1. (a) Taim traipela win i kamap long raunwara Galili, wanem samting i kamap long Pita? (Lukim piksa long kirap bilong stadi.) (b) Bilong wanem Pita i sink i go daun long wara?

LONG wanpela nait, traipela win i kamap na aposel Pita na sampela disaipel i taitim bun long pul long bot i go long hapsait bilong raunwara Galili. I no longtaim, ol i kirap nogut long lukim Jisas i wokabaut antap long wara. Pita i singaut long Jisas na askim sapos em tu inap wokabaut antap long wara na i go long Bosman bilong em. Taim Jisas i tokim Pita long i go long em, Pita i kirap lusim bot na wokabaut antap long wara na i go long Jisas. Bihain liklik, Pita i stat long sink i go daun long wara. Bilong wanem? Em i lukim traipela win na dispela i mekim em i pret. Pita i singaut long Jisas na kwiktaim Jisas i putim han i go na holim Pita na i tok: “Bilip bilong yu i liklik, bilong wanem yu gat tupela tingting?”—Mat. 14:24-32.

2. Yumi bai skelim wanem ol samting long dispela stadi?

² Yumi ken skelim 3-pela samting we i kamap long Pita long sait bilong bilip: (1) Long namba 1 taim, Pita i soim olsem em i bilip long strong bilong God. (2) Pita i lusim bilip. (3) Pita i kamap strong gen  long bilip. Taim yumi skelim ol dispela samting, dispela bai helpim yumi long luksave long ol samting yumi inap mekim bambai yumi inap “sanap strong long bilip.”—1 Kor. 16:13.

3. (a) Wanem samting i kirapim Pita long lusim bot? (b) Yumi mekim wanem na dispela i wankain long samting Pita i bin mekim?

³ Pita i bilip, olsem na em i lusim bot na wokabaut antap long wara. Jisas i singautim Pita long wokabaut i go long em, na Pita i bilip olsem God bai strongim em wankain olsem Em i strongim Jisas. Olsem tasol, yumi bilip olsem Jehova bai strongim yumi, olsem na yumi dediket na kisim baptais. Jisas i singautim yumi long kamap disaipel na bihainim lek mak bilong em. Yumi mas bilip long Jisas na God, na yumi mas tingim olsem ol bai helpim yumi long kain kain rot.—Jon 14:1; ritim 1 Pita 2:21.

4, 5. Bilong wanem bilip i stap olsem samting i dia tumas?

⁴ Bilip em wanpela samting i dia tumas. Bilip bilong Pita i mekim na em inap wokabaut antap long wara. Olsem tasol, bilip bilong yumi i kirapim yumi long mekim ol samting em ol narapela i ting olsem i hatwok long mekim. (Mat. 21:21, 22) Planti bilong yumi i mekim ol bikpela senis long pasin na toktok bilong yumi, olsem na ol pren bilong yumi long bipo i hatwok long luksave long yumi. Jehova i helpim yumi long mekim ol dispela senis, long wanem, yumi bilip long em na dispela i kirapim yumi long mekim ol dispela senis. (Ritim Kolosi 3:5-10.) Bilip i kirapim yumi long dediket long Jehova na kamap pren bilong em—yumi no inap mekim dispela samting long strong bilong yumi yet.—Efe. 2:8.

⁵ Bilip i strongim yumi, olsem na yumi inap sakim pasin birua bilong Satan. (Efe. 6:16) Na tu, taim yumi bilip long Jehova, dispela i helpim yumi long daunim pasin bilong wari tumas long taim bilong hevi. Jehova i tok, sapos bilip i kirapim yumi long putim wok bilong Kingdom i stap namba 1 samting long laip bilong yumi, Em bai lukautim yumi long ol narapela samting. (Mat. 6:30-34) Bikpela samting moa em olsem, bilip i opim rot long yumi inap kisim wanpela presen we yumi no inap kisim long strong bilong yumi yet—em presen bilong laip oltaim.—Jon 3:16.

6, 7. (a) Wanem samting long nau i wankain olsem traipela win na biksi i raunim Pita? (b) Yumi mas mekim wanem bambai yumi no ken kamap slek long bilip?

