1, 2. (a) Yu laik tru long lukim wanem ol blesing long Paradais long graun? (Lukim piksa long kirap bilong stadi.) (b) Long nupela taim, yumi bai kisim wanem ol blesing long sait bilong bilip?

“LAIP TRU.” Taim yumi harim dispela tok, ating planti bai tingim laip oltaim yumi bai kisim long Paradais long graun. Aposel Pol i tok, “laip oltaim” em “laip tru.” (Ritim 1 Timoti 6:12, 19.) Yumi bilip na wet long kisim laip we i no gat pinis bilong en, na yumi bai stap amamas oltaim. Long olgeta moning, yumi bai kirap na amamas long pilim olsem bodi bilong yumi i gat strong na tingting na bel bilong yumi i stap isi. (Ais. 35:5, 6) Yumi bai amamas tru long bung wantaim ol wanblut na ol pren bilong yumi, na ol narapela husat i kirap bek! (Jon 5:28, 29; Apo. 24:15) Na tu, save bilong yumi bai kamap bikpela moa long sait bilong saiens, musik, wokim haus, o sampela narapela samting.

² Yumi wet long kisim ol dispela blesing, tasol yumi bai kisim ol nambawan gutpela blesing long sait bilong bilip. Yumi bai amamas tru long save olsem nem bilong Jehova i kamap holi na em i stretim pinis gutnem bilong em, olsem em i gat rait long i stap nambawan bos! (Mat. 6:9, 10) Yumi bai amamas tru long lukim Jehova i kamapim samting em i tingting pinis long mekim long graun na long ol manmeri. Long dispela taim, isi isi yumi bai wok long  kamap gutpela olgeta, na taim yumi winim pinis dispela mak, yumi bai pas gut tru wantaim Jehova!—Sng. 73:28; Jems 4:8.

3. Bilong wanem yumi mas redim yumi yet long nau?

³ Yumi inap kisim ol dispela blesing, long wanem, Jisas i tok “God inap mekim olgeta samting.” (Mat. 19:25, 26) Tasol sapos yumi laik i stap long nupela taim na stap laip yet bihain long Wan Tausen Yia, orait yumi mas mekim sampela samting long nau bambai yumi inap “holim strong dispela laip em i laip tru.” Yumi mas bilip na wet long lukim pinis bilong haptaim nogut bilong nau, na yumi mas mekim sampela samting bilong redim yumi yet long i stap long nupela taim. Tasol yumi stap yet long haptaim nogut bilong nau, olsem na hau bai yumi inap mekim ol dispela samting?

4. Long nau, yumi ken mekim wanem ol samting bilong redim yumi yet long i stap long nupela taim?

⁴ Olsem wanem yumi inap redim yumi yet long kisim laip long nupela taim God bai kamapim? Tingim olsem yumi laik i go i stap long narapela kantri. Yumi bai mekim wanem ol samting bilong redim yumi yet? Ating yumi bai lainim tokples bilong dispela kantri. Yumi bai kisim save tu long sampela kastam bilong ples. Ating yumi bai traim sampela kaikai bilong dispela kantri. Taim yumi stap yet long kantri bilong yumi, yumi bai kirap long bihainim sampela pasin bilong ol manmeri bilong kantri em yumi bai i go i stap long en. Olsem tasol, long nau yumi ken bihainim ol pasin em yumi bai bihainim long nupela taim. Yumi ken skelim sampela eksampel.

5, 6. Taim yumi bihainim tok i kam long oganaisesen bilong God, olsem wanem yumi redim yumi yet long laip bilong nupela taim?

⁵ Long nupela taim, yumi bai amamas tru, long wanem, yumi bai i stap aninit long wok bos bilong God. Tasol long nau, ol man i bosim wokabaut bilong ol yet, long wanem, Satan i bosim dispela graun! Sampela man i laik bosim wokabaut bilong ol yet na ol i strong tumas long bihainim laik bilong ol yet, tasol wanem samting i kamap? Ol i no bihainim tok bilong God, olsem na ol i karim pen na hevi, na taim nogut i painim ol. (Jer. 10:23) Yumi laik tru long lukim dispela taim bai kamap na olgeta manmeri bai stap aninit long gutpela wok bos bilong Jehova!

