1-3. Wai na wanpela sista i bilip tru olsem Jehova i save long ol samting yumi nidim?

LANA em wanpela sista bilong yumi long Jemani, na em i bin kisim gutpela ekspiriens long yia 2012. Em i beten 2-pela taim na kolim stret 2-pela samting, na em i pilim olsem God i harim beten bilong em. Em i mekim namba 1 beten taim em i stap insait long tren na i go long ples balus. Em i askim Jehova long opim rot na bai em inap autim tok. Taim em i kamap long ples balus, em i painimaut olsem ol i senisim taim bilong em long kisim balus—em bai kisim balus long neks de. Olsem na em i mekim namba 2 beten bikos em i pinisim mani we em inap yusim long Yurop, na em i no gat ples slip.

² Lana i no pinisim yet namba 2 beten na em i harim wanpela man i tok, “Lana, yu mekim wanem long hia?” Dispela man em wanskul bilong Lana long bipo. Em i kam wantaim bubu meri na mama. Nem bilong mama em Elke. Mama na bubu meri i kam bilong lusim em na em bai i go long Saut Afrika. Taim Elke i save long hevi bilong Lana, em i tokim Lana long i go i stap wantaim ol. Elke na mama bilong em i mekim gut long Lana, na ol i givim planti askim long bilip bilong em na wok bilong em long autim tok fultaim.

 ³ Long neks moning, Elke na mama bilong em i redim kaikai na givim long Lana, na ol i givim planti moa askim long sait bilong Baibel na Lana i bekim ol askim bilong ol. Lana i kisim atres bilong ol na bai em inap ringim ol o salim pas long ol. Em i go bek long ples bilong em na mekim yet wok painia. Em i pilim olsem Man bilong “harim beten” i stiaim ol samting i kamap long em.—Sng. 65:2.

4. Yumi mas askim God long helpim yumi long wanem ol samting?

⁴ Taim hevi i painim yumi, yumi save beten askim Jehova long helpim yumi, na Jehova i amamas long harim beten bilong ol man i stap gut long em. (Sng. 34:15; Snd. 15:8) Tasol sapos yumi skelim ol tok em Jisas i kolim long beten, yumi inap luksave olsem i gat ol narapela samting tu em yumi ken beten long en. Taim yumi skelim 3-pela laspela samting long beten bilong Jisas, yumi luksave olsem yumi mas askim God long helpim yumi long sait bilong bilip. Namba 4 samting Jisas i kolim, em beten bilong askim God long givim bret inap long olgeta wan wan de. Yu ting i gat sampela samting moa yumi ken mekim bilong bihainim pasin i stret wantaim dispela beten?—Ritim Matyu 6:11-13.

5, 6. Maski yumi gat kaikai inap long yumi, wai na yumi mas beten askim God long givim bret long yumi inap long wan wan de?

⁵ Taim yu beten askim God long givim bret inap long wan wan de, no ken tok, givim bret long “mi,” nogat, yu mas tok, givim bret long “mipela.” Victor em wasman sekit long Afrika, na em i tok: “Mi save tok tenkyu long Jehova olsem mi na meri bilong mi i no tingting planti long husat bai givim mipela kaikai bilong neks de o husat inap baim rent bilong haus. Ol bratasista i lukautim mipela long olgeta de, na mi save beten askim God long helpim ol na bai ol i no gat hevi long sait bilong mani.”

⁶ Sapos yumi gat kaikai bilong lukautim yumi inap longpela taim, yumi ken tingim ol bratasista i stap rabis o disasta i kamap long hap bilong ol. Yumi ken beten askim God long helpim ol, na tu, yumi mas mekim ol samting i stret wantaim beten bilong yumi. Yumi ken serim sampela samting wantaim ol. Na tu, oltaim yumi ken putim kontribusen bilong helpim wok long olgeta hap. Yumi save olsem ol brata i yusim dispela kontribusen long mekim gutpela wok.—1 Jon 3:17.

