1. (a) Wanem pasin em nambawan bikpela pasin bilong God? (b) Yu pilim olsem wanem taim yu kisim save olsem God i gat dispela pasin?

JEHOVA yet i kamapim ol tok i stap long Baibel, na dispela buk i tokim yumi olsem “God em i pasin laikim.” Baibel i no tok tasol olsem pasin laikim em wanpela pasin bilong God, nogat, Baibel i tok “God em i pasin laikim.” (1 Jon 4:8) Pasin laikim em nambawan bikpela pasin bilong God. Baibel i no tok olsem Jehova i gat pasin laikim, nogat. Baibel i tok, Jehova yet em i pasin laikim. Yumi amamas tru long kisim save olsem Krieta bilong olgeta samting long heven na long graun, em i God bilong pasin laikim! Pasin laikim i stiaim olgeta samting em i mekim.

2. God i gat pasin laikim, na olsem wanem dispela i strongim bilip bilong yumi? (Lukim piksa long kirap bilong stadi.)

² God i laikim tru olgeta samting em i wokim long heven na long graun. Dispela i strongim bilip bilong yumi olsem em bai mekim olgeta samting em i tingting pinis long mekim bilong helpim ol manmeri, na dispela bai helpim tru olgeta manmeri i stap daun long wok bos bilong em. Pasin laikim i kirapim Jehova na “em i makim pinis  wanpela de [na] long stretpela pasin em bai mekim wok jas na skelim ol manmeri bilong graun. Em bai mekim olsem long rot bilong wanpela man em i makim pinis,” em Jisas Krais. (Apo. 17:31) Yumi ken bilip tru olsem dispela samting bai kamap. God bai orait long ol manmeri husat i bihainim stretpela pasin na bihainim tok bilong em, na ol bai kisim gutpela sindaun tru na stap amamas inap oltaim oltaim.

3. Sapos God i no laikim yumi ol manmeri bilong graun, yu ting yumi bai i gat wanem kain sindaun?

³ Sapos God i no laikim yumi ol manmeri bilong graun, yu ting yumi bai i gat wanem kain sindaun? Tingim ol hevi i kamap long graun—ol man i mekim wok bos, na Satan i stap god bilong ol na em i belhat nogut tru. (2 Kor. 4:4; 1 Jon 5:19; ritim Revelesen 12:9, 12.) Dispela i soim olsem sindaun bilong yumi long bihain bai i nogut tru sapos God i no gat pasin laikim.

4. Wai na Jehova i larim ol man i bikhet long stretpela wok bos bilong em?

⁴ Taim Satan i bikhet long wok bos bilong Jehova, em i kirapim namba 1 man na meri tu long bihainim pasin bikhet. Em i sutim tok olsem God i no gat rait long i stap King bilong heven na graun, na em i sutim tok tu olsem God i no bihainim stretpela pasin long mekim wok bos. I olsem Satan i tok, wok bos bilong em bai i gutpela moa winim wok bos bilong God. (Stt. 3:1-5) Jehova i givim sampela haptaim tasol long Satan bambai em i ken kamapim klia sapos tok bilong em i tru, o nogat. Jehova i gat bikpela savetingting, olsem na em i larim sampela haptaim i lus, na dispela i soim klia olsem i no gat man inap mekim gut wok bos olsem God. Ol hevi i kamap long graun i kamapim klia olsem Satan na ol man bilong graun i no inap tru long mekim gutpela wok bos na lukautim yumi long ol samting yumi nidim.

5. Ol hevi i kamap long graun i soim klia wanem samting?

⁵ Insait long 100 yia i go pinis, winim 100 milion manmeri i dai long rot bilong ol pait i kamap namel long ol kantri. Long nau, ol hevi i kamap long graun i wok long i go nogut moa yet. Baibel i tok profet olsem, “long taim bilong las de” bilong dispela haptaim, “ol man nogut na ol man bilong giaman bai i go nogut moa.” (2 Tim. 3:1, 13) Ol hevi i kamap long graun i kamapim klia olsem dispela tok bilong Baibel em i tru olgeta. Baibel i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jer. 10:23) Taim Jehova i wokim ol man, em i no givim rait long ol long bosim wokabaut bilong ol yet, nogat, em yet i mas bosim ol.

