1, 2. God i mekim wanem samting bilong kirapim yumi long laikim em?

SAPOS papa i laik skulim ol pikinini, em yet i mas soim gutpela pasin em ol pikinini i ken lukim na bihainim. Aposel Jon i tok: “Yumi mekim pasin laikim, long wanem, [God] i bin laikim yumi pastaim.” (1 Jon 4:19) Jehova i stap olsem Papa na em i soim pasin laikim, na dispela inap kirapim yumi long laikim em.

² Olsem wanem God “i bin laikim yumi pastaim”? Aposel Pol i tok: “God i soim pasin laikim bilong em long yumi long dispela rot: Krais i dai bilong helpim yumi taim yumi stap sinman yet.” (Rom 5:8) Jehova i soim bikpela pasin laikim taim em i givim Pikinini bilong em olsem ofa bilong baim bek ol manmeri i bilip long em. Taim man i daunim laik bilong em yet na givim ol samting bilong helpim ol narapela, dispela i soim olsem em i gat bikpela pasin laikim. God i mekim gutpela pasin tru na dispela i opim rot long yumi inap kisim helpim long pasin laikim bilong em, na yumi tu inap mekim ol samting bilong soim olsem yumi laikim em.—1 Jon 4:10.

3, 4. Yumi mas mekim wanem ol samting bilong soim olsem yumi laikim God?

³ Pasin laikim em nambawan bikpela pasin bilong Jehova. Olsem na taim wanpela man i laik save long wanem lo i namba 1, Jisas i tok: “Yu mas laikim Jehova, God bilong yu. Yu mas laikim em long bel olgeta  bilong yu, na long laip olgeta bilong yu, na long tingting olgeta bilong yu, na long strong olgeta bilong yu.” (Mak 12:30) Tok bilong Jisas i skulim yumi olsem, yumi mas givim bel olgeta long mekim ol samting bilong soim olsem yumi laikim God. Jehova i no inap amamas sapos yumi givim hap bel tasol. Yumi mas givim ol narapela samting tu—yumi mas givim laip olgeta, tingting olgeta, na strong olgeta bilong yumi. Sapos yumi laikim tru God, dispela em i no samting we yumi pilim tasol long bel, nogat. Yumi mas mekim tu ol wok lotu na ol narapela samting. Tok bilong profet Maika i soim olsem Jehova i laik bai yumi mekim ol dispela samting.—Ritim Maika 6:8.

⁴ Olsem wanem yumi inap soim olsem yumi laikim tru Papa long heven? Olsem Jisas i tok, yumi mas yusim strong olgeta, bel olgeta, tingting olgeta, na mekim olgeta samting yumi inap mekim long sait bilong bilip. Long stadi i kamap paslain, yumi bin stori long 4-pela samting Jehova i mekim bilong soim olsem em i laikim tru ol pikinini bilong em. Long dispela stadi, yumi bai stori long ol samting yumi inap mekim bilong soim olsem yumi laikim tru Jehova na strongim dispela pasin laikim, na yumi mas bihainim rot em God i orait long en.

5. Taim yumi tingim bek olgeta samting Jehova i mekim bilong soim olsem em i laikim yumi, dispela i mas kirapim yumi long mekim wanem?

⁵ Taim yu kisim wanpela presen, yu save mekim wanem? Ating yu save soim olsem yu amamas. Na tu, yu bai yusim gut dispela presen na yu no inap larim em i stap nating. Disaipel Jems i tok: “Olgeta gutpela presen na olgeta presen i nambawan tru i kam long ples antap. Em i kam long Papa bilong ol lait bilong skai, dispela Papa i no save senis senis olsem sedo i save senis senis.” (Jems 1:17) Jehova i givim ol samting bilong helpim yumi long i stap laip na stap amamas. Dispela i mas kirapim yumi long mekim ol samting bilong soim olsem yumi laikim em.

6. Lain Israel i mas mekim wanem bambai Jehova i ken wok yet long blesim ol?

⁶ Inap planti handret yia, Jehova i lukautim gut lain Israel na em i givim planti blesing long sait bilong klos na kaikai, na em i givim ol gutpela tok bilong strongim ol long sait bilong bilip. (Lo 4:7, 8) Lain Israel bai kisim yet ol dispela blesing sapos ol i bihainim yet Lo Bilong God. Dispela i makim tu olsem oltaim ol i mas “kisim ol gutpela kaikai tru i mau paslain long ol arapela kaikai” na givim olsem ofa long Jehova. (Kis. 23:19) Long dispela rot, lain Israel bai soim olsem ol i pilim tru pasin laikim bilong Jehova na ol blesing em i givim.—Ritim Lo 8:7-11.