⁶ Yumi bai amamas tru long i stap aninit long wok bos bilong Jehova long nupela taim, na mekim dispela graun i kamap naispela ples, na skulim ol manmeri husat i kirap bek, na mekim samting Jehova i laik bai yumi mekim bilong helpim ol manmeri. Tasol olsem wanem sapos ol i askim yumi long mekim wanpela wok we yumi no laik mekim? Yumi bai redi long bihainim tok na givim bel olgeta long mekim dispela wok na kisim amamas long en, o nogat? Planti bilong yumi bai bekim olsem yumi bai bihainim tok! Olsem wanem? Long nau yumi save bihainim tok i kam long oganaisesen bilong God? Sapos yumi mekim olsem, yumi redim yumi yet long kisim laip oltaim aninit long wok bos bilong Jehova.

7, 8. (a) Bilong wanem yumi mas kisim pasin bilong wok bung wantaim? (b) Wanem ol senis i kamap long sampela bratasista? (c) Taim yumi kisim laip long nupela taim, wanem ol samting bai kamap long graun?

⁷ Sapos yumi laik redim yumi yet long i stap long nupela taim, orait yumi mas i stap daun long ol lo em Jehova i putim long nau, na tu, yumi mas kisim pasin bilong i stap belgut na wok bung wantaim ol narapela. Sapos yumi wok bung wantaim ol lain i go pas long yumi, na amamas long ol nupela asainmen yumi kisim, yumi bai bihainim wankain pasin long nupela taim. (Ritim Hibru 13:17.) Long Graun Bilong Promis, lain Israel i bin pilai satu taim ol i laik skelim na tilim graun. (Nam. 26:52-56; Jos. 14:1, 2) Long nau, yumi no save long wanem  hap stret yumi bai stap long en long nupela taim. Tasol maski yumi stap long wanem hap bilong graun, yumi bai kisim bikpela amamas taim yumi mekim laik bilong Jehova na wok bung wantaim ol narapela.

⁸ Yumi bai kisim gutpela blesing tru long i stap aninit long wok bos bilong Kingdom, olsem na yumi mas wok gut wantaim oganaisesen bilong Jehova na mekim gut ol asainmen bilong yumi. Em tru olsem sindaun bilong yumi i save senis long olgeta taim. Sampela bratasista bilong Betel long Amerika i bin kisim asainmen bilong i go autim tok, na nau ol i amamas long planti blesing ol i kisim long mekim wok painia. Sampela i mekim wok olsem wasman raun, tasol hevi bilong kamap lapun na ol narapela samting i mekim na asainmen bilong ol i senis na nau ol i mekim wok olsem ol painia salim. Sapos yumi kisim pasin bilong belgut, beten askim God long helpim yumi, na yumi mekim olgeta samting yumi inap mekim long wok bilong em, yumi bai kisim amamas na yumi bai kisim planti blesing maski yumi stap long dispela taim nogut bilong las de. (Ritim Sindaun 10:22.) Wanem ol samting bai kamap bihain? Ating yumi tingim pinis wanpela hap em yumi laik i stap long en long nupela taim, tasol ating ol bai tokim yumi long i go i stap long narapela hap. Maski yumi bai stap long wanem hap na mekim wanem kain wok, yumi ken bilip olsem yumi bai stap amamas.—Neh. 8:10.

9, 10. (a) Long nupela taim, wanem ol samting bai kamap na i stret long yumi mas i gat pasin bilong wet na i no les kwik? (b) Olsem wanem yumi inap soim olsem yumi gat pasin bilong i no les kwik?

⁹ Long nupela taim, yumi mas i gat pasin bilong i no les kwik. Ating sampela manmeri i kirap bek long indai na ol wanfamili na ol pren bilong ol i amamas long bungim ol. Tasol yumi yet i no ken les kwik long wet inap long taim ol wanfamili na ol pren bilong yumi i kirap bek. Long dispela taim, yumi bai amamas wantaim ol narapela na i no les kwik long wet, o olsem wanem? (Rom 12:15) Long nau, sapos yumi no les kwik long wet na lukim truim i kamap long ol tok promis bilong Jehova, orait long bihain yumi bai mekim wankain pasin.—Sav. 7:8.