⁶ Taim Pita i wokabaut antap long wara, strongpela win i mekim solwara i raf. Dispela i wankain long ol hevi na ol traim i painim yumi taim yumi dediket long God. Maski ol bikpela hevi i painim yumi, Jehova inap helpim yumi long sanap strong. Taim Pita i sink i go daun long wara, i no olsem bikpela win o biksi i mekim na em i sink, nogat. Tingim ol samting i kamap paslain long em i sink: “Traipela win i mekim na em i pret.” (Mat. 14:30) Pita i no putim tingting i go long Jisas, olsem na em i kisim 2-pela tingting. Yumi tu inap kamap slek long bilip sapos yumi tingting tasol long ol hevi, na dispela inap mekim na yumi kisim 2-pela tingting olsem Jehova bai helpim yumi, o nogat.

⁷ Yumi mas luksave olsem sapos yumi no was gut, yumi inap kamap slek long bilip. Olsem na Baibel i tok dispela hevi i olsem “sin i save pasim yumi.” (Hib. 12:1) Ekspiriens bilong Pita i soim klia olsem kwiktaim yumi inap kamap slek long bilip sapos yumi tingting tasol long ol hevi i painim yumi. Olsem wanem yumi inap luksave sapos bilip bilong yumi i laik kamap slek? Yumi ken stori long sampela askim we yumi inap yusim bilong skelim yumi yet.

8. Wanem ol samting inap kirapim yumi long kisim 2-pela tingting long ol tok promis bilong God?

⁸ Mi bilip strong yet long ol tok promis bilong God olsem mi mekim long bipo? God i tok promis olsem em bai pinisim dispela haptaim nogut bilong nau. Olsem wanem? Yumi larim ol  amamas bilong graun i pulim nabaut tingting bilong yumi na yumi no bilip strong moa long ol tok promis bilong God? Yumi inap kisim 2-pela tingting na pilim olsem pinis i longwe yet. (Hab. 2:3) Tingim narapela eksampel. God i tok promis long fogivim yumi long rot bilong ofa bilong baim bek man. Sapos yumi tingim yet ol popaia yumi mekim long bipo, yumi inap kisim 2-pela tingting olsem ating Jehova i no “tekewe” olgeta sin bilong yumi. (Apo. 3:19) Dispela inap mekim na yumi no amamas moa long mekim wok bilong God, na yumi lusim wok autim tok.

9. Wanem samting inap kamap sapos yumi putim tingting olgeta long inapim ol laik bilong yumi yet?

⁹ Mi strong yet long mekim wok bilong God olsem mi mekim long bipo? Aposel Pol i soim klia olsem sapos yumi wok strong long mekim wok bilong Jehova, yumi inap “holimpas dispela samting [yumi] bilip na wet long en i go inap long pinis.” Sapos yumi tingting tasol long inapim ol laik bilong yumi yet, na yumi kisim wok mani i gat gutpela pe, tasol em i pasim yumi long mekim wok lotu, orait wanem hevi inap kamap? Yumi inap kamap slek long bilip na “les kwik” long mekim wok bilong Jehova maski sapos sindaun bilong yumi i no gat hevi.—Hib. 6:10-12.

10. Taim yumi fogivim ol narapela, olsem wanem dispela i soim olsem yumi bilip long Jehova?

¹⁰ Mi hatwok long fogivim ol narapela? Taim ol narapela i mekim yumi bel hevi, ating yumi inap tingting tasol long dispela na yumi laik tokim ol stret long dispela samting, o abrusim ol na yumi no toktok moa wantaim ol. Tasol taim yumi fogivim ol narapela, yumi soim olsem yumi bilip long Jehova. Yumi inap tok olsem, long wanem, taim ol narapela i rongim yumi, i olsem ol i gat dinau long yumi, wankain olsem sin bilong yumi i mekim na yumi tu i gat dinau long God. (Luk 11:4) Taim yumi fogivim ol narapela, God bai orait long yumi, na dispela i bikpela samting moa  winim pasin bilong bekim rong. Ol disaipel bilong Jisas i luksave olsem ol i mas i gat bilip bambai ol inap fogivim ol narapela. Taim Jisas i tokim ol long fogivim ol man husat i rongim ol planti taim, ol i tok: “Yu mas mekim bilip bilong mipela i kamap bikpela moa.”—Luk 17:1-5.