7. Olsem wanem yumi inap yusim mani kago long soim olsem yumi laikim Jehova?

⁷ Long nau, yumi no gat wok long givim kaikai olsem ofa, tasol i stret long yumi givim ol nambawan samting bilong soim olsem yumi laikim God. (Snd. 3:9) Yumi inap givim wanem ol samting? Yumi inap yusim mani kago long helpim wok bilong Kingdom long hap bilong yumi na long olgeta hap bilong graun. Dispela em gutpela rot bilong soim olsem yumi laikim Jehova maski yumi gat planti mani kago, o nogat. (2 Kor. 8:12) I gat ol narapela samting tu yumi inap mekim bilong soim olsem yumi laikim Jehova.

8, 9. Olsem wanem pasin bilong yumi long trastim tok promis bilong Jehova i soim olsem yumi laikim em? Stori long wanpela eksampel.

⁸ Jisas i tokim ol disaipel olsem ol i no ken tingting planti long kaikai ol bai kisim na klos ol bai werim. Mobeta ol i wok yet long painim Kingdom pastaim. Em i tok, Papa i save long ol samting yumi nidim. (Mat. 6:31-33) Sapos yumi laikim tru Jehova, yumi bai bilipim dispela tok promis. Yumi no inap laikim wanpela man sapos yumi no bilipim tok bilong em. (Sng. 143:8) Yumi ken askim yumi yet: ‘Ol mak mi laik winim na ol pasin bilong mi i soim olsem mi laikim tru Jehova? Ol samting mi mekim long olgeta wan wan de i soim  olsem mi bilip olsem em bai lukautim mi long ol samting mi nidim?’

⁹ Mike em wanpela Kristen, na em i bin soim olsem em i laikim God na trastim em. Taim Mike i stap yangpela, em i laik tru long i go long narapela kantri na mekim wok bilong God. Bihain, em i marit na em i gat 2-pela pikinini, tasol laik bilong em i no senis. Mike na famili bilong em i ritim ol atikol na ol ripot i stori long ekspiriens bilong ol bratasista i go helpim wok autim tok long ol hap i sot tru long ol pablisa. Dispela i kirapim ol long salim haus na ol i go stap long wanpela flet. Mike i gat bisnis bilong klinim haus na stretim ol samting i bagarap. Em i kisim save olsem maski em i stap long narapela kantri, em inap yusim Intenet long lukautim wok bisnis bilong em. Olsem na em i sotim namba bilong ol wokman na ol kastama bilong em. Mike na famili bilong em i go long narapela kantri na ol i kisim amamas long helpim wok autim tok. Bihain long 2-pela yia, ol i tok: “Mipela i lukim truim bilong tok bilong Jisas long Matyu 6:33!”

10. Taim yumi tingim tingim tok bilong Jehova, wanem samting inap kamap long yumi wankain olsem samting i kamap long Devit?

¹⁰ Inap 3 tausen yia i go pinis, King Devit i pilim tru samting em i lukim long ples antap. Em i tok: “Skai i soim yumi olsem God em i nambawan tru. Olgeta samting bilong antap i soim yumi gutpela wok bilong em.” Devit i pilim tru savetingting i stap long Lo Bilong God, olsem na em i tok: “Lo bilong Bikpela em i stret olgeta, na i save givim nupela laip long yumi. Tok bilong Bikpela em i samting yumi inap bilip tru long en. Em i save givim gutpela tingting long ol man i no gat planti save.” Wanem samting i kamap taim Devit i tingim tingim Lo Bilong God? Devit i tok moa: “Bikpela, mi laik bai tok bilong mi na tingting bilong mi i ken i orait long ai bilong yu. Bikpela, yu ples hait bilong mi na helpim bilong mi.” Dispela i soim olsem Devit i pas gut wantaim God.—Sng. 19:1, 7, 14.

11. Long nau, God i helpim yumi long kisim planti save long Baibel, olsem na sapos yumi laikim God, orait yumi mas mekim wanem? (Lukim piksa long kirap bilong stadi.)