6. Wai na God i larim ol pasin nogut i stap inap sampela haptaim?

⁶ I gat narapela bikpela risen na God i larim ol pasin nogut i stap inap sampela haptaim. God i laik kamapim klia olsem wok bos bilong em tasol inap helpim tru ol manmeri. Taim Jehova i pinisim olgeta pasin nogut na bagarapim ol man nogut, em i no inap larim wanpela man i stap sapos dispela man i sutim tok olsem Jehova i no bihainim pasin laikim long wok bos bilong em. God inap yusim histori bilong ol man long nau long soim klia olsem i stret long em i rausim kwik ol man nogut, na em i no ken larim ol i kirapim gen pasin nogut.

7, 8. (a) Wanem ol samting i soim klia olsem Jehova i gat pasin laikim? (b) Wai na yumi ken tok olsem i stret long God i wokim ol samting i gat laip na putim ol long graun?

⁷ Jehova i mekim planti samting bilong soim klia olsem em i gat bikpela pasin laikim. Skelim ol naispela samting i stap long ples antap. I gat planti bilion galaksi, na olgeta wan wan galaksi i gat planti bilion sta na planet. Graun bilong yumi i stap insait long Milkiwe galaksi, na san em wanpela sta long galaksi bilong yumi. Lait bilong san i helpim olgeta samting long graun long i stap laip. Olgeta dispela samting i soim  klia olsem Jehova tasol em i God tru, na em i gat bikpela strong, savetingting, na pasin laikim. Yes, “kirap long taim God i wokim olgeta samting na i kam inap long nau, ol man i lukim ol samting God i bin wokim na long dispela rot ol inap save long ol pasin bilong en i stap hait. Na ol i save long bikpela strong bilong en i stap oltaim na ol i save olsem tru tru em i God.”—Rom 1:20.

⁸ Long graun, Jehova i wokim olgeta samting bilong helpim ol manmeri na ol animal long i stap laip. Em i redim naispela gaden bilong ol manmeri long i stap long en, na em i givim gutpela tingting na gutpela bodi we inap helpim ol long i stap laip inap oltaim oltaim. (Ritim Revelesen 4:11.) Na tu, “em i save givim kaikai long olgeta manmeri na olgeta abus. Oltaim oltaim em i save laikim yumi moa yet.”—Sng. 136:25.

9. Pasin laikim na ol narapela pasin bilong Jehova i kirapim em long mekim wanem?

⁹ Jehova i kamapim klia olsem em i heitim pasin nogut. Song 5:4-6 i tok: “God, yu no save amamas long pasin i no stret. . . . Yu no laikim tru ol man i mekim pasin nogut.” Baibel i tok moa olsem, Jehova i “no laikim tru ol man bilong kilim man i dai na ol man bilong kusai.”

10, 11. (a) Jehova bai mekim wanem long ol man nogut? (b) Jehova bai givim wanem blesing long ol manmeri i gat gutpela bel?

¹⁰ Jehova em i God bilong pasin laikim na em i heitim pasin nogut. Olsem na em i tingting pinis olsem, bihain long em i kamapim klia olsem i stret long em i mekim wok bos, em bai pinisim olgeta kain pasin nogut. Baibel i tok promis olsem: “Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol. I no longtaim na bai ol man nogut i lus olgeta. . . . Ol birua bilong Bikpela bai ol i lus, olsem gutpela bilas bilong plaua na gras. Tru tumas, bai ol i lus olsem smok i save stap liklik taim tasol na i go pinis.”—Sng. 37:9, 10, 20.

