1. Stori long olsem wanem wanpela gutpela ensel i kisim nem olsem Satan.

 PASTAIM em i gutpela ensel na em i stap gut long Jehova. Em i save olsem ol manmeri i mas lotuim God, tasol pasin mangal i mekim na em i laik bai ol man i lotuim em. Em i no rausim dispela laik nogut, olsem na dispela laik nogut i kirapim em long mekim sin. (Jems 1:14, 15) Dispela ensel “i no holimpas tok i tru,” olsem na em i kisim nem Satan. Em i bikhet long Jehova na em i kamap “papa bilong pasin giaman.”—Jon 8:44.

2, 3. Taim yumi skelim ol dispela biknem, “Satan,” “Devil,” “snek bilong bipo yet,” na “traipela snek,” dispela i soim klia olsem nambawan birua bilong Jehova i gat wanem ol pasin?

² Kirap long taim Satan i mekim pasin bikhet, em i kamap nambawan birua bilong Jehova, na tu, em i kamap birua bilong ol man. Ol biknem bilong Satan i kamapim klia ol pasin nogut bilong em. Mining bilong dispela nem Satan em “Birua.” Dispela i makim olsem em i no laik i stap daun long wok bos bilong God, nogat; em i heitim na birua tru long wok bos bilong God. Satan i no laik tru bai Jehova i stap nambawan bos.

³ Revelesen 12:9 i kolim Satan olsem Devil, mining bilong en “Man Bilong Krungutim Gutnem.” Satan i sutim tok long Jehova na kolim  em olsem man bilong giaman. Dispela hap tok, “snek bilong bipo yet,” i kirapim yumi long tingim hevi i kamap long gaden Iden taim Satan i yusim snek long giamanim Iv. Dispela hap tok, “traipela snek,” i kirapim yumi long tingim wanpela traipela animal we ol man bai pret long en. Dispela i makim stret pasin bilong Satan—em i gat bikpela laik tru long pasim rot bilong Jehova long kamapim samting Em i tingting pinis long mekim, na Satan i laik tru long bagarapim lain manmeri bilong God.

4. Yumi bai skelim wanem samting long dispela stadi?

⁴ Satan i laik tru long bagarapim pasin bilong yumi long i stap gut long God. Olsem na i stret long Baibel i tok: “Yupela i mas holimpas gutpela tingting na was i stap. Satan, dispela birua bilong yupela, em i raun olsem wanpela laion i singaut strong na i painim ol man bilong kaikai.” (1 Pita 5:8) Satan i birua tru long Jehova na ol manmeri bilong Em, olsem na yumi bai skelim 3-pela pasin bilong Satan—em ol pasin we i mekim na yumi mas was i stap.

5, 6. (a) Stori long ol eksampel i soim olsem ol ensel “i gat bikpela strong.” (b) Bilong wanem yumi ken tok olsem, Satan “i gat strong bilong kamapim dai”?

⁵ Ol ensel “i gat bikpela strong.” (Sng. 103:20) Strong bilong ol ensel i winim strong bilong ol man, na ol i gat bikpela save. Ol gutpela ensel i save yusim strong bilong ol long mekim ol gutpela wok. Wanpela ensel bilong Jehova i kilim i dai 185 tausen soldia bilong Asiria—em samting we wanpela man o wanpela lain ami i no inap long mekim. (2 Kin. 19:35) Long narapela taim, wanpela ensel i yusim bikpela strong na save bilong em long helpim ol aposel bilong Jisas long lusim kalabus. Em i opim ol dua long haus kalabus na bringim ol aposel i go ausait, na em i lokim gen ol dua—maski ol gad i sanap i stap klostu, ol i no lukim ol dispela samting!—Apo. 5:18-23.

⁶ Ol gutpela ensel i yusim strong bilong ol long mekim ol gutpela wok, tasol Satan i yusim strong bilong em long mekim ol wok nogut. Satan i gat bikpela strong tru long stiaim ol man! Baibel i kolim em olsem “hetman bilong dispela graun” na “god bilong dispela graun.” (Jon 12:31; 2 Kor. 4:4) Na tu, Satan “i gat strong bilong kamapim dai.” (Hib. 2:14) Dispela i no makim olsem em i save kilim stret olgeta man, nogat. Ol manmeri bilong graun i holim wankain tingting olsem Satan—ol i tingting tasol long kilim ol man i dai. Iv i bilipim tok giaman bilong Satan, na Adam i sakim tok bilong God, olsem na sin na dai i painim olgeta manmeri. (Rom 5:12) Dispela i soim olsem Satan “i gat strong bilong kamapim dai.” Jisas i kolim em olsem “man bilong kilim man i dai.” (Jon 8:44) Satan i stap olsem nambawan bikpela birua bilong yumi!