11. Wanem samting inap pasim yumi long larim tok bilong Baibel i helpim yumi?

¹¹ Mi luk daun long tok kaunsel bilong Baibel? Taim wanpela brata i givim tok kaunsel long yumi, nogut yumi no tingim helpim yumi inap kisim long dispela tok na yumi laik painim rong long dispela tok o sutim tok long man i givim tok kaunsel. (Snd. 19:20) Tok kaunsel bilong Baibel inap stiaim yumi long bihainim tingting bilong God, tasol nogut yumi yet i luk daun long dispela tok.

12. Taim man i komplein long ol brata em Jehova i yusim long lukautim lain bilong em, dispela i soim klia wanem samting?

¹² Mi save komplein long ol brata i holim wok insait long kongrigesen? Taim lain Israel i tingim tingim ripot nogut bilong 10-pela man bilong lukstil, dispela i kirapim ol long komplein long Moses na Aron. Jehova i tokim Moses: “Planti taim ol dispela lain manmeri i sakim tok bilong mi na i no bilip long mi.” (Nam. 14:2-4, 11) Taim lain Israel i komplein, dispela i soim olsem ol i no trastim God, em Man husat i makim Moses na Aron long mekim wok. Olsem tasol, sapos oltaim yumi komplein long ol brata em God i yusim ol long stiaim lain bilong em, dispela i soim olsem yumi no bilip strong moa long God.

13. Bilong wanem yumi no ken bel hevi sapos yumi luksave olsem bilip bilong yumi i no strong moa?

¹³ Yu no ken bel hevi sapos yu skelim yu yet na luksave olsem bilip bilong yu i no strong moa. Aposel Pita tu i pret na kisim 2-pela tingting. Planti taim Jisas i stretim tingting bilong olgeta aposel, long wanem, ol “i gat liklik bilip.” (Mat. 16:8) Tingim bikpela skul yumi inap kisim long stori bilong Pita. Bilip bilong em i no strong moa, olsem na em i sink i go insait long wara.

14, 15. (a) Pita i mekim wanem taim em i stat long sink? (b) Yumi no inap lukim Jisas, tasol olsem wanem yumi inap “lukluk i go stret” long em?

¹⁴ Taim Pita i lukluk long traipela win na em i stat long sink, ating em yet inap swim i go bek long bot, long wanem, em man bilong swim. (Jon 21:7) Tasol em i no yusim strong bilong em yet, nogat, em i lukluk gen long Jisas na em i larim Jisas i helpim em. Sapos yumi pilim olsem bilip bilong yumi i no strong moa, orait yumi mas bihainim eksampel bilong Pita. Tasol olsem wanem yumi inap mekim olsem?

¹⁵ Pita i lukluk gen long Jisas, olsem na yumi tu i mas “lukluk i go stret long dispela Nambawan Gopas bilong bilip bilong yumi na Man Bilong Inapim Tru bilip bilong yumi, em Jisas.” (Ritim Hibru 12:2, 3.) Yumi no inap lukim Jisas long ai tru bilong yumi olsem Pita i bin mekim. Tasol yumi inap “lukluk i go stret” long Jisas taim yumi stadi gut long ol tok na ol pasin em i skulim ol man long en, na bihainim gut lek mak bilong em. Yumi ken skelim sampela samting yumi inap mekim bambai yumi ken bihainim eksampel bilong Jisas. Taim yumi bihainim ol pasin bilong Jisas, dispela bai strongim bilip bilong yumi.

16. Olsem wanem yumi inap stadi long Baibel long pasin we bai strongim tru bilip bilong yumi?

¹⁶ Bilip strong moa long tok bilong Baibel. Jisas i bilip olsem Baibel em Tok Bilong God, na dispela buk i kamapim ol nambawan gutpela tok bilong stiaim yumi. (Jon 17:17) Yumi mas bihainim pasin bilong Jisas na ritim Baibel long olgeta de, stadi long en, na tingim tingim ol skul yumi kisim long en. Taim yu stadi long Baibel, mekim wok painimaut long ol bikpela tok yu gat askim long en. Yu ken mekim olsem: Sapos yu laik strongim bilip bilong yu olsem pinis bilong haptaim bilong nau i klostu, orait yu ken stadi gut long ol tok bilong Baibel we i soim klia olsem yumi stap long haptaim bilong las de. Yu ken skelim ol tok profet bilong Baibel em truim bilong ol i kamap  pinis bambai dispela i ken strongim bilip bilong yu long ol tok promis bilong ol samting bai kamap bihain. Na tu, yu ken skelim sampela stori long olsem wanem tok bilong Baibel i bin helpim sindaun bilong ol manmeri, na dispela bai strongim bilip bilong yu olsem tok bilong Baibel i gat strong long helpim ol manmeri. *—1 Tes. 2:13.

