YU WOKIM DISISEN LONG SAMTING BAI PAINIM YU BIHAIN? Sampela manmeri i bilip olsem God i makim ol samting bai painim ol long bihain, ol disisen bilong ol i no inap kontrolim laip bilong ol. Taim ol i no winim ol mak ol i putim, ol i ting dispela i makim olsem samting ol i laik mekim i no stret. Ol i tok, “God i makim pinis olsem mi no inap winim mak!”

Sampela i bel hevi taim ol i lukim olsem i no gat gutpela samting i kamap long dispela graun i pulap long pasin nogut. Ating ol i laik kisim gutpela sindaun—ol i lukim tasol woa, pasin bilong pait na bagarapim narapela, hevi bilong win na ren, na ol sik i mekim na ol i no inapim ol mak ol i putim. Ol i askim ol yet, ‘Wai na mi mas wari long ol dispela samting?’

Em tru olsem ol samting i painim yumi inap mekim sampela samting long ol plen bilong yumi. (Saveman 9:11) Tasol taim yu wokim disisen long laip bilong yu long bihain, orait yu inap makim stret samting yu laikim. Baibel i tok ol disisen bilong yu bai stiaim ol samting bai painim yu bihain. Skelim ol dispela tok.

Moses em lida bilong lain Israel long bipo, em i tokim ol manmeri em klostu ol bai go insait long Graun Bilong Promis olsem: “God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. Na bai mi singautim heven na graun long lukim yupela na save long wanem rot yupela i makim. Tasol mi laikim yupela i mas bihainim rot bilong i stap gut. Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim.”—Lo 30:15, 19, 20.

“God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim.”—Lo 30:19

Yes! God i kisim bek lain Israel long wok kalabus long Isip na bai ol inap stap fri na amamas long Graun Bilong Promis. Tasol ol i mas mekim sampela samting bilong kisim ol dispela blesing. Ol i mas “bihainim rot bilong i stap gut.” Ol ‘i mas laikim tru God, harim tok, na bel tru long em oltaim.’

Wankain samting bai painim yu long nau, ol disisen bilong yu bai makim ol samting bai painim yu long bihain. Taim yu wokim disisen long laikim God, harim tok bilong em, na bel tru long em, i olsem yu makim rot bilong i stap gut—laip oltaim long paradais long graun. Tasol wanem sampela samting moa yu mas mekim?

Pasin laikim em nambawan pasin bilong God. Aposel Jon i tok: “God em i pasin laikim.” (1 Jon 4:8) Em risen na taim ol i askim Jisas long wanem lo i nambawan na i winim ol arapela lo, em i tok: “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu.” (Matyu 22:37) Pasin laikim i mas kirapim yu long pas gut wantaim God Jehova, na i no pasin bilong pret o bihainim tasol tok bilong ol man. Bilong wanem yumi mas mekim disisen long laikim God?

Pasin laikim bilong Jehova long ol man i wankain long pasin bilong ol papamama long laikim ol pikinini. Maski ol papamama i gat sin, pasin laikim i kirapim ol long skulim, strongim, sapotim, na stretim pikinini bikos ol i laik bai ol i stap amamas na kisim gutpela sindaun. Papamama i laik bai pikinini i gat wanem tingting long ol? Ol i laik bai pikinini i laikim ol na bihainim olgeta tok ol i givim na dispela bai helpim pikinini. Olsem na yumi inap ting Papa bilong yumi long heven em man i gutpela olgeta, em i laik bai yumi tenkyu long ol samting em i mekim bilong helpim yumi.

Long taim ol man i raitim Baibel, planti taim dispela tok “harim” i makim pasin bilong “bihainim tok.” Dispela i gat wankain mining taim yumi tokim pikinini, “Harim tok bilong papamama.” Bilong harim tok bilong God, yumi mas kisim save na bihainim tok bilong em. Tru yumi no inap harim God i toktok long yumi, tasol em i toktok long yumi taim yumi ritim na bihainim tok bilong em long Baibel.—1 Jon 5:3.

Jisas i laik kamapim klia olsem em i bikpela samting long harim tok bilong God, na em i tok: “Man i no inap stap laip long bret tasol, nogat. Em i mas bihainim tu olgeta tok i kamap long maus bilong Jehova.” (Matyu 4:4) Wankain olsem kaikai tru em yumi mas kisim, yumi mas kisim save long God, em i bikpela samting moa. Bilong wanem? Saveman King Solomon i tok: “Gutpela tingting i olsem mani, na i save helpim yumi long taim nogut. Tasol gutpela tingting na save i winim mani, na i helpim yumi moa yet na yumi stap gut olgeta.” (Saveman 7:12) Gutpela tingting na save i kam long God inap lukautim yumi na helpim yumi long mekim gutpela disisen long nau na bai yumi inap kisim laip oltaim long bihain.

Tingim tok piksa bilong Jisas long atikol i kamap paslain, em i tok: “Geit i go long laip em i liklik na rot i go long dispela hap em i liklik tru. Na wan wan manmeri tasol i save lukim na bihainim dispela rot.” (Matyu 7:13, 14) Bilong wokabaut long dispela kain rot, yumi mas kisim helpim na stap klostu long wanpela gaid husat i save gut long dispela hap na bai yumi inap kamap long ples yumi laik go long en—laip oltaim. Olsem na i gat gutpela risen na yumi mas stap klostu long God. (Song 16:8) Yumi bai mekim olsem wanem?

Long olgeta de i gat planti samting yumi mas mekim, na planti moa samting em yumi laik mekim. Ol dispela samting inap pulim taim bilong yumi na yumi no mekim ol samting God i laik yumi mas mekim. Em risen na Baibel i tok: “Yupela i mas was gut tru long wokabaut bilong yupela. Yupela i no ken wokabaut olsem ol man i no gat savetingting, nogat, yupela i mas wokabaut olsem ol man i gat savetingting. Yupela i mas yusim gut taim, long wanem, nau em i taim nogut.” (Efesus 5:15, 16) Yumi stap klostu long God taim yumi tingim olsem pasin pren bilong yumi wantaim em i bikpela samting long laip bilong yumi.—Matyu 6:33.

Maski yu no inap senisim ol samting i kamap long bipo, yu inap mekim disisen long gutpela samting bai kamap long yu na famili bilong yu. Baibel i tokaut olsem Papa bilong yumi long heven, God Jehova, i laikim tru yumi na em i tokim yumi long ol samting em i laik yumi mas mekim. Tingim tok bilong profet Maika:

“Bikpela i tokim yumi pinis long ol gutpela pasin, na em i laik bai yumi mekim pasin olsem tasol. Yumi mas bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim God bilong yumi, na bihainim em wanpela tasol.”—Maika 6:8.

Yu bai bihainim tok bilong Jehova na wokabaut wantaim em na kisim ol blesing bilong oltaim oltaim we em i laik givim long yu long bihain? Yu yet i ken mekim disisen!