Wai Pasin Bilong Heitim Narapela i No Pinis?
Wai pasin bilong heitim ol narapela i stap long olgeta hap bilong graun na i no gat pinis bilong en? Bilong save gut long risen bilong en, yumi mas kliagut long pasin bilong heitim narapela em wanem samting, wai ol manmeri i kirap heitim narapela, na hau dispela pasin i go bikpela.
Pasin Bilong Heitim Narapela Em Wanem Samting?
Pasin bilong heitim narapela i olsem man i no laikim tru o birua tru long narapela o wanpela lain. Dispela filings i no samting i stap sotpela taim tasol, nogat, em i save stap i go i go.
AS NA OL MAN I KIRAP HEITIM NARAPELA
I gat planti as na ol man i heitim ol narapela. Ol i heitim ol narapela, i no bikos long samting ol i mekim, tasol bikos long ol i husat. Ol i heitim ol narapela bikos ol i tingim ol olsem ol i lain nogut, lain bilong bagarapim narapela, o ol i no inap senis na kamap gutpela. Ating ol i tingim ol olsem lain i no gat nem, ol i man bilong bagarapim ol narapela, o ol i save kamapim ol hevi. Ol man husat i heitim ol narapela, ol yet i karim hevi long ol narapela i mekim nogut long ol, mekim pasin i no stret long ol, o wanpela samting i kamap long ol i mekim na ol i kisim dispela pasin.
OLSEM WANEM PASIN BILONG HEITIM NARAPELA I GO BIKPELA
Man inap heitim narapela maski em i no bungim em. Olsem, planti taim man inap kisim wankain tingting olsem famili o pren bilong ol long wanpela lain. So sapos sampela long famili o pren i heitim wanpela lain, i no longtaim olgeta insait long famili bai heitim dispela lain.
Taim yumi kliagut long hau pasin bilong heitim ol narapela i go bikpela, bai yumi luksave long wai planti man moa i heitim ol narapela. Tasol bilong lusim dispela pasin yumi mas save long wanem ol samting i as bilong pasin bilong heitim narapela. Baibel i kamapim klia ol dispela samting.
BAIBEL I SOIM OL SAMTING I AS BILONG PASIN BILONG HEITIM NARAPELA
OL MAN I NO KIRAPIM PASIN BILONG HEITIM NARAPELA. Dispela pasin i kirap taim wanpela ensel long heven, em nem bilong em Satan, dispela Devil, i bikhet long God. Devil “em i man bilong kilim man i dai” long taim em i kirap long bikhet. Em i “man bilong giaman na papa bilong pasin giaman,” na em i wok yet long kirapim ol man long heitim na mekim nogut long ol narapela. (Jon 8:44; 1 Jon 3:11, 12) Babel i kolim em olsem man nogut, man bilong belhat, na man bilong mekim nogut long ol narapela.—Jop 2:7; Revelesen 12:9, 12, 17.
EM ISI LONG OL MAN I NO GUTPELA OLGETA LONG HEITIM NARAPELA. Namba wan man Adam i bihainim pasin bilong Satan na mekim sin. Olsem na olgeta man i kisim sin na ol i no gutpela olgeta. (Rom 5:12) Fes pikinini man bilong Adam, em Kein, i heitim brata bilong em na kilim em i dai. (1 Jon 3:12) Tru, planti man i save soim pasin laikim na pasin sori. Tasol bikos yumi gat sin, planti man i save tingim ol yet, mangal, na mekim pasin antap—em ol pasin i kirapim man long heitim narapela.—2 Timoti 3:1-5.
MAN INAP HEITIM MAN HUSAT I NO WANKAIN OLSEM EM. Yumi stap long graun we i kirapim ol man long heitim ol narapela long rot bilong i no marimari long narapela, na mekim ol pasin we i bagarapim ol narapela. Pasin bilong man i no laikim narapela i no wankain olsem em, birua long man bilong narapela lain, mekim tok i bagarapim narapela, pasin buli, na bagarapim ol samting bilong narapela i stap bikos “dispela graun olgeta i stap long han bilong Satan,” dispela Devil.—1 Jon 5:19.
Baibel i no stori tasol long ol samting i as bilong pasin bilong heitim narapela, nogat. Em i stori tu long rot bilong stretim dispela hevi.
