SAPOS wanpela yu laikim tru i dai, ating yu tu bai i gat ol dispela filings, yu bel hevi tru, na pilim olsem yu stap wanpis na i no gat helpim. Na tu, ating yu belhat, bel hevi, na pret. Ating bai yu tingting olsem i gat risen long stap yet, o nogat.

Pasin bilong krai sori i no makim olsem yu no gat strong. Em i makim olsem yu laikim tru dispela man. Tasol, yu ting yu inap painim rot bilong daunim krai sori bilong yu?

Yu inap ting bel hevi bilong yu i no inap pinis, tasol ol dispela tok inap mekim gut bel bilong yu:

YU NIDIM TAIM LONG KRAI SORI

Olgeta man i no save krai sori long wankain pasin o lusim wankain taim long krai sori. Maski i olsem, krai inap helpim yu long daunim pen. Vanessa, em yumi bin stori long en, i tok: “Mi krai tasol; mi mas rausim bel hevi bilong mi.” Sofía, em sista bilong em i dai wantu, i tok: “Mi pilim bikpela pen taim mi tingim ol samting i kamap, i olsem mi opim na klinim wanpela sua i gat blut na susu long en. I hatwok tru long karim dispela pen, tasol dispela bai helpim sua long drai.”

KAMAPIM TINGTING NA FILINGS BILONG YU

Em tru, sampela taim yu pilim olsem yu laik stap wanpis. Tasol krai sori em bikpela hevi we yu yet i no  inap karim. Jared i gat 17 krismas taim papa i dai, i tok: “Mi kamapim filings bilong mi long ol narapela. Mi no save sapos ol i klia long tok bilong mi, tasol mi amamas olsem mi inap kamapim tingting bilong mi.” Janice, em yumi stori long fes atikol, i kamapim narapela gutpela helpim: “Taim mi toktok wantaim ol narapela, mi kisim bel isi tru. Mi pilim olsem ol i klia long tingting bilong mi, na mi no pilim olsem mi stap wanpis.”

KISIM HELPIM

Wanpela dokta i tok: “Man husat i bel hevi sapos em i larim ol pren na wanblut i helpim em long taim bel hevi i kamap nupela, planti taim em i isi long karim na winim hevi bilong krai sori.” Tokim ol pren long samting ol inap mekim bilong helpim yu; ol i laik helpim, tasol ating ol i no save hau.—Provep 17:17.

GO KLOSTU LONG GOD

Tina i tok: “Taim man bilong mi i dai wantu tasol long sik kensa, mi no inap toktok moa wantaim em, so mi tokim God long olgeta samting! Long kirap bilong olgeta wan wan de, mi save askim em long helpim mi long mekim ol nomol samting bilong de. God i helpim mi long planti rot na mi stori long sampela tasol.” Tarsha i gat 22 krismas taim mama bilong em i dai, em i tok: “Baibel ritim em samting i givim bel isi long mi long olgeta de. Baibel ritim i helpim mi long tingim wanpela samting we inap strongim bel bilong mi.”

PIKSAIM KIRAP BEK LONG TINGTING

Tina i tok moa: “Pastaim, hop bilong kirap bek i no mekim isi bel bilong mi bikos mi nidim man bilong mi—ol pikinini i nidim papa bilong ol—long dispela taim. Tasol nau, 4-pela yia bihain, mi holimpas strong hop bilong kirap bek. Dispela hop i helpim mi long olgeta samting. Mi piksaim olsem mi lukim em gen, na dispela i givim bel isi na amamas long mi!”

Taim yu krai sori, ating yu no inap kisim bel isi kwiktaim. Tasol ekspiriens bilong Vanessa inap strongim yu. Em i tok: “Yu inap ting olsem yu no inap daunim dispela krai sori, tasol isi isi bel bilong yu bai kamap orait.”

Filings yu gat long bel long misim wanpela i no inap pinis, tasol tingim, i gat risen long stap laip yet. Long rot bilong gutpela helpim God i givim, yu inap wok yet long enjoim gutpela pasin pren na laip bilong yu i gat as tru bilong en. Na klostu nau God bai kirapim bek ol man i dai pinis. Em i laik bai yu holimpasim gen ol manmeri yu laikim tru. Long dispela taim, dispela pen i stap long bel bilong yu bai kamap orait inap oltaim oltaim!