7. Olsem wanem ol ensel nogut i soim olsem ol i gat strong?

⁷ Satan i sutim tok long rait bilong God long i stap nambawan bos bilong heven na graun, olsem na taim yumi sakim Satan, yumi soim olsem yumi sakim tu ol lain husat i stap long sait bilong em. Sampela ensel nogut tu i stap long lain bilong Satan. (Rev. 12:3, 4) Long olgeta taim, ol ensel nogut i save soim bikpela strong bilong ol taim ol i mekim nogut long ol manmeri na mekim ol i stap bel hevi tru. (Mat. 8:28-32; Mak 5:1-5) Ol ensel nogut na “hetman bilong ol spirit nogut” i gat bikpela strong. (Mat. 9:34) Jehova tasol inap strongim yumi long daunim Satan na winim pait.

8. (a) Satan i gat bikpela laik tru long mekim wanem? (Lukim piksa long kirap bilong stadi.) (b) Wanem ol samting i soim olsem ol manmeri i holim wankain tingting olsem Satan long bagarapim ol narapela?

⁸ Aposel Pita i tok Satan i olsem “wanpela laion i singaut strong.” Wanpela buk i stori olsem, tok Grik ol i tanim olsem “singaut strong” i makim “singaut bilong wel animal taim em i hangre nogut tru.” Dispela hap tok i makim stret  pasin bilong Satan—em i hangre tru long bagarapim ol man! Maski graun olgeta i stap pinis aninit long strong bilong Satan, em i laik tru long pundaunim planti manmeri moa. (1 Jon 5:19) Long tingting bilong em, ol manmeri bilong dispela graun i stap olsem ol abus bilong em. Namba 1 lain em Satan i laik tru long pundaunim em ol liklik lain Kristen God i bin makim na ol i stap yet long graun, na namba 2 lain em ol manmeri bilong lain “arapela sipsip.” (Jon 10:16; Rev. 12:17) Satan i gat bikpela laik tru long bagarapim na pinisim ol manmeri bilong Jehova. Olsem na kirap long taim bilong ol aposel na i kam inap long nau, Satan i kirapim ol man long birua long ol disaipel bilong Jisas.

9, 10. (a) Olsem wanem Satan i laik pasim rot bilong God long kamapim samting em i tingting pinis long mekim long lain Israel? (Stori long sampela eksampel.) (b) Bilong wanem Satan i birua tru long lain Israel bilong bipo? (c) Yu ting Satan i pilim olsem wanem taim wanpela wokman bilong Jehova i mekim bikpela rong long nau?

⁹ Satan i traim long pasim rot bilong God long kamapim samting em i tingting pinis long mekim, na long dispela rot Satan i soim olsem em i birua long yumi long narapela rot tu. Sapos wanpela laion i hangre nogut tru, em i no inap marimari long abus bilong en. Em i no inap pilim sori taim em i laik kilim dispela abus, na bihain tu em i no inap bel hevi long samting em i mekim. Long wankain pasin, Satan i no pilim sori long ol lain em i laik bagarapim. Em i stiaim lain Israel long pundaun long ol laik nogut bilong ol long bihainim pasin gridi na mekim pasin pamuk. Olsem: Simri i mekim pasin pamuk na Gehasi i bihainim pasin gridi. Taim yu ritim stori long ol hevi i painim dispela 2-pela man, yu inap piksaim olsem Satan i amamas long em i pundaunim tupela.—Nam. 25:6-9, 14, 15; 2 Kin. 5:20-27.

¹⁰ I gat sampela samting i mekim na Satan i birua tru long lain Israel bilong bipo. Mesaia bai kamap long lain bilong ol, na em bai bagarapim na pinisim Satan, na kamapim klia olsem i stret long Jehova i stap nambawan bos. (Stt. 3:15) Satan i no laik bai lain Israel i stap gut na i stap amamas, olsem na em i wok strong tru long pulim ol long mekim rong. Satan i no pilim sori long Devit taim Devit i mekim pasin adaltri, na tu, em i no pilim sori long Moses taim Moses i mekim rong na em i no go insait long Graun Bilong Promis. Satan i save amamas tru taim ol wokman  bilong God i mekim bikpela rong, na em i save yusim dispela long sutim tok long Jehova.—Snd. 27:11.

