BAIBEL i tok, sampela hap long Graun Bilong Promis i gat bikpela bus long en na i gat ‘planti diwai moa.’ (Jos. 17:15, 18; 1 Kin. 10:27) Tasol taim ol man i lukim planti hap bilong kantri Israel long nau we i no gat diwai long en, ating ol bai i no bilip olsem long bipo i gat planti bikbus long dispela hap.

Wanpela buk (Life in Biblical Israel) i tok: “Long bipo, Israel i gat traipela bikbus, winim bilong nau.” Long ol ples maunten bilong bipo i gat ol diwai pain na diwai ok, olsem Pinus halepensis, Quercus calliprinos, na Pistacia palaestina. Na tu, long ples daun bilong Sefela namel long kil bilong ol maunten na solwara Mediterenian, i gat planti diwai fik long dispela hap, em diwai Ficus sycomorus.

Narapela buk (Plants of the Bible) i tok, long nau sampela hap bilong Israel i no gat wanpela diwai i stap. Bilong wanem? Isi isi ol man i wok long katim ol diwai na rausim bikbus, na buk i tok moa olsem: “Ol man i wok long rausim ol diwai bilong bus bambai ol i gat bikpela hap graun bilong wokim fam na planim kaikai na lukautim ol sipsip. Na tu, ol i katim ol diwai bilong wokim ol haus na yusim olsem paiawut.”