Ol man bai autim gutnius bilong Kingdom Bilong God long olgeta hap olsem Jisas i tok profet. (Matyu 24:14) Buk Daniel long Baibel i tokim yumi olsem dispela Kingdom, em gavman bilong God. Sapta 2 bilong Daniel i stori long wanpela tok profet long kingdom o wok gavman bilong ol man, kirap long Babilon bilong bipo i kam inap long taim bilong yumi. Em i tok profet long samting bai kamap bihain, ves 44 i tok:

“God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”

Dispela tok profet na ol narapela tok profet bilong Baibel i tok Kingdom Bilong God bai senisim wok bos bilong ol man na bringim gutpela sindaun long ol man long graun. Kingdom Bilong God bai kamapim wanem ol samting? Hia em sampela gutpela promis bai kamap tru.

• NOGAT WOA

  Song 46:9: “[God] i save mekim i dai pait long olgeta hap graun. Em i save brukim olgeta banara na spia, na em i save kukim ol hap plang long paia.”

  Ol man i yusim mani na save bilong ol long wokim ol samting bilong pait, tasol tingim sindaun bilong ol man bai olsem wanem sapos ol i yusim ol dispela samting bilong helpim ol manmeri na i no kilim ol! Dispela promis bai kamap tru aninit long Kingdom Bilong God.

• NOGAT SIK

  Aisaia 33:24: “I no gat man i stap long Jerusalem bai i tok olsem, ‘Mi gat sik.’”

  Tingim wanpela taim bai kamap na no gat man bai kisim sik bilong lewa, kensa, malaria, na ol narapela sik. Bai i no gat moa haus sik na ol marasin. Gutpela helt—em samting bai painim ol man long bihain.

• KAIKAI BAI PULAP

  Song 72:16: “Planti rais na wit samting i ken kamap long ol gaden bilong ol manmeri, inap olsem i save kamap long Lebanon.”

  Graun bai kamapim planti kaikai inap long olgeta man, na olgeta inap kisim na kaikai. Ol man bai i no hangre na sot long kaikai.

• NOGAT PEN, KRAI, NA DAI

  Revelesen 21:4: “[God] bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”

   Dispela i makim olsem laip oltaim bai gutpela olgeta long paradais long graun! Em samting Krieta bilong yumi i gat pasin laikim, God Jehova, i tok promis long mekim.

Yu ting olgeta dispela promis i gutpela tumas na i no inap kamap tru? Maski planti man i wanbel olsem ol samting Baibel i tok promis na stori long en, em ol samting ol i laik tru long lukim, i gat sampela risen na planti man i pilim olsem i hatwok long bilip long ol manmeri bai stap oltaim. Yumi kirap nogut long dispela bikos i no gat wanpela man i bin i gat kain sindaun olsem na bai em i stori long yumi.

Ol man i stap kalabus long sin na dai na karim pen na hevi inap longpela taim, na planti manmeri i ting olsem em ol nomol samting long laip bilong yumi. Tasol dispela i narakain long tingting Krieta, God Jehova, i gat taim em i wokim yumi.

Bilong helpim yumi long bilip tru long olgeta samting God i tok promis long kamapim, God i tok: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”—Aisaia 55:11.

Baibel i stori long Jehova olsem God husat “i no inap giaman.” (Taitus 1:2) God i tok promis long olgeta dispela gutpela samting bai kamap long bihain, olsem na yumi ken askim yumi yet: Tru tru ol manmeri bai stap oltaim long Paradais long graun? Yumi mas mekim wanem bilong kisim ol dispela blesing? Long ol atikol i kamap bihain long dispela magasin, yu bai kisim ol gutpela bekim long ol dispela askim.