GUTPELA SAMTING TRU! Krieta bilong yumi i tok promis long givim yumi laip oltaim long graun. Planti i hatwok long bilipim dispela tok. Ol i tok, ‘Wanpela taim olgeta man bai dai. Em samting i save painim yumi olgeta, yumi stap laip na dai.’ Sampela i bilip olsem yumi bai stap oltaim, tasol i no long dispela graun. Ol i tok yu inap kisim laip oltaim bihain long yu dai na go long heven. Yu gat wanem tingting?

Paslain long yu bekim ol dispela askim, tingim bekim Baibel i givim long dispela 3-pela askim: God i wokim yumi i narakain, na olsem wanem dispela i soim ol yia bilong yumi long i stap laip? Wanem laik bilong God taim em i wokim dispela graun na ol manmeri? Olsem wanem dai i painim yumi olgeta?

Long olgeta samting God i wokim long dispela graun, ol man i narakain tru. Baibel i tok God i wokim ol manmeri olsem “[em] yet.” (Stat 1:26, 27) Dispela i makim wanem? Em i makim olsem yumi ol man inap kamapim ol pasin bilong God, olsem pasin laikim na bihainim stretpela pasin.

Na tu, yumi inap wokim tingting long wanem samting i gutpela na wanem samting i nogut, na yumi laik kisim save long God na pas gut wantaim em. Em risen na yumi inap tok tenkyu long man i bin wokim gut heven na graun, na ol samting yumi lukim, olsem ol piksa na musik. Bikpela samting moa, ol man inap lotuim Krieta. Ol dispela pasin i mekim na yumi man i narakain tru long ol narapela samting i gat laip long graun.

Yu ting God inap givim yumi ol gutpela pasin na yumi inap kamapim na mekim ol dispela pasin i kamap gutpela moa sapos em i laik bai yumi stap sampela yia tasol? Stretpela save em olsem, God i givim ol dispela gutpela pasin bambai yumi inap stap amamas oltaim long dispela graun.

Sampela i tok, em i no laik bilong God long ol manmeri bai stap oltaim long graun. Ol i ting dispela graun i bilong stap sotpela taim tasol, em ples we God bai skelim ol manmeri na makim husat bai stap oltaim long heven wantaim em. Sapos dispela tingting i tru, yu ting dispela i makim olsem God i as bilong ol pasin nogut na hevi i pulap long graun? Dispela tok bai i no stret wantaim laik bilong God. Baibel i tok long God olsem: “Oltaim em i save bihainim tok bilong en na em i no save  giaman. Na pasin bilong en i gutpela na stretpela tasol.”—Lo 32:4.

Baibel i kamapim klia laik bilong God long pastaim na i tok: “Heven em i ples bilong God tasol, na em i givim graun long yumi manmeri.” (Song 115:16) Yes, God i wokim dispela graun i nais tru, em ples ol man bai stap oltaim long en, na em i putim olgeta samting yumi nidim bilong i stap laip inap oltaim oltaim.—Stat 2:8, 9.

“Heven em i ples bilong God tasol, na em i givim graun long yumi manmeri.”—Song 115:16

Baibel i kamapim klia samting God i tingting pinis long mekim long ol manmeri. Em i tokim namba 1 man na meri long “kamap planti na i go sindaun long olgeta hap bilong graun na bosim olgeta samting i stap long en.” (Stat 1:28) Em gutpela blesing long ol inap lukautim na skruim Paradais i go long olgeta hap bilong graun! Laip em Adam na Iv na ol pikinini bilong ol bai kamap bihain i wet long kisim, em laip oltaim long graun na i no pe long heven.

Bilong wanem yumi save dai? Baibel i kamapim klia olsem wanpela pikinini spirit bilong God, em bihain ol i kolim em Satan, em i laik bagarapim samting God i tingting long mekim long gaden Iden. Em i mekim wanem samting?

Satan i giamanim namba 1 papamama bilong yumi, Adam na Iv, long bihainim em na bikhet long God. Taim Satan i tok God i pasim gutpela samting long ol—long stap fri long makim wanem samting i gutpela na wanem samting i nogut—tupela i wokim tingting long bihainim Satan na givim baksait long God. I no longtaim na ol i dai olsem God i bin tokim ol. Ol i lus long kisim gutpela blesing bilong i stap oltaim long Paradais long graun.—Stat 2:17; 3:1-6; 5:5.

Pasin bikhet bilong Adam na Iv i givim hevi long olgeta manmeri i kam inap long nau. Baibel i tok: “Long rot bilong wanpela man [Adam] tasol sin i kamap long graun. Na sin i bringim dai i kam. Na long dispela rot dai i painim olgeta manmeri.” (Rom 5:12) Yumi save dai bikos yumi kisim sin long tumbuna papamama bilong yumi, na dispela i no samting God i makim long painim yumi.

Pasin bikhet long Iden i no senisim tingting bilong God long laik bilong em long pastaim long ol man na long graun. Pasin laikim na stretpela pasin bilong God i kirapim em long stretim rot na bai yumi inap lusim kalabus bilong sin na dai, em yumi bin kisim long Adam na Iv. Aposel Pol i tok: “Pe bilong sin em dai, tasol presen God i givim em laip oltaim long rot bilong Krais Jisas, Bikpela bilong yumi.” (Rom 6:23) Long pasin laikim, God “i givim dispela Pikinini tru [Jisas Krais] bilong en long ol bai olgeta man husat i bilip long em ol inap abrusim bagarap na kisim laip oltaim.” (Jon 3:16) Taim Jisas i redi long givim em yet olsem pe bilong baim bek man, em i helpim yumi long kisim gen ol samting Adam i lusim. a

Klostu nau promis bilong God long kamapim paradais long graun bai kamap tru. Yu inap kisim ol dispela gutpela blesing sapos yu bihainim tok bilong Jisas: “Yupela i mas go insait long liklik geit, long wanem, rot i go long bagarap i bikpela na i op tumas, na planti manmeri i bihainim dispela rot na i go. Tasol geit i go long laip em i liklik na rot i go long dispela hap em i liklik tru. Na wan wan manmeri tasol i save lukim na bihainim dispela rot.” (Matyu 7:13, 14) Tru tumas, ol disisen yu mekim long nau bai helpim yu long kisim laip long bihain. Bai yu mekim wanem?