17. (a) Wanem samting i helpim Jisas long i stap gut long God maski ol bikpela hevi i painim em? (b) Olsem wanem yu inap bihainim pasin bilong Jisas?

¹⁷ Tingim ol blesing em Jehova i tok promis long givim. Jisas “i tingim amamas em bai kisim” na dispela i helpim em long i stap gut yet long God maski ol bikpela hevi i painim em. (Hib. 12:2) Em i no larim ol samting bilong graun i pulim tingting bilong em. (Mat. 4:8-10) Yu ken bihainim pasin bilong Jisas na tingim tingim ol gutpela blesing em Jehova i tok promis long givim long yu. Piksaim ol samting yu bai mekim taim God i pinisim pasin nogut bilong dispela haptaim, na yu ken raitim long pepa o droim piksa bilong en. Yu ken raitim nem bilong ol manmeri em yu laik bungim taim ol i kirap bek na samting yu laik toktok wantaim ol long en. God i tok promis long givim ol dispela blesing long olgeta lain man, tasol yu ken tingim olsem yu yet i wanpela bilong ol lain husat bai kisim blesing.

18. Olsem wanem beten inap helpim yu long strongim bilip bilong yu?

¹⁸ Askim God long strongim bilip bilong yu. Jisas i skulim ol disaipel long beten askim Jehova long givim holi spirit. (Luk 11:9, 13) Taim yu mekim olsem, yu mas askim God long strongim bilip bilong yu, long wanem, bilip em wanpela pasin em holi spirit i save kamapim. Askim God long helpim yu long lusim ol pasin kranki we i makim olsem yu wok long kamap slek long bilip. Kain olsem: Ating yu hatwok long fogivim ol narapela.

19. Wanem kain ol manmeri i mas i stap olsem ol pren bilong yumi?

¹⁹ Poromanim ol manmeri i stap strong long bilip. Jisas i skelim gut wanem kain lain bai i stap olsem ol pren na pas gut wantaim em. Ol aposel i stap strong long bilip na ol i stap gut long Jisas, olsem na ol i bihainim tok bilong em. (Ritim Jon 15:14, 15.) Yu mas poromanim ol manmeri i stap strong long bilip, em ol manmeri i bihainim tok bilong Jisas. Tingim: Gutpela pren i gat pasin bilong toktok gut wantaim narapela, na em bai redi long givim tok bilong helpim narapela na kisim tok bilong helpim em yet.—Snd. 27:9.

20. Taim yumi strongim bilip bilong ol narapela, hau bai dispela i helpim yumi?

²⁰ Strongim bilip bilong ol narapela. Toktok na pasin bilong Jisas i strongim bilip bilong ol disaipel. (Mak 11:20-24) Taim yumi bihainim pasin bilong Jisas na strongim bilip bilong ol narapela, dispela bai strongim bilip bilong yumi tu. (Snd. 11:25) Taim yu autim tok na skulim ol man, yu mas soim klia olsem God i stap, na em i tingim tru yumi, na em yet i kamapim ol tok bilong Baibel. Strongim bilip bilong ol bratasista. Sapos sampela bratasista i komplein long ol brata i holim wok insait long kongrigesen, yu no ken kirap kwik long givim baksait long ol dispela bratasista. Mobeta yu bihainim savetingting na helpim ol long mekim ol samting bilong strongim gen bilip bilong ol. (Jut 22, 23) Sapos yu stap long skul na tisa i stori long bilip bilong evolusen, yu no ken pret long sambai long bilip bilong yu. Ating tok bilong yu bai kirapim tingting bilong ol narapela.

21. Jehova i tok promis olsem em bai helpim yumi olsem wanem?

²¹ Long rot bilong Jisas, God i helpim Pita long daunim pasin bilong pret na tingting planti, na em i stap strong tru long bilip. Long wankain pasin, Jehova bai helpim yumi olgeta long sanap strong long bilip. (Ritim 1 Pita 5:9, 10.) Taim yumi wok hat long mekim ol samting bilong strongim bilip bilong yumi, hatwok bilong yumi i no inap lus nating, long wanem, yumi bai kisim ol nambawan gutpela blesing.