KIRAP long 1992, Gavening Bodi i makim ol brata i mekim wok elda inap planti yia, na ol i stap olsem helpim long komiti bilong Gavening Bodi. * Ol dispela brata i bilong lain “arapela sipsip,” na ol i helpim Gavening Bodi. (Jon 10:16) Long olgeta wik, ol dispela brata i stap long miting bilong ol komiti bambai ol inap givim sampela infomesen, na kamapim tingting bilong ol. Bihain, ol memba bilong Gavening Bodi i mekim laspela disisen, na ol brata long komiti i mekim samting em komiti i wanbel long en. Ol dispela brata i raun wantaim ol memba bilong Gavening Bodi long ol spesel na intenesenel kibung. Na tu, Gavening Bodi i salim ol long visitim ol brens ofis.

Wanpela brata husat i stap long wanpela komiti kirap long 1992, em i tok: “Taim mi mekim gut wok, Gavening Bodi inap putim tingting olgeta i go long redim gut ol kaikai bilong strongim bilip.” Narapela brata husat i stap long wanpela komiti winim 20 yia, em i tok: “Dispela em nambawan blesing tru i winim olgeta narapela samting.”

Gavening Bodi i givim planti wok long ol dispela brata na amamas tru long pasin bilong ol long mekim gut wok. Yumi olgeta i “no ken lusim pasin bilong tingim tru ol kain man olsem.”—Fili. 2:29.