Famili bilong mi i stap long Tellancourt, em wanpela liklik ples long not is bilong Frans. Papa bilong mi i bilong Frans na mama i bilong Itali. Taim mi gat 8-pela krismas, mipela i go stap long wanpela taun long Rom, Itali. Long dispela hap, planti man i nogat wok mani. Olsem na famili bilong mipela i bungim hevi bilong mani. Dispela i mekim na planti taim papamama i kros pait.

Taim mi gat 15 krismas, mama i tokim mi long bung wantaim ol narapela na kamap pren bilong ol. Olsem na planti taim mi no stap long haus. I no longtaim na mi poroman wantaim ol poroman nogut. Wanpela taim, wanpela man i kam bungim mi na i luk olsem em i gat pasin bilong toktok gut long ol man. Tasol em i givim mi drak, na mi kisim, long wanem, mi laik bai ol narapela i tingim mi olsem man i bikpela pinis. I no longtaim na mi kamap man bilong kisim drak na mekim pasin pamuk. Planti taim ol man i mekim pasin sem long mi. Mi no tingim laip olsem bikpela samting moa, na mi no wari sapos mi stap laip o mi dai. Na tu, mi pilim olsem mi stap wanpis. Taim mi gat 16 krismas mi laik suasaid, olsem na mi dring wanpela botol wiski na kalap i go insait long wanpela raunwara. Dispela i mekim na mi hap indai, na mi slip tasol inap 3-pela de olgeta.

Mi wok strong long mekim ol samting bilong i stap amamas, tasol long wankain taim mi kamap man bilong pait na mekim pasin giaman. Mi save mekim pasin pamuk wantaim ol arapela, givim drak long ol long haus bilong ol, na stilim ol kago bilong ol i gat bikpela pe. Ol lain bilong mekim wok bisnis long ol drak i save givim mi ol drak bilong salim long ol man long Itali. Olsem na planti taim polis i save painim mi. Mi pilim olsem laip bilong mi i nogat as bilong en na mi no inap long bosim ol samting i kamap long mi. Maski i olsem, mi bilip olsem i gat risen na yumi stap laip. Mi beten long God na askim em long larim mi i stap amamas na bel isi inap wanpela yia.

Mi mekim wok bilong salim drak, olsem na mi bungim hevi long dispela. Em risen na taim mi gat 24 krismas, mi go stap long Inglan. Tasol paslain long mi go, mi visitim mama bilong mi. Mi kirap nogut long lukim wanpela  man, nem bilong em Annunziato Lugarà, i kam toktok wantaim mama long Baibel. * Mi pret bikos em man bilong pait na mekim nogut long ol arapela, olsem na mi askim em long risen na em i kam lukim mama. Em i tokim mi long ol bikpela senis em i mekim bilong kamap wanpela Witnes Bilong Jehova. Na em i tok long mi mas painim ol Witnes taim mi go kamap long Inglan. Mi wanbel long mekim olsem, tasol taim mi kamap long Inglan, kwiktaim mi bihainim gen ol pasin bilong mi long bipo.

Wanpela de, mi bungim wanpela Witnes husat i tilim nius Wastaua na Kirap! long wanpela bisi strit bilong London. Mi tingim promis bilong mi long Annunziato, olsem na mi askim em long stadi wantaim mi long Baibel.

Mi kirap nogut long save mi kisim long Baibel. Olsem, mi pilim tru tok bilong 1 Jon 1:9, em i tok: “God i save bihainim tok bilong em na mekim stretpela pasin, olsem na sapos yumi autim ol sin bilong yumi, em bai fogivim ol sin bilong yumi.” Dispela skripsa i kotim maus bilong bel bilong mi, long wanem, mi tingim ol pasin mi bihainim long bipo. I no longtaim na mi kirap long i go long ol miting long Haus Kingdom bilong Ol Witnes Bilong Jehova. Ol Witnes i amamas long bungim mi. Taim mi lukim gutpela pasin pren bilong ol, mi laik tru long bung wantaim dispela lain husat i pas gut olsem famili. Em samting mi bin laikim inap longpela taim.

I hatwok long mi lusim pasin bilong kisim drak na pasin pamuk, tasol mi pilim olsem i hatwok moa long senisim ol pasin bilong mi. Mi luksave olsem mi mas rispektim na mekim gutpela pasin long ol narapela, olsem na mi wok strong yet long lusim sampela pasin bilong mi. Na Jehova i helpim mi long mekim ol senis long i stap bilong mi. Mi stadi long Baibel inap 6-pela mun, na long 1997 mi kisim baptais olsem wanpela Witnes Bilong Jehova.

Bihain long mi baptais, mi marit long Barbara. Long dispela taim, em tu i kamap wanpela Witnes Bilong Jehova. Taim wanpela pren bilong mi long bipo i luksave long ol senis mi mekim, em tu i kirap stadi long Baibel. I no longtaim, em na susa bilong en i kamap Witnes. Bihain, susa bilong bubu meri bilong mi husat i winim 80 krismas i stadi long Baibel na kisim baptais paslain long em i dai.

Nau mi mekim wok olsem elda long wanpela kongrigesen bilong ol Witnes Bilong Jehova. Na mi na meri bilong mi i mekim wok autim tok fultaim long London. Mipela i skulim ol man i mekim tok Itali long tok bilong Baibel. Sampela taim, mi bel hevi long ol samting mi mekim long bipo, tasol Barbara i stap gutpela helpim bilong mi. Nau mi gat wanpela gutpela famili na Papa husat i laikim mi tru, em samting mi gat laik long en. Mi askim God long larim mi i stap amamas na bel isi inap wanpela yia, tasol em i givim mi planti samting moa!