¹⁰ Sapos yumi no kliagut long sampela tok bilong Baibel, orait yumi ken soim pasin bilong i no les kwik. Olsem wanem? Yumi save stadi na skelim gut ol tok bilong Baibel na wet long tok i tru i kamap klia isi isi? Long nau, sapos yumi no les kwik long wet, orait long nupela taim yumi bai amamas long wet long Jehova i kamapim klia ol samting em i laik yumi mas mekim.—Snd. 4:18, 19; Jon 16:12.

11. (a) Long nau, Jehova i givim wanem skul long yumi long pasin bilong pas gut wantaim ol narapela? (b) Olsem wanem dispela pasin bai helpim yumi long nupela taim?

¹¹ Narapela pasin we bai helpim yumi long kisim laip long nupela taim em pasin bilong fogivim narapela. Taim Krais i mekim wok king inap Wan Tausen Yia, ating sampela haptaim bai lus pastaim na bai ol stretpela man na ol man nogut i lusim ol pasin kranki bilong ol. (Apo. 24:15) Long nupela taim, yumi bai soim pasin laikim long narapela narapela, o nogat? Sapos yumi amamas long fogivim ol narapela na pas gut wantaim ol, orait long nupela taim em bai isi long yumi kamapim dispela pasin.—Ritim Kolosi 3:12-14.

12. Long nau, bilong wanem yumi mas bihainim ol pasin em God i skulim yumi long bihainim?

¹² Long nupela taim, ating sampela taim yumi no inap kisim ol samting yumi laikim. Tasol yumi kisim ol blesing taim yumi stap daun long gutpela wok bos bilong Jehova, olsem na yumi mas i gat pasin bilong tok tenkyu na stap belgut. Dispela i makim olsem yumi mas bihainim ol pasin em Jehova i skulim yumi long bihainim long nau. Long nau, sapos yumi bihainim ol pasin em yumi bai bihainim long nupela taim, yumi kamapim ol pasin em yumi bai bihainim i go inap oltaim oltaim. Yumi strongim bilip bilong yumi long  “dispela graun bai kamap bihain.” (Hib. 2:5; 11:1) Na tu, yumi soim klia olsem yumi laik tru long lukim stretpela pasin we bai i stap long nupela taim. Yumi redim yumi yet long kisim laip oltaim long nupela taim em God bai kamapim.

13. Long nupela taim, yumi bai givim bel moa yet long mekim wanem wok?

¹³ Skelim narapela samting em yumi ken mekim bilong redim yumi yet long kisim laip tru long bihain. Maski God i tok promis long givim yumi planti kaikai na ol narapela samting long nupela taim, yumi bai amamas moa yet long ol blesing yumi kisim long sait bilong bilip. (Mat. 5:3) Yumi bai givim bel moa yet long mekim ol wok bilong Jehova, na yumi bai soim olsem yumi amamas tru long pas gut wantaim em. (Sng. 37:4) Taim yumi putim wok bilong God i stap namba 1, dispela i makim olsem yumi redim yumi yet long kisim laip tru long bihain.—Ritim Matyu 6:19-21.

14. Ol yangpela i ken putim wanem ol mak na dispela bai helpim ol long putim tingting olgeta i go long laip oltaim?

¹⁴ Olsem wanem yumi inap kisim bikpela amamas long mekim wok bilong God? Wanpela rot em long putim ol mak yumi laik winim long mekim wok bilong God. Sapos yu yangpela na yu putim tingting i go long mekim wok bilong Jehova, orait yu ken skelim sampela atikol i stori long kain kain wok yu inap mekim na putim wanpela bilong ol dispela wok i stap olsem mak yu laik winim. * Yu ken toktok wantaim sampela em ol i bin stap insait long fultaim sevis inap planti yia. Taim yu mekim wok painia, yu redim yu yet long mekim wok bilong God long nupela taim, na long dispela taim yu bai yusim gut olgeta skul na trening yu kisim nau long mekim wok bilong God.