¹¹ Baibel i tok promis tu olsem: “Ol stretpela man bai i kisim graun God i givim ol, na bai ol i stap oltaim long en.” (Sng. 37:29) Ol bai “sindaun gutpela tumas na amamas i stap.” (Sng. 37:11) Dispela tok promis bai kamap tru bikos God i gat pasin laikim, na oltaim em i save helpim ol wokman bilong em. Baibel i tok: “Em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.” (Rev. 21:4) Sapos yumi pilim tru pasin laikim bilong Jehova na yumi stap daun long wok King bilong em, yumi bai kisim ol gutpela blesing tru long bihain!

12. Husat inap i stap olsem “man i no gat asua long wanpela samting”?

¹² Baibel i tok: “Yu tingting long man i no gat asua long wanpela samting, na lukim pasin bilong stretpela man. Man i save sindaun isi wantaim ol arapela manmeri, lain bilong en bai i stap oltaim. Tasol Bikpela i save bagarapim tru ol man bilong mekim sin. Ol lain tumbuna pikinini bilong ol bai i lus olgeta.” (Sng. 37:37, 38) Taim man i kisim save long Jehova na Pikinini bilong em na mekim laik bilong God, em bai i stap olsem “man i no gat asua long wanpela samting.” (Ritim Jon 17:3.) Dispela kain man i tingim tru tok bilong 1 Jon 2:17, em i tok: “Ol manmeri i stap longwe long God, ol bai pinis na laik bilong ol tu bai pinis, tasol man i bihainim laik bilong God em bai stap oltaim oltaim.” Pinis bilong dispela haptaim nogut bilong nau i wok long i kam klostu, olsem na em i bikpela samting long yumi mas “bilip long Bikpela na prea long em na bihainim pasin bilong em.”—Sng. 37:34.

13. Jehova i mekim wanem bikpela samting long helpim ol sinman?

¹³ Maski yumi gat sin, yumi inap ‘bihainim pasin bilong God.’ Yumi inap pas gut wantaim Jehova,  long wanem, em i mekim bikpela samting tru bilong soim olsem em i laikim yumi. Em i givim Jisas Krais olsem ofa bilong baim bek ol man, na dispela i opim rot na ol manmeri i bihainim tok bilong God, ol bai kamap fri long sin na dai em ol i kisim long Adam. (Ritim Rom 5:12; 6:23.) Jehova i bilip long Pikinini tru bilong em—dispela Pikinini i stap gut long God long heven inap planti yia. God i gat pasin laikim, olsem na em i bel hevi tru long pasin nogut ol man i mekim long Jisas taim em i stap long graun. Tasol Jisas i stap gut long wok bos bilong God na em i soim klia olsem stretpela man inap stap gut long Jehova maski ol hevi i painim em.

14, 15. Dai bilong Jisas i helpim yumi olsem wanem?

¹⁴ Ol bikpela hevi tru i painim Jisas, tasol em i stap gut long wok king bilong Jehova i go inap long taim em i dai. Yumi mas tenkyu olsem long rot bilong dai bilong Jisas, em i baim bek yumi ol manmeri na dispela i opim rot long yumi inap kisim laip oltaim long nupela taim em God i tok promis long kamapim! Aposel Pol i stori long pasin laikim bilong Jehova na Jisas, na em i tok: “Taim yumi no gat strong, Krais i dai bilong helpim yumi ol man nogut, na em i dai long taim God i makim. I hatwok long painim wanpela man husat bai redi long dai bilong helpim stretpela man. Tru tumas, ating wan wan man tasol bai redi long dai bilong helpim gutpela man. Tasol God i soim pasin laikim bilong em long yumi long dispela rot: Krais i dai bilong helpim yumi taim yumi stap sinman yet.” (Rom 5:6-8) Aposel Jon i tok: “Pasin laikim bilong God i kamap  ples klia long yumi olsem: God i salim Pikinini bilong en, em pikinini tru bilong en, i kam long dispela graun bai yumi inap kisim laip long rot bilong em. I no olsem yumi laikim God na em i mekim dispela samting, nogat. Em olsem, God i laikim yumi na salim Pikinini bilong en i kam olsem sakrifais long ol sin bilong yumi bilong mekim yumi kamap wanbel wantaim God.”—1 Jon 4:9, 10.

