Olsem wanem? Yu bin ritim gut ol tok bilong ol nupela Wastaua? Yu ken traim bekim ol dispela askim:

Taim pinis i kamap, wanem ol samting bai pinis?

Ol samting bai pinis olgeta em ol gavman bilong graun, woa na wansait pasin, ol lotu we i no bihainim lo bilong God na i no skulim gut ol man, na ol manmeri husat i no mekim laik bilong God.—5/1, p. 3-5.

Husat em Gok Bilong Magok em Buk Esekiel i stori long en?

Dispela nem i no makim Satan, nogat. Dispela nem i makim ol kantri i bung wantaim bilong pait long lain bilong God na pinisim ol. Dispela samting bai kamap bihain long traipela hevi tru i kirap.—5/15, p. 29-30.

Wanem 6-pela samting inap helpim man long stap amamas taim em i wok long kamap lapun?

Baibel i tokim yumi long (1) mekim pasin daun, (2) holim stretpela tingting, (3) holim gutpela tingting, (4) givim ol samting, (5) mekim pasin pren, na (6) tok tenkyu. Sapos man i bihainim ol dispela pasin, em bai stap amamas taim em i wok long kamap lapun.—6/1, p. 8-10.

Olsem wanem ol mirakel bilong Jisas i soim olsem em i gat pasin bilong givim ol samting?

Long weding i kamap long Kana, Jisas i wokim mirakel na tanim 380 lita wara i kamap wain. Long narapela taim, em i wokim mirakel na givim kaikai long 5,000 manmeri. (Mat. 14:14-21; Jon 2:6-11) Long dispela 2-pela taim, Jisas i bihainim pasin bilong Papa long givim ol samting.—6/15, p. 4-5.

Bilong wanem yumi inap mekim God i amamas maski yumi gat sin?

Ol kain man olsem Jop, Lot, na Devit, ol i bin mekim ol popaia. Tasol ol i laik mekim wok bilong God, na ol i sori long rong ol i mekim, na ol i senisim pasin bilong ol. God i orait long ol, olsem na God inap orait tu long yumi.—7/1, p. 12-13.

Yu ting olgeta memba bilong lotu giaman bai bagarap taim Bikpela Babilon i bagarap?

Ating nogat. Sekaraia 13:4-6 i stori olsem sampela pris pasto bai lusim lotu bilong ol na tok olsem ol i no memba bilong lotu giaman.—7/15, p. 15-16.

Wai na Barak i tok em bai i go pait sapos Debora i go wantaim em?

Barak em wanpela bilipman. Em i no askim God long givim em planti samting bilong pait, nogat. Barak i laik bai Debora, em wokmeri bilong God, i strongim em na ol soldia bilong em. (Het. 4:6-8; 5:7)—8/1, p. 13.

Wanem sampela samting em Kristen i ken tingim tingim?

Kristen i ken tingim tingim ol samting Jehova i wokim, na tok bilong God long Baibel, na pasin bilong beten, na ofa bilong Krais long baim bek yumi.—8/15, p. 10-13.

Taim yumi abrusim ol poroman nogut, hau bai dispela i helpim yumi long sait bilong painim poroman?

Yumi soim gutpela pasin long ol manmeri husat i no wanbilip. Tasol sapos yumi prenim wanpela i no dediket long God na bihainim ol lo bilong em, dispela i makim olsem yumi sakim tok bilong God. (1 Kor. 15:33)—8/15, p. 25.

Olsem wanem bilip bilong Pita i lus na bihain em i bilip gen?

Aposel Pita i bilip, olsem na em i wokabaut antap long wara na i go long Jisas. (Mat. 14:24-32) Tasol Pita i lukim bikpela win na ren na em i pret. Bihain, em i lukluk gen long Jisas, na em i larim Jisas i helpim em.—9/15, p. 16-17.

Aposel 28:4 i tok ol manmeri bilong Malta i ting aposel Pol em wanpela kilman. Bilong wanem ol i ting olsem?

Taim posin snek i kaikaim Pol, ating ol i kisim tingting kranki olsem Dike, em god meri bilong stretpela pasin, i panisim Pol.—10/1, p. 9.

Yumi kisim wanem skul long stori bilong Marta long larim planti wok i pulim tingting bilong em?

Wanpela taim, Marta i redim bikpela kaikai na dispela i pulim tingting bilong em. Jisas i tok susa bilong Marta i makim gutpela samting long mekim, na em i putim yau long tok bilong Jisas. Yumi no ken larim ol narapela samting i pasim yumi long mekim wok bilong God.—10/15, p. 18-20.