15. Ol pablisa i ken putim mak long mekim wanem ol samting?

¹⁵ Yumi save autim tok bilong Kingdom, olsem na yumi mas tingting long winim wanem ol mak long sait bilong bilip? Yumi ken putim mak long kamap gutpela moa long sampela samting long wok autim tok. O yumi ken wok strong long kliagut moa long ol stiatok bilong Baibel na olsem wanem yumi ken bihainim long i stap bilong yumi. Yumi ken wok strong long kamap gutpela moa long pasin bilong yumi long rit na toktok long pablik, o bekim tok long miting. Ating yu inap tingim ol narapela samting yu ken mekim. Bikpela samting em olsem: Taim yu putim ol mak yu laik winim, dispela bai strongim laik bilong yu long mekim wok bilong God, na dispela bai helpim yu long redim yu yet long i stap long nupela taim.

16. Bilong wanem wok bilong Jehova em nambawan gutpela wok bilong mekim?

¹⁶ Taim yumi lusim bikpela haptaim long redim yumi yet long kisim laip long nupela taim, yu ting dispela i makim olsem yumi pasim rot bilong yumi yet long mekim laip bilong yumi long nau i kamap gutpela moa? Nogat tru! Taim yumi mekim wok bilong Jehova, dispela bai givim bikpela amamas moa long yumi winim olgeta narapela samting. I no olsem yumi laik abrusim bagarap long taim bilong traipela hevi tru na em tasol, nogat. God i wokim yumi bilong i stap na lotuim em, na dispela tasol bai givim bikpela amamas long yumi. Sapos yumi larim Jehova i stiaim yumi na soim pasin laikim long yumi, dispela i gutpela moa winim pasin bilong i stap longwe long em. (Ritim Song 63:1-3.) Long nupela taim, yumi bai kisim ol blesing long sait bilong bilip sapos yumi givim bel olgeta long mekim wok bilong Jehova, tasol long nau tu yumi inap kisim ol dispela blesing! Inap planti yia, sampela bilong yumi i kisim ol dispela blesing, na yumi save olsem wok bilong God tasol inap givim bikpela amamas long yumi.—Sng. 1:1-3; Ais. 58:13, 14.

17. Long Paradais, yumi bai putim wanem ol samting i stap namba 1 na wanem ol samting i stap namba 2?

¹⁷ Long nupela taim, yumi bai mekim tu ol samting yumi save amamas long mekim. Taim Jehova i wokim yumi, em i inapim yumi wantaim laik bilong mekim ol samting yumi yet i ken amamas long en, olsem na em i laik bai yumi inapim ol dispela laik. (Sav. 2:24) Long dispela rot na planti narapela rot, Jehova bai “inapim laik bilong olgeta samting i gat laip.” (Sng. 145:16, NW) I stret long yumi mekim ol narapela samting bilong kisim amamas, tasol dispela amamas bai kamap bikpela moa sapos yumi tingim pastaim pasin bilong yumi long pas gut wantaim Jehova. Wankain samting bai kamap taim yumi kisim laip long Paradais. Em savetingting long yumi putim ol laik bilong yumi yet i stap namba 2 samting, na yumi painim Kingdom pastaim na putim tingting i go long ol blesing em ol manmeri bilong Jehova i kisim long nau!—Mat. 6:33.

18. Olsem wanem yumi inap soim olsem yumi redim yumi yet long kisim laip oltaim long Paradais?

¹⁸ Taim yumi stap long Paradais, yumi bai kisim bikpela amamas moa winim olgeta taim bipo. Sapos yumi laik kisim dispela laip em i laip tru, orait long nau yumi mas mekim ol samting bilong redim yumi yet long kisim dispela laip. Yumi mas bihainim ol gutpela pasin bilong God na givim bel olgeta long autim tok bilong Kingdom, na long dispela rot yumi bai kisim bikpela amamas. Yumi mas amamas tru long mekim ol wok bilong God. Na tu, yumi mas bilip tru long ol tok promis bilong Jehova, na yumi mas redi na wet long kisim laip long nupela taim!