7. Jisas i mekim wanem tok piksa bilong soim olsem yumi “no ken tingting planti long ol samting bilong de antap”?

⁷ Taim Jisas i kolim bret bilong wan wan de, em i tingim ol samting yumi mas kisim long olgeta wan wan de. Em i tok, God i save bilasim ol plaua bilong bus, na bihain em i tok: “Olsem tasol, God bai amamas moa long givim ol klos samting long yupela, yupela ol man i gat liklik bilip. Olsem na no ken tingting planti na tok, . . . ‘Bai yumi werim wanem samting?’” Bihain, em i kolim gen dispela skultok: “No ken tingting planti long ol samting bilong de antap.” (Mat. 6:30-34) Dispela i soim olsem yumi no ken bungim planti mani kago, nogat, yumi mas amamas long klos na kaikai yumi gat pinis. Long olgeta wan wan de, yumi nidim haus, wok mani bilong helpim yumi long lukautim famili, na tu, yumi nidim savetingting bilong helpim yumi long karim hevi bilong sik. Sapos yumi beten askim God long lukautim yumi long ol dispela samting tasol, dispela i makim olsem yumi no bihainim stretpela tingting. Em i bikpela samting moa long yumi mas beten askim God long helpim yumi long sait bilong bilip.

8. Taim Jisas i kolim bret bilong wan wan de, dispela i mas kirapim yumi long tingim wanem bikpela samting? (Lukim piksa long kirap bilong stadi.)

⁸ Taim Jisas i kolim bret bilong wan wan de, dispela i mas kirapim yumi long tingim olsem yumi mas kisim kaikai bilong strongim bilip long olgeta de. Bosman bilong yumi i tok: “Man  i no inap stap laip long bret tasol, nogat. Em i mas bihainim tu olgeta tok i kamap long maus bilong Jehova.” (Mat. 4:4) Olsem na yumi mas wok yet long beten askim Jehova long givim yet kaikai bilong strongim bilip bilong yumi long taim stret.

9. Hau na ol sin bilong yumi i kain olsem “dinau”?

⁹ Wai na Jisas i yusim dispela tok “dinau,” na long narapela taim em i yusim dispela tok “sin”? (Mat. 6:12, futnot; Luk 11:4) Winim 60 yia i go pinis, wanpela magasin i tok: “Taim yumi brukim lo bilong God, i olsem yumi gat dinau long em. . . . God inap pinisim laip bilong yumi. . . . Em inap tekewe bel isi bilong em long yumi, na yumi no inap pas gut moa wantaim em. . . . I stret yumi bihainim tok bilong em na soim olsem yumi laikim em; God i no laikim pasin bilong mekim sin, olsem na taim yumi mekim sin, yumi no bekim dinau bilong yumi long laikim em.”—1 Jon 5:3.

10. (a) Wanem samting i opim rot long Jehova inap fogivim yumi? (b) Yumi mas pilim olsem wanem long ofa bilong baim bek yumi?

¹⁰ Long olgeta de, yumi mas beten askim God long fogivim yumi. Dispela i soim olsem i gat wanpela rot tasol long God inap fogivim yumi—em ofa bilong Jisas. Maski Jisas i givim dispela ofa inap olsem 2 tausen yia i go pinis, yumi mas pilim tru dispela presen na tingim olsem em i givim dispela presen long nau. “Pe bilong baim bek [yumi], em i antap tumas,” olsem na ol sinman i no inap givim wanpela samting olsem pe bilong baim bek yumi. (Ritim Song 49:7-9; 1 Pita 1:18, 19.) Jehova i givim nambawan gutpela presen long yumi, olsem na oltaim yumi mas tok tenkyu long em. Jisas i no kolim dispela hap tok, “ol sin bilong mi,” nogat, em i kolim dispela hap tok, “ol sin bilong mipela.” Dispela hap tok i mas kirapim yumi long tingim olsem yumi olgeta i nidim tru ofa bilong baim bek yumi. Jehova i laik yumi mas beten askim em long fogivim rong bilong yumi na rong bilong ol narapela husat i rongim yumi. Taim ol narapela i mekim liklik rong long yumi, dispela i opim rot long yumi inap soim olsem yumi laikim tru ol bratasista na yumi redi long fogivim ol, wankain olsem God i marimari na fogivim yumi.—Kol. 3:13.