¹⁵ Jisas i stori long pasin laikim God i soim long ol manmeri, na em i tok: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.” (Jon 3:16) God i laikim tru ol manmeri, olsem na em i redi long givim Pikinini bilong em olsem ofa. Pasin laikim bilong em i no gat pinis bilong en. Oltaim yumi mas tingim pasin laikim bilong God. Pol i tok: “Mi bilip tru olsem dai, laip, ol ensel, ol gavman, ol samting nau i stap, ol samting bai kamap bihain, ol samting i gat strong, ol samting bilong antap, ol samting bilong daunbilo, na ol arapela samting God i bin wokim, olgeta dispela samting i no inap tekewe yumi long pasin laikim bilong God, em dispela pasin i stap long Krais Jisas, Bikpela bilong yumi.”—Rom 8:38, 39.

16. (a) Kingdom Bilong Mesaia em wanem samting? (b) Jehova i makim husat long mekim wok king long Kingdom?

¹⁶ God i stretim rot long Kingdom Bilong Mesaia bai mekim wok, na dispela i kamapim klia olsem God i laikim tru ol manmeri. Jehova i putim pinis dispela gavman long han bilong Pikinini bilong em husat i laikim tru ol manmeri, na i stret tru long em i stap King long dispela gavman. (Snd. 8:31) Taim lain 144,000 i mekim wok king wantaim Jisas long heven, ol bai tingim yet hevi i painim ol taim ol i stap man long graun. (Rev. 14:1) Taim Jisas i mekim wok autim tok, Kingdom i stap olsem nambawan bikpela samting em i skulim ol man long en. Em i skulim ol disaipel long beten olsem: “Papa bilong mipela long heven, nem bilong yu i mas i stap holi. Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Mat. 6:9, 10) Taim ol tok bilong dispela beten i kamap tru, planti blesing bai painim ol manmeri husat i bihainim tok bilong God!

17. Olsem wanem wok bos bilong Jisas i narapela kain long wok bos bilong ol man long graun?

¹⁷ Wok king bilong Jisas long heven i narapela kain tru long wok bos bilong ol man long graun. Wok bos bilong ol man i mekim na planti milion manmeri i dai long ol pait! Jisas i tingim tru ol manmeri bilong em na em i bihainim ol pasin bilong God, na em i givim bel moa yet long bihainim pasin laikim. (Rev. 7:10, 16, 17) Jisas i tok: “Yupela ol man i save hatwok nating na karim ol bikpela hevi, yupela kam long mi na bai mi givim nupela strong long yupela. Karim hap plang bilong mi na kisim skul long mi, long wanem, mi man bilong pasin isi na pasin daun, na yupela bai kisim nupela strong. Hap plang bilong mi i gutpela na samting mi askim yupela long karim i no hevi.” (Mat. 11:28-30) Dispela tok i strongim tru bilip bilong yumi!

18. (a) Kingdom Bilong God i mekim wanem ol samting kirap long taim em i stat long mekim wok? (b) Yumi bai skelim wanem ol askim long neks stadi?

¹⁸ Ol tok profet bilong Baibel i soim klia olsem Kingdom Bilong God i kirap mekim wok long heven taim Krais i kamap King long yia 1914. Kirap long dispela taim na i kam, God i bungim ol Kristen husat bai mekim wok king wantaim Jisas long heven, na tu, em i bungim “bikpela lain manmeri” husat bai abrusim bagarap na kisim laip long nupela taim. (Rev. 7:9, 13, 14) Hamas manmeri bai i stap olsem dispela bikpela lain manmeri? Husat bai winim mak long i stap olsem wanpela bilong ol dispela bikpela lain manmeri? Yumi bai kisim bekim bilong ol dispela askim long neks stadi.