11. Bilong wanem Satan i laik pulim Sara long pundaun long sin?

¹¹ Satan i birua nogut tru long lain famili em Mesaia bai kamap long en. Tingim hevi i kamap bihain liklik long God i tokim Abraham olsem lain famili bilong em bai kamap “bikpela lain tru.” (Stt. 12:1-3) Taim Abraham na Sara i stap long Isip, Fero i salim tok na ol i bringim Sara i go long haus king, long wanem, Fero i laik bai Sara i kamap meri bilong em. Tasol Jehova i mekim sampela samting bilong kisim bek Sara long han bilong Fero. (Ritim Stat 12:14-20.) Wankain hevi i kamap long taun Gerar paslain liklik long Sara i karim Aisak. (Stt. 20:1-7) Yu ting Satan i stiaim ol samting i kamap long dispela taim? Sara i lusim taun Ur, em taun i gat gutpela sindaun, na em i stap long ol haus sel. Olsem na yu ting Satan i holim tingting olsem Sara bai mangalim ol naispela haus king bilong Fero na Abimelek? Yu ting Satan i holim tingting olsem Sara bai givim baksait long man bilong em, na sakim Jehova, na mekim pasin adaltri? Baibel i no stori long dispela samting, tasol yumi save olsem Satan bai amamas tru sapos Sara i mekim rong na em i no stap gut moa long ai bilong God. Dispela bai mekim na Sara i no inap karim dispela pikinini em God i bin tok promis long givim. Satan i no inap bel hevi sapos Sara i mekim rong na bagarapim marit bilong em, gutnem bilong em, na pasin bilong em long pas gut wantaim Jehova. Satan i laik tru long bagarapim yumi!

12, 13. (a) Bihain long mama i karim Jisas, olsem wanem Satan i soim olsem em i laik tru long bagarapim ol narapela? (b) Yu ting Satan i pilim olsem wanem long ol yangpela husat i laikim Jehova na ol i wok strong long mekim wok bilong Em long nau?

¹² Mama i karim Jisas planti handret yia bihain long taim bilong Abraham. Satan i no tingim Jisas olsem naispela liklik bebi, nogat. Satan i save olsem taim dispela liklik pikinini i kamap bikpela, em bai kamap Mesaia em God i bin tok promis long en. Jisas i stap olsem namba 1 hap bilong pikinini bilong Abraham long tok profet, na em bai “bagarapim ol samting Satan i kamapim.” (1 Jon 3:8) Yu ting Satan i holim tingting olsem i no stret long kilim i dai wanpela liklik bebi? Satan i no gat stretpela tingting. Taim Jisas i stap liklik pikinini yet, Satan i kirap kwik long birua long em. Satan i mekim wanem?

¹³ King Herot i belhat nogut tru taim ol glasman bilong ol sta i askim em long “dispela pikinini mama i karim bilong kamap king bilong ol Juda,” na em i tingting strong long kilim dispela pikinini. (Mat. 2:1-3, 13) Em i no laik bai dispela pikinini i abrusim bagarap, olsem na em i tokim ol man long kilim i dai olgeta pikinini man long Betlehem na ol distrik bilong en, em ol pikinini man i gat 2-pela krismas na i go daun. (Ritim Matyu 2:13-18.) Jisas i abrusim bagarap, tasol dispela stori i givim wanem save long yumi long Satan, em birua bilong yumi? Yumi luksave olsem Satan i no tingim laip bilong ol man. Em i no gat pasin bilong sori long ol pikinini. Tru tumas, Satan i stap olsem “wanpela laion i singaut strong.” Yumi mas was i stap, long wanem, Satan i laik tru long bagarapim yumi!

14, 15. Olsem wanem Satan “i pasim tingting” bilong ol man i no bilip?

¹⁴ Satan i yusim pasin giaman long pulim ol man long givim baksait long God Jehova. (1 Jon 4:8) Satan i giamanim ol man bambai ol i no ken luksave olsem ol i “hangre long kisim save long God.” (Mat. 5:3) Em i “pasim tingting bilong ol. Olsem na lait bilong gutnius bilong Krais, husat i stap olsem piksa bilong God, em i no inap lait long ol.”—2 Kor. 4:4.

