“Yu Man Bilong Harim ol prea, olsem na olgeta manmeri i mas i go long yu.”—Buk Song 65:2.

Sampela man i beten bikos ol i tok beten i mekim ol i pilim gutpela maski ol i no bilip olsem i gat wanpela i putim yau i stap. Tasol beten i no samting yumi mekim bilong pilim gutpela na bai yumi ken karim hevi na em tasol, nogat. Baibel i tokim yumi olsem “Jehova a i save stap klostu long ol manmeri i save singaut long em i helpim ol, em ol manmeri i save bihainim pasin i tru na i singaut long em. . . . Em i save harim krai bilong ol long kisim helpim.”—Buk Song 145:18, 19.

So yumi ken save tru olsem, Jehova God i save harim ol beten bilong ol manmeri i lotuim em. Long pasin laikim em i tok: “Yupela bai singaut long mi na kam klostu long mi long rot bilong beten, na mi bai harim beten bilong yupela.”—Jeremaia 29:12.

“Oltaim holim strong pasin bilong beten.” —Rom 12:12.

Baibel i kirapim yumi long “beten oltaim” na “beten long olgeta kain taim.” Em i klia tru olsem Jehova God i laik bai yumi beten long em.—Matyu 26:41; Efesus 6:18.

Wai na God i laik bai yumi beten long em? Tingim: Papa i save amamas taim liklik pikinini bilong em i askim em long helpim em. Tru, ating papa i save pinis long samting em pikinini i nidim o pilim, tasol taim em i harim pikinini i askim em long helpim em, dispela i soim papa olsem pikinini i trastim em na pas gut wantaim em. Olsem tasol, taim yumi beten long Jehova God, yumi soim em olsem yumi trastim em na yumi laik pas gut wantaim em.—Provep 15:8; Jems 4:8.

“God i save wari long yupela, olsem na yupela i mas putim olgeta hevi bilong yupela long han bilong em.”—1 Pita 5:7.

God i laik bai yumi beten long em bikos em i laikim na tingim tru yumi. Em i save long olgeta samting yumi save tingting planti na wari long en, na em i laik helpim yumi.

Long laip olgeta bilong em, King Devit i save beten long Jehova God i helpim em, na em i save tokim God long ol tingting na filings bilong em. (Buk Song 23:1-6) God i pilim olsem wanem long Devit? God i laikim Devit na putim yau long planti beten bilong em. (Aposel 13:22) Olsem tasol, God i save harim ol beten bilong yumi bikos em i tingim tru yumi.

Em tok bilong wanpela bilong ol man i bin raitim Buk Song long Baibel. Em i save tru olsem God i save harim ol beten bilong em na dispela i helpim em tru. Em i pilim olsem em i pas gut wantaim God na dispela i strongim em long winim ol hevi na daunim bel sori.—Buk Song 116:1-9.

Taim yumi save olsem God i save putim yau long ol beten bilong yumi, yumi bai wok yet long beten long em. Tingim ekspiriens bilong Pedro, em i stap long noten Spen. Pikinini man bilong em i gat 19 krismas i dai long wanpela eksiden long rot. Pedro i bel hevi tru na em i kamapim olgeta tingting bilong em long God, na em i beten planti taim bilong kisim bel isi na helpim. Wanem samting i kamap? Pedro i tok: “Jehova i harim ol beten bilong mi, na long rot bilong ol wanbilip Kristen em i mekim gut bel bilong mi na meri bilong mi na sapotim mipela.”

Tru, ol beten i no mekim na pikinini man bilong Pedo i stap laip gen, nogat, tasol ol i helpim em na famili bilong em. Meri bilong em, María Carmen, i tok: “Ol beten i helpim mi long karim hevi bilong bel sori. Mi save olsem Jehova God i kliagut long mi bikos taim mi beten long em, mi pilim bel bilong mi i stap isi.”

Baibel na ol samting planti man i pilim long laip bilong ol i soim olsem God i save putim yau long ol beten. Tasol em klia tu olsem God i no save harim olgeta beten. Wai na God i harim sampela beten na sampela nogat?