¹¹ Long nau, yumi kisim planti save long ol samting Jehova i wokim long heven na graun, na tu, yumi kisim save long olsem wanem em i inapim samting em i tingting pinis long kamapim. Ol manmeri bilong graun i tingting tasol long i go long bikpela skul na kisim planti save. Tasol ekspiriens bilong planti bratasista i soim olsem taim ol i go long bikpela skul, ol i lusim bilip na lusim pasin bilong laikim God. Baibel i kirapim yumi long kisim save, na tu, yumi mas kisim savetingting, na kliagut long ol samting. Dispela i makim olsem yumi mas lain long yusim save em God i givim long yumi bambai yumi inap helpim yumi yet na helpim tu ol narapela. (Snd. 4:5-7) God “i laik kisim bek olgeta kain man na em i laik bai ol i kisim stretpela save long tok i tru.” (1 Tim. 2:4) Yumi soim olsem yumi laikim Jehova taim yumi givim bel olgeta long tokim olgeta man long gutnius bilong Kingdom. Na tu, yumi helpim ol long save gut long samting God i tingting pinis long mekim bilong helpim ol manmeri.—Ritim Song 66:16, 17.

12. Wanpela yangpela i tok wanem long ol samting Jehova i givim bilong helpim yumi long pas gut wantaim em?

¹² Ol yangpela tu inap soim olsem ol i laikim Jehova. Ol i ken soim olsem ol i tenkyu long ol samting em i givim bilong helpim ol long pas gut wantaim em. Shannon i stori olsem taim em i gat 11-pela krismas, em na liklik sista bilong em husat i gat 10-pela krismas, ol i go long “Givim Bel Long God” Kibung Distrik wantaim papamama. Long wanpela program, ol atendan i tokim ol yangpela long i go sindaun long wanpela hap ol brata i makim. Shannon i pret liklik, tasol em i bihainim tok. Bihain, em i amamas tru taim ol i givim naispela buk long olgeta yangpela. Nem bilong dispela buk em Sampela Askim Bilong  Ol Yangpela—Ol Gutpela Bekim. Taim Shannon i kisim dispela buk, em i pilim olsem wanem long God Jehova? Em i tok: “Long dispela taim stret, mi luksave olsem Jehova em Man i stap tru, na em i laikim mi tumas.” Shannon i tok moa: “Yumi ken amamas tru olsem Jehova, em nambawan God bilong yumi, em i save amamas long givim ol naispela presen tru long yumi!”

13, 14. Taim Jehova i givim tok kaunsel long yumi, pasin yumi mekim bai soim klia wanem samting?

¹³ Baibel i tok: “Bikpela i save stretim ol man em i laikim tumas, olsem ol papa i save stretim ol pikinini ol i laikim tumas.” (Snd. 3:12) Yumi mas mekim wanem taim yumi kisim tok bilong stretim yumi? Aposel Pol i tok: “Taim wanpela i stretim yumi, yumi no save amamas, nogat, yumi save bel hevi.” Pol i no mekim dispela tok long daunim pasin bilong stretim man, nogat. Em i tok: “Ol lain i kisim skul pinis long wanpela i stretim ol, dispela i save kamapim bel isi na stretpela pasin.” (Hib. 12:11) Sapos yumi laikim Jehova, orait yumi no ken bel kros o bel hevi taim em i givim tok bilong stretim yumi. Sampela manmeri i no laik bihainim tok kaunsel bilong God. Tasol sapos yumi laikim God, yumi bai bihainim ol tok kaunsel bilong em.

¹⁴ Long taim bilong Malakai, God i givim tok bilong stretim lain Juda, tasol planti bilong ol i no amamas long dispela tok. Ol i save long tok i stap long Lo Bilong Moses long sait bilong givim ofa. Tasol ol i no bihainim dispela lo, olsem na Jehova i givim strongpela tok bilong stretim pasin bilong ol. (Ritim Malakai 1:12, 13.) Jehova i tok: “Mi tok strong olsem yupela bai i bagarap. Bai mi bagarapim ol gutpela kaikai samting yupela i save kisim long wok bilong yupela. Tasol yupela i ting mi toktok nating na yupela i no bihainim tok bilong mi. Olsem na mi bagarapim yupela pinis.” (Mal. 2:1, 2) Dispela i soim olsem, sapos long laik bilong yumi yet yumi sakim tok kaunsel i kam long Jehova, yumi inap karim bikpela hevi tru.

