Sapos wanpela pren bilong yumi i gat sik bilong tingting, ating yumi pilim olsem no gat rot bilong helpim em. Tasol yumi ken soim olsem yumi tingim tru pren bilong yumi, long rot bilong helpim em long karim hevi bilong dispela sik.

“Putim yau kwik long harim tok.”​—JEMS 1:19.

Nambawan rot bilong helpim pren bilong yu, em long putim gut yau taim em i laik toktok. No ken ting olsem yu mas bekim olgeta tok em i mekim. Soim olsem yu putim gut yau taim em i toktok, na tingim em tru. Traim long kliagut long filings bilong em, na no ken mekim tok i daunim em. Tingim olsem sampela taim em bai mekim ol tok we em i no min long mekim we bihain em bai rigret long en.​—Jop 6:2, 3.

“Mekim gut bel bilong ol man i bel hevi.”​—1 TESALONAIKA 5:14.

Ating pren bilong yu i wari na tingting planti, o ating em i pilim olsem em i no gutpela. Maski sapos yu no save wanem tok yu bai mekim long em, yu ken mekim isi bel bilong em na strongim em taim yu tokim em olsem yu tingim em tru.

“Trupela pren i save soim pasin laikim long olgeta taim.”​—PROVEP 17:17.

Tokim em olsem yu laik helpim em. No ken ting yu save long ol samting bilong helpim em, i gutpela yu askim em long wanem ol samting yu ken mekim bilong helpim em. Sapos pren bilong yu i hatwok long tokim yu long ol samting em i nidim, traim tokim  em long sampela samting yutupela i ken mekim wantaim, kain olsem go wokabaut wantaim. O yu ken tokim em olsem yu bai go baim ol samting bilong em long stua, klinim haus bilong em, o mekim ol narapela samting bilong helpim em.​—Galesia 6:2.

“No les kwik.”​—1 TESALONAIKA 5:14.

I no olgeta taim pren bilong yu bai amamas long toktok. Yu ken tokim em olsem yu bai amamas long putim yau taim em i laik toktok. Pren bilong yu i gat sik olsem na sampela taim em inap mekim ol tok o pasin we i bagarapim bel bilong yu. Ating em bai kenselim ol plen em i wokim wantaim yu o em bai bel hevi o kros. Taim yu helpim em, no ken les kwik na tingim olsem em i gat sik.​—Provep 18:24.

“Mi mekim ol samting na bai pren bilong mi i ken pilim olsem em inap toktok wantaim mi. Maski mi no gat rot bilong stretim ol hevi bilong em, oltaim mi save redi long putim yau taim em i kamapim bel bilong em. Sampela taim em i nidim wanpela long putim yau tasol taim em i toktok na dispela i mekim em i pilim gutpela.” Farrah, a pren bilong em i gat sik dipresen na em i save tingting planti na wari na dispela i mekim na em i no save laik kaikai (eating and anxiety disorders).

“Wanpela pren bilong mi i save mekim gutpela pasin long mi na strongim mi. Em i redim naispela kaikai na singautim mi i go kaikai long haus bilong em. Em i soim olsem em i laikim mi na dispela i mekim na i isi long mi kamapim filings bilong mi long em. Dispela i strongim tru mi!”​—Ha-eun, em i gat sik dipresen.

“Pasin bilong i no les kwik i bikpela samting. Taim meri bilong mi i mekim sampela samting i mekim mi bel hevi, mi save tokim mi yet olsem sik bilong em i as na em mekim olsem, em i no pasin tru bilong em. Dispela i helpim mi long no ken belhat long em, na mi mas tingim em na mekim gutpela pasin long em.”​—Jacob, meri bilong em i gat sik dipresen.

“Meri bilong mi i bin sapotim mi gut na mekim isi bel bilong mi. Taim wari na tingting planti i daunim mi tru, em i no save fosim mi long mekim ol samting we mi no laik mekim. Sampela taim dispela i makim olsem em i no inap mekim ol samting we em i laik tru long mekim. Em i spesel tru long mi bikos em i no save tingim em yet na em i redi long mekim ol samting bilong helpim mi.​—Enrico, em i gat sik bilong tingting planti na wari.