela amamas long en, na dispela amamas bai i stap oltaim oltaim. Bipo mipela i stap poroman long danis, tasol nau mipela i poroman wantaim long mekim wok painia. Mipela i kisim bikpela amamas moa yet long helpim planti man long kisim save long ol gutpela tok we inap helpim ol long kisim laip. Ol dispela manmeri i stap olsem “ol pas” i tokaut long wok mipela i mekim, na dispela i winim tru biknem bilong dispela graun. (2 Kor. 3:1, 2) Sapos mipela i no bin kisim tok i tru, long nau mipela bai i gat memori tasol, na ol poto bilong bipo, na ol vidio program bilong ol danis mipela i mekim long bipo.

David: Mipela i mekim wok bilong Jehova, na dispela i senisim tru laip bilong mipela. Dispela i helpim mi long i stap gutpela maritman na gutpela papa. Baibel i tok, Miriam, King Devit, na sampela narapela, ol i bin kamapim amamas bilong ol long rot bilong danis. Mipela tu, na planti arapela Kristen i gat bikpela laik long mekim danis bilong amamas long nupela taim Jehova bai kamapim.—Kis. 15:20; 2 Sml. 6:14.