15. Long nau, yumi mas wok strong long abrusim wanem kain pasin?

¹⁵ Long nau, ol man i tingim laik bilong ol yet, olsem na i hatwok long givim tok kaunsel long ol  na tok bilong stretim ol, na tu, ol i no laik kisim ol dispela tok. Sampela i kisim ol dispela tok, tasol ol i bel hevi. Ol Kristen “i no ken wokabaut moa long wankain pasin olsem ol man bilong dispela taim i save bihainim.” Yumi mas luksave long “laik bilong God” na bihainim. (Rom 12:2) Jehova i yusim oganaisesen bilong em long givim ol tok bilong stiaim yumi long planti samting. Kain olsem: Em i tokim yumi long stretpela pasin yumi mas bihainim taim yumi stap wantaim ol poroman, o yumi mekim ol samting bilong kisim amamas, o yumi stap wantaim wanpela husat i no poroman marit bilong yumi. Taim yumi kisim na bihainim ol dispela tok, yumi soim olsem yumi tenkyu tru long Jehova na yumi laikim em tru long bel bilong yumi.—Jon 14:31; Rom 6:17.

16, 17. (a) Bilong wanem yumi mas bihainim laik bilong Jehova taim yumi mekim ol disisen? (b) Olsem wanem lain Israel i soim olsem ol i no laikim Jehova na trastim em?

¹⁶ Taim ol liklik pikinini i pilim olsem hevi bai painim ol, ol i save ran hariap i go long papamama. Taim ol i kamap bikpela, ol i lain long skelim ol samting na mekim disisen bilong ol yet. Dispela i soim olsem ol i wok long kamap bikpela man o meri. Tasol ol pikinini husat i pas gut wantaim papamama, ol i amamas long kisim tingting na skultok bilong papamama paslain long ol i mekim disisen. Wankain samting i kamap long sait bilong bilip. Jehova i givim holi spirit long yumi, na dispela “i kirapim laik bilong [yumi] na i strongim [yumi] long mekim ol samting em yet i laikim.” Sapos yumi bihainim laik bilong yumi yet na mekim ol disisen na yumi no bihainim laik bilong God, dispela bai soim klia olsem yumi no laikim God na trastim em.—Fili. 2:13.

¹⁷ Long taim bilong Samuel, wanpela taim ol Filistia i daunim tru lain Israel long pait. Ol manmeri bilong God i sot tru long helpim. Ol i mekim wanem? Ol i tok: “Goan, yumi salim sampela man i go long Silo bilong kisim Bokis Kontrak bilong Bikpela na bringim i kam. Na taim yumi go pait bai Bikpela i ken i go wantaim yumi na helpim yumi, bai ol birua i no inap winim yumi.” Wanem samting i kamap? “Long dispela de ol Filistia i kilim i dai planti man moa, inap 30,000 olgeta. . . . Na ol i kisim Bokis Kontrak bilong Bikpela.” (1 Sml. 4:2-4, 10, 11) Taim lain Israel i karim bokis kontrak i go wantaim ol, ating ol i ting olsem Jehova bai helpim ol. Tasol ol i no larim Jehova i stiaim ol, nogat. Ol i bihainim tingting bilong ol yet, olsem na bikpela hevi tru i painim ol.—Ritim Sindaun 14:12.

18. Yumi mas holim wanem tingting long pasin bilong askim Jehova long helpim yumi?

¹⁸ Man bilong raitim song i holim stretpela tingting na em i tok: “Mi mas bilip long God na wetim em i helpim mi. Em i God bilong mi na em i save helpim mi. Olsem na bai mi litimapim nem bilong en gen. Bel bilong mi i hevi moa, olsem na mi tingting long yu.” (Sng. 42:5, 6) Dispela man i laikim tru Jehova! Olsem wanem long yu? Yu kisim pinis pasin bilong laikim tru Papa bilong yumi long heven na bilip long em? Maski sapos yu kisim pinis dispela pasin, yu inap bihainim tok bilong Baibel na strongim bilip bilong yu. Baibel i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”—Snd. 3:5, 6.

19. Yu ken mekim wanem ol samting bilong soim olsem yu laikim tru Jehova?

¹⁹ Jehova i bin laikim yumi pastaim, olsem na em i soim yumi long olsem wanem yumi inap laikim em. Oltaim yumi mas tingim gutpela pasin em i bin soim long yumi. Oltaim yumi mas painim rot bilong soim olsem yumi laikim em ‘long bel olgeta bilong yumi, na long laip olgeta bilong yumi, na long tingting olgeta bilong yumi, na long strong olgeta bilong yumi.’—Mak 12:30.