Delphine em yumi stori long em long atikol paslain, em i save dring planti alkohol taim em i tingting planti. Baibel i no tambuim pasin bilong dring alkohol, tasol em i tok: “Yu no ken poroman wantaim ol man i save dring planti wain.” (Sindaun 23:20) Pasin bilong dring planti i mekim na ol man i kisim ol bikpela sik, ol i no pas gut wantaim ol narapela, na planti milion man i dai long olgeta yia. Planti bilong ol dispela hevi i no inap kamap sapos ol man i bihainim savetok bilong Baibel.

Delphine i bihainim tok bilong Baibel. Em i tok: “Mi luksave olsem alkohol i no pinisim hevi bilong tingting planti. Mi bihainim savetok i stap long Filipai 4:6, 7: ‘Yupela i no ken tingting planti long wanpela samting, . . . kamapim ol askim bilong yupela long God.’ Taim mi tingting planti na mi hatwok long slip, mi save beten askim Jehova long helpim mi. Mi tokim em long olgeta filings bilong mi; taim mi belhat, bel hevi, wari na tingting planti, na mi save askim em long helpim mi long painim rot bilong holim stretpela tingting. Long moning, mi save wok strong long daunim ol dispela filings. Pasin bilong beten long Jehova i helpim mi long putim tingting i go long ol samting mi gat na i no long ol samting mi no gat. Mi mekim disisen olsem mi no inap dring alkohol gen. Mi kisim bel isi we i narapela kain tru, olsem na mi no laik larim wanpela samting i tekewe dispela bel isi.”

Pasin pamuk em bikpela hevi we i save bagarapim tru tingting na filings bilong ol manmeri na mekim ol i stap bel hevi. Ol stiatok bilong Baibel inap helpim yumi long abrusim ol pasin we inap kamapim pasin pamuk—olsem tok gris na lukim ol piksa bilong ponografi. Yangpela man Samuel i tok: “Em isi tru long tok gris wantaim narapela. Maski mi no laikim wanpela meri, mi inap luksave olsem em i laikim mi, na dispela i kirapim mi long tok gris wantaim em.” Planti taim ol narapela i sutim tok olsem Samuel em man bilong tok gris—maski em i no min long mekim olsem—olsem na long laik bilong em yet em i mekim tok gris i kamap pasin bilong em. Tasol bel bilong em i kotim em. Long nau em i tok: “Dispela pasin i nogut tru bikos em i kirapim mi long tingim laik bilong mi yet.”

Samuel i ritim wanpela atikol bilong ol yangpela long websait jw.org. Em i tingim tok bilong Sindaun 20:11: “Yumi lukim pasin bilong wanpela man na yumi ken save, em i gutpela na stretpela man o em i man nogut. Na long wankain pasin tasol, yumi ken save long ol pikinini tu.” Olsem wanem dispela tok i helpim Samuel? Em i luksave olsem pasin bilong tok gris i no stret. Long nau em i tok: “Sapos wanpela yangpela i bihainim pasin bilong tok gris long nau, em i no inap stap gutpela poroman marit long bihain. Mi tingim olsem meri bilong mi bai bel hevi sapos em i lukim mi tok gris wantaim narapela meri. Mi luksave olsem dispela pasin bai bagarapim sindaun bilong mi. Em isi tru long tok gris, tasol dispela pasin i no stret.” Samuel i senisim pasin bilong em. Em i sakim pasin bilong tok gris, olsem na em inap abrusim pasin pamuk.

Antonio i bihainim pasin doti: Oltaim em i lukim ol piksa bilong ponografi. Maski em i maritim meri em i laikim tru, planti taim em i lukim ponografi. Em i tingim tok bilong 1 Pita 5:8 na dispela i helpim em. Skripsa i tok: “Yupela i mas holimpas gutpela tingting na was i stap. Satan, dispela birua bilong yupela, em i raun olsem wanpela laion i singaut strong na i painim ol man bilong kaikai.” Antonio i tok: “Ol piksa bilong ponografi i stap long olgeta hap, na ol dispela piksa inap pas strong long tingting. Dispela ves i helpim mi long tingim man i kamapim ol dispela traim. Mi mas hariap long tingim olsem ol dispela piksa nogut i kam long Satan. Nau mi save olsem Jehova tasol inap helpim mi long ‘holimpas gutpela tingting na was i stap’ na bai mi inap long sakim ol dispela traim na lukautim tingting, bel, na marit bilong mi.” Antonio i kisim helpim em i nidim, na em i lusim dispela pasin nogut. Long dispela rot, em i abrusim ol bikpela hevi.

Yumi inap luksave olsem Baibel i kamapim ol savetok we inap helpim yumi long abrusim ol bikpela hevi. Tasol olsem wanem long ol hevi i stap pinis wantaim yumi na i hatwok long pinis? Yumi ken skelim hau Tok Bilong God inap helpim yumi long stretim ol dispela kain hevi.