¹⁵ Satan i yusim ol lotu giaman olsem nambawan rot bilong giamanim ol man. Jehova i “no inap larim wanpela giaman god i senisim [em],”  olsem na Satan i amamas tru long lukim ol manmeri i lotuim ol tumbuna, ol animal, ol diwai, na ol samting bilong ples antap! (Kis. 20:5) Planti manmeri i ting olsem ol i bihainim stretpela pasin long lotuim God, tasol ol i stap kalabus long ol bilip giaman na ol kastam i no gat mining bilong en. Ol i stap tarangu stret, wankain olsem ol manmeri em Jehova i givim tok long ol olsem: “Bilong wanem bai yupela i pinisim nating ol mani bilong yupela long ol samting i no inap helpim yupela, na yupela i stap hangre yet? Putim gut yau long tok bilong mi, na mekim olsem mi tok, na bai yupela i pulap tru long ol kain kain gutpela kaikai mi givim yupela.”—Ais. 55:2.

16, 17. (a) Wai na Jisas i tokim Pita olsem: “Satan, yu go baksait long mi”? (b) Olsem wanem Satan inap giamanim yumi na yumi no holim tingting olsem taim i sot pinis?

¹⁶ Satan inap tu long giamanim ol manmeri husat i givim bel tru long mekim wok bilong Jehova. Tingim samting i kamap taim Jisas i tokim ol disaipel olsem ol birua bai kilim em i dai. Aposel Pita i laik helpim Jisas, olsem na em i kisim Jisas i go long sait na tokim em olsem: “Bikpela, marimari long yu yet, dispela samting i no ken kamap long yu.” Jisas i tok strong long Pita olsem: “Satan, yu go baksait long mi!” (Mat. 16:22, 23) Bilong wanem Jisas i kolim Pita olsem “Satan”? Jisas i save long ol samting bai kamap. Taim i kamap nau long Jisas bai i dai na givim laip bilong em olsem ofa bilong baim bek ol man, na soim klia olsem Satan em i man bilong giaman. Jisas bai mekim bikpela wok tru, olsem na nau em i no taim bilong em long “marimari” long em yet. Ating Satan i laik tru bai Jisas i no ken was i stap long dispela taim.

¹⁷ Yumi stap klostu tru long pinis bilong dispela haptaim bilong nau, olsem na planti hevi tru bai painim yumi. Satan i laik bai yumi “marimari” long yumi yet, na mekim ol wok bilong kisim biknem long dispela graun na bai yumi no tingim olsem taim i sot pinis. No ken larim dispela samting i kamap long yu! Oltaim yu “mas was i stap.” (Mat. 24:42) No ken bilipim tok giaman bilong Satan olsem pinis i stap longwe yet na i no inap kamap.

18, 19. (a) Satan i laik giamanim yumi, olsem na em inap kirapim yumi long holim wanem tingting? (b) Olsem wanem Jehova i helpim yumi long holim stretpela tingting na was i stap?

¹⁸ Satan i yusim narapela rot tu long giamanim yumi. Em i laik bai yumi holim tingting olsem God i no laikim yumi, na em i no inap fogivim yumi. Dispela tu em rot bilong Satan long giamanim yumi. Tingim: Husat tru i stap olsem man em Jehova i heitim? Dispela man em Satan. Husat tru i stap olsem man em Jehova i no inap fogivim? Dispela man tu em Satan. Tasol Baibel i tok: “God i no man bilong mekim pasin i no stret na bai em i lusim tingting long ol wok yupela i bin mekim na pasin bilong yupela long laikim tru nem bilong em.” (Hib. 6:10) Jehova i amamas long ol wok yumi mekim we i stret wantaim laik bilong em, na ol wok bilong yumi i no inap lus nating. (Ritim 1 Korin 15:58.) Olsem na yumi no ken larim Satan i pundaunim yumi long ol tok giaman bilong em.

¹⁹ Olsem yumi skelim pinis, Satan i gat bikpela strong, na em i laik tru long bagarapim yumi, na giamanim yumi. Olsem wanem yumi inap sanap strong na daunim dispela birua bilong yumi na winim pait? Jehova i redi long sambai long yumi. Baibel i skulim yumi long ol rot em Satan i yusim bilong giamanim na bagarapim yumi, olsem na “yumi save long ol trik bilong em.” (2 Kor. 2:11) Taim yumi save gut long ol trik bilong Satan, dispela bai helpim yumi long holim stretpela tingting na was i stap. Yumi save nau long ol trik bilong Satan, tasol yumi mas mekim sampela samting moa. Baibel i tok: “Yupela i mas sakim Satan, na em bai lusim yupela na ranawe.” (Jems 4:7) Neks stadi bai stori long 3-pela samting we Satan inap yusim bilong pundaunim yumi.