Jisas em i King bilong Kingdom Bilong God.

Luk 1:31-33: “Yu mas givim nem Jisas long em. Na em bai i gat biknem na ol bai kolim em Pikinini bilong God Antap Tru. Na God Jehova bai givim em sia king bilong papa bilong em Devit, na em bai stap King long lain bilong Jekop inap oltaim oltaim, na bai i no gat pinis bilong Kingdom bilong em.”

Kingdom em bikpela tok Jisas i bin autim tok long en.

Matyu 9:35: “Jisas i go raun long olgeta bikpela taun na liklik taun. Em i skulim ol manmeri insait long ol sinagog bilong ol na autim gutnius bilong Kingdom na oraitim olgeta kain sik bilong ol.”

Jisas i tokim ol disaipel long wanpela mak bilong helpim ol long save klostu nau Kingdom bai kam.

Matyu 24:7: “Wanpela kantri bai pait long narapela kantri na wanpela kingdom bai pait long narapela kingdom. Na bai i gat taim bilong ol bikpela hangre na ol guria bai kamap long narapela narapela hap.”

Long nau, ol disaipel bilong Jisas i autim tok bilong Kingdom long olgeta hap bilong graun.

Matyu 24:14: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.”