11. Wai na yumi mas i gat pasin bilong fogivim ol narapela?

¹¹ Yumi sinman, olsem na yumi save holim bel kros long narapela. (Wkp. 19:18) Sapos yumi tokim ol narapela long dispela hevi, ol inap  sapotim yumi na dispela inap kamapim pasin bilong brukim lain insait long kongrigesen. Sapos yumi larim dispela hevi i stap, dispela bai soim olsem yumi no pilim pasin marimari bilong God na ofa bilong Krais long baim bek man. Sapos yumi no laik fogivim ol narapela, God i no inap yusim ofa bilong Jisas long fogivim yumi. (Mat. 18:35) Jisas i stori long dispela bihain stret long em i skulim ol disaipel long pasin bilong mekim beten. (Ritim Matyu 6:14, 15.) Sapos yumi laik bai God i fogivim yumi, yumi mas abrusim pasin bilong mekim bikpela rong. Orait nau, yumi ken skelim narapela tok em Jisas i kolim long beten.—1 Jon 3:4, 6.

12, 13. (a) Wanem samting i kamap long Jisas bihain long em i baptais? (b) Wai na yumi mas redi long karim hevi sapos yumi pundaun long traim? (c) Taim Jisas i stap gut long God i go inap long em i dai, em i soim klia wanem samting?

¹² Taim yumi skelim samting i kamap long Jisas bihain long em i baptais, dispela inap helpim yumi long kliagut long as na yumi mas beten na tok: “No ken larim mipela i pundaun long traim.” Holi spirit i stiaim Jisas na em i go long ples drai nating, “na Satan i traim em.” (Mat. 4:1; 6:13) Yumi no inap kirap nogut long samting i kamap long Jisas sapos yumi kliagut long risen bilong God long salim Jisas i kam long graun. Jisas i kam bilong stretim hevi i kamap taim Adam na Iv i bikhet long wok bos bilong God. Pasin bikhet bilong ol i kamapim sampela bikpela tok, olsem na sampela haptaim i mas lus bilong bekim ol dispela askim: Taim God i wokim man, em i mekim sampela popaia, o nogat? Man i gutpela olgeta inap stap daun long wok bos bilong God maski “Satan” i putim presa long em, o nogat? Sapos ol man i sakim wok bos bilong God na bosim ol yet, ol bai i gat gutpela sindaun, o nogat? (Stt. 3:4, 5) Sampela haptaim i mas lus paslain long God i bekim ol dispela askim, tasol dispela bai helpim ol ensel na ol man long luksave olsem Jehova i save mekim wok bos long pasin we inap helpim tru olgeta lain.

¹³ Jehova em holi, olsem na em i no save pulim man long mekim sin. Satan tasol em “Man Bilong Traim Man.” (Mat. 4:3) Satan i save stiaim ol samting na bai em inap traim yumi. Tasol olgeta wan wan man i mas wokim disisen olsem ol bai larim ol yet i insait long ol samting we traim inap kamap na pundaunim ol, o nogat. (Ritim Jems 1:13-15.) Taim traim i kamap, kwiktaim Jisas i yusim Tok Bilong God long sakim Satan. Jisas i sapotim wok bos bilong God. Tasol Satan i no givap. Em i “wetim narapela taim.” (Luk 4:13) Satan i laik pulim Jisas na bai em i no ken i stap gut long God, tasol Jisas i sakim Satan. Krais i sapotim wok king bilong Jehova na soim klia olsem man i gutpela olgeta inap stap gut long God maski bikpela traim tru i painim em. Satan i laik pundaunim ol disaipel bilong Jisas, na em i laik pundaunim yu tu.

14. Yumi mas mekim wanem na bai yumi no ken pundaun long traim?

¹⁴ Satan i sutim tok long rait bilong God long mekim wok bos, tasol Jehova i larim em long yusim ol samting bilong dispela graun long traim yumi. God i no save traim yumi, nogat. Em i trastim yumi na em i laik helpim yumi. Jehova i larim yumi yet long mekim disisen olsem yumi bai sakim traim, o nogat. Yumi mas mekim 2-pela samting. Namba 1: Yumi mas was i stap long sait bilong bilip. Namba 2: Yumi mas beten oltaim. Jehova i save bekim beten bilong yumi long wanem ol rot?

15, 16. (a) Yumi mas sakim wanem ol traim? (b) Sapos man i pundaun long traim, em asua bilong husat?

¹⁵ Jehova i givim holi spirit na dispela inap helpim na strongim yumi long sakim ol traim. God i yusim Baibel na kongrigesen long givim tok lukaut long ol samting yumi mas abrusim. Olsem, yumi no ken westim bikpela haptaim, mani, na strong bilong yumi long bungim ol  samting yumi no nidim. Espen na Janne em tupela marit long wanpela kantri long Yurop we i gat planti mani. Inap planti yia, tupela i mekim wok painia long wanpela hap bilong kantri we i sot long ol pablisa. Taim fesbon pikinini i kamap, tupela i lusim wok painia na nau ol i gat namba 2 pikinini. Espen i tok: “Mipela i no gat rot moa long lusim bikpela haptaim long mekim wok bilong Kingdom, olsem na mipela i save beten askim Jehova long helpim mipela bambai mipela i no ken pundaun long traim. Mipela i askim Jehova long helpim mipela long i stap strong yet long bilip na givim bel yet long mekim wok autim tok.”

¹⁶ Narapela samting i traim planti man long nau em pasin bilong lukim ol piksa nogut bilong pasin sem. Sapos yumi pundaun long kain traim olsem, yumi no ken sutim tok long Satan. Satan na lain bilong em i no inap fosim yumi long mekim rong. Sampela man i pundaun long dispela traim bikos ol yet i tingim tingim ol samting nogut. Tasol yumi inap sakim dispela traim, wankain olsem planti tausen bratasista i bin mekim.—1 Kor. 10:12, 13.

17. (a) Hau bai yumi inap bihainim pasin i stret wantaim beten bilong yumi long God i ken kisim bek yumi long han bilong Satan? (b) Klostu nau wanem gutpela samting bai kamap?

¹⁷ Yumi save beten na askim God long “kisim bek [yumi] long han bilong Satan.” Sapos yumi laik bihainim pasin i stret wantaim dispela beten, orait yumi no ken tru “insait long ol samting bilong dispela graun [bilong Satan],” na “no ken laikim pasin bilong dispela graun [bilong Satan] na ol samting bilong dispela graun.” (Jon 15:19; 1 Jon 2:15-17) I hatwok long mekim olsem, tasol yumi bai amamas tru taim Jehova i harim beten bilong yumi na pinisim Satan na lain bilong em! Yumi mas tingim olsem taim Satan i kam daun long graun, em i save olsem em i gat sotpela taim tasol bilong i stap. Em i belhat nogut tru na em i mekim olgeta samting em inap mekim bilong bagarapim pasin bilong yumi long i stap gut long God. Olsem na oltaim yumi mas beten askim God long kisim bek yumi long han bilong Satan.—Rev. 12:12, 17.

18. Sapos yumi laik abrusim bagarap taim God i bagarapim ol manmeri nogut, orait oltaim yumi mas mekim wanem?

¹⁸ Yu laik tru long lukim ol dispela gutpela samting i kamap? Orait yu mas beten yet long Kingdom Bilong God i ken mekim holi nem bilong God na kamapim laik bilong em long graun. Yu mas beten askim Jehova long givim yu ol samting bilong lukautim yu long sait bilong bilip na ol samting olsem klos na kaikai. Yu mas tingting strong long bihainim ol pasin i stret wantaim ol tok i stap long Beten